16 январь куни Германия расмийлари Россия мухолифати етакчиси Алексей Навальний билан ўтказилган интервьюларнинг стенограммаларини Россияга юбориб, Москвадан мухолифатчининг заҳарланиши бўйича тўлиқ тергов ўтказишни талаб қилди.
Германияда бир неча ой даволанган Навальний 17 январь куни Россияга қайтишни режаламоқда. Навальний ўтган йилнинг август ойида заҳарланиш аломатлари билан Омскда касалхонага ётқизилганидан кейин тиббиёт учоғи билан Берлинга жўнатилган эди.
Кремль танқидчиси Россия Жазони ўташ федерал хизматидан (ФСИН) Россияга қайтганида ҳибсга олиниши ҳақида огоҳлантириш олганига қарамай, Россияга қайтишини айтган.
Ўтган ойда ФСИН Навальнийдан Германиядан зудлик билан қайтишни талаб қилган эди. ФСИН мухолифатчини 2014 йилда унга чиқарилган шартли қамоқ жазоси шартларини бузишда айбламоқда.
Суд ҳужжатларига кўра, Навальний 3,5 йиллик қамоқ жазосига ҳукм этилиши мумкин.