Украина Россия ҳарбий тажовузини даф қилиш учун АҚШдан янги турдаги қурол-аслаҳалар, жумладан THAAD ракетага қарши мажмуалари, F/A-18 “Хорнет” қирувчилари, Apache ва Black Hawk вертолётларини сўради. Бу ҳақда Reuters агентлиги ўзи мазмуни билан танишган ҳужжатга таянган ҳолда хабар қилди.
Украина Мудофаа вазирлиги вакиллари қурол-аслаҳалар рўйхатини мудофаа саноати масалалари бўйича 6 декабрь куни Вашингтонда ёпиқ мажлис чоғида тақдим этишган. Бу йиғилишда америкалик мулозимлар ва АҚШ ҳарбий саноати етакчилари қатнашишган.
Агентлик манбалари маълумотига кўра, рўйхатга ҳозирда Украина Қуролли кучлари тасарруфида бўлган Abrams танклари, 155 миллиметрли тўплар, дронлар ва узоқ масофага учадиган ATACMS ракеталари ҳам киритилган. Сўралаётган ёрдам рўйхатида Boeing ширкати томонидан ишлаб чиқарилаётган C-17 Globemaster ва Lockheed Martin томонидан ишлаб чиқарилаётган C-130 Super Hercules учоқлари ҳам бор.
Олтинчи декабрь оқшомида АҚШ Сенати, президент Жо Байден чақириғига қарамай, Украина ва Исроилга ҳарбий ёрдам ҳамда Ғазо сектори аҳолисига гуманитар ёрдамни молиялаштиришга оид қонун лойиҳасини ўтказмаган.
АҚШ президенти Вашингтон Россия президенти Владимир Путиннинг Украинада ғалаба қозонишига йўл қўёлмаслигини билдирган. Байденнинг ишонишича, Россия ғалаба қилган тақдирда, у Украина билан чекланиб қолмай, бошқа мамлакатларга ҳам ҳужум қилиши мумкин. АҚШ президентига кўра, Киевга ёрдамни имиллаб мувофиқлаштиришга йўл қўйиб бўлмайди. АҚШ қарори бўлмаса, Украинага бошқа иттифоқчилар – Европа мамлакатлари, Япония ва бошқа ҳамкорлар қўллови ҳам савол остида қолиши мумкин, дея урғулаган Байден.
Аввалроқ Вашингтон Киевга 175 миллион долларлик галдаги ёрдам пакетини ажратган эди. Мазкур пакетга HIMARS ва ҳаводан мудофаа тизими учун ўқ-дорилар, артиллерия снарядлари, танкка қарши қурол-аслаҳалар ва бошқалар киритилган. Бу орада АҚШ Давлат котиби Энтони Блинкен, президент Байденнинг қўшимча молиялаштиришга оид талабномаси маъқулланмаган тақдирда, бу ёрдам пакети «охиргилардан бири» бўлиши мумкинлиги ҳақида огоҳлантирган.