Россия президенти Владимир Путин АҚШдаги президент сайлови натижаси Дональд Трамп фойдасига ҳал бўлиши учун Москва томонидан амалга оширилган уринишлардан бохабар бўлган. Бу ҳақда АҚШ разведка хизматидаги манбалар Reuters агентлиги билан суҳбатда билдиришган. Улар бу уринишларни Путиннинг ўзи йўналтириб турган бўлиши ҳам мумкинлигини айтганлар.
Россиянинг Қўшма Штатларда 2020 йили бўлиб ўтган сайлов кампаниясига аралашганига оид хулосалар АҚШ миллий разведкаси директори офиси томонидан сешанба куни ёйинланган 15 саҳифали ҳисоботда акс этган. Ҳисоботга мувофиқ, Трамп тарафдорлари украиналик россияпараст сиёсий арбобларнинг Байден ҳақидаги танқидларини алқалаш орқали Москва “тегирмонига сув қуйган”.
Шунга қарамай, демократ Жо Байден Дональд Трамп устидан ғалаба қозониб, шу йил 20 январида АҚШ президенти лавозимини эгаллаган, дея қайд этадилар Reuters агентлиги ва The New York Times газетаси.
Ҳисобот муаллифлари Трамп иттифоқдошларининг Хитой Байден тарафида туриб, сайлов кампаниясига аралашганига оид иддаоларга ҳам муносабат билдирганлар. Пекин Америкадаги сайловга атайлаб аралашмай турган, деб ҳисоблайди разведка ҳамжамияти экспертлари.
АҚШ разведкаси таҳлилчилари мамлакатдаги президент сайловига Куба, Венесуэла ва Ливандаги “Ҳизбуллоҳ” жангари гуруҳи ҳам аралашишга урингани, аммо уларнинг имкониятлари Россия ва Эрон имкониятлари билан қиёслаб бўлмайдиган даражада суст бўлганини қайд этишган.