Россия пойтахти Москвада журналистлар 8 сентябрь куни Адлия вазирлиги биноси олдида “хорижий агентлар” тўғрисидаги қонунга қарши бир кишилик пикетга чиқди.
Озодлик радиоси рус хизмати хабарига кўра, пикет ўтказган тўрт кишидан уч нафари, жумладан, “Важние истории” нашрининг жисмоний шахс сифатида “хорижий агент” деб топилган журналистлари – Алеся Мароховская ва Ирина Долининалар қўлга олинган.
Улар “хорижий агент”ларнинг мақолалари, ижтимоий тармоқлардаги хабар ва изоҳларига илова қилиниши шарт бўлган эслатмадан иқтибослар келтирилган плакатларни кўтариб олишган эди.
В Москве в эти минуты проходят пикеты в защиту свободы слова, против закона об "иностранных агентах". Уже есть задержанные. https://t.co/s3NDdeivuO pic.twitter.com/gNn18MMb5c
— Радио Свобода (@SvobodaRadio) September 8, 2021
Қўлга олинган учинчи журналист – Полина Ужвак “Муҳим воқеалар ўзини ўзи сўзлаб бера олмайди” деб ёзилган плакат билан иштирок этган.
Аввалроқ полициячилар пикет иштирокчиларининг ҳужжатларини текширган, дея хабар қилган “Меадиазона”.
“ОВД-Инфо” маълумотига кўра, пикетчилар “Якиманка” полиция бўлинмасига олиб кетилган. Улар рухсат этилмаган акцияда иштирок этишда айбланиши айтилмоқда.
8 сентябрь – Халқаро журналистлар бирдамлиги куни эди. Шу муносабат билан Россия оммавий ахборот воситалари “Хорижий агентлар йўқ, журналистлар бор” номли акцияни бошлади. Акцияни 40 дан ортиқ нашр, жумладан “хорижий агент” ОАВлар рўйхатига киритилган “Дождь” телеканали, “Медуза”, “Важние истории”, шунингдек “The Bell”, “Медиазона”, “Republic”, “Новая газета” ва бошқалар қўллаб-қувватлади.
“Хорижий агент ОАВ” тушунчаси Россия қонунчилигида 2017 йилда пайдо бўлган, ўшанда Озодлик радиоси ва унинг минтақавий лойиҳалари биринчилардан бўлиб ушбу реестрга киритилган эди.
Озод Европа/Озодлик радиоси корпорацияси Россия ҳукуматининг бу қарорига рози бўлмаган. Медиаширкат “хорижий агентлар” тўғрисидаги қонунчиликнинг татбиқ этилиши устидан Инсон ҳуқуқлари бўйича Европа судига шикоят киритган.