Буюк Британия ва Кимёвий қуролларни тақиқлаш ташкилотига (КҚТТ) аъзо яна 44 давлат 5 октябрь куни КҚТТ техник котибияти орқали Россияга мухолифатчи Алексей Навальнийнинг заҳарланиши бўйича суриштирувга оид расмий саволлар билан мурожаат қилди. КҚТТ қоидаларига кўра, жавоб бериш учун россиялик расмийларда 10 кун вақти бор.
Саволлар тўртта бўлиб, ташкилот сайтида эълон қилинган.
Full text of the @UK_OPCW sponsored clarification request to Russia regarding the August 20, 2020 Novichok poisoning of Alexie Navalny under Article IX of the CWC has been published.https://t.co/z2hJHDTFqB
— Gregory Koblentz (@gregkoblentz) October 5, 2021
Россия расмийларидан 2020 йил 20 августда мамлакат ҳудудида кимёвий қуролдан фойдаланилганлиги муносабати билан қандай чоралар кўрилганини батафсил баён қилиш сўралган – сўровда таъкидланишича, Россиянинг мажбуриятлари бор, хусусан, у кимёвий қуролларни тақиқлаш тўғрисидаги конвенцияни бузилишига алоқадор шахсларни жазолаши лозим.
Россиядан ушбу чоралар натижасини маълум қилиш, шунингдек, КҚТТнинг Навальний “Новичок” гуруҳига мансуб модда билан заҳарлангани ҳақидаги хулосасига изоҳ бериш сўралган.
Бундан ташқари, Россия мухолифатчининг заҳарланиши бўйича кейинги қадамларини маълум қилиши керак.
Сўнгги савол Россиянинг КҚТТ билан ҳамкорлигига оид бўлиб, бунда, жумладан, ташкилот экспертларининг Россияга ташрифи ҳақида сўз боради – иддао қилинишича, Москва экспертлар келишига тўсқинлик қилмоқда.
Россиянинг жавоблари сўров муаллифларини (улар орасида АҚШ ва ЕИ давлатлари бор) қониқтирмаган тақдирда, улар Россия ҳукуматидан маълумот олишга эришиш учун белгиланган тартиб-таомилларга кўра ҳаракат қилиши, ҳатто Навальний заҳарланиши масаласида КҚТТнинг махсус сессиясини ўтказиши мумкин.
Навальний заҳарланганини рад этиб келаётган Россия ҳукумати сўровга ўз муносабатини билдирганича йўқ.