Украина, Франция, Буюк Британия, Испания, Италия, Польша, Германия ташқи ишлар вазирлари ҳамда Европа Иттифоқининг ташқи сиёсат бўйича мутасаддиси ( “Веймар+” гуруҳи) Париждаги учрашув якунларига кўра Россиянинг Украинага қарши уруши тўхтатилишига оид муҳтамал бўлажак музокараларда ҳам Украина, ҳам ЕИ вакиллари иштирок этиши лозимлигини ёқлаб чиқишди.
Вазирлар “Украина ва унинг Европадаги иттифоқчилари манфаатларини кафолатлаши” лозим бўлган “адолатли, кенг қамровли ва барқарор тинчлик”ка эришилиши тарафдори эканларини билдиришган. Ҳужжатда, шунингдек, Украинани дастаклашни давом эттириш ҳамда унга хавфсизлик кафолати берилишига тайёрлик билдирилган. Баёнотда тинчликка эришиш йўлларини америкалик иттифоқчилар билан муҳокама қилишга ҳозирлик ҳам қайд этилган.
Баёнот АҚШ президенти Дональд Трамп Россия президенти Владимир Путин билан, кейин эса Украина президенти Владимир Зеленский билан телефон орқали мулоқот қилгани маълум бўлганидан бир неча соат ўтиб ёйинланган. Трампнинг билдиришича, Путин билан сўзлашув чоғида томонлар “тегишли командаларимиз [Россиянинг Украина билан ҳарбий можаросини ҳал қилиш бўйича] зудлик билан музокаралар бошлашлари ҳақида” келишиб олган. АҚШ президенти иддаосича, у Украина бўйича музокара жараёнига етакчилик қилишни Давлат котиби Марко Рубио, Марказий разведка бошқармаси директори Жон Рэтклифф, миллий хавфсизлик бўйича маслаҳатчи Майкл Уолтц ва махсус элчи Стив Уиткоффга топширган.
Трампнинг баёнотида ЕИ мамлакатлари музокара иштирокчиси ўлароқ зикр этилган эмас. Музокара командаси иштирокчилари орасида АҚШнинг Украина ва Россия бўйича махсус вакили Кит Келлогг исми ҳам эслатилмаган. Бироқ, АҚШ Давлат департаменти сайтининг маълум қилишича, 13 февраль куни Келлогг Европа сафарига отланган. Келлоггнинг ўзи сафардан мақсад “президент Трампнинг Украинада куч орқали тинчликни таъминлаш ҳамда АҚШнинг миллий хавфсизлик манфаатларини ҳимоя қилиш мақсадини олға суриш” бўлиб ҳисобланишини айтган.
Келлогг, хусусан, Мюнхенда ўтаётган хавфсизлик бўйича конференцияда иштирок этиши ҳамда Брюсселдаги НАТО ва ЕИ қароргоҳларига ташриф буюриши кутилмоқда. Маълум қилинишича, у “Россиянинг Украинага қарши урушини тўхтатиш ва Европада барқарорликни тиклаш учун Қўшма Штатлар билан ишлашга тайёр бўлган” Европадаги иттифоқчилар ва ҳамкорлар билан учрашишни режаламоқда.
14 февраль куни очиладиган Мюнхень конференциясида АҚШ вице-президенти Жей Ди Вэнс ва Давлат котиби Марко Рубио ҳам иштирок этишади. Улар ҳам айни пайтда Европада юришибди.
13 февраль куни Брюсселда НАТОга аъзо мамлакатлар ташқи ишлар вазирлари мажлис ўтказишган. НАТО бош котиби Марк Рютте аввалроқ Трамп ва Путин суҳбати тинчлик музокаралари бошланганидан далолат бериши мумкинлигини билдирган. У ҳам Украина музокараларнинг тўла ҳуқуқли иштирокчиси бўлиши лозимлигини айтган. Германия ташқи ишлар вазири Анналена Бербок ҳам шу каби таклиф билан чиқиб, “Европада тинчлик хавф остида бўлгани учун” музокараларда Европа ҳам иштирок этиши лозимлигини қайд этган.
Трамп куни кеча журналистлар билан суҳбатда Путин билан ўтказилган суҳбати ҳақида гапира туриб, Украина ўзининг халқаро майдонда тан олинган ҳудудининг ҳаммасини ўз назорати остига ола билишининг эҳтимоли кам эканини билдирган. Айни пайтда у ҳозирда Россия ишғоли остида бўлган ҳудудларнинг бир қисми музокаралар натижасида Украина назорати остига қайтиши мумкинлигини айтган. Аввалроқ АҚШ мудофаа вазири Пит Хегсет ҳам Украинанинг 2014 йилгача бўлган чегараларини қайтариб олиш худди Украинанинг НАТОга кириши каби реалистик мақсад бўлиб ҳисобланмаслигини билдирган эди.
Трамп тинчлик музокараларида ЕИ мамлакатлари иштирок этиши мумкинлиги ҳақида бирор гап айтган эмас.