Ўзбекистон президенти Шавкат Мирзиёев Самарқанд вилоятига ташрифи давомида 18 октябр куни Қорадарё устидан ўтувчи кўприк қурилиши жараёни билан танишди. Бу кўприк “Ширин” массивини Самарқанд шаҳри ҳамда халқаро аэропорт билан боғлайди.
“Ўзбекистон 24” давлат телеканали олиб берган репортажда президент ва расмийлар бу кўприкнинг стратегик аҳамияти ҳақида гапирдилар, қурувчилар шаънига мақтовли гаплар айтдилар.
Аммо шу кўприкни қураётган ишчилар шу куни Озодликка мурожаат қилиб, уларнинг маошлари тўлиқ берилмаётгани, касаллик варақалари ва таътилларга йиллаб пул тўланмаётганидан шикоят қилди.
Кўприкни «Ўзбекистон темир йўллари» аксиядорлик жамиятининг “Кўприкқурилиш АЖ” тизимидаги 67-Кўприкқурилиш отряди қурмоқда.
Президент армони сифатида таърифлаган бу кўприкнинг лойиҳа қиймати 310 миллиард сўмни ташкил этади. Унинг 780 метр, кенглиги 29,8 метр, баландлиги эса 12 метр. Қатнов қисми 4 тасма, кунига 25 мингтагача транспорт воситасини ўтказиш қувватига эга бўлади.
Президент сайтида берилган хабарга кўра, кўприк фойдаланишга топширилгач, Ширин шаҳарчасидан марказгача бўлган масофа 23 километрдан 4 километрга, йўлга кетадиган вақт эса 30 дақиқага қисқаради.
Аммо Президентга тақдим этилган кўприк ортида иш ҳақини кутаётган ишчилар ҳам бор.
Браузерингиз HTML5 ни қўллаб- қувватламайди
“Кўприкқурилиш АЖ” тизимидаги 67-Кўприкқурилиш отряди ишчилари маош берилмаётганидан норозилик билдирмоқда.
Озодликка мурожаат қилган, ўзларини Тошкентдаги «Кўприк қурилиш АЖ»нинг 67-отряди ишчилари деб таништирган қурувчилар Самарқанддаги Қорадарё устига қурилган кўприкда меҳнат қилганини айтмоқда:
“Президентимиз кўприкни кўриб хурсанд бўлди, лекин бу меҳнатнинг ортида қанча-қанча ишчилар маошсиз қолаётганини билармикин? Биз “Кўприк қурилиш трести”нинг 67-отряди ишчиларимиз. Отрядимизда 380 нафар ишчи бор. 2025 йил декабрь ойидан буён таътил пули, касаллик варақаси бўйича тўловлар ва ҳисоб-китоб пулларини ололмаяпмиз. Август ойлиги ҳам берилмаган. Июль ойлигини эса ҳамма олгани йўқ. Кўп марта сўраймиз. “Пул йўқ, берамиз”, дейишади. Лекин муаммо ҳал бўлмаяпти. Ишчилар қийналиб қолдик".
Озодлик қурувчилар билан боғланиб, улардан интервью олди. Қурувчилар хавфсизлик сабаб исмларини очиқлашни истамади.
Уларнинг айтишича, қурилиш бошланганидан буён иш ҳақларини ўз вақтида бермаслик одатий ҳолга айланган.
2026 йил бошида ишчилар Озодликнинг “Сиздан Телеграм” каналига мурожаат қилиб маошлар берилмаётганидан шкиоят қилган эди:
Исми сир қолишини сўраган бошқа бир ишчининг айтишича, бу хабардан сўнг 2025 йил декабр маоши ташлаб берилган, лекин 2026 йилда ҳам бу ҳолат узлуксиз давом этган.
Мурожаатчилар маош талаб қилиб икки марта ишлашдан бош тортганини айтмоқда. Уларнинг баёнига кўра, 13 октябрда 180 нафар ишчи Самарқанд ҳокимлиги томон пиёда йўлга чиққан:
“13 октябрь куни йиғилиб, “Ойлигимизни беринг, ишламаймиз”, дедик. Жами икки марта норозилик билдирдик. 180 нафар ишчи Самарқанд ҳокимлиги томон пиёда юрдик. Ярим йўлда ишхонамиз директори Зафар Маҳаматов бизни қайтариб олиб келди. “Ойликларингизни тушириб бераман”, деди. Шундан кейин бизга июль ойлиги тушди. Лекин биз вахта усулида ишлаймиз. Иккинчи вахтадаги ишчилар энди ишга борди, улар июль ойлигини ҳали ҳам олгани йўқ. Август ойлигини эса ҳеч ким олмади”.
Ишчиларнинг шикоятига кўра, август ойи маоши тўланмаган, июль ойи иш ҳақини эса ишчиларнинг бир қисмигина олган. Таътил, касаллик варақаси ва якуний ҳисоб-китоб бўйича тўловлар бир йилдан буён кечикмоқда.
Ишчиларнинг айтишича, маошнинг кечикиши уларнинг кундалик турмушига таъсир қилмоқда. Рўзғор харажатлари ва коммунал тўловлар учун қарз олишга мажбур бўлаётганлар бор.
Озодлик 67-кўприк қурилиши отрядининг раҳбари Равшан Аҳмедовнинг Телеграм каналига ишчиларнинг иддаоларига муносабат сўраб мурожжат қилди. Равшан Аҳмедов мурожаатни ўқиди, лекин жавоб бермади.
Озодлик “Кўприкқурилиш АЖ” раиси Зафар Махаматов номига ишчилар иддаоларига оид саволлар битилган мактуб юборди. Аммо ҳозирча жавол олинмади. Жавоб келиши билан Озодлик уни нашр этишга тайёр.
Озодликка мурожаат қилган қурувчилар бажарилган ишлар учун ҳақини тўлиқ олишни талаб қилмоқда.
Ишчиларнинг айтишича, президентга кўрсатилган кўприкнинг очилиши қурилиш натижаси бўлса, уни қурган ишчилар билан ўз вақтида ҳисоб-китоб қилиш ҳам шу ишнинг ажралмас қисми бўлиши керак.
“Кўприкқурилиш АЖ” ишчиларининг маошлари кечиктирилаётгани ва ўз вақтида берилмаётгани биринчи марта кузатилаётгани йўқ.
Корхонанининг 13-кўприкқурилиш отряди ишчилари 2021 йил бошидан бери ойлик маошлари вақтида берилмаётганидан шикоят қилиб, 10 март куни иш ташлагани ҳақида Озодлик хабар берган эди.
Cамарқанд шаҳри Рудакий ва Бўстонсарой кўчалари чорраҳасида барпо этилган ва 2021 йилнинг 31 декабрь куни тантанали равишда очилган туннелни биринчи ёмғирдаёқ сув босган эди.
Туннель лойиҳа босқичида 67,7 миллиард сўм этиб белгиланган бўлса-да, маҳаллий солиқ тўловчиларга икки баравар қимматга тушган. “Ўзбекистон темир йўллари” акциядорлик жамиятига қарашли “Кўприкқурилиш” трести уни 143 миллиард сўмга кўриб битқазган эди.
Лойиҳа пудратчиси экани айтилган “Ўзбекистон темир йўллари” АЖ бундан аввал 2020 йил майида ўпирилган Сардоба сув омборидаги техноген ҳалокат, 2019 йил декабрида Тошкент метрополитени Юнусобод йўналишининг қурилаётган қисмидаги фожиа ҳамда Тошкент ер усти метросидаги кўплаб носозликлар учун танқид қилинган.