Ғарбий Қозоғистон вилоятининг Бокейорда туман суди Украинадаги урушга боришдан бош тортиб Россиядаги ҳарбий қисмдан қочган ҳарбий Игор Санджиевни шартли равишда олти йиллик қамоқ жазосига ҳукм қилди ва уни мамлакатдан депортация қилиш тўғрисида қарор чиқарди. Унга Қозоғистонга кириш беш йилга тақиқланди.
Озодлик радиоси қозоқ хизматининг хабар беришича, Санджиев давлат чегарасини ноқонуний кесиб ўтишда айбдор деб топилди. Суд бир неча кун олдин қозоқ ҳукумати Санджиевга қочқинлик мақоми беришни рад этгани, унинг доимий яшаш жойи йўқлиги ва ишсизлигини ҳисобга олиб, мазкур қарорни чиқарган.
Тергов материалларига кўрса, Санджиев 2023 йилнинг 26 мартида Волгограддаги ҳарбий қисмдан қочган ва “дезертирлик учун жазоланишдан қочиб, Қозоғистон чегарасини ноқнуний равишда кесиб ўтган”.
Санджиев айбловни тан олди ва суддан уни депортация қилмасликни сўради. У суд қарори устидан юқори инстанцияга ариза киритишини билдирди. Санджиев судда Россиядан Украинадаги урушда қатнашмаслик мақсадида қочганини таъкидлади.
2023 йилнинг мартида Россиянинг Барнаул гарнизон ҳарбий суди Қозоғистондан депортация қилинган Федерал қўриқлаш хизмати майори Михаил Жилинни олти ярим йиллик қамоқ жазосига ҳукм қилган эди. У дезертирликда ва чегарани ноқонуний кесиб ўтишда айбдор деб топилган.
Қозоғистонда Украина урушидан қочган россиялик шартли равишда 6 йилга қамалди
Иллюстратив сурат.