Солиқ тўлашдан бош тортганлик жиноятларида гумон қилинаётган Аллен Вайссельберг Нью-Йорк прокурорларига таслим бўлди. У АҚШнинг собиқ президенти Дональд Трампга тегишли Trump Organization бош ҳисобчиси эди.
Нью-Йоркнинг Манхэттен тумани прокурори Сайрус Вэнс суд Трампнинг бош ҳисобчисига нисбатан йиғилган далиллар ҳақиқий эканини тан олганидан сўнг айблов билан чиқишини билдирди.
Прокурор судга Trump Organization мамлакат ҳукуматидаги олий лавозимли айрим шахсларга солиқ тўлаш бўйича қатор имтиёзларни ноқонуний йўл билан яратиб берганликда гумонланаётгани тўғрисидаги ҳужжатларни тақдим этган.
Агар суд ҳисобчи айбдор эканини тасдиқласа, Дональд Трамп ва унинг оила аъзоларига ҳам айблов билдирилиши мумкин.
Трампнинг адвокатлари 28 июнь куни Аллен Вайссельбергга нисбатан тергов-суриштирув ишлари “тахминларга асосланган, янглиш, нохолис” эканини билдирди.
Трамп ўз расмий баёнотида Trump Organization амалга оширган ҳаракат “АҚШ тадбиркорлар жамияти учун одатий ҳолат ҳисобланиши” ва республикачилар партиясига қарши бўлган демократ партия вакили бўлган прокурор бу ишни “бўрттириб юборгани” ҳақида билдирди.