АҚШ Давлат котиби Энтони Блинкен ва ХХР раиси Си Цзиньпин 19 июнь куни Пекинда учрашишди. “Америка овози” хабарига кўра, музокаралар ярим соатча давом этган ва бу тадбир Блинкеннинг Хитойга икки кунлик сафарига якун ясаган.
Хитой раҳбарининг АҚШ Давлат котиби билан учрашиш-учрашмаслиги сўнгги дамгача номаълум бўлиб турган эди. АҚШ Давлат департаменти учрашув ўтказилишини фақат 19 июнь тонгига бориб тасдиқлаган.
Хитой лидери АҚШ Давлат департаменти раҳбари билан охирги марта 2018 йили учрашган. Ўшанда Давлат департаментига Жон Салливан раҳбарлик қилаётган эди.
Бугунги учрашув, “Америка овози” қайдича, жорий йилда АҚШ ва ХХР лидерлари саммити ўтказилишига туртки бўлиши мумкин.
“Иккала томон очиқ ва батафсил муҳокамаларни ўтказишди. Жаноб давлат котиби, ушбу ташриф шарофати билан сизнинг Хитой ва АҚШ ўртасидаги муносабатлар барқарорлашишига янада ижобийроқ ҳисса қўшасиз, дея умид қиламан”, деган Си Цзиньпин Энтони Блинкенга мурожаат қиларкан.
Ўз навбатида, Давлат департаменти раҳбари Вашингтон яхлит Хитой сиёсатини қўллаши ва Тайвань мустақиллигини тан олмаслигини қайд этган. “АҚШ янги совуқ урушга интилаётгани йўқ”, дея урғулаган Блинкен.
Давлат котиби 18 июнь куни Хитой ташқи ишлар вазири Цинь Ган билан учрашган, икки вазир музокаралари беш соатдан кўпроқ давом этганди. Давлат департаменти мулозимларидан бири мазкур учрашув якунлари бўйича журналистларга “иккала томон ўзаро тарангликни камайтириш уринишларини намойиш қилган”ини билдирган. Шу билан бирга, АҚШ вакилига кўра, Вашингтон ва Пекин ўртасида бир қатор масалалар бўйича теран ихтилофлар ҳали ҳам мавжуд. Мулозим бунга оид тафсилотларга тўхталган эмас.
Оммавий ахборот воситалари Блинкеннинг Пекинга сафарининг асосий вазифаси ўлароқ икки мамлакат ўртасидаги муносабатларидаги таранглик даражасини пасайтириш, савдо бўйича келишмовчиликларни юмшатиш ҳамда Россиянинг Украинага қарши уруши масаласини муҳокама қилиш кабиларни санашган.
Томонлар мазкур сафар чоғида конкрент қандай келишувларга эришганлари ҳозирча очиқланмаяпти.