Калуга вилоятида Россия армияси билан шартномани имзоламаган мигрантларга фуқаролик беришдан бош тортилмоқда. Бу ҳақда ҳуқуқ фаоллари билдирмоқда.
Озодлик радиоси рус хизматининг ёзишича, ҳуқуқ фаоли Татьяна Котляр "7х7" нашрига бу каби бешта ҳолат ҳақида гапириб берган.
Тожикистонлик мигрант "7х7" нашрига Россия фуқаролигини олиш учун армия билан шартнома имзолашга мажбур қилингани ҳақида айтган. Уни расмийлар фуқаролик учун ҳужжатларни қабул қилишдан олдин военкоматга жўнатишган ва ҳарбий шартномани имзолашни талаб этишган.
Тожикистонлик мигрант беш болали бўлгани учун военкомат у билан шартнома тузишдан бош тортган. Оқибатда мигрантдан фуқаролик учун ҳужжат қабул қилинмаган. Нашр мана шунга ўхшаш яна бир қатор воқеалар тўғрисида ёзган.
Россия қонунчилигида фуқаролик олиш учун армия билан шартнома тузиш талаб қилинмайди.
2023 йилнинг ёзидан бери Россия шаҳарларида мигрантларга қарши рейдлар ўтказиб келинмоқда. Бундан аввал эса Россиянинг йирик шаҳарларида мигрантларни Украинадаги урушда иштирок этишга тарғиб қилган эълонлар ва варақалар пайдо бўлган эди.
Май ойида президент Владимир Путин “махсус ҳарбий амалиёт” (Москва расмийлари ва ташвиқотчилар Украинадаги урушни шундай аташади) даврида Россия армиясида ёки ҳарбий бўлинмаларида хизмат ўташ учун бир йиллик шартнома имзолаган чет элликларни Россия фуқаролигига қабул қилишни осонлаштиришни кўзда тутган фармонни имзолаган эди.
Ўзбекистон расмийлари Россиядаги ўзбек муҳожирларини Украинадаги урушда иштирок этганлар жиноий жавобгарликка тортилиши мумкинлиги тўғрисида бир неча бор огоҳлантирган. Шу билан бирга, Россия қамоқхоналарида жазо ўтаётган ўзбекистонликлар ва Марказий Осиёнинг бошқа мамлакатларидан бўлган маҳкумлар урушга ёлланаётгани ҳақида маълумотлар пайдо бўлган эди.
