Украинада яраланган кўплаб россиялик ҳарбий Шимолий Кореяда даволаниб, реабилитациядан ўтмоқда. Бу ҳақда Россиянинг КХДРдаги элчиси Александр Мацегора “Российская газета”га берган интервьюсида билдирган. Элчига кўра, улар Шимолий Кореядаги энг яхши касалхона ва оромгоҳларда бепул муолажа олишяпти. Мацегора КХДРда даволанаётган россияликлар сони “юзлаб” эканини айтган.
“Биз [шимолий кореялик] дўстларимизга харажатларнинг ҳеч бўлмагандан бир қисмини қоплашни таклиф қилганимизда, улар бундан астойдил хафа бўлишди ва бундан кейин ҳеч қачон бундай қилмасликни сўрашди”, деган элчи.
Дипломат Шимолий Кореяда Украинада ҳалок бўлган россиялик ҳарбийларнинг фарзандлари ҳам бепул дам олишаётганини, ОТМлар ўртасида талаба алмашуви ривожланаётгани ҳамда Россия Шимолий Кореяга кўмир, озиқ-овқат ва дори-дармон етказиб бераётганини қўшимча қилган.
2024 йил ноябрида Россия билан Шимолий Корея ҳар томонлама стратегик ҳамкорлик тўғрисидаги шартномани ратификация қилганди. Унда савдо-сотиқ, илмий-техник ва мудофаа ҳамкорлигини ривожлантиришга оид ниятлар баён қилинган, бироқ ҳужжатда россиялик ярадорларни даволаш режалари ҳақида айтилган эмас.
Ўтган йил кузидан Шимолий Корея қўшинлари Россиянинг Украина билан урушида иштирок этаётгани ва улар, хусусан, Россиянинг Курск вилоятига жойлаштирилгани тўғрисида хорижий разведкаларнинг кўплаб хабарлари чиқа бошлаган. Бундай ҳарбийларнинг бир қанчаси Украина Қуролли кучлари томонидан асирга олинган.
Кейинроқ улар Курск вилоятида сезиларли даражада талафотлар беришгани, шу сабабли жанггоҳ ҳудудидан олиб чиқиб кетилиши мумкинлиги ҳақида хабар қилинган. Россия президенти Владимир Путин журналистларнинг шимолий кореялик ҳарбийлар жанговар ҳаракатларда иштирок этаётганига оид саволларига мужмал жавоб берган.