НАТО сиёсий қарорларини қабул қилувчи асосий орган бўлган Шимолий Атлантика кенгаши 23 май куни Афинадан Вильнюсга учиб кетаётган Ryanair авиаширкати учоғининг Минскда мажбуран қўндирилишини қатъиян қоралади. НАТО вакиллари беларуслик фаол Роман Протасевичнинг қўлга олинишини “сиёсий ўзгача фикрлилик ва матбуот эркинлиги тамойилларига тажовуз” ўлароқ баҳолаганлар.
НАТОга аъзо давлатлар Беларусни Роман Протасевич ва унинг ҳамроҳи София Сапегани зудлик билан ва ҳеч бир эътирозсиз озод қилишга чақирган.
“Бу йўл қўйиб бўлмас ҳодиса фуқаро авиацияси фаолиятини тартибга солувчи меъёрларни жиддий равишда бузди ҳамда йўловчилар ва экипаж аъзолари ҳаётини хавф остига қўйди”, дейилган НАТО матбуот хизмати томонидан 26 май куни ёйинланган баёнотда.
Шимолий Атлантика иттифоқи мазкур ҳодиса тезлик билан ва мустақил равишда суриштирилишини дастаклаган ҳамда иттифоқчилар томонидан бу инцидентга жавобан якка тартибда ва жамоа бўлиб қабул қилинган чораларни олқишлаган.
НАТО баёнотида латвиялик дипломатларнинг Беларусдан “асоссиз” бадарға қилиниши юзасидан ташкилотнинг Латвия билан бирдамлиги ҳам билдирилган.