Владимир Путин ва Александр Лукашенко 4 ноябрь куни Россия ва Беларусь Иттифоқ давлати олий кенгашининг онлайн йиғилиши чоғида “Иттифоқ давлати интеграция декрети”ни имзолашди.
РИА Новости хабарига кўра, мазкур ҳужжат билан сентябрь ойида маъқулланган асосан иқтисодий интеграция соҳасига доир 28 та иттифоқ дастури тасдиқланган.
Бундан ташқари, Россия ва Беларусь раҳбарлари қўшма ҳарбий доктринани ҳам тасдиқлашган.
Ҳужжат Россиядаги давлат байрами – Халқ бирлиги кунида имзоланган. Имзолаш чоғида Путин аннексия қилинган Севастополь шаҳрида бўлган.
Россия президенти ўз нутқида Москва ҳамда Минск “ички ишларга ҳар қандай аралашувларга қарши биргаликда курашиш ниятида” эканини, шунингдек “қардош беларус халқига кўмаклашишда давом этиши”ни билдирган. Путин Беларусь Россия учун “биродар республика” эканлигини урғулаган.
Лукашенко ўз сўзида Россиядаги “айрим телеграм-каналлар” ҳужжат имзоланишига шубҳа қилганини айтган. “Бугун бутун Олий давлат кенгаши билан бу саволга жавоб бермоқдамиз”, деган у.
Интеграцияни чуқурлаштириш бўйича музокаралар Лукашенко Беларусда ўтган йили ёз ва кузда ўзига қарши бошланган оммавий норозиликни бостирганидан сўнг якуний паллага кирган эди. Беларусь мухолифати вакиллари Лукашенко Москвадан дастак олиш учун ўз мамлакати суверенитетидан воз кечиши мумкинлигидан хавфсирамоқда.
Иттифоқ дастурларига сиёсий интеграция билан боғлиқ ташаббуслар кирган эмас.