“Вагнер” ХҲШ ёлланмаларининг Владимир Путин ҳокимиятига қарши мисли кўрилмаган ундови ортидан бошланган хаос ҳали охирига етмаган бўлиши ва беқарорлик яна узоқ вақтгача сақланиб қолиши мумкин. АҚШ давлат котиби Энтони Блинкен Россиядаги вагнерчилар исёни ҳақида ана шундай мулоҳаза билдирди.
Қатор телевидениеларга берган интервьюларида Блинкен Евгений Пригожин бошчилигидаги 23–24 июнь кунлари кузатилган исёнга олиб келган таранглик анчадан буён етилиб келганига эътибор қаратди.
“Мен Россия фасадида янада кўпроқ чатнашларни кўрдик, деб ўйлайман. Яқин ҳафта ва ойлар ичида Путин ҳал қилиши лозим бўлган кўплаб янги муаммолар бор”, деган АҚШ давлат котиби NBC News ёйинида.
Блинкен шу кундаги тартибсизликлар Москванинг Украинадаги имкониятларига таъсир қилиши мумкинлигини қайд этган.
“Украина ўзини ўзи мудофаа қилиши ва ҳудудларини қайтариб олиши учун унда барча зарур нарсалар борлигига амин бўлиш учун бизнинг диққат-эътиборимиз доимий равишда Украинага қаратилган”, дея таъкидлаган Блинкен.
ABC News билан суҳбатда АҚШ бош дипломати Кремлдаги муаммолар Киевга таховуздан ҳимояланиш учун ёрдам бериши мумкинлигини айтган.
Аввалроқ Украина мудофаа вазирининг ўринбосари Анна Маляр украиналик ҳарбийлар шанба куни Донецк вилоятида бирданига бир неча йўналиш бўйлаб ҳужум бошлашгани ҳақида ёзган эди.
“Барча йўналишлар бўйлаб олға силжиш бор”, дея иддао қилган Маляр бу ўринда гап Орехово-Васильевка, Бахмут, Богдановка, Ягодний, Клешчеевка, Курдюмовка каби аҳоли пунктлари ҳақида кетаётганини билдирган.
Бу орада Москва вакиллари ҳам фронтда илгарилаш борлигини иддао қилишмоқда. Россия Мудофаа вазирлиги якшанба куни ўз кучлари Украина Қуролли кучларининг Москва томонидан ишғол этилган ҳудудларидаги кўплаб контрҳужумларини даф этгани ҳақида баёнот тарқатган. Ҳисоботга мувофиқ, сўнгги 24 соат ичида Бахмут атрофида украиналик ҳарбийларнинг 10 та контрҳужумини қайтаришган.
Аввалроқ Ғарб нашрлари исми очиқланмаган манбалар маълумотига таянган ҳолда АҚШ разведкаси юқори лавозимли шахсларни “Вагнер” ХҲШ раҳбари Евгений Пригожиннинг Россия ҳарбий раҳбариятига қарши қуролли исён бошлаши мумкинлиги ҳақида хабардор қилганини ёзиб чиқишган.
Жумладан, Washington Post нашри разведка Пригожиннинг исён кўтаришга оид режаларини июнь ойи ўрталарида ўрганганини иддао қилган. Бу хабарлар жиддий қабул қилинган – америкалик таҳлилчилар Владимир Путин ҳокимиятни ўз қўлида сақлаб қолишига шубҳа қилишган ҳамда Россиядаги ядровий қуроллар тақдири юзасидан хавотир изҳор қилишган.