Марказий Африка Республикасида 27 май куни автомобиль портловчи қурилмани босиши натижасида 3 нафар россиялик инструктор ва маҳаллий полициячилардан икки нафари ҳалок бўлган. Яна бир неча киши тан жароҳати олган. Бу ҳақда 30 май куни AFP ахборот агентлиги мамлакат ҳукуматидаги манбаларига таянган ҳолда хабар қилди.
Маълумотни агентликнинг БМТдаги манбалари ҳам тасдиқлаган.
Воқеа МАР пойтахти Банги шаҳридан 400 км нарида, катта йўлнинг Бербати ва Буар шаҳарлари оралиғидаги қисмида юз берган. У ерга, ҳалок бўлган ва жароҳатланганларни эакуация қилиш мақсадида, Россия вертолёти жўнатилган.
AFP қайдича, Россия Африканинг ушбу қашшоқ мамлакатида сезиларли таъсирга эга бўлиб, МАР армияси ҳарбий хизматчиларига таълим берувчи кўп миқдордаги “инструкторлар” контингентини сақлайди. Ўтган йили бу контингент Россиядаги ярим ҳарбий тузилмаларнинг юзлаб хизматчилари билан тўлдирилган эди. Улар Раунда армияси билан биргаликда исёнчиларга қарши кураш олиб бораётган президент Фостен Арканжа Тоуадерни дастаклашда муҳим роль ўйнайди.
МАР ҳукумати Россия билан икки томонлама шартномаларда унинг фуқароларини “ҳарбий хизматчилар” деб атаган, бироқ кейинроқ Москва тузатиш киритиб, МАРда жанг қилаётган фуқароларини “инстукторлар” деб атаган эди.
Воқеаларнинг кўп сонли шоҳидлари ҳамда ноҳукумат ташкилотлар вакиллари “инструкторлар” — бу “Вагнер гуруҳи” деб аталувчи норасмий ҳарбий ширкатнинг ёлланма ходимлари бўлиб, улар Руанда махсус аскарлари ва БМТ тинчликпарвар кучлари билан бирга Марказий Африкадаги исёнчиларга қарши жангларда фаол иштирок этишини иддао қиладилар.
Қарийб 5 миллион аҳоли яшайдиган Марказий Африка Республикасида етти йилдан бери президент тарафдорлари билан 2013 йилда ҳукуматни ағдарган қуролли отрядлар ўртасида уруш давом этмоқда.