Линклар

Шошилинч хабар
17 сентябр 2019, Тошкент вақти: 15:34

Ўзбекистон

Мирзиёев бу йилни Наврўзни янгича ўтказиш тўғрисида қарор қабул қилди

Ўзбекистон Республикаси президенти Шавкат Мирзиёевнинг "2017 йилги Наврўз умумхалқ байрамига тайёргарлик кўриш ва уни ўтказиш тўғрисида"ги қарори эълон қилинди.

ЎзА ахборот агентлиги эълон қилган қарор матнида айтилишича, 2017 йилги Наврўз умумхалқ байрами Тошкент шаҳрида, Қорақалпоғистон Республикаси ва вилоятлар марказларида, барча шаҳар, туман ва қишлоқларда умумхалқ сайиллари шаклида ўтказилади.

Ҳужжатда байрамни уюштириш ва ўтказиш билан боғлиқ қилинадиган ишлар санаб ўтилган.

Ўзбекистонда меҳнат дафтарчалари бекор қилиниши мумкин

Бу ҳақда хабар қилган Norma.uz сайтига кўра, агар бу масалада қарор қабул қилинса, 2005 йилгача бўлган давр учун меҳнат стажини тасдиқловчи асосий ҳужжат меҳнат дафтарчаси, 2005 йилдан кейинги давр учун эса жамғариб бориладиган пенсия ҳисоб варақлари бўлади.

Сайтнинг мутахассисларга таяниб ёзишича, дунёнинг кўплаб давлатларида меҳнат дафтарчлари ўрнига солиқ тўловчилар, ишчилар, меҳнатни ҳисобга олишнинг электрон тизимларидан фойдаланилади.

Бироқ Ўзбекистон қонунчилигига кўра, айни вақтда меҳнат дафтарчаси меҳнат стажини тасдиқловчи асосий ҳужжат ҳисоблансада, бироқ амалда ягона ҳужжат эмас. Амалиётда пенсия миқдори белгиланаётганда меҳнат стажи меҳнат дафтарчасидан ташқари, маълумотномалар, буйруқлардан кўчирмалар, ойлик маоши ведомостлари, меҳнат шартномалари, архив маълумотномалари ва бошқа ҳужжатлар билан тасдиқланади.

Ўзбекистон эскирган ҳарбий учоқларни сотувга қўйгани айтилмоқда

Су-27 қирувчи самолётлари

Ўзбекистон совет даврида ишлаб чиқарилган ва Ўзбекистон армияси фойдаланиб келган эски ҳарбий учоқларни сотаётгани тўғрисидаги хабарни Мудофаа вазирлиги қисман тасдиқлади. Бу ҳақда “Новости Узбекистана” нашри 28 февраль куни маълум қилди.

Аввалроқ Россиянинг “Военное обозрение” нашри Американинг Redfish Trading Company ширкати сотувга етти дона МиГ-29 қирувчиси, беш дона Су-27 қирувчиси, бир дона Су-25 ҳужумчи самолёти ва 22 дона Су-17 қирувчи-бомбардимончи самолётларини қўйгани ва бу учоқлар Ўзбекистон ҳарбий ҳаво кучларига тегишли эканиниёзган эди.

“Новости Узбекистана” нашри Мудофаа вазирлигидаги манба бу хабарни қисман тасдиқлаганини ва эскирган ҳарбий техникани сотиш учун тендер эълон қилинганини айтганини хабар қилди.

“Бироқ ҳозирча тендер ғолиби аниқланмаган ва сотувга қўйилгани айтилаётган ҳарбий техника доимий хизмат ўташ жойларида сақланмоқда”, деб ёзади “Новости Узбекистана”.

Ўзбекистон бош прокурори хитойлик ҳамкасби билан учрашди

Ўзбекистон Бош прокуратураси биноси.

Хитой пойтахти Бейжинда Ўзбекистон бош прокурори Ихтиёр Абдуллаев Хитой Олий халқ прокуратураси бош прокурори Цао Цзяньмин билан учрашув ўтказди.

Бош прокуратура матбуот хизматининг 28 февраль куни билдиришича, “томонлар ўзаро ҳамкорлик ҳолати ва истиқболларини муҳокама қилди. Учрашув якунлари бўйича 2017−2018 йилларда ҳамкорлик дастури имзоланди”.

Томонлар Ўзбекистон Бош прокуратурасининг Олий ўқув курслари ва ХХР Олий халқ прокуратурасининг Давлат прокурорлар институти ўртасида ўзаро англашув Меморандумини ҳам имзолади.

Ўзбекистон-Украина савдо айланмаси бир йилда 9,5 фоизга озайди

Ўтган бир йил ичида Ўзбекистоннинг Украина билан савдо айланмаси 9,5 фоизга озайди ва 223 миллион долларни ташкил қилди. Бу ҳақда 28 февраль куни ўтган матбуот анжуманида Украинанининг Тошкентдаги элчиси Юрий Савченко маълум қилди.

Унга кўра, Москва Украина маҳсулотларини Россия ҳудудидан транзит қилинишини тақиқлагани, иқтисодий инқироз ва жанговар ҳаракатлар савдо айланмасининг озайиб кетишига асосий сабаб бўлмоқда.

Дипломатнинг айтишича, Украинадан Ўзбекистонга товар экспорт қилиш 2016 йилда 2015 йилга нисбатан 18,6 фоизга озайган, айни пайтда Ўзбекистон экспортининг улуши 15,7 фоизга ортган.

Юрий Савченко ўзбек инвесторларининг Украина иқтисодиётига ётқизган сармояси ўтган йили 1 миллион 200 минг долларни ташкил қилганини, Украинанинг Ўзбекистонга киритган сармояси эса 350 минг доллар бўлганини таъкидлади.

Ўзбекистонда пенсионерлар пенсия қачон берилишини SMS орқали билишлари мумкин

Ўзбекистонда пенсия берилишини кутиб ўтирган аёллар.

Ўзбекистонда пенсионерлар ва ижтимоий нафақа олувчилар тўловлар қачон амалга оширилишини мобил телефонлари орқали SMS сўров жўнатиш йўли билан аниқлаб олишлари мумкин. Бу ҳақда 28 февраль куни Пенсия жамғармасига таянган ҳолда Podrobno.uz нашри хабар берди.

Хабарда айтилишича, пенсия ва ижтимоий нафақа миқдори, унинг қачон берилиши тўғрисидаги маълумотни олиш учун 107 11 қисқа номерига SMS жўнатиш лозим бўлади.

Унда пенсионер ёки нафақа олувчи пенсионер гувоҳномасида кўрсатилган ўзининг ҳисоб рақамини ёзиши керак. Шундан сўнг сўров юборган шахснинг мобил телефонига жавоб юборилади.

Пенсия жамғармаси SMS сўров пулли бўлишини ва ҳар бир SMS учун мобил операторлари 0,02 цент ҳақ олишини билдирди.

Шавкат Мирзиёев Россиянинг бош разведкачисини қабул қилди

Россия ташқи разведка хизмати директори Сергей Наришкин.

Ўзбекистон Президенти Шавкат Мирзиёев сешанба куни Россия ташқи разведка хизмати директори Сергей Наришкинни қабул қилди.

Бу ҳақда хабар қилган “Ўзбекистон” телеканали “Ахборот” кўрсатувига кўра, амалий сафар билан Ўзбекистонга келган россиялик мулозим билан учрашув чоғида Шавкат Мирзиёев даврнинг таҳдидларига қарши ҳаракатлар соҳасида икки мамлакатнинг ҳамкорлиги даражасини юқори баҳолаган.

Экстремизм ва террорчилик, наркотиклар ғайриқонуний савлоси ва уюшган жиноятчиликка қарши кураш масалаларига алоҳида эътибор қаратилгани айтилди.

Ўз навбатида Сергей Нарышкин икки мамлакат хавфсизлигини таъминлашнинг долзарб вазифаларини ҳал қилишда ўзаро ҳамкорликдаражасини юқори баҳолаган. У, шунингдек, Шавкат Мирзиёевга Россия президенти Владимир Путиннинг саломини етказган.

Ўзбекистонда расмий доллар яна қарийб 50 сўмга қимматлади

Ўзбекистон Республикаси Марказий банки 28 февралдан бошлаб 1 АҚШ доллари нархини 3404 сўм 35 тийин қилиб белгилади, бу сўнгги ҳафтада белгиланган кўрсаткичдан 47 сўм 48 тийинга кўпдир.

Ўтган ҳафтада ҳам Марказий банк сўмнинг расмий курсини қарийб 50 сўмга оширган эди. АҚШ доллари ўтган йилнинг сентябрида 3000 сўмлик довондан ошиб ўтган эди.

Айни пайтда мамлакатнинг қора валюта бозорида 1 АҚШ доллари 7000 сўмлик довондан ошиб ўтди.

Қозон аэропортида ушланган ўзбек террорчилик ва экстремистликда гумон қилинмоқда

Татаристонда 42 яшар ўзбекистонлик устидан экстрадиция текшируви бошланди. Тергов якунига қадар у суд қарори билан ҳибсда қолади.

Россия Федерал хавфсизлик хизматига таяниб, "Казань-ТВ"нинг хабар қилишича, исми ошкор этилмаётган ўзбекистонлик 21 февралга ўтар кечаси Қозон шаҳри аэропортида қўлга олинган. У паспорт назоратидан ўтаётганида Ўзбекистон Ички ишлар вазирлиги томонидан халқаро қидирувга берилгани аниқланган.

Ўзбекистон ҳуқуқ-тартибот органлари ўзбек муҳожирини экстремистик, сепаратистик ва террорчи ташкилотларга алоқадор эканликда гумонлаётгани айтилмоқда.

Тошкентнинг Миробод бозорига яқин кафелар бузилмоқда

Иллюстрация

Тошкент шаҳридаги Grand Mir меҳмонхонасидан Миробод бозоригача бўлган кўчада жойлашган кафе ва кабобхоналар бузилмоқда. Бу ҳақда ижтимоий тармоқларда тарқалган суратларга таяниб, кун.уз сайти хабар қилди.

Тошкентнинг Чорсу бозори яқинидаги 38 та дўкон бузила бошлагани тўғрисида Озодлик куни кеча хабар қилган эди. Дўкондорларнинг айтишича, савдо объектлари уларнинг эгалари ҳисобидан бузилиб, ўрнига барпо этилажак янги савдо маркази ҳам дўкондорлар пулига қурилиши лозимлиги айтилган.

Ўзбекистонда жазонинг янги тури жорий этилиши мумкин

Ўзбекистонда жиноий жазолар тизимига «мажбурий жамоат ишлари» киритилиши режалаштирилмоқда. Олий Мажлис Қонунчилик палатаси 24 февраль куни киритилаётган тегишли ўзгартишни биринчи ўқишда кўриб чиқди.

Бу ҳақда хабар қилган палата ахборот хизматига кўра, киритилаётган ўзгартиш ва қўшимчаларга мувофиқ жиноий жазолар тизимига «мажбурий жамоат ишлари"нинг киритилиши муносабати билан қамоқ тариқасидаги жиноий жазо бекор қилинади. Жиноят содир этганликда гумон қилинаётган шахсларни ушлаб туриш, қамоққа олиш ва уй қамоғи тарзидаги эҳтиёт чораларини қўллаш, дастлабки тергов, шунингдек фуқаролик иши бўйича суд қарорини назорат тартибида қайта кўриб чиқиш муддатлари қисқартирилмоқда.

Эрдўғон Истанбулда Рустам Азимовни қабул қилди

Туркия президенти Режаб Тоййип Эрдўғон (ўнгда) Ўзбекистон бош вазири ўринбосари Рустам Азимов билан Истанбулда учрашди. Истанбул, 2017 йил 27 февраль.

Туркия президенти Режаб Тоййип Эрдўғон Ўзбекистон бош вазири ўринбосари Рустам Азимовни қабул қилди. Бу ҳақда бугун “Анадолу” агентлигига таянган ҳолда Podrobno.uz. нашри хабар берди.

Учрашув Истанбулдаги “Бейларбейн” саройида бўлиб ўтган. Томонлар бир соатга яқин ёпиқ эшиклар ортида суҳбатлашган. Учрашувда Туркия бош вазири ўринбосари Тугрул Тюркеш, иқтисодиёт вазири Ниҳат Зейбекчи ва мудофаа вазири Фикри Ишик ҳам иштирок этган.

Учрашувнинг бошқа тафсилотлари матбуот учун очиқланмади.

Хабарларда айтилишича, Истанбулда Туркия-Ўзбекистон бизнес форуми ўтказилган. Форумда иқтисодиёт вазири Нихат Зейбекчи бугунги кунда Туркия ва Ўзбекистон ўртасидаги савдо айланмаси 1 миллиард 200 миллион долларни ташкил этаётгани, бу эса икки мамлакат ўртасидаги ҳамкорлик потенциалидан анча оз эканини таъкидлаган.

Туркия расмийсига кўра, турк қурилиш ширкатлари Ўзбекистонда умумий қиймати 2 миллиард долларли 110та лойиҳани амалга оширган.

Ўзбекистонда долларнинг қора бозордаги курси 7 минг сўмдан ошиб кетди

Ўзбекистонда долларнинг қора бозордаги курси 7 минг сўмдан ошиб кетди.

Dollaruz.Com сайтининг хабар беришича, 27 февраль куни эрталаб Тошкентдаги Чорсу бозорида доллар 7020 сўмдан сотиб олинган ва 7050 сўмдан сотилган. Хоразмда эса долларнинг сотиб олиниши 7 минг сўмни, сотилиши 7020 сўмни ташкил қилган.

Айни пайтда долларнинг расмий курси 3356 сўм 87 тийин, биржа курси 9 минг 100 сўм қийматида қолмоқда. Сўнгги йилларда долларнинг расмий қиймати ҳафтасига 14-15 сўмдан қимматлаб бораётган эди. Лекин 21 февраль куни Марказий банк долларни бирданига 47 сўм 52 тийинга қимматлатди.

Тошкентдаги 12 қаватлди бизнес марказда ёнғин юз берди

Тошкентда ёнғин юз берган бинолардан бири.

Тошкентнинг Амир Темур кўчасида жойлашган 12 қаватли бизнес марказда 27 февраль куни ёнғин юз берди.

Газета уз нашрининг хабар беришича, бинонинг 8 қаватида 17.30да юз берган ёнғин орадан 25 дақиқа ўтгач ўчирилган.

Ёнғинда жабрланганлар бўлмаган. 8 қаватдаги 20 квадрат метрли майдон, Silver Water Gold Fish ва “Монтаж курилиш хизмат” ширкатининг жиҳозлари ёниб кетган. Айни пайтда ёнғин сабаблари ўрганилмоқда.

2015 йилнинг сентябрида ҳам мазкур бизнес марказда ёнғин юз берган ва бинонинг фасадига зарар етган эди.

Бухородаги Чорминор сувдан тозаланди

Бухородаги тарихий обидалардан бири.

Бухородаги Чорминор архитектура ёдгорлиги 27 февраль ҳолатига кўра сувдан тозаланди.

Бир неча кун олдин Фейсбукда Чорминорнинг сув босган ҳолатдаги сурати пайдо бўлган эди. Ўзбек матбуотининг хабар беришича, ўтган ҳафта сўнггида бир неча кун ёққан ёмғир оқибатида тарихий обидани сув босган эди.

Тарихий обидаларни ҳимоя қилиш бўйича Бухоро ва Навоий вилоят инспекцияси мазкур хабарлар ортидан Чорминорга эътибор қаратиб, обидани судан тозалаган. Инспекция раҳбариятига кўра, Чор минордаги сувни сўриб олувчи насос электр линиясидаги узилиш ортидан ишламай қолгани учун мана шундай вазият юзага келган.

1807 йилда барпо этилган Чорминор ЮНЕСКОнинг жаҳон мероси рўйхатига киритилган тарихий обида ҳисобланади.

Ўзбекистонда 3 йилда 330та газ заправкалари барпо этилади

Ўзбекистонда кейинги уч йил мобайнида 330та газ заправкаларини барпо этиш режалаштирилмоқда. Бу ҳақда “Ўзтрансгаз” ширкати маълумот берди.

Хабарда айтилишича, айни пайтда мамлакатда 550та табиий газ заправкалари ишламоқда. Йил охиригача уларнинг сони 600тага етказилади.

“Ўзтрансгаз” ширкати мазкур лойиҳани амалга ошириш учун Хитой сармоясини жалб қилмоқчи эканини билдирди. Хитойликлар 60та шаҳобчани қуради ва уларга зарур ускуналарни ҳам етказиб беради.

Хитой инвесторлари шаҳобчалар фойда келтираётганига амин бўлгач, қолган шаҳобчаларни қуриш ёки қурмаслик тўғрисида ўз фикрларини айтадилар.

Ўзбекистонда бугунги кунда давлат, жамоат ва хусусий транспортни бензиндан газга ўтказиш бўйича йирик дастур амалга оширилмоқда. Мана шу мақсадда Жанубий Корея, Хитой ва Италия ширкатлари билан қўшма корхоналар ташкил этилган.

"Ўзтрансгаз" аҳолини газ билан узлуксиз таъминлаш чоралари кўрилаётганини билдирди

Газ қувири.

"Ўзтрансгаз" ширкати Ўзбекистонда аҳолини газ билан таъминлашда узилишлар бўлмаслигига эришиш йўлида ҳаракатлар режасини амалга оширмоқда. Бу ҳақда 27 февралда Тошкентда ўтган матбуот анжуманида ширкат вакиллари маълум қилди.

Маълумотга қараганда, бугунги кунда 68,6 километр газ қувурлари таъмирдан чиқарилган. 171,9 километр газ коммуникациялари эса қайта қурилган.

"Ўзтрансгаз"нинг билдиришича, бугунги кунда газ етиб бормаган ҳудудларда 2,5 миллион квартира суюлтирилган газ билан таъминланаяпти.

Айни пайтда Ўзбекистон вилоят ва туманларидаги аҳоли қиш мавсумида газ ва электр таъминотида мунтазам узилишлар бўлишидан шикоят қилиб келади.

Ўзбекистонда ҳомиладорлик таътили муддати узайтирилиши мумкин

Ҳомиладорлик ва туғиш таътиллари кунини узайтириш; болали аёлларга моддий ёрдам кўрсатиш ва қисқартирилган иш вақтини ўрнатиш; касб-ҳунар таълими муассасаларининг битирувчиларига меҳнат муносабатлари соҳасида қўшимча имтиёзлар ўрнатиш; узоқ муддат фойдаланиладиган товарлар харид қилиш, уй-жой қурилиши, шунингдек, сафарбарлик чақируви захирасида хизматни ўташга ҳақ тўлаш учун ёш ходимларга фоизсиз ссудалар бериш имтиёзларини киритиш каби масалалар 2017 йил 22 февралда Ўзбекистон Республикаси Вазирлар Маҳкамаси, Ўзбекистон касаба уюшмалари Федерацияси Кенгаши, Ўзбекистон Республикаси Савдо-саноат палатаси ўртасида ижтимоий-иқтисодий масалалар бўйича2017-2019 йиллар учун имзоланган Бош келишувда назарда тутилгани тўғрисида маҳаллий нашрлар хабар қилди.

Лекин хабарларда ҳомиладорлик ва туғиш таътиллари қанча бўлиши билдирилмаган.

Ўзбекистон ва АҚШ икки томонлама муносабатлар истиқболларини муҳокама қилди

АҚШ Давлат котибининг Жанубий ва Марказий Осиё бўйича ёрдамчиси ўринбосари Дэниел Розенблюм.

АҚШ Давлат котибининг Жанубий ва Марказий Осиё бўйича ёрдамчиси ўринбосари Дэниел Розенблюм 25 февраль куни Тошкентда Ўзбекистон ташқи ишлар вазири Абдулази Комилов билан учрашди.

Ўзбекистон Ташқи ишлар вазирлигининг якшанба куни хабар беришича, учрашув чоғида ўзбек-америка муносабатлари истиқболлари, минтақавий ва халқаро масалалар бўйича фикр алмашинилган. Томонлар 1 февраль куни Тошкентда бўлиб ўтган Америка-Ўзбекистон савдо паластаси йиғилиши якунларини ҳам муҳокама қилган.

1 февраль куни ўтган йиғилишда АҚШ-Ўзбекистон савдо палатаси раиси Кэролин Лэмм Қўшма Штатлар Ўзбекистонни Марказий Осиё минтақасида асосий ҳамкор ўлароқ кўришини ҳамда самарали ҳамкорликни кенгайтиришдан манфаатдор эканини урғулаган.

Бугунги кунда Ўзбекистонда АҚШ ширкатлари иштирокида 164 та корхона фаолият кўрсатмоқда, улардан 122 таси қўшма корхона, 42 таси эса 100 фоизлик чет эл сармояси билан ишлаяпти.

Ўзбекистон Ташқи иқтисодий алоқалар, инвестиция ва савдо вазирлигида АҚШнинг 29 та ширкати аккредитациядан ўтган.

Қаршида Абдулла Ориповга ҳайкал ўрнатилади

Ўзбекистон халқ шоири¸ Ўзбекистон қаҳрамони Абдулла Орипов.

ЎзАнинг хабар беришича, Қаршида Ўзбекистон халқ шоири, Ўзбекистон Қаҳрамони Абдулла Орипов ҳайкали ўрнатилади.

Президент Шавкат Мирзиёев Қашқадарёга сафари давомида якшанба куни Абдулла Орипов ҳайкали лойиҳаси билан танишди.

Хабарда айтилишича, Абдуллап Орипов ҳайкали Қаршидаги Ўзбекистон кўчасида ўрнатилади. Президент ҳайкал лойиҳасини такомиллаштириш, бу ерда Абдулла Орипов номидаги мактаб ва унинг ижодига бағишланган музей ташкил этиш зарурлигини таъкидлади.

Хитой Ўзбекистонга 20та кема совға қилди

Хитой байроғи.

Хитой Ўзбекистонга каналларни тозалайдитган махсус кемаларни совға қилди.

Ўзбек матбуотининг "Жэньминь жибао" газетасига таяниб хабар беришича, кемаларнинг биринчи партияси 26 февраль куни темир йўл орқали Ўзбекистонга етиб келди.

Хабарда айтилишича, Хитойнинг Ўзбекистонга тақдим этган бу ёрдами "Битта минтақа, битта йўл" миллий дастури доирасида етказилди.

Бундай кемалардан жами 20таси келтирилиши режалаштирилган. Кемалар 5та партия орқали етказилиши белгиланган, биринчи партияда 3та кема келтирилган.

Туркманистонда Ravon автомобиллари тақдимоти бўлиб ўтди

Ravon автомашинаси тақдимоти.

Туркманистонда Ravon автомобиллари тақдимоти бўлиб ўтди. Бу ҳақда 27 февраль куни Podrobno.uz хабар берди.

Хабарда айтилишича, тақдимот “Туркман-ЎзАВТО” ширкати томонидан уюштирилди. Унда Ravon Gentra, Ravon Nexia R3 и Ravon R4 автомобиллари намойиш этилди.

Тадбирда Ўзбекистонда ишлаб чиқарилаётган қишлоқ хўжалик , қурилиш ва коммунал хизматлар учун мўлжалланган техникалардан ҳам намуналар намойиш этилган.

“Туркман-ЎзаАВТО” GM Uzbekistan ширкатининг Туркманистондаги дистрибьютери ҳисобланади. Ўн йил аввал ташкил этилган мазкур ширкат Туркманистонда шу йиллар давомида 2 мингта Chevrolet ва Uz-Daewoo русумидаги автомашиналарни сотган.

Ўзбекистон Ветеринария бошқармаси чорвага оқсим юққанига оид хабарни рад этди

Ўзбекистон Фавқулодда вазиятлар вазирлиги (ФВВ) матбуот хизматига таяниб Gazeta.uz сайтининг ёзишича, Давлат Ветеринария бош бошқармаси раиси ўринбосари Суннат Оққиев етакчилигидаги бир гуруҳ ветеринар эксперт "Янги ҳаёт" фуқаролар йиғинига борган.

Экспертлар гуруҳи ҳудуддаги ҳар бир хонадонга кириб, қорамолларни текширгани ва оқсим касаллиги клиник аломатларини топмагани", аммо, "намуналар лаборатория текширувига йўллангани" хабар қилинмоқда.

23 февраль куни Озодлик радиоси туман чорвадорлари оқсим тарқалди, деган хавотирда экани, Оҳангарон тумани ветеринария хизмати эса бунга стоматит касаллиги, деб изоҳ берганини хабар қилган эди.

Ўзбекистон Соғлиқни сақлаш вазирлиги сайтида берилган маълумотга кўра, оқсим касаллиги одамга ҳам юқиши мумкин бўлган ўта хавфли юқумли касалликдир.

Ўзбекистонда чорванинг оқсил, куйдирги каби касалликлар билан оғриши кузатилиб турилади.

Ўзбекистонда бўлиш қоидаларини бузган хорижликлар жаримага тортилади

Ўзбекистонга келган сайёҳлар мамлакат ҳудудида бўлиш қоидаларини бузгани тақдирда уларга ёки уларни таклиф қилган Ўзбекистон фуқароларига маъмурий жазо қўлланиши бўйича қонун ишлаб чиқилмоқда.

Маъмурий жарима миқдори энг кам ойлик иш ҳақининг 10 бараваридан 50 бараваригача бўлиши мумкин.

Айни пайтда, хорижлик сайёҳларни қабул қилувчи туристик фаолият билан шуғулланувчи тадбиркорлик субъектлари сайёҳларнинг Ўзбекистон ҳудудида бўлиб туриши ва ҳатти-ҳаракатлари учун тўлиқ мсъул ҳисобланади.

Айни пайтда мамлакатдаги сайёҳлик ширкатлари мазкур қонун қабул қилинса сайёҳларнинг Ўзбекистонга келишига яна бир тўсиқ бўлиши мумкинлиги борасида хавотирлар айтилмоқда.

Ўзбекистоннинг Хива шаҳридаги хусусий меҳмонхоналардан бирининг соҳиби Озодлик билан суҳбатда: "Сайёҳлар Ўзбекистонга ўзи оз келади. Келадиганлари қоидани бузмайди. Менимча бунақа қонунларни қабул қилиб сайёҳларни қўрқитмасилик керак", - дейди меҳмонхона хўжайини.

Қамашида Ўзбекистондаги энг йирик қуён, курка фермаси очилади

Қашқадарёнинг Қамаши туманида йил оҳиригача Ўзбекистондаги энг йирик курка ва қуён етиштирадиган комплекс ишга туширилади.

У ерда беш мингдан зиёд курка ва қуён боқилади.Шу комплексни ўзида қуён гўшти ва терисини қайта ишловчи завод ҳам ишга туширилади.

Лойиҳани “Қамаши момиқ қуёнлари” ширкати амалга оширади. 30 одам иш билан таъминланади.

Ўзбекистон президенти Шавкат Мирзиёев Қашқадарёга сафари давомида мазкур лойиҳани маъқуллади.

Давомини ўқинг

XS
SM
MD
LG