Катта еттилик - G7 давлатлари ўртасида узоқ йиллардан бери муҳокама мавзуси бўлиб келган “рақамли солиқ” масаласида ўзаро муросага эришилди. Бу ҳақда 5 июнь куни Британия молия вазири Риши Сунак Лондонда G7 молия вазирлари билан ўтган учрашувдан сўнг маълум қилди.
Мазкур учрашувда қабул қилинган қарорга асосан, бундан буён Apple, Google, Amazon ва бошқа йирик IT-корпорацияларнинг фақат ўзларини рўйхатга олган давлатгагина солиқ тўлаш амалиёти бекор қилинади.
Эндиликда мазкур ширкатлар бевосита ўзлари фаолият юритаётган давлатларга ҳам солиқ тўлайди. Шу кунгача IT-корпорациялар ўз штаб-квартираларини солиқ оз тўланадиган мамлакатларга жойлаштириб келар эди.
Масалан, Microsoft ширкатининг Ирландиядаги филиали ўтган 1или 315 миллиард доллар даромад кўрган, аммо Ирландияга бир тийин солиқ тўламаган. Чунки мазкур ширкат штаб-квартираси Бермудда рўйхатга олинган.
Катта еттилик молия вазирлари йирик IT-корпорациялар ўзлари фаолият юритиб бевосита даромад олаётган мамлакатларга камида 15 фоиз солиқ тўлаши лозимлигини белгилаб қўйди.