Малайзияга қарашли “Боинг” учоғининг (МН17 рейси) Донбасс осмонидаги ҳалокатига оид иш кўрилаётган Амстердам судида айирмачиларнинг музокаралари деб иддао қилинаётган янги аудиоқайдлар эшиттирилди.
Ёзувларда улар “Бук” зенит-ракета комплексини ўзлари назорат қилаётган ҳудуд доирасида бир жойдан бошқасига кўчириш масаласини муҳокама қилишган. Бу ҳақда Би-би-си хабар қилди.
Қайдлардан бирига мувофиқ, ҳалокат арафасида суҳбат қатнашчиларидан бири — Украинадан мустақиллигини эълон қилган “Донецк халқ республикаси” “разведка”си бошлиғи Сергей Дубинский “ДХР”га тегишли “Восток” батальони командири Александр Семёновга унинг аскарлари талафот беришаётганини, “Бук” ЗРК ниҳоятда зарурлигини айтган.
Бошқа ёзувга кўра, фожиадан бир неча соат олдин Дубинский ҳамда Россия армиясининг истеъфодаги зобити Олег Пулатов “Бук”ни Донецкдан Первомайское қишлоғига кўчириб келиш ҳақида гаплашишган.
Яна бир эпизод ҳам музокара мазмунида бўлиб, унда Дубинский “ДХР” айирмачилари вакили Леонид Харченкога “Бук”ни қандай транспортировка қилиш ва қўриқлаш бўйича кўрсатмалар берган.
Ёзиб олинган суҳбатлар 2014 йилнинг 16 ва 17 июль кунлари бўлиб ўтган. Тергов маълумотларига кўра, улар Украина хавфсизлик хизмати томонидан “тутиб қолиниб”, Халқаро тергов гуруҳига топширилган.
9 июндаги мажлисида суд илгари Снежное қишлоғидан қочиб кетган ва ҳозирда Россияда яшаётган икки гувоҳнинг кўрсатмаларини рад этган. Улар ракета украин ҳарбийлари жойлашган ҳудуддан — Амвросиевка аҳоли манзилгоҳи томондан отилганини кўришганини иддао қилганлар. Тергов гуруҳи мазкур ҳудуд учоқ радарларда кўринмай қолган нуқтадан ҳаддан зиёд олисдалигини таъкидлаган.
Айблов томони келтирган ўнлаб гувоҳлар эса бошқа координатларни айтишган. Уларга кўра, ракета “ДХР” назоратида бўлган Первомайское қишлоғидан йўлланган.
2014 йил 17 июлида ҳалокатга учраган Boeing 777-200ER бўйича суд жараёни 2020 йилнинг 7 июнида Ҳаага округ судида қайтадан бошланган. Лайнер Амстердам — Куала-Лумпур йўналишида парвоз қилаётганди. Учоқ бортидаги 298 кишининг барчаси ҳалок бўлган.
Айбланувчилар тўрт киши бўлиб, шундан уч нафари Россия фуқароларидир. Булар: ФХХнинг захирадаги полковниги Игорь Гиркин (Стрелков); БРБ (ГРУ)нинг захирадаги катта зобити Сергей Дубинский; захирадаги ҲДҚ подполковниги Олег Пулатов.
Тўртинчи айбланувчи — Украина фуқароси, Украинадан ўзини мустақил деб эълон қилган “Донецк Халқ Республикаси”га қарашли разведка бўлинмаси командири Леонид Харченко.
Россия Мудофаа вазирлиги ҳамда Кремль вакиллари Халқаро тергов гуруҳининг хулосаларини рад этиб келишмоқда.