Virgin Galactic компанияси ўзининг ракета-кемасини муваффақиятли тарзда синовдан ўтказди. Ширкат келажакда Ер атмосфераси четига сайёҳлик парвозларини таклиф қилишга бел боғлаган.
Ширкат 22 май куни берган баёнотга кўра, ракета двигателига эга VSS Unity кемаси Нью-Мексико штатидан учиб, тахминан 80 километр баландликка кўтарилган. Бунинг ортидан кема Ерга муваффақиятли қўнган.
Британиялик миллиардер ва Virgin Galactic асосчиси Ричард Брансон Twitterда икки учувчи ва NASAга тегишли тадқиқот юклари ортилган кема атмосфера четига етиб боргани ва хавфсиз Ерга қайтганини тасдиқлади.
Virgin Galactic кейинги йилдан бошлаб мижозларга Ер атмосфераси четига парвозларни таклиф қила бошлашни режалаштирмоқда. Жорий йил охирида Брансоннинг ўзи ҳам синов парвозида учади.