Линклар

Шошилинч хабар
18 сентябр 2019, Тошкент вақти: 17:18

Халқаро янгиликлар

“Ал-Қойда” раҳбари ўринбосари Айман аз-Завоҳирий АҚШ президенти Жорж Бушнинг Ироққа қўшимча куч жўнатиш ҳақидаги режасини масҳара қилди.

Интернет сайтига жойлаштирилган видеолавҳада Завоҳирий бутун АҚШ армиясини Ироққа жойлаштиришга чақириб, президент Жорж Бушнинг устидан кулди. Завоҳирий мужоҳидлар 10та армияни ҳам йўқ қилишга қодир эканини айтди.

Эрон Ташқи ишлар вазири Манучеҳр Муттақий БМТнинг 38 нафар мутахассисига Эронга кириш учун рухсат берилмагани ҳақидаги маълумотни тасдиқлади.

Ундан олдин тарқатилган хабарларда Эрон парламентининг Миллий хавфсизлик комиссияси раҳбари Аловуддин Бурожердий БМТ қошидаги Халқаро атом энергияси агентлигига шу ҳақда расмий мактуб йўллагани билдирилган. Эроннинг ядровий объектларини вақти-вақти билан текшириб турадиган БМТ ташкилоти бу масала Теҳрон расмийлари билан муҳокама қилинаётгани ва келажакда текшириш ишлари яна давом этишига умид билдирди. Вашингтонда АҚШ Давлат департаменти вакили Шон Мак Кормак бу қарор Теҳрон расмийларининг халқаро ҳамжамият талабини назар-писанд қилмаётганига яна бир далил эканини айтди.

Бағдод ва унинг атрофида содир этилган портлашлар оқибатида камида 100 нафар ироқлик нобуд бўлди.

Бағдоднинг шиалар яшайдиган Садр шаҳарчасидаги одамлар билан гавжум бозорда содир этилган иккита портлаш оқибатида 90га яқин одам нобуд бўлди, 160дан ортиқ ироқлик яраланди. Бош вазир Нурий ал-Маликий террорчилар коалицияси ва Ироқ собиқ президенти Саддам Ҳусайннинг тарафдорларини мазкур ҳужумни уюштирганликда айблади. Бақуба яқинида юз берган портлаш ва минамёт ҳужуми оқибатида яна камида 12 нафар ироқлик нобуд бўлди. Айни пайтда, АҚШ ҳарбийлари Бағдоддан шимоли-шарқда “Ал-Қойда”га алоқадар гуруҳларга қарши ўтказилган 10 кунлик рейдлар давомида 93 жанггари ўлдирилгани ва 57 нафари қўлга олинганини билдирди. АҚШ ҳарбийлари сўнгги икки кун ичида Ироқда уч нафар америкалик аскар нобуд бўлганини ҳам маълум қилдилар. Бу билан янги йил бошидан бери Ироқда ўлган Америка ҳарбийлари сони 47га етди.

Германияга қарашли ноҳукумат ташкилоти учун ишлаган Афғонистон фуқароси гиёҳванд моддалар савдоси билан шуғулланганликда гумон қилиниб Сурхондарё вилоятида қўлга олинди.

Россиядаги ахборот агентлигига асосланиб “Рress-uz.info” Интернет сайтида тарқатилган хабарга кўра, Ўзбекистон хавфсизлик хизмати ходимлари унинг машинасидан бир килограмм героин ва салкам икки килограмм қорадори топганлар. Маълумотларга кўра, қўлга тушган афғонистонлик қароргоҳи Франкфурт шаҳрида жойлашган Халқаро инсон ҳуқуқлари ташкилотида маслаҳатчи бўлиб ишлаган.

Ливан мухолифати одамларни иш ташлашга чақирди.

Мухолиф гуруҳлардан бири бўлган “Хизбаллоҳ” раҳбари Сайид Ҳасан Насруллоҳ кабинет тарқатиб юборилиши ва янги сайловлар ўтказилиши борасида ҳукуматга босимни кучайтириш учун ливанликларни иш ташлашга чақирди. Бироқ Ғарб давлатлари қўллаб-қувватлаган Бош вазир Фуад Синиора ҳукумати мухолифат талабига эътибор бермади.

Теҳронда Эрон ва Сурия Ташқи ишлар вазирлари учрашуви бўлиб ўтди.

Музокарадан сўнг ўтказилган матбуот анжуманида Манучеҳр Муттақий ва Валид ал-Муалим Эрон ва Сурия Ироқнинг яхлитлиги сақланиб қолиши тарафдори эканини айтдилар. Улар Ироқда юзага келган сиёсий ва хавфсизлик вазияти хусусида минтақавий анжуман ўтказишни Бағдод ҳукуматига тавсия қилдилар. Ғарб давлатлари Эрон ва Сурияни Ироқдаги жанггариларни қўллаб-қувватлаётганликда айблаб келмоқда.

Арман миллатига мансуб туркиялик журналист Хрант Динк 23 январ куни дафн қилинади.

Туркия ва Арманистон ўртасида дипломатик алоқалар йўқлигига қарамай, Арманистон Ташқи ишлар вазири ўринбосари Армен Кирокосян дафн маросимида қатнашиш учун Истанбулга боради. Қарийб бир аср олдин арманларнинг турклар томонидан оммавий ўлдирилганини “геноцид” деб тан олишга чақириб келган Хрант Динк жамоатчиликка танилиш баробарида турк миллатчилари ғазабини ҳам қўзғаган. Динк 19 январ куни 17 яшар Огун Самаст томонидан отиб ўлдирилган эди. 22 январ куни Истанбул полицияси бошлиғи Самастнинг ҳеч қандай гуруҳга алоқадор бўлмаганини айтди.

23 январ куни Москвада Арманистон ва Озарбайжон Ташқи ишлар вазирлари учрашуви бўлади.

Вардан Осканян ва Элмар Мамедяров ўртасидаги музокара чоғида Тоғли Қорабоғ муаммоси муҳокама этилади. Аҳолисининг аксари арманлар бўлган Тоғли Қорабоғ учун қуролли кураш олти йил давом этди. Ниҳоят 1994 йилда ўт очишни тўхтатиш ҳақидаги шартнома имзоланганидан кейин ҳарбий ҳаракатлар тўхтади. Уруш давомида тахминан 30 минг одам халок бўлди, бир миллионга яқин аҳоли ўз уйларини ташлаб бошқа жойларга кўчишга мажбур бўлди.

Бош қароргоҳи Шенжен шаҳрида жойлашган Хитойнинг “ZTE” корпорацияси Тожикистоннинг телекоммуникация соҳасига сармоя ётқизишни муҳокама қилмоқда.

Тожикистондаги ахборот воситалари хабарига кўра, Хитой тараққиёт банки республикага 73 миллион доллар ҳажмида сармоя ётқизишга тайёр. Тожикистон президенти Имомали Раҳмоновнинг 21 январ куни тугаган бир ҳафталик Хитой сафари давомида бу ҳақда келишувга эришилган.

22 январ куни кечқурун “Ал-Арабия” телеканалининг Ғазо шаҳридаги идораси олдида кучли портлаш юз берди.

Бахтли тасодиф туфайлигина портлашдан ҳеч кимга зарар етмади. Воқеа содир бўлган пайтда идорада ходимлар бўлмаган. Портлаш сабаби дарҳол маълум қилингани йўқ. Ҳозирча ҳеч бир гуруҳ мазкур портлаш учун масъулиятни ўз зиммасига олмади. “Ал-Арабия” телеканали ўз кўрсатувларини Ер сунъий йўлдош орқали эфирга узатади.

Ўтган ҳафта Москвада вафот этган қозоғистонлик таниқли қўшиқчи Мурат Носиров 22 январ куни Алматида дафн қилинди.

37 яшар Носиров 19 январ куни Москвадаги ўз уйи деразасидан пастга йиқилиб ўлган эди. Рафиқаси Наталия Бойконинг айтишича, Мурат телевизорга антенна ўрнатаётган пайтда деразадан йиқилиб кетган. Бироқ Россия милицияси ходимлари Мурат Носиров гиёҳванд модда таъсирида ўз жонига қасд қилган бўлиши мумкин, деган фикрда.

Қозоғистоннинг Олмаота шаҳри суди президент Нурсултон Назарбоевни ҳақоратлашда айбланган журналист Казис Тўғузбоевни икки йиллик шартли қамоқ жазосига ҳукм қилди.

К.Тўғузбоевнинг ўтган йили Интернетда эълон қилинган мақоласи жиноят иши қўзғатилишига сабаб бўлди. Мақолада журналист 2006 йилда мухолифат раҳбари Олтинбек Сарсенбоев ўлдирилиб кетилгани учун Н.Назарбоевни танқид қилган эди.

Қирғизистон парламентининг конституциявий қўмитаси президент Қурманбек Бақиевнинг Феликс Қулов номзодини бош вазирликка иккинчи бор тавсия этиши қонунга зидлигини маълум қилди.

Қўмита раиси Исҳоқ Масалиевнинг билдиришича, президент парламентга бошқа номзодни таклиф этишга ҳақлидир. Бироқ ҳукумат вакили Мирза Қапаров қўмита мажлисида чиқиш қилиб, президент бир номзодни уч марта тавсия этишга, номзод тасдиқланмаса, парламентни тарқатиб юбориш ҳуқуқига эгалигини таъкидлади. Президент бош вазирликка Ф.Қулов номзодини биринчи марта тавсия этганида парламент уни рад этганди. 19 январь куни президент бу номзодни иккинчи марта парламентга тақдим этди.

Ўзбекистон мухолифати вакиллари мамлакат раҳбари Ислом Каримовнинг конституцияда белгиланган президентлик ваколати муддати 22 январь куни тугаганини билдирмоқда.

Уларнинг таъкидича, шу йилнинг декабрь ойида бўлиб ўтиши кутилаётган президент сайловигача И.Каримов нолегитим давлат раҳбари ҳисобланади. И.Каримов илк бор 1991 йилда Ўзбекистон президенти этиб сайланган эди. Унинг 2000 йил 22 январда бошланган иккинчи муддати 2002 йилда ўтказилган референдум натижаларига кўра яна икки йилга узайтирилганди.

Покистон шимолидаги Вазиристон вилоятида ҳарбийлар кетаётган машинага худкуш ҳужум қилгани оқибатида уч аскар нобуд бўлди, яна тўққиз нафари жароҳатланди.

Афғонистонга чегарадош бўлган бу вилоятда кейинги пайтларда “Толибон” ва “Ал-Қоида” ҳаракати жангарилари фаоллашгани айтилмоқда.

Араб дунёсининг 170га яқин таниқли уламоси Ироқда авж олиб бораётган зўравонликларни қоралади.

Улар зўравонликлар Ироқни парчаланиб кетишга етаклаётганини билдирди. “Сунний ва шиалар битта дин вакилларидир ва оғир синовлар даврида улар бирлашиши даркор”, - дейилади уламоларнинг Қатар пойтахти Доҳадаги анжумандан сўнг қабул қилинган баёнотида.

Бағдодда амалга оширилган навбатдаги қўпорувчиликлар оқибатида 90 фуқаро нобуд бўлди, яна 150га яқин одам жароҳатланди.

Хабарларга кўра, шиалар яшайдиган ҳудуднинг гавжум бозорларидан бирида бирин-кетин иккита бомба портлатиб юборилган. Бир неча соат аввал Бағдод шимолида бомба портлаши туфайли 14 киши ҳалок бўлганди. Ҳафта охирида Ироқда АҚШнинг 20дан ортиқ ҳарбийси ҳалок бўлган эди. Уларнинг 13 нафари Бағдод яқинида ҳарбий вертолёт ерга қулаши натижасида ўлганди. Вертолёт ҳалокати сабаби ҳамон номаълум.

Беш кунлик сафар билан Ҳиндистонда бўлиб турган Россия мудофаа вазири Сергей Иванов бу мамлакатнинг “Times” газетасига интервью берди.

“Россия ва Ҳиндистон ўртасида ҳарбий ҳамкорлик яхши йўлга қўйилган. Бироқ томонлар мавжуд ҳамкорликни янада ривожлантиришга иштиёқ билдирмоқда”, - деди.
25 январь куни Россия президенти Владимир Путин ҳам расмий ташриф билан Ҳиндистонга келади.

Италия Ташқи ишлар вазирлигининг маълум қилишича, Афғонистон президенти Ҳомид Карзай 16-17 февраль кунлари Римга сафар қилади.

Жорий йилнинг апрель ойида Италияда Афғонистонга бағишланган халқаро анжуман ўтказилиши режалаштирилган. Айни пайтда Италиянинг 2 мингга яқин ҳарбийси НАТО қўмондонлиги остида Афғонистонда хизмат қилмоқда. Ўтган ҳафтада Италия ташқи ишлар вазири Массимо д’Аллемо Афғонистондаги италиялик ҳарбийлар мамлакатда бундан сўнг ҳам қолишини маълум қилган эди.

НАТОнинг Афғонистондаги кучлари қўмондони Дэвид Ричардснинг айтишича, “Толибон” жангариларини 1 йил ичида бутунлай тор-мор этиш учун мамлакатдаги ҳарбийлар сонини кўпайтириш лозим.

Генерал “Guardian” газетасига берган интервьюсида НАТОни 2007 йилда толиблар таҳдиди кучайишини тан олмаслик оқибатларидан огоҳлантирди. Унинг таъкидлашича, Афғонистонни қайта тиклаш ишларида нафақат ҳарбийлар, балки жамоат ташкилотлари ҳам ўз ҳиссасини қўшмоғи даркор. Ҳозир Афғонистонда қарийб 40 минг кишилик халқаро қўшин жойлаштирилган, улардан 30 мингдан ортиғи НАТО қўмондонлиги остида хизмат қилмоқда. АҚШнинг Афғонистондаги қўшинлари қўмондони генерал Карл Эйкенбери эса ўз мамлакати Афғонистонни халқаро террорчилардан тозалаш амалиётларини бундан сўнг ҳам давом эттиражагини алоҳида таъкидлади.

Покистон президенти Парвез Мушарраф Шарм аш-Шайх шаҳрида Миср президенти Ҳусни Муборак билан учрашди.

Покистон ташқи ишлар вазири Хуршид Касурийнинг журналистларга билдиришича, президентлар Араб-Исроил тинчлик музокараларини қўллаб-қувватлашда мусулмон давлатлари якдил бўлиши лозимлиги айтган. Президентлар учрашуви чоғида мусулмон дунёсида экстремизм каби иллатларга қарши кураш масалалари, Ироқ, Афғонистон ва Покистон чегарасидаги вазият муҳокама қилинган.

Афғонистон таълим вазири Муҳаммад Хониф Амтар толибларнинг ўз назорати остидаги ҳудудларда мактаблар ташкил этиш режаларини қоралади ва ҳукумат бунга ҳеч қачон йўл қўймаслигини билдирди.

Унинг фикрича, мазкур режа баҳонасида толиблар Покистондаги террорчилар тайёрлаш марказларини Афғонистонга кўчириш ниятида. 21 январь куни толиблар расмийси Ғарб ва ғарбпараст ҳукуматлар ташвиқотига зарба бериш мақсадида янги мактаблар очиш режасини маълум қилганди. Толиблар бу мақсад учун бир миллион доллар сарфлашни режалаштирган.

Россиянинг Владивосток шаҳрида “Губерня” маҳаллий телевидениеси журналисти Константин Боровко ўлдириб кетилди.

Бу ҳақда хабар тарқатган Россия ахборот агентликларининг ёзишича, К.Боровко номаълум шахслар томонидан калтакланган ва олган жароҳатлари оқибатида вафот этган. Нью-Йоркда жойлашган Журналистларни ҳимоя қилиш қўмитаси маълумотига кўра, сўнгги 15 йил мобайнида Россияда 40дан ортиқ журналист суиқасд қурбони бўлган.

Беларус ва Эрон ўзаро ҳарбий ҳамкорликни кенгайтиришга келишиб олди.

Бу ҳақдаги шартнома Беларус мудофаа вазири Леонид Малцевнинг эронлик ҳамкасби Мустафо Муҳаммад Нажжар билан бўлиб ўтган учрашуви чоғида имзоланди. Якшанба куни Л.Малцев Эрон президенти Маҳмуд Аҳмадийнажот ва ҳукуматнинг бошқа расмийлари билан ҳам учрашган эди.


* * * * * * * * * *



Россия президенти Владимир Путин Сочида Германия Канцлери Ангела Меркел билан учрашди.

Музокарадан сўнг Путин ўз мамлакати энергия масаласида Европа билан барча томон манфаатлари ҳисобга олинган ҳолда диалог олиб боришга тайёрлигини айтди: “Биз транзит давлатлар билан ҳамкорлик қилишни хоҳлаймиз. Лекин шуни яна бир марта таъкидламоқчиман, муносабатлар ҳамма учун аниқ ва умумий бўлган, сиёсатдан ҳоли принцпларга асосланган бўлиши керак. Шунинг учун биз барчага ҳамкорлик учун “ҳа”, текинхўрлик учун “йўқ” деяпмиз”, – деди Россия раҳбари.
Владимир Путин Россия Польшадан гўшт импорт қилинишига жорий этилган чекловини бекор қилиш хусусида конструктив иш олиб боришга тайёрлигини билдирди. 1 январдан бошлаб Европа Иттифоқига раислик қилаётган Германия Канцлери А. Меркел келишмовчиликлар олдини олиш учун Россия билан мулоқотни яхшилаш кераклигини айтди.

Давомини ўқинг

Кўрмай қолган бўлсангиз

XS
SM
MD
LG