Буюк Британия Ички ишлар вазирлиги 15 сентябрь куни Россиянинг “Вагнер” хусусий ҳарбий ширкатини тақиқланган ташкилотлар рўйхатига киритди ва террор ташкилоти, деб эълон қилди.
Вазирлик баёнотига кўра, мазкур иш мамлакат парламенти томонидан 6 сентябрь куни чиқарилган буйруқ асосида амалга оширилган.
Эндиликда ХҲШ фаолиятида иштирок этиш, унга мансублик ёки унинг фаолиятини дастаклаш жиноят бўлиб ҳисобланади ва бу жиноятни содир этганлар 14 йилгача озодликдан маҳрум этилишлари мумкин.
ИИВ қайдича, мазкур рўйхатга “Вагнер” ХҲШдан ташқари яна 78 та ташкилот киритилган.
Аввалроқ Британия Ички ишлар вазири Суэлла Браверман “Вагнер” гуруҳини “шафқатсиз ва бузғунчи” деб атаб, мазкур гуруҳ хорижда Владимир Путин бошчилик қилаётган Россиянинг “гурзигарони” ўлароқ ҳаракат қилаётганини қайд этган эди.
“Вагнер” ХҲШни террор ташкилотлари рўйхатига киритиш эҳтимоли Британияда сўнгги бир неча ойдан буён муҳокама этилаётганди. ХҲШни террор ташкилотлари рўйхатига киритиш унинг асосчиси Евгений Пригожин ва ширкатдаги қатор командирлар номаълум сабабларга кўра Россияда авиаҳалокатга учраб, ҳалок бўлганидан бир неча ҳафта ўтиб амалга ошди.
“Вагнер” ХҲШ ёлланмалари ўзлари юрган мамлакатларда, хусусан Украинада қатор жиноятларни содир этганликда бир неча бор айбланган.