Туркиянинг Истанбул шаҳрида тиланчига меҳнат қилиш кераклиги ҳақида танбеҳ берган ўзбекистонлик муҳожир Бурҳонжон Олчинов пичоқлаб ўлдирилди.
Hurriyet нашри хабарига кўра, ҳодиса Истанбулнинг Малтепе мавзеи Меъмор Синон кўчасида ўтган ҳафта рўй берган.
Айтилишича, тиланчилик қилиб кун кечирадиган Бедир Г. спиртли ичимлик учун дўконга келган. У ерда курьерлик билан шуғулланувчи 31 ёшли Бурҳонжон Бедирга: “Мен юртимдан келиб, бу ерда ишлаяпман. Сен келиб, бу ерда мендан пул сўраяпсан, уялмайсанми? Бор, ишла”, деган.
Бу гапдан кейин чиққан тортишув жанжалга айланган. Ур-сурда Бедир Г. Олчиновни пичоқ билан кўксидан яралаган. Можаро кузатув камераси ёзувларида акс этган.
Ҳодисадан сўнг касалхонага етказилган Бурҳонжон Олчинов врачлар саъй-ҳаракатига қарамай, оламдан ўтган. Полиция вакиллари ўртоғининг уйида яшаётган Бедир Г.ни бир неча соатдан сўнг Малтепеда қўлга олган. Полиция бўлимида ҳужжатлар расмийлаштирилганидан кейин гумонланувчининг иши судга оширилган.