Линклар

Шошилинч хабар
18 сентябр 2019, Тошкент вақти: 01:55

Ўзбекистон

Тошкент Давлат консерваториясида Ҳолокост қурбонлари хотирасига концерт ўтказилади

Концерт 27 январь куни Тошкент Давлат консерваториясида бўлиб ўтади

Тошкентда Ҳолокост қурбонлари хотирасига бағишланган концерт ўтказилади. Исроил ва Германия элчихоналари ҳамда Европа Иттифоқининг Ўзбекистондаги делегацияси ҳамкорлигида уюштирилаётган концерт 27 январь куни Давлат консерваториясида бўлиб ўтади.

ГФР элчихонаси матбуот хизматининг билдиришича, концерт Камолиддин Ўринбоев бошчилигидаги Ўзбекистон Ёшлар симфоник оркетсри ижросида бўлиб ўтади.

“Иккинчи жаҳон уруши бошланишида Ўзбекистон Ҳолокостдан қочган минглаб яҳудийлар ҳамда юзлаб қочқин ва эвакуация қилинганлар учун паноҳ бўлди. Ўзбекистон халқи ўз эшикларини очиб қочқинларга паноҳ берди, улар билан бир бурда нонини баҳам кўрди. Бу ҳеч қачон унут бўлмайди”, дейилади элчихона хабарномасида.

Шостакович, Уильямс, Каччини ва Боярская асаралари ижро этиладиган концертда Ким Киенг, Кирилл Борчанинов каби мумтоз қўшиқ ижрочилари ҳам иштирок этади.

Лукойл қийинчиликларга қарамасдан Қандим газни қайта ишлаш заводини қуриш лойиҳасини давом эттиради

Лукойл Ўзбекистонда Қандим-Шоди-Қўнғирот газ конларини ўзлаштириш лойиҳаларида иштирок этади.

Ўзбекистонда Қандим газни қайта ишлаш заводини қуриш лойиҳасида Россиянинг Лукойл ва Кореянинг Hyunday Engineering ширкатлари иштирок этади.

Ўзбекистон ҳукумати 8,1 миллиард куб метр газни қайта ишлаш қувватига эга иншоот ташқи инфратузилмаларига 108 миллион АҚШ доллари миқдорида сармоя ётқизилишини назарда тутувчи қарор қабул қилди.

Регнум агентлигининг Ўзбекистон ҳукуматидаги манбаларига таяниб хабар қилишича, 2016 йил охирига қадар “Ўзбекистон темир йўллари” давлат ширкати заводга элтувчи темир йўл линияларини қуриб битказиши режалаштирилмоқда. Умумий узунлиги 48,7 километрни ташкил этадиган темир йўлга 50 миллион доллар сарфланади. 2017 йил охиргача эса “Ўзбекэнерго” қиймати 58,8 миллион долларга тенг электр билан таъминлаш объектларини қуриб бериши айтилади хабарда.

Бунда Лукойл ва Hyunday Engineering компанияларининг лойиҳадаги иштироки қиймати хабарда келтирилмаган.

Ўтган йили пайдо бўлган хабарда заводни қуришни ўз ичига олувчи Қандим конларини ўзлаштириш лойиҳасининг умумий қиймати 2,66 миллиард долларга тенг экани айтилган эди.

Айни пайтда, Россиянинг Лукойл ширкати 21 январь куни сармоя дастурларини қисқартиришини маълум қилди. Жаҳон бозорида нефть ва газ нархининг тушиши ортидан қийин аҳволга тушиб қолганини тан олган Лукойл 2016 йил учун мўлжалланган 8,5 миллиард долларлик сармоя миқдорини 1,5 миллиард долларга камайтиришга мажбур эканини эълон қилди.

2015 йил ноябрида Лукойл Қўнғирот газ конларини ўзлаштириш лойҳаларидан воз кечишини эълон қилди.

Лукойл 2004 йилда Ўзбекистон ҳукумати билан имзоланган Маҳсулотни тақсимлаш келишуви доирасида Қандим-Шоди-Қўнғирот газ конларини ўзлаштириш лойиҳаларида иштирок этади.

Лукойл сармоялар миқдорини қисқартиради

Россиянинг йирик Лукойл нефт ширкати ётқизилаётган сармоялар миқдорини 24 фоизгача қисқартиради. Бу ҳақда журналистларга ширкат раҳбари Вагит Алекперов маълум қилди.

Лукойл сармояларининг катта қисми Ўзбекистон ҳиссасига тўғри келади. Ўн йил давомида Ўзбекистонда олиб борилган геологоразведка ва янги конларни ўзлаштириш ишларига Лукойл 3,5 миллиард доллар сармоя ётқизган. Лукойл Ўзбекистонга жами 12 миллиард доллар сармоя ётқизишни режалаштирган эди.

Вагит Алекперовнинг айтишича, сармоялар миқдорининг қисқартирилиши нефтнинг жаҳон баҳоси тушиб кетгани билан боғлиқ. Алекперов 2016 йилда ширкат 8,5 миллиард доллар сармоя ётқизишни режалагани, бироқ нефть нархи тушиб кетгани муносабати билан бу сармоялар 1,5 миллиард долларга қисқартирилишини маълум қилган.

Хитой, Россия ва Жанубий Корея Ўзбекистоннинг энг катта инвесторлари

Бухородаги текстил корхонаси.

Хитой, Россия ва Жанубий Корея Ўзбекистоннинг энг йирик инвесторлари ҳисобланади. Ўзбекистон Давлат статистика қўмитасининг 20 январда эълон қилинган 2015 йил якунларига оид ҳисоботида, жумладан, мана шу ҳақда гап боради.

Статистика қўмитасига кўра, ўтган йилда республикада хориж сармоядорлари иштирокида 494 қўшма корхона ташкил қилинган. Мазкур корхоналарнинг 103таси Хитой, 91таси Россия ва 53таси Жанубий Корея иштирокида уюштирилган.

Ҳисобот таҳлил қилинса, Ўзбекистон иқтисодиётида 2015 йилда Россия улуши бошқа йилларга инисбатан кўпайганинини, Хитой ва Жанубий Корея улуши эса камайганини кузатиш мумкин. Масалан, 2014 йилда Ўзбекистонда Россия иштирокида 69та, Хитой иштирокида 110та, Жанубий Корея иштирокида эса 56та қўшма корхона ташкил қилинган эди.

Ўзбекистонда электр қуввати ишлаб чиқариш 104 фоизга кўпайди

Ўзбекистонда электр энергияси ишлаб чиқариш кўпайганига қарамай, кўпчилик ўзбекистонликлар шам ёруғида ўтиришибди.

“Ўзбекэнерго” ҳиссадорлик жамияти 2014 йилда Ўзбекистонда электр қуввати ишлаб чиқариш 104,2 фоизга ўсганини расман маълум қилди.

Ширкат сайтида қайд этилишича, ўтган йили мамлакатда 55 миллиард 500 миллион кВт соат электр энергияси ишлаб чиқарилган, бу эса ўтган йилга нисбатан 104,2 фоизга кўпдир.

“Ўзбекэнерго”, шунингдек, 2015 йилда маҳсулот экспорт қилиш ҳамда хизмат кўрсатиш режаси юз фоиздан кўпроққа бажарилганини ҳам билдирган. Ширкат сайтида қайд этилишича, ишлаб чиқаришга сарфланадиган ҳаражатлар қисқартирилиши ортидан ишлаб чиқилган электр энергияси таннархининг 14 фоиз арзонлашига сабаб бўлган.

Айни пайтда қиш мавсумида ўзбекистонликлар электр энергияси таъминотида мунтазам узилишлар бўлаётган шароитда яшаб келмоқда. Озодликка етиб келган хабарларга қараганда, айрим вилоят ва туманларда электр қуввати суткасига 2-3 соатдан берилмоқда.

Бундестаг депутатлари Ўзбекистонга сафар қилмоқда

21 январь куни Ўзбекистон Ташқи ишлар вазирлигида Германия парламенти депутатлари билан учрашув бўлиб ўтди.

Ўзбекистон дипломатик идораси тарқатган хабарга кўра¸ учрашувда икки давлат ўртасидаги муносабатлар¸ хусусан¸ парламентлараро алоқалар муҳокама қилинган.

Немис депутатлари Ўзбекистонга сафар давомида “Иқтисодий ислоҳотлар¸ ижтимоий муҳофаза ва хусусий тадбиркорликни мустаҳкамлашда парламент роли: Германия ва Ўзбекистон тажрибаси” деб номланган давра суҳбатида қатнашганлар.

Ушбу суҳбат 21 январь куни Ўзбекистон Олий Мажлисининг Қонунчилик палатасида бўлиб ўтган.

Ўзбекистон ширкати Қозоғистонда мева етиштириб¸ хорижга сотмоқчи

Мева-сабзавот етиштириш ва сотиш билан шуғулланувчи Ўзбекистондаги йирик ширкат Қозоғистоннинг тўрт вилоятида боғлар барпо қилиб, етиштириладиган мевани экспорт қилмоқчи.

Бу ҳақда хабар қилган "Новости-Казахстан" ахборот агентлигига кўра, ўзбекистонлик тадбиркорларнинг қўшни Қозоғистонга қизиқиш билдиришига бу мамлакатда иш юритиш Ўзбекистонга нисбатан фойдалироқ эканлиги билан изоҳланади.

Қозоғистондаги “Атамекен” Миллий тадбиркорлар ассоциацияси раиси ўринбосари Нуржан Альтаевнинг агентликка айтишича¸ 19 январь куни Ўзбекистондаги сабзавот ва мева экспорти билан шуғулланувчи йирик компания вакиллари билан музокаралар бўлиб ўтган.

Улар сармоя ётқизиш учун Қозоғистондаги шароитнинг идеал эканлигини таъкидлаб¸ Жанубий Қозоғистон, Жамбул, Олмаота ва Қизил Ўрда вилоятларида боғ барпо этиб, мевани чет мамлакатларга сотиш режасини муҳокама қилганлар.

Қозоғистон томони бундай таклиф билан келган ўзбек ширкати номини очиқлашни истамади.

Freedom House Акром Йўлдошев қамоқда ўлгани ҳақидаги хабарлар ортидан баёнот тарқатди

"Акромийлар" гуруҳи етакчиси Акром Йўлдошев.

2005 йилдаги Андижон фожиаси ортида турганликда айбланган "Акромийлар" оқими асосчиси Акром Йўлдошев беш йил олдин қамоқда ўлгани ҳақидаги хабарлар ортидан Freedom House халқаро ташкилоти баёнот тарқатди.

Ташкилотнинг халқаро дастурлар бўйича вице-президенти Роберт Герман: “Ўзбекистон ҳукумати олти йил давомида Акром Йўлдошевнинг ўлими ҳақида хабар бермай, шармандали иш қилди. Акром Йўлдошевнинг тақдири ҳақида ғарб давлатлари ҳукуматлари ва унинг оиласи қилган мурожаатлар жавобсиз қолдириб келинди”, деб билдирди.

Герман Қўшма Штатларни Ўзбекистондан бу борада тўла ҳисобт олишга ундади.

Акром Йўлдошев беш йил олдин қамоқда ўлгани ҳақида "Озодлик" радиоси шу йилнинг 11 январида ўз манбаларига таянган ҳолда хабар тарқатди.

Йўлдошев 1999 йилда тузумга қарши жиноятларда айбдор деб топилиб, 17 йилга қамалган эди.

"Пахтакор"нинг икки ўйинчиси хориж клублари билан шартнома тузди

Ўзбекистонлик футбол ишқибозлари.

“Пахтакор” футбол клубининг икки футболчиси 2016 йилдаги мавсумни хориж клубларида ўтказади.

“Пахтакор” жамоаси дарвозабони Александр Лобанов Эроннинг "Персеполис" клуби билан олти ойлик шартномани имзолади. Бу шартнома олти ойдан кейин яна бир йилга узайтирилиши мумкин. Лобанов бундан олдин Қозоғистоннинг “Қайсар” ва “Акжайик” клублари таркибида ҳам ўйнаган эди.

Жамоа ҳимоячиси Егор Кримец эса ўз карьерасини Хитойнинг “Бейжинг Гоан” клубида давом эттиради. “Пахтакор” футбол клуби раҳбариятининг билдиришича, Кримец Хитой клубига икки йиллик муддатга ижарага берилган.

Ўзбекистон Тожикистон учун темир йўл транзити тарифини пасайтирди

Ўзбекистон ва Тожикистоннинг темир йўл ширкатлари темир йўл орқали юк ташишда чегирмалар тизимини яратиш борасида келишувга эришган.

Тожикистон Транспорт вазирлиги матбуот хизматининг билдиришича, “Ўзбекистон темир йўллари” ширкати нефть маҳсулотлари, алюминий ва алюминий қириндисини Қудуқли-Келес ва Қудуқли-Қорақалпоқ темир йўллари бўйлаб ташишда белгиланган тарнзит нархларини 15 фоизга туширган.

Ўз навбатида, “Тожик темир йўли” ширкати ҳам Ўзбекистон юкларини Тожикистоннинг темир йўл зонаси орқали транзит қилишда чегирмалар тақдим этган.

Мазкур келишув икки қўшни давлат орасидаги юк айланмасининг ошишига хизмат қилади, демоқда тожик расмийлари.

Украина шарқидаги жангларда қатнашган ўзбекистонликлар ўн йилгача муддатга қамалиши мумкин

Ўзбекистон ҳукумати Украина шарқидаги жангларда қатнашган фуқаролари жиноий жавобгарликка тортилиши ҳақида огоҳлантирди.

Ўзбекистоннинг Украинадаги элчихонаси сешанба куни бу ҳақда пресс-релиз чиқарди.

Унда мамлакат ғарбидаги жангларда қатнашаётган ўзбекистонликлар 10 йилгача бўлган муддатга қамоқ жазосига тортилишлари ҳақида огоҳлантирилади.

Украинада ҳукумат тарафида ёки айирмачилар томонида туриб жанг қилаётганлар орасида ўзбекистонликларнинг ҳам борлиги айтилади. Лекин, уларнинг аниқ сони маълум эмас.

“Моддий манфаатдорлик ёки бошқа бирон шахсий манфаатни кўзлаб, ўзга давлат ҳудудида ёки унинг тарафини олиб қуролли тўқнашувда ёхуд ҳарбий ҳаракатларда қатнашиш учун ёлланиш 5 йилдан 10 йилгача озодликдан маҳрум қилиш билан жазоланади”, - демоқда ўзбек расмийлари.

ЖБ: Ўзбекистонни иқтисодий ривожланишига кўмаклашишга тайёрмиз

Жаҳон банки логотипи.

Жаҳон банкининг Европа ва Марказий Осиё мамлакатлари бўйича вице-президенти Сирил Мюллер банк бундан буён ҳам Ўзбекистон иқтисодиётини рвиожлантириш бўйича ҳамкорликка тайёр эканини маълум қилди.

Маҳаллий матбуотнинг 19 январь куни билдиришича, бу борда Сирил Мюллер Ўзбекистон президенти Ислом Каримовга жўнатган расмий мактубда гап боради.

“Жаҳон банки гуруҳи бизнинг Ўзбекистон билан ҳамкорлигимизни юқори баҳолайди ва бундан буён ҳам мамлакат билан ҳамкорлик концепциясидан келиб чиққан ҳолда Ўзбекистон иқтисодий ривожланишига кўмаклашишда давом этади”, дейилади мактубда.

Ўзбекистон ва Жаҳон банки томонидан имзоланган 2016-2020 йилларга мўлжалланган ҳамкорлик стратегияси доирасида Жаҳон банки январь ойида Ўзбекистонга 3,5 -4 миллиард долларлик кредит бериши кутилмоқда.

2012-2015 йиллардаги ҳамкорлик стратегияси доирасида Жаҳон банки Ўзбекистонга 1 миллиард 973 миллион доллар қарз берган эди.

Тўрақўрғон ГЭСи қурилишини Япония назорат қилади

Тўрақўрғон ГЭСи йилига 7 миллиард кВт-соат электр энергияси ишлаб чиқариши режаланмоқда.

Япониянинг TEPSCO ширкати Наманган вилоятида барпо этиладиган Тўрақўрғон ГЭСи қурилиши юзасидан консалтинг хизмати кўрсатади.

Ўзбекистон нашрларининг сешанба куни билдиришича, бу борадаги шартнома Япония ширкати ва “Ўзбекэнерго” ўртасида имзоланган. Маълумотда айтилишича, Япония ширкати Тўрақўрғон ГЭСини лойиҳалаш ишларини технологик, молиявий ва ишлаб чиқариш нуқтаи назаридан назорат қилиб боради.

“Ўзбекэнерго” 2013 йил августида Тўрақўрғон ГЭСини қуришга тайёргарлик ишларини бошлаган эди. Мазкур ГЭС 900 МВт қувватга эга бўлади ва йилига 7 миллиард кВт-соат электр энергияси ишлаб чиқаради. Тўрақўрғон ГЭСининг биринчи энергоблоки 2018 йилда, иккинчи энергоблоки эса 2019 йилда ишга туширилиши режалаштирилган.

ГЭСни қуриш учун зарур бўлган маблағнинг 1 миллиард 100 миллион доллари Япония халқаро ҳамкорлик агентлиги, 704 миллиони Ўзбекистон қайта қуриш ва ривожлантириш жамғармаси, 300 миллион доллари “Ўзбекэенерго” томонидан берилади.

Ўзбекистон олимпия жамоаси Рио де Жанейрога бориш имконидан маҳрум бўлди

Ўзбекистоннинг 23 ёшгача бўлган олимпия терма жамоаси 2016 йилда Бразилияда бўладиган ёзги олимпиада ўйинларига бориш имконидан мосуво бўлди.

Бу жамоа Қатарда бўлиб ўтаётган Осиё чемпионати давомида гуруҳ босиқичидаги кетма-кет иккита ўйинда мағлубиятга учради.

Uff.uz сайти жамоа ҳимоячиси Максимилян Фомин мағлубиятдан сўнг Facebook саҳифасида мухлисларига беписанд комментлар қолдирганини танқид қилди. Орадан бир кун ўтиб, ижтимоий тармоқлардаги танқидлардан сўнг Фомин ёзувларини ўчириб ташлаган.

АҚШда Ўзбекистонни "ўта хавфли давлатлар" сирасига киритиш таклиф қилинди

АҚШ конргессига Ўзбекистонни "ўта хавфли давлатлар" рўйхатига киритиш кўзда тутилган қонун лойиҳаси таклиф қилинди.

"Известия" газетасининг хабар қилишича, рўйхатдаги давлатлар фуқароларнинг виза учун топширган аризаси энг камида 30 кун кўриб чиқилади. Шунингдек, бу давлатдан борган қочқинлар устидан ҳам алоҳида тартибда назорат ўрнатилади.

Бу рўйхатда Ўзбекистондан ташқари Россия, Тожикистон, Қозоғистон, Қирғизистон ва яна 30га яқин Араб ҳамда Африка давлатлари бор.

Ҳозирча "Хавфсизлик акти" деб номланаётган бу ҳужжат Кентукки штати сенатори, республикачилардан президентликка номзод Рэнд Пол томонидан ишлаб чиқилган.

Ўзбекистон Меҳнат вазирлиги Telegram bot ахборот хизматини бошлади

Ўзбекистон Меҳнат ва аҳолини ижтимоий ҳимоя қилиш вазирлиги Telegram bot (@mehnatbot) ахборот хизматини ишга туширди.

Gazeta.uz сайтининг хабар қилишича, ушбу ахборот тарқатиш воситаси орқали вазирлик ҳозирча Ўзбекистондаги энг кам иш ҳақи, пенсия, бола пули, стипендия миқдори, иш ҳақини ҳисоблаш механизми ва вазирликка топшириладиган ариза бланкаларини тақдим қилмоқда.

Telegram bot - шу кунда мавжуд ижтимоий тармоқлар орасида қисқа муддатда оммалашган ахборот тарқатиш воситалардан бирига айланган.

Ўзбекистон Меҳнат ва аҳолини ижтимоий ҳимоя қилиш вазирлиги ҳозирда ижтимоий тармоқлар орасида бу ахборот воситасидан фойдаланаётган илк вазирлик бўлмоқда.

Вашингтонда Ўзбекистон-АҚШ сиёсий маслаҳатлашувларининг навбатдаги раунди бўлиб ўтади

19 январь куни Ўзбекистон Ташқи ишлар вазири Абдулазиз Комилов етакчилигидаги ўзбек делегациясининг Вашингтонга сафари бошланади.

21 январгача давом этадиган сафар чоғида, Ўзбекистон Ташқи ишлар вазирлиги тарқатган хабарга кўра, Ўзбекистон-АҚШ сиёсий маслаҳатлашувларининг навбатдаги раунди, Давлат департаменти ва бошқа муассасаларда икки томонлама учрашувлар ўтказиш кўзда тутилган.

Ўзбек расмийларининг Вашингтонга сафари олдидан Ҳюман Райт Уотч халқаро инсон ҳуқуқлари ташкилоти Қўшма Штатлар Ўзбекистондаги сиёсий маҳбусларни озод этиш учун Тошкент ҳукуматига очиқ босим ўтказиши кераклигига оид баёнот билан чиққан.

Ўзбекистон-АҚШ сиёсий маслаҳатлашувлари 2009 йилдан буён мунтазам равишда ўтказиб келинмоқда. Бундан аввалги сиёсий маслаҳатлашувлар 2014 йилнинг декабрь ойида Тошкентда ўтказилган.

VimpelCom Гулнора Каримовага пора берганини тан олиб, 600 миллион жарима тўлашга тайёр

VimpleCom ширкати Ўзбекистондаги фаолияти давомида миллионлаб доллар пора берганини тан олиб, 600 миллион АҚШ долларига тенг жарима тўлашга тайёрлиги тўғрисида хабар қилинмоқда. Россияда чиқадиган “Ведомомости” газетаси бу ҳақда душанба куни ўз манбаларига таяниб хабар қилди.

VimpelCom ширкати ўтган йили Ўзбекистондаги коррупцион жанжал билан боғлиқ эҳтимолий жарималар ва бошқа харажатлар учун 900 миллион доллар маблағ ажратган эди. Ноябрь ойида эса ширкат АҚШ адлия вазирлиги билан ишни судга оширмасдан 775 миллион доллар жарима тўлаш масаласи устида музокара қилаётгани тўғрисида хабар қилинган эди.

14 январь куни, Швециянинг TeliaSonera ширкати ҳам Ўзбекистондаги бизнеси қийматига тенг қарийб 700 миллион долларни ҳисобдан чиқариши тўғрисида эълон қилди.

АҚШ ва Европада тергов қилинаётган ишларда VimpelCom, TeliaSonera ва МТС ширкатлари Ўзбекистонда бизнес қилиш имкони эвазига бу мамлакат президентининг қизи Гулнора Каримовага камида 1 миллиард АҚШ доллари миқдорида пора бергани гумон этилмоқда. Мазкур терговлар доирасида Европа мамлакатларида Гулнора Каримовага алоқадор деб кўрилган жами 1 миллиард АҚШ доллари музлатиб қўйилган.

Ўтган ҳафта Ўзбекистон ҳукумати музлатилган пуллар жиноятчилар тарафидан ўмарилгани ва мамлакатга қайтарилиши лозимлиги айтилган мактуб билан АҚШга мурожаат қилди.

Ўзбекистон Адлия вазири Музраф Икромов имзоси билан жўнатилган мактубда жиноятчилар орасида Гулнора Каримованинг исми келтирилмаган, лекин унинг жазмани Рустам Мадумаров ва хос ёрдамчиси Гаяне Авакянлар асосий жинояткорлар сифатида тилга олинган.

Ўзбекистон ҳаво йўллари учоқларида фото ва видео олиш, носвой чекиш тақиқланди

Ўзбекистон ҳаво йўллари самолётларида учиш ва қўниш пайтида расм ва видеога олиш тақиқланди. Парвозлар хавфсизлигини назорат қилиш бўйича Ўзбекистон Давлат инспекцияси бошлиғининг буййруғи билан йўловчининг ҳаво кемаси бортидаги хатти-ҳаракатлари қоидасига бунга оид ўзгартишлар киритилгани ҳақида “Норма” нашри хабар қилди.

18 январдан кучга кирган янги қоидаларга кўра, учоқ учиш йўлагига олиб кетилаётган пайтда ҳамда учиш ва қўниш пайтида йўловчиларнинг фото ва видео олишларига изн берилмайди.

Шунингдек, учоқ бортида йўловчининг наркотик моддалар, тамаки маҳсулотлари, жумладан носвой истеъмол қилиши ҳамда электрон сигаретадан фойдаланиши ҳам тақиқланиши айтилади хабарда.

Бундан ташқари, борт-проводниклар таклиф этганидан ортиқча ҳамда божсиз савдо дўконларидан олинган алкогол маҳсулотларини истеъмол қилиш тақиқланди.

Янги қоидаларда пилотлар кабинасига кириш ва ҳаво кемаси экипажи аъзоларига ўз вазифаларини бажаришга тўсқинлик қилиш тақиқланиши айтилади.

Учоқ бортидан ёпинчиқ, ёстиқ, идишлар олиб кетиш, жамоат тартибини бузиш ва эҳтиёжсиз атрофдагиларни безовта қилиш тақиқланиши ҳам алоҳида қайд этилган.

Шунингдек, йўловчилар экипаж аъзоларининг рухсатисиз бошқа ўриндиққа ўтиришдан ҳам огоҳлантирилади.

Ўзбекистон ернинг яроқсизлашиши туфайли пахта майдонларини қисқартиришга мажбур бўлмоқда

Ўзбекистондаги пахта майдонларидан бири.

Ўзбекистонда 2020 йилгача пахта хомашёсини етиштириш ва уни давлат томонидан харид қилиш ҳажмини 3 миллион 350 минг тоннадан 3 миллион тоннага босқичма-босқич қисқартирилади. Бу ҳақда Ўзбекистон президенти Ислом Каримов ўтган ҳафта якунида ўтказилган ҳукумат мажлисида билдирди.

Пахта етиштириш 350минг тоннага қисқариши ортидан 170,5 минг гектар суғориладиган ер бўшайдиган бўлиб турибди. Бироқ, Ўзбекистон президентига кўра, бунда асосан пахта ҳосилдорлиги гектарига 12-15 центнердан ошмайдиган паст бонитетли ерлар, аниқроғи, шўрлаган ва пахта етиштиришга яроқсиз бўлган тоғолди ерлари бўшатилади.

Ислом Каримовнинг айтишича, пахтадан бўшаган экин майдонларида аввало сабзавот ва картошка, шулар қаторида, озуқа экинлари, ёғ-мой олинадиган ва бошқа ўсимликлар экилади, боғ ва узумзорлар барпо этилади.

Ўзбекистон Ташқи ишлар вазири Вашингтонга сафар қилади

Ўзбекистон Ташқи ишлар вазирлиги тарқатган хабарга кўра, Ташқи ишлар вазири Абдулазиз Комилов етакчилигидаги делегация келгуси ҳафтада Вашингтонда АҚШ ҳукумати вакиллари билан музокаралар ўтказади.

Ташқи ишлар вазирлиги Ўзбекистон-Америка сиёсий кенгашининг навбатдаги учрашувида қандай масалалар муҳокама этилиши борасида маълумот бергани йўқ.

“Ташриф давомида Вашингтон шаҳрида Ўзбекистон-АҚШ сиёсий маслаҳатлашувларининг навбатдаги раунди, Давлат департаменти ва бошқа муассасаларда икки томонлама учрашувлар ўтказиш кўзда тутилган,” дейилади вазирлик матбуот хизмати тарқатган хабарда.

Каримов ялпи ички маҳсулотни 2030 йилгача икки бараварга оширишни мақсад қилди

Президент Ислом Каримов

Президент Ислом Каримов Ўзбекистон ялпи ички маҳсулотини 2030 йилгача икки бараварга ошириш режасини эълон қилди.

Унинг бу сўзлари 15 январь куни Ўзбекистон Вазирлар Маҳкамасининг 2015 йил якунларига бағишланган кенгайтирилган мажлиси чоғида янгради.

"Мамлакатимиз ялпи ички маҳсулотининг 2016-2030 йилларда 2 баробар кўпайишига эришиш учун ўртача йиллик ўсиш суръатлари 4,8 фоиз даражасида бўлишини таъминлаш зарур. Агар кейинги 11 йилда бу кўрсаткич 8 фоиздан юқори бўлиб келганини ҳисобга оладиган бўлсак, бу вазифани амалга ошириш учун мустаҳкам асос ва замин борлиги яққол аён бўлади," деди Ислом Каримов.

Ислом Каримов ҳозирда ҳукуматнинг бош мақсади иқтисодиётда таркибий ўзгаришларни изчил давом эттириш эканини айтди.

"Бош мақсадимиз – мавжуд қийинчиликларга қарамасдан, олиб бораётган ислоҳотларни, иқтисодиётимизда таркибий ўзгаришларни изчил давом эттириш, хусусий мулкчилик, кичик бизнес ва тадбиркорликка янада кенг йўл очиб бериш ҳисобидан олдинга юришдир," деди Ислом Каримов.

HRW: АҚШ сиёсий маҳбусларни озод этиш учун Тошкент ҳукуматига очиқ босим ўтказиши керак!

АҚШ Ўзбекистондаги сиёсий маҳбусларни озод этиш учун Тошкент ҳукуматига очиқ босим ўтказиши керак.

Ҳюман Райт Уотч ҳам Марказий Осиёда Инсон ҳуқуқлари ассоциацияси каби халқаро ташкилотлар келаси ҳафтада АҚШ ва Ўзбекистон расмийлари ўртасида ўтказилиши кутилаётган масалаҳат кенгаши олдидан ана шундай чақириқ билан чиқди.

Ўзбекистон Ташқи ишлар вазири Абдулазиз Комилов 19 январь кунига белгиланган маслаҳат кенгаши доирасида АҚШ Давлат департаменти ва Мудофаа вазирлиги мулозимлари билан сўзлашувлар ўтказади.

Мухокамаларда “Исломий давлат” экстремист гуруҳига қарши халқаро глобал коалиция таркибида янада фаолроқ ҳаракат қилиш, Афғонистондаги вазият ва терроризм хавфига қарши ҳарбий ҳамкорлик истиқболлари мухокама этилиши кутиляпти.

Ўзбекистон пахта етиштиришни 350 минг тоннага камайтирмоқчи

Ўзбекистон келаси тўрт йил ичида мамлакатда етиштириладиган пахта ҳажмини 3 миллион 350 минг тоннадан 3 миллион тоннага камайтиришни режаламоқда.

Бу ҳақда Ўзбекистон президенти Ислом Каримов 15 январь куни бўлиб ўтган ҳукумат йиғинида таъкидлади.

Жаноб Каримовга кўра, бу жаҳон бозорида пахта толасининг нархи ва унга бўлган талабнинг кескин пасайиб кетиши билан боғлиқдир.

Шунингдек, Каримов пахта етиштириш ҳажми 350 минг тоннага қисқариши туфайли 170 минг 500 гектар ер пахтадан бўшатилиши ва улар ўрнига бошоқли дон, картошка, мева, узум экилиши учун йўл очишини таъкидлади.

Пахта Ўзбекистоннинг асосий экспорт маҳсулоти бўлиб, давлат томонидан ташкиллаштириладиган оммавий сафарбарлик асосида йиғиб олинади.

Ўзбекистон пахта далаларида мажбурий меҳнат туфайли халқаро танқидлар остида қолган.

Мутахассислар Ўзбекистон пахта майдонларини кескин қисқартириш ва ердан фойдаланиш йўлларини ранг-баранглаштириш лозимлигини йиллардан бери айтиб келишади.

Ўзбек расмийларига кўра, қийноқлар бўйича шикоятлардан учтаси тасдиқланган

Ўзбекистон расмийлари иддаосича 2014 йилда маҳкумларни қийноққа солиш ҳолатлари бўйича 61та мурожаат кўриб чиқилган ва шулардан 3 таси ўз тасдиғини топган.

Бу ҳақда Ўзбекистон Бош прокуратураси фуқаролар ҳуқуқлари ва эркинликлари, жамият ва давлат манфаатларини ҳимоя қилиш бошқармаси бошлиғи Ислом Жасимов Женевада бўлиб ўтган БМТнинг инсон ҳуқуқлари қўмитаси йиғинида таъкидлаган.

Жасимовга кўра, қийноқ холатларининг учтаси тасдиқланган ва айбдорлар жазоланган.

Халқаро ташкилотлар Ўзбекистон қамоқхоналарида маҳкумлар мунтазам қийноққа солиниши ҳақида бонг уриб келади.

Халқаро Қизил Хоч ëки БМТнинг қийноқлар бўйича махсус маърузачиси ëпиқ қолаëтган Ўзбекистон қамоқхоналаридаги инсон ҳуқуқларига оид вазият ташвишга солаётганини билдирган.

БМТнинг қийноқлар бўйича махсус маърузачиси Манфред Новак Ўзбекистон қамоқхоналарига бориб, у ердаги ҳақиқий аҳвол, хусусан, қийноқлар вазиятини ўрганишга икки йилдан бери уринаëтгани, бироқ ҳозирча сўровлари жавобсиз қолаëтганини айтган эди.

Давомини ўқинг

XS
SM
MD
LG