Толибон тузган ҳукуматда ички ишлар вазири вазифасини бажарувчи, энг катта террорчилардан бири сифатида халқаро қидирувга берилган Сирожиддин Ҳаққоний худкушларни алқаб, уларнинг қариндошларига пул ва ер ваъда қилди.
Қўшма Штатлар томонидан террорчилар рўйхатига киритилган “Ҳаққоний тармоғи” гуруҳи етакчиси бўлмиш Сирожиддин Ҳаққонийнинг боши учун 10 миллион доллар мукофот ваъда қилинган.
18 октябрь куни Ҳаққоний Кобулдаги Intercontinental меҳмонхонасида бир неча террорчининг яқинлари билан учрашди, дея хабар қилган ИИВ вакили Саид Хустий.
Хустий ва Толибон тарафдорларининг Twitter’даги аккаунтларида Ҳаққоний дея тахмин қилинаётган кишининг учрашувда одамлар билан қучоқлашиб кўришаётгани акс этмиш фотосуратлар эълон қилинган. Суратларда унинг юзи хиралаштирилган ёки кадрга орқа ўгирган ҳолда тушган.
Баёнотда Ҳаққоний худкуш террорчилар оилаларини олқишлаб, ҳалок бўлганларнинг хотирасига ҳурмат бажо келтиргани айтилган.
Афғонистоннинг RTA давлат телеканали Ҳаққоний ҳар бир оилага 125 доллардан пул ва томорқа беришни ваъда қилгани ҳақида хабар берган.
Толибонга алоқадор “Ҳаққоний тармоғи” жанговар гуруҳи АҚШ етакчилигидаги халқаро коалиция кучларига ва август ойида толиблар Кобулни эгаллаб олгани ортидан ағдарилган афғон ҳукуматига қарши ҳужумлар уюштириб, кўплаб ҳарбийларни ўлдирганликда айбланади.