Линклар

Шошилинч хабар
23 август 2019, Тошкент вақти: 09:42

Халқаро янгиликлар

Афғонистонда полициячилар пистирмага учради

Афғонистон жанубида Толиблар жангарилари пистирмадан уюштирган ҳужум оқибатида 20 нафар полиция ходими ҳалок бўлди.

Ҳилманд вилояти ҳокимининг матбуот котиби Дауд Аҳмаднинг айтишича, қурбон бўлганлар Муса Қала тумани ҳокимининг қўриқчилари бўлган.

Толиблар матбуот вакили Қори Юсуф Аҳмад полиция ходимлари билан отишма пайтида толиблардан икки киши ўлгани, тўрт нафари яраланганини айтди.

Украинага газ бериш тўхтатилди

Россиянинг Газпром ширкати Украинага табиий газ етказиб беришни тўхтатди.

Украина ўз қарзини келишилган муддат ичида тўлай олмагани бунга сабаб бўлган. Газпром матбуот вакили Сергей Куприянов муаммони янги музокаралар ўтказиш орқали ҳал этишга чақирди. Аммо унга кўра, Украина делегацияси Газпром идорасини тарк этган.

Интерфакс ахборот агентлиги хабарига кўра, Украина президенти Виктор Юшченко ва бош вазир Юлия Тимошенко эълон қилган қўшма баёнотда Украина ҳар минг куб метр газ учун 201 АҚШ долларидан ҳақ тўлашга тайёрлиги билдирилган. Аммо Газпром минг куб метр газни 250 доллардан сотиб олишни таклиф қилган. Бу Европага сотилаётган газ нархидан кам, аммо шу пайтгача Украинага етказиб берилган газ нархидан юқори.

Айни пайтда, Европа Иттифоқи Россия ва Украинани газ муаммосини ҳал этишга чақирди.

Чехия ЕИга раислик қилади

1 январдан бошлаб Чех республикаси Европа Иттифоқи раислигини қабул қилиб олди.

Чехия Ғазодаги можарога ечим топиш учун Яқин Шарққа Европа Иттифоқининг дипломатик миссиясини жўнатишини режалаётганини билдирди.

Прага шаҳрида сўзлаган Чехия бош вазири Мирек Тополанек миссия аъзолари орасида ЕИнинг Ташқи сиёсати мутасаддиси Хавьер Солана, Ташқи алоқалар комиссари Бенита Ферреро Валднер, шунингдек, Чехия, Франция ва Швеция Ташқи ишлар вазирлари ҳам бўлишини маълум қилди. Тополанек миссиянинг жўнаб кетиш вақтини айтмади.

Ғазо: қурбонлар сони 400 га етди

Исроил ҳарбийларининг Хамас ҳаракатига қарши ҳужумлари олти кундан буён кун давом этмоқда.

Исроил учқичлари Ғазо минтақасидаги Хамасга тегишли биноларни бомбардимон қилди. Хабарларга кўра, Фаластин парламенти биносига ҳам ҳаводан ҳужум уюштирилган.

Якшанба кунидан бери Исроил армияси уюштирган ҳужумлар оқибатида ўлган фаластинликлар сони тахминан 400 кишини ташкил этмоқда. Фаластинликлар амалга оширган ракета ҳужуми натижасида тўрт исроиллик ўлди.

Исроил учқичлари уюштирган ҳужумлар натижасида 2004 йилдан бери биринчи марта Хамас ҳаракатининг юқори лавозимли сиёсий раҳбарларидан бири Низар Райан халок бўлган.

Яқин Шарқ масаласини муҳокама қилиш учун БМТ хавфсизлик кенгаши фавқулодда йиғилиш ўтказди. Халқаро ҳамжамият эса Исроил ва Хамасни ўт очишни тўхтатишга чақирмоқда.

Айни пайтда Теҳронда талабалар Исроил армиясининг Ғазога ҳужумига норозилик юриши ўтказди. Юзлаб талабалар Ғазога бориб Исроилга қарши урушишга тайёрлигини билдирди.

Жаҳон янги йилни қарши олди

Дунё давлатларида янги 2009 йил катта тантаналар ва мушакбозлик билан кутиб олинди.

Нью Йоркдаги “Times Square”да АҚШнинг собиқ президенти Билл Клинтон ва унинг рафиқаси, янги АҚШнинг янги маъмуриятидаги Давлат котиби Хиллари Клинтон анъанавий биллур тўпни туширадиган тугмани босишди.

Дунё бўйича янги йилни кутиб олиш тантаналарида фожеалар ҳам юз берди. Таиланд пойтахти Бангкокдаги тунги клубда ёнғин чиққани оқибатида 60 киши нобуд бўлди.

Миср, Иордания, Дубай ва Сурияда Исроил ҳарбийлари ҳужумига учраган фаластинликларга бирдамлик тимсоли сифатида янги йил тантаналари бекор қилинди.

Газпром украиналикларни шантажда айбламоқда

Россиянинг Газпром ширкати вакилларига кўра, украиналиклар, агар икки давлат ўртасидаги газ можароси ҳал этилмайдиган бўлса, ўз ҳудуди орқали Европага транзит қилинаётган Россия газининг маълум миқдорини олиб қўйиш билан таҳдид қилган.

Маълум бўлишича, Украинанинг Нафтогаз ширкати Газпромга йўллаган мактубида, агар томонлар келишувга эриши олмаса, транзит газидан фойдаланишга ишора қилган.

Газпром раиси ўринбосари Александр Медведев Украина томонининг бу каби иддаоларини "шантаж" дея баҳолади. Ҳозирда Украина томони бу маълумотларни тасдиқлаганича йўқ.

ЕИ Боку ҳаракатидан таажжубда

ЕИ Озарбойжон ҳукуматининг хорижий радиостанциялар фаолиятини таъқиқлашга оид қарори ўзаро муносабатларга салбий таъсир этиши мумкинлиги тўғрисида огоҳлантирди.

ЕИ ташқи алоқалар мутасаддиси Бенита Ферреро Валднернинг таъкидича, эндиликда озарбойжонлик тингловчилар холис ва мустақил манбалардан маълумот олиш имкониятидан маҳрум бўлади.

30 декабр куни Озарбойжон Миллий телевидение ва радио кенгаши хориж радиостанцияларининг мамлакатдаги фаолиятини тўхтатиш тўғрисида қарор қабул қилганди.

1 январдан бошлаб кучга кирадиган ушбу қарор Би-Би-Си, Америка Овози ва Озодлик радиоларининг озарбойжон тилидаги хизмати фаолиятига таъсир этади.

Айни пайтда АҚШ Давлат департаменти ва ЕХҲТ расмий Боку ҳаракатларини кескин танқид қилди.

Украина газ можаросини ҳал этиш ниятида

Украина бош вазири Юлия Тимошенко бугун Москвага сафар қилади.

Хабарларга кўра, Украина бош вазири бу ерда Россия ҳукумати расмийлари билан учрашиб, икки давлат ўртасида авж олиб бораётган газ можаросини ҳал этиш йўлларини муҳокама қилади.

30 декабр куни расмий Киев ўзининг газдан бир ярим миллиард доллар қарзини Россияга тўлаганини маълум қилган эди. Бироқ Россия томони ҳеч қандай тўлов амалга оширилмаганини таъкидламоқда.

Шунингдек, Россиянинг Газпром ширкати 1 январдан бошлаб Украинага газ беришни тўхтатиши тўғрисида яна бир бор огоҳлантирди.

Ғазода вазият кескинлигича қолмоқда

Исроил ҳукумати Ғазо минтақасида 48 соатлик сулҳ жорий этиш таклифини рад этди.

Кеча Франция ҳукумати Ғазо минтақасидаги фуқароларга дори-дармон ва озиқ-овқат маҳсулотлари етказиб бериш мақсадида Исроилга вақтинчалик сулҳ жорий қилишни таклиф қилган эди.

Бироқ Исроил Ташқи ишлар вазирлиги расмийси Йигал Палморга кўра, Франция таклифида Исроил ҳудудларининг фаластинликлар томонидан ўққа тутилмаслигини кафолатловчи механизмлар мавжуд эмас.

Исроил ҳарбий учқичлари бугун ҳам Ғазо минтақасида Хамас ҳаракатига тегишли экани айтилаётган биноларни бомбардимон қилди.
Фаластинлик шифокорларга кўра, шу кунгача Исроил ракеталаридан 370 дан зиёд фуқаро нобуд бўлиб, 1700 киши тан жароҳати олган.

Хамас ҳаракати ҳам Исроил ҳудудини ракеталардан ўққа тутишни давом эттирмоқда.

Қирғизистон: собиқ вазирга айблов илгари сурилмоқда

Қирғизистоннинг собиқ мудофаа вазири, ҳозирда мухолифат етакчиларидан бирига айланган Исмоил Исақов ўз мансабини суиистеъмол қилганликда айбланмоқда.

Қирғизистон прокуратураси тарқатган маълумотга кўра, Исақовга ҳарбий техника йўқолиши ҳамда бюджет маблағини ноқонуний равишда ишлатиш ҳолати юзасидан айблов илгари сурилмоқда.

Исмоил Исақов эса ўзига қўйилган айбловларни рад этмоқда.

Покистон: жангариларга қарши амалиётлар давом этаётир

Покистон ҳарбий вертолётлари Афғонистон чегарасига яқин Хайбар довонида жангарилар истеҳкомларини бомбардимон қилди.

Маълум бўлишича, ҳаво зарбаларидан сўнг, пиёда қўшинлари ушбу ҳудудда ҳарбий амалиётлар олиб борган.

Хайбар довони орқали Афғонистондаги халқаро кучларга таъминот етказиб берилади. Сўнгги ой давомида жангарилар мазкур ҳудудда Афғонистондаги АҚШ ва НАТО кучлари таъминоти учун ишлатиладиган автоулов маскани ҳамда бир нечта омборга ҳужум уюштирган эди.

Франция мудофаа вазири Афғонистонда

Франция мудофаа вазири Эрве Морен Афғонистонга сафар қилди.

Хабарларга кўра, Франция расмийси Кобулда Афғонистон президенти Ҳамид Карзай ва мамлакатдаги Франция қўшинлари қўмондонлари билан учрашишни режалаштирган.

Маълум бўлишича, ҳозирда Франциянинг уч мингга яқин аскари Афғонистондаги халқаро кучлар сафида хизмат қилмоқда.

Хитой: гўдакларни заҳарлаган компания раҳбари судга тортилди

Бугун Хитойда минглаб болаларнинг заҳарланишига сабаб бўлган сут маҳсулотлари ишлаб чиқарган компания раҳбари устидан маҳкама жараёни бошланди.

Агар компания раҳбари айбдор деб топилса, унга ўлим жазоси тайинланиши мумкин.

Маълум бўлишича, ушбу компания ёш болаларга мўлжалланган сут маҳсулотларига пластмасса ишлаб чиқаришда қўлланиладиган меламин моддасини қўшган.

Меламин қўшилган сутдан эса камида олтита бола нобуд бўлди, 300 мингга яқини эса заҳарланиш ташхиси билан шифохонага ётқизилди.


Бир сония узоқроқ яшаймиз

Қаерда яшаб турганингизга боғлиқ тарзда, 2008 ёки 2009 йилингиз бошқа йилларга қараганда бир сонияга узоқроқ давом этади.

Гап шундаки, Ер шарининг айланиши йилдан-йилга секинлашаётган сайин дунёнинг энг дақиқ атом соатлари бир оз чалғиб кетди. Шунинг учун Гринвич бўйича 31 декабрдан 1 январга ўтар кечанинг сўнгги дақиқасига ошиқча бир сония қўшилади.

Озарбойжон расмийлари “Озодлик”ни таъқиқлади

Биринчи январдан бошлаб амал қиладиган ушбу таъқиқ асосида мамлакатда Би-Би-Си, Америка овози ҳамда Озодлик радиоларининг Озарбойжон хизматлари ёпиб қўйилади.

Матбуот эркинлигини ҳимоя қилувчи етакчи ташкилотлар Озарбойжон ҳукуматини қоралади.

Озодлик радиосининг президенти Жефри Гедмин Озарбойжон ҳукуматининг қароридан ҳафсаласи пир бўлганини айтди.

ЮКОС вакили озод қилинди

ЮКОС ширкатининг оғир ҳасталикка чалинган собиқ мулозими қамоқдан озод этилди.

ОИТС ва саратон билан касалланган ЮКОС компаниясининг собиқ раҳбарларидан бири Василий Алексанянни озод этишга қаратилган компания бир неча йил давом этди.

Жорий ой бошида Россия суди Алексаняннинг муддатидан аввал озод этилиши учун 2 миллион долларга яқин товон пули тўланиши лозимлиги ҳақида қарор қабул қилганди.

Бир неча йил аввал ЮКОСни Россиядаги энг қудратли нефт компаниясига айлантирган Михаил Ходорковский ҳамда Платон Лебедевлар ҳамон қамоқда қолаётир.

Британия ва Австралия қўшинлари Ироқда қолади

Кеча Ироқ ҳукумати билан бу борадаги келишувга имзо қўйилди.

1 январ куни БМТ нинг Ироқдаги мандати тугайди ва шу сабабли хорижий қўшинларининг Ироқдаги ҳозирлиги савол остида қолаётганди.

Рус-украин газ можароси тугамади

Украина ўзининг газдан бир ярим миллиард доллар қарзини Россияга тўлаганини маълум қилди.

Айни пайтда Россиянинг Газпром монополияси пулни қабул қилиб олганини тасдиқламаётир.

Украина президенти Виктор Юшченко ўз баёнотида Украина томони 2008 йил мобайнида йиғилиб қолган газ қарзини узганини ва келаси йилга янги шартномани имзолашга тайёр эканини таъкидлаган.

Аввалроқ Газпром компанияси Украина ўзининг икки миллиард доллар қарзини тўламаса, биринчи январдан бошлаб бу давлатга газ таъминоти тўхтатилиши ҳақида огоҳлантирганди.

Газпром матбуот вакили Сергей Куприанов жорий вазиятдан афсусда эканини айтганди.

- Украинанинг қарзи ҳамон 2 миллиард долларга яқин миқдорни ташкил этмоқда. Жорий газ шартномасининг муддати икки кундан кейин тугайди, биз эса ҳамон келаси йилга ҳеч қандай шартномани имзолаганимиз йўқ. Бу эса, афсуски, газ таъминотини давом эттиришимиз учун ҳеч қандай асос йўқлигини англатади, - деди Газпром расмий вакили.

Воситачилар Исроил ва Хамасни муросага чақирди

Яқин Шарқдаги тинчлик жараёнида воситачилик қилаётган тўртлик гуруҳи Исроил ва Хамасни дарҳол ўт очишни тўхтатишга чақирди.

БМТ бош котиби Пан Ги Мун кеча тўртлик аъзолари АҚШ давлат котиби Кондолиза Райс, Россия ташқи ишлар вазири Сергей Лавров ва Европа Иттифоқининг ташқи ишлар мутасаддиси Хавьер Солана билан сўзлашувлар ўтказди.

Теҳронда Британия элчихонасига ҳужум қилинди

Теҳронда ўнлаб намойишчилар Исроилнинг Ғазодаги ҳаракатларини қўллаб-қувватлаган Британиянинг элчихонасига ҳужум қилди ва элчихонанинг байроқларини олиб ташлаб, ўрнига Фаластин байроқларини осиб қўйдилар.

АҚШ президенти Жорж Буш Фаластин президенти Маҳмуд Аббос билан телефонлашиб, Ғазодаги зўравонликни тўхтатишга эришиш йўлларини муҳокама этди.

Ғазода дори-дармон етишмаяпти

Халқаро қизил хоч қўмитаси Ғазодаги зўравонликлар оқибатида жабр кўрган тинч фуқаролар аҳволидан жиддий хавотирда эканини билдирди.

Қўмита томонидан эълон қилинган баёнотда айтилишича, 29 декабр кунига қадар Ғазо минтақаси касалхоналарига 1266 нафар яраланган одамлар жойлаштирилган. Касалхоналарга қон ва дори-дармонлар фавқулодда етишмаётир.

Россия: президент олти йилга сайланадиган бўлди

Президент Дмитрий Медведев Россия президенти ва Давлат думаси депутатлари ваколатларини узайтиришни назарда тутган қонун лойиҳасига имзо чекди.

Конституцияга киритилган янги ўзгартишларга мувофиқ эндиликда Россия президенти олти йил муддатга, депутатлар эса беш йилга сайланади.

Мазкур қонун лойиҳаси ноябр ойида Россия парламентининг иккала палатаси ва кейинчалик минтақа кенгашлари томонидан маъқулланган эди.

Миср Ғазо билан чегарани ёпиқ сақламоқчи

Миср президенти Ҳусни Муборак Фаластин президенти Маҳмуд Аббос Ғазо минтақасида ҳокимиятни қайта қўлга киритмагунича Миср Ғазо билан ўз чегараларини ёпиқ ҳолда сақлаши тўғрисида маълум қилди.

- Маҳмуд Аббос ва ЕИ кузатувчилари рухсатисиз чегараларнинг очилиши радикал руҳдаги жангариларнинг Ғазо минтақасига ўтишига хизмат қилади, - дея қўшимча қилди Миср президенти.

Ибодийнинг яна бир идораси расмийлар нишонида

Нобел мукофоти лауреати, эронлик Ширин Ибодийга тегишли яна бир идора ўзини солиқ ходимлари дея таништирган шахслар томонидан тинтув қилинди.

Бундан икки ҳафта муқаддам Эрон хавфсизлик хизмати ходимлари Теҳронда Ширин Ибодий етакчилигидаги инсон ҳуқуқлари марказига бостириб кириб, ходимларни бинодан ҳайдаб чиқариб¸ идорани муҳрлаб қўйган эди.

Расмийлар даъвосича, инсон ҳуқуқлари ҳимоячилари ғайриқонуний ҳаракат қилган ҳамда уларда фаолият юритиш учун махсус рухсатнома бўлмаган.


Покистон қўшинлари жангариларга қарши амалиётлар ўтказмоқда

Покистон ҳукумат қўшинлари Афғонистонга яқин чегара ҳудудда жангариларга қарши кенг кўламли ҳарбий амалиётлар ўтказа бошлади.

Хабарларга кўра, шу важдан Покистон томони Афғонистондаги халқаро кучларга таъминот етказиб берувчи асосий йўлни ёпиб қўйган.

Сўнгги ой давомида жангарилар мазкур ҳудудда Афғонистондаги АҚШ ва НАТО кучлари таъминоти учун ишлатиладиган автоулов маскани ҳамда бир нечта омборга ҳужум уюштирган эди.

Қайд этиш жоизки, Афғонистондаги халқаро кучларга етказилиб берилаётган ёнилғи ва озиқ-овқатнинг 75 фоизи айнан шу ҳудуд орқали олиб ўтилади.

Давомини ўқинг

XS
SM
MD
LG