Адабиёт бўйича 2023 йилги Нобел мукофоти “новаторча пьесалар ва насрий асарлар ёзгани учун” норвегиялик Юн Фоссега берилди.
1959 йилда туғилган Юн Фоссе биринчи навбатда драматург сифатида танилган. Унинг қаламига мансуб пьесалар жаҳоннинг кўплаб театрларида саҳаналаштирилган.
Фоссенинг «Қизил, қора» деб номланган илк романи 1983 йилда чоп қилинган. Фоссе кўплаб адабий мукофотларнинг лауреатидир.
Нобел қўмитаси 2 октябрдан бошлаб мукофотга сазовор бўлганлар номларини эълон қила бошлади.
2 октябрда Физиология ва тиббиёт бўйича 2023 йилги Нобел мукофоти COVID-19 га қарши самарали мРНК вакциналар яратилишига туртки бўлган нуклеозид асосларнинг модификациясини кашф қилган олимлар - венгриялик тадқиқотчи Каталин Карико ва АҚШнинг Пенсильвания университетида ишловчи биохимик Дрю Вайсманга берилганди.
3 октябрда Физика бўйича 2023 йилги Нобел мукофоти моддада электронлар динамикасини ўрганишнинг экспериментал методлари учун берилди. Унга америкалик Пьер Агостини, германиялик Ференц Крауш ва швециялик Анн Л'Улье сазовор деб топилди.
4 октябрда кимё бўйича мукофот америкалик олимлар Мунги Бавенди, Луис Брюс ва Алексей Екимовларга берилди. Улар квант нуқталари деб аталувчи моддани кашф қилган.
6 октябрь куни Нобел Тинчлик мукофоти лауреати эълон қилинади.
Нобел мукофоти лауреатларига олтин медаль, диплом ва пул мукофоти топширилади. Жорий йилда пул мукофоти миқдори 11 миллион швед крони, яъни 994 минг АҚШ долларини ташкил қилмоқда.
