Россия президенти Владимир Путин 2021 йилда Нобель Тинчлик мукофотига сазовор бўлган “Новая газета” бош муҳаррири Дмитрий Муратов “хориж агенти” рўйхатига киритилиши мумкинлигини эътибордан соқит қилмади.
Президентга кўра, Муратов “мукофотни ўзига қалқон қилиб олмаслиги шарт ва агар қонунни бузса, мукофот уни қутқариб қололмайди”.
Путинга Муратовнинг “хориж агенти” рўйхатига киритилиш эҳтимоли борлиги тўғрисидаги саволни журналистлар 13 октябрда Москвада ўтган “Россия энергетика ҳафталиги” доирасидаги учрашув пайтида беришган эди.
Россияда қабул қилинган “Ҳориж агентлари тўғрисида”ги қонунга асосан, Дмитрий Муратов Нобель Тинчлик мукофотининг пулдан иборат қисмини қабул қилиб олса, “хориж агенти” сифатида эълон қилиниши мумкин.
Дмитрий Муратов ўзи ва “Новая газета” “хориж агенти” рўйхатига киритилишига унча ишонмаслигини айтди. Унга кўра: “Ҳукумат бундай аҳмоқона қарорлар қабул қилмаслик иммунитетига эга”.
Дмитрий Муратов СССР тарқаб кетганидан сўнг ўтган 30 йил ичида Нобель мукофотига сазовор бўлган илк россияликдир.
Унга ва Филиппинлик журналист Мария Рессега Нобель Тинчлик мукофоти берилгани тўғрисида 8 октябрь куни эълон қилинганди.