Туркиянинг “Анталяспор” футбол клуби ўйинчиси бўлган Сагив Йехезкел қўлида “100 кун. 7/10” билакбанди борлиги учун жиноий жавобгарликка тортилди. Бу ҳақда Туркия адлия вазири Йилмаз Тунч маълум қилди.
Вазирга кўра, жиноят иши “оммавий равишда нафрат ва душманлик кайфиятини тарғиб қилиш” моддаси асосида қўзғатилган.
28 ёшли футболчи “Трабзонспром” жамоаси билан ўйинда урган голини нишонлар экан, “100 кун. 7/10” деган ёзув ифода этилган билакбандини жамоатчиликка намойиш этган.
Билакбанддаги бу ёзув АҚШ ва ЕИ томонидан террорчи ташкилот сифатида билинадиган ҲАМАСга қарши бошланган уруш юз кун аввал бошланганини англатади.
Туркия адлия вазири Тунчнинг айтишича, Сагив Йехезкел “100 кун. 7/10” деган рақамлар ёзилган билакбандини жамоатчиликка кўрсатиш орқали “Исроилнинг Ғазодаги қатлиомини” дастаклаган.
Ғазода ҲАМАСга қарши уруш бошланганидан сўнг Туркия президенти Эрдўғон Исроилни “террорчи давлат” сифатида тақдим этган эди.
“Анталяспор” клуби “Туркия қадриятларига зид ҳаракат қилгани учун” Йехезкел билан шартномани бекор қилгани ҳақида билдирди. Туркия Футбол федерацияси ҳам “футболчининг қабул қилиб бўлмайдиган ҳаракати”ни қоралади.
14 январь куни ҲАМАС Исроил жанубига ҳужум қилганига юз кун бўлди. Ўтган йилнинг 7 октябрида ҲАМАС ҳужумидан 1200 киши ҳалок бўлган. ҲАМАС камида 200 кишини, жумладан, болаларни гаровга олган. Улардан 105 нафари Исроил ва ҲАМАС ўртасидаги вақтинчалик оташкесим келишувига асосан озод қилинган. Исроил ҳозирла яна 136 киши ҲАМАС гаровида қолаётганини билдирган. Уларнинг тақдири номаълум.
ҲАМАС назорати остидаги Ғазо Соғлиқни сақлаш вазирлиги Исроил ҳужумлари оқибатида 23 минг фаластинлик ҳалок бўлганини билдирди. Уларнинг асосий қисми аёллар ва болалардир. Мустақил манбалардан бу маълумотни тасдиқлатиш имконияти мавжуд эмас.
Туркияда исроиллик футболчи “100 кун. 7/10” билакбанди учун ҳибс қилинди
Сагив Йехезкел қўлида “100 кун. 7/10” билакбанди борлиги учун жиноий жавобгарликка тортилди.