Қозоғистоннинг Олмаота шаҳрида шоир ва диссидент Арон Эдигеев (адабий тахаллуси – Арон Атабек) 68 ёшида вафот этди. Бу ҳақда Озодликнинг қозоқ хизматига шоирнинг синглиси Розия Нутушева маълум қилган. Унинг айтишича, Атабек 24 октябрь куни шаҳар касалхоналаридан бирида ҳаётдан кўз юмган.
Диссидент 20 октябрь куни коронавирусли зотилжамга чалингани ортидан соғлиғи кескин ёмонлашгани муносабати билан касалхонанинг жонлантириш бўлимига ётқизилган эди. Кейинроқ у комага тушган ва сунъий нафас бериш аппаратига уланган.
Атабекнинг соғлиғига оид сўнгги маълумот 11 ноябрь куни берилган. Ўшанда шоирнинг аҳволи оғирлигича қолаётгани айтилган.
У умрининг сўнгги 15 йилини “Шанирақ иши” бўйича қамоқда ўтказган (ўзига қўйилган айбловни мутлақо тан олган эмас). Атабекка жами 18 йиллик қамоқ муддати тайинланган.
Шу йил 1 октябрида у “соғлиғи ёмонлашгани муносабати билан” суд қарорига кўра қамоқдан чиқарилиб, муддатнинг ўталган қисми бир йилга озодликни чеклаш ва пробация назоратига алмаштирилган.
Атабекнинг ўз сўзига кўра, у соғлиғини қамоқда – калтаклаш ва қийноқлар, оғир шарт-шароит оқибатида йўқотган.
“Оммавий тартибсизликлар ташкил қилиш” айбловини Атабек на судгача, на суддан кейин тан олган. Шу боис муддатидан олдин шартли озод қилишларини ёки жазони ўзгартиришни ҳам сўрамаган ва фақатгина тўлиқ оқланганидан сўнг ёки муддатини охиригача ўтагач, озодликка чиқишини айтган.
Озодликка берган интервьюсида у “мени ўлишим учун қўйиб юборишди”, деган эди.
Инсон ҳақлари ташкилотлари Атабекни сиёсий маҳкум деб топишган ва кўп йиллардан бери унинг озод этилишини талаб қилганлар. 2010 йилда шоир “Тутқундаги ижодкор” (Imprisoned аrtist) номинациясида Freedom to Create халқаро мукофотига сазовор бўлган эди.