Линклар

Шошилинч хабар
20 август 2019, Тошкент вақти: 06:22

Халқаро янгиликлар

Қозоғистон ЕХҲТ раислигини қабул қилди

1 январдан бошлаб Қозоғистон Марказий Осиё, қолаверса, МДҲ давлатлари ичида биринчи бўлиб Европада хавфсизлик ва ҳамкорлик ташкилоти раиси вазифасини бажаришга киришди.

Сўнгги бир йил давомида бу ташкилотга Юнонистон раислик қилган эди.

Қозоғистон Ташқи ишлар вазири ва Давлат котиби Канат Саудабаев “Ванкувердан Владивосток”ка қадар бўлган ҳудудда хавфсизликни мустаҳкамлаш ва ҳамкорликни кенгайтириш учун Қозоғистон бор имкониятни ишга солишини айтди.

ЕХҲТ доимий кенгашининг йиғилиши 14 январга белгиланган. Лента.ру хабарига кўра, халқаро ташкилот раҳбарлари йиғилиши Вена шаҳрида бўлиб ўтади.

Марказий разведка бошқармаси толиблардан ўч олади

АҚШ Марказий разведка бошқармаси Афғонистондаги худкуш ҳужум оқибатида ташкилотнинг етти ходими ва бир афғонистонлик ўлганига жавобан толиблардан ўч олинишини айтди.

Хўст вилоятидаги базада амалга оширилган ҳужумда МРБнинг яна олти ходими яраланган.

Хўстдаги базада Афғонистон хавфсизлик кучлари ишламаётганини таъкидлаган Афғонистон Мудофаа вазирлиги Толибон тарафдори бўлган худкуш кимса Афғонистон армияси ҳарбийси бўлгани ҳақидаги толиблар иддаосини рад қилди.

Бироқ НАТО етакчилигидаги кучлар матбуот вакили базада афғон хавфсизлик ходимлари ишлаганини айтди.

АҚШ президенти Барак Обама разведка хизмати ходимлари ўлганига таъзия изҳор қилди.

Покистонда БМТ ходимларнинг бир қисми кўчирилади

Покистонда хавфсизлик билан боғлиқ вазият беқарор бўлаётганига жавобан БМТ халқаро ходимларнинг чорак қисми кўчирилишини маълум қилди.

2009 йилда Покистонда БМТнинг камида 11 ходими ўлдирилди.

Толиблар бош қароргоҳи ҳисобланган Жанубий Вазиристон вилоятида Покистон армияси кенг кўламли амалиётлар бошлаганидан бери 500дан ортиқ одам нобуд бўлди.

Россияда энг арзон ароқнинг нархи ошди

1 январдан бошлаб Россияда ярим литрли ароқ нархи чакана савдода 89 рубл, яъни, уч АҚШ доллардан арзонга сотилмаслиги керак.

Спиртли ичимликлар бозорини мувофиқлаштириш бўйича тузилган Федерал хизмат ўтган йил шу ҳақда қарор чиқарган.

Экспертлар фикрича, бу чора ноқонуний равишда спиртли ичимликлар ишлаб чиқариш ва алкоголизмга қарши курашда ёрдам беради.

Бироқ мутахассислар агар рисоладагидек назорат қилинмаса, бу чора самара беришига шубха билдирмоқда.

Маълумотларга кўра, Россия бозоридаги ароқларнинг қарийиб ярми ноқонуний равишда ишлаб чиқарилган.

Россияда ҳар йили 500 мингга яқин одам спиртли ичимликлар истеъмоли билан боғлиқ касалликлардан нобуд бўлади.

АҚШ Покистон ҳудудида ҳужум уюштирди

Покистон разведка хизмати расмийлари Афғонистон чегараси яқинида АҚШ ҳарбийлари амалга оширган ракета ҳужумида уч киши ўлганини маълум қилди.

Расмийларга кўра, жума кунги ҳужум Шимолий Вазиристон вилоятининг Мир Али шаҳри яқинида уч киши кетаётган автомобилга қарши уюштирилган.

Бу Америка ҳарбийларининг сўнгги 12 соат ичида уюштирган иккинчи ракета ҳужумидир. Маълумотларга кўра, пайшанба кунги ҳужумда ҳам уч киши ўлган.

Ҳукуматга моил қабила бошлиғи суиқасд қурбони бўлди

Покистоннинг Бажур туманида йўл четига ўрнатилган бомба портлагани оқибатида беш киши жумладан толибларга қарши бўлган қабила бошлиғи нобуд бўлди.

Маҳаллий ҳокимиятнинг юқори лавозимли расмийси Зокир Ҳусайн Афридийга кўра, ҳукуматга мойил қабила оқсоқоли Гулшали Хон ва яна тўрт киши Саларзай қишлоғида узоқдан бошқариладиган бомба портлатилгани оқибатида халок бўлган.

Покистон ҳарбийлари Бажурда август ойидан бери толибларга қарши амалиётлар олиб бормоқда.

Бангладешда 18 одам автохалокат қурбони бўлди

Полиция маълумотига кўра, тезликни оширган ҳайдовчи автобусни бошқара олмаган.

Оқибатда автобус пойтахт Дакадан 60 километр нарида жойлашган Фаридпур туманидаги каналга қулаган.

Халокат пайтида жароҳат олган 56 йўловчи ҳозирда касалхоналарда даволанмоқда.

Тожикистон газ масаласида Ўзбекистон билан келишди

“Тожиктрансгаз” Бош директор ўринбосари Шавкат Шоимов айтганига асосланиб Фарғона.Ру ахборот агентлиги тарқатган хабарга кўра, Тожикистон 2010 йилда Ўзбекистондан 250 миллион куб метр газ сотиб олади.

Шоимов Тошкентда олиб борилган қизғин музокаралардан сўнг шу ҳақда келишув имзоланганини ва ўзбек газининг нархи жаҳон бозоридаги нархга қараб белгиланишини айтган.

Янги йил биринчи чорагидаги газ нархи январ ойи бошида маълум бўлади.

Тожикистон статистика қўмитаси маълумотига кўра, 2009 йил январ-ноябр ойларида Тожикистон Ўзбекистондан 47 миллон 600 минг АҚШ долларига 198 ярим миллион куб метр табиий газ сотиб олган.

Афғонистонда хорижликлар жиддий талафот кўрди

Қандаҳор вилоятида йўл четига ўрнатилган бомба портлагани натижасида канадалик тўрт аскар ва бир журналист нобуд бўлди.

Ундан олдин худкуш кимса Хўст вилоятидаги базада ўзини портлатди.

Оқибатида саккиз нафар АҚШ фуқароси халок бўлди.

АҚШ Марказий разведка бошқармаси ўлганлар орасида ўз ходимлари борлиги ҳақидаги маълумотни шарҳламади.

Хўст вилоятида амалга оширилган ҳужум учун масъулиятни Толибон ҳаракати ўз зиммасига олди.

Толиблар матбуот вакили Забихулла Мужоҳид худкуш кимса Афғонистон армияси аскари кийимида бўлганини айтди.

Россия махфий келишувни текширмоқда

Россия Ташқи ишлар вазирлиги вакили Андрей Нестеренко ўз мамлакати Қозоғистон ва Эрон уран савдоси бўйича махфий келишувга эришгани ҳақидаги маълумотни текшираётганини айтди.

БМТ Хавфсизлик кенгаши қабул қилган 1737 рақамли резолюцияда Эронга ядровий материаллар сотиш ман қилинганини урғулаган Нестеренко бу резолюцияга “барча ҳукуматлар қатъий риоя қилиши”га Россия ишонишини айтди.

29 декабрдан бери қатор ахборот агентликлари Қозоғистон 1 минг 350 тонна уранни Эронга сотиш масаласини кўриб чиқаётгани ҳақида хабарлар тарқатди.

Ҳам Қозоғистон ҳам Эрон бу маълумотни инкор қилди.

Шинжонда “Миллий бирлик тўғриси”да қонун қабул қилинди

Хитой назоратида бўлган Шинжон Уйғур мухторияти ҳукумати миллий бирликка таҳдид солувчи ғояларни тарқатишни қатъий таъқиқловчи қонунни қабул қилди.

Шинжон вилояти маъмурияти интернет сайтида “Этник бирлик учун ўқитиш” деб номланган қонун сешанба куни қабул қилингани билдирилган.

Мазкур қонун якка шахс ва ташкилотларга миллий бирликка зид фикрларни тарқатиш, йиғилишлар ўтказиш ва миллий бирликка қарши материаллар ишлаб чиқиш ва маълумотлар тарқатишни таъқиқлайди.

Давлатга қарашли ахборот воситаларида у ёки бу маълумот ва фикрлар миллий бирликка таҳдид солиши мумкинлиги қандай аниқланиши билдирилмаган.

Бундай жиноят учун қандай жазо белгиланиши ҳам ошкор қилинмаган.

2009 йил июлида Шинжонда маҳаллий уйғурлар ва келгинди хан хитойликлар ўртасида содир бўлган тўқнашувларда расмий маълумотларга кўра, қарийиб 200 одам ўлган.

АҚШ ўз фуқароларини огоҳлантирди

Индонезиядаги АҚШ элчихонаси Америка фуқароларини янги йилда Бали курорт оролида террор ҳужуми содир этилиши мумкинлиги ҳақида огоҳлантирди.

Элчихона интернет сайтида янги йил арафасида террор ҳужуми уюштирилиши мумкиндиги ҳақида Бали ҳокими Мангку Пастика огоҳлантиргани билдирилган.

Кейинроқ Пастиканинг матбуот вакили Путу Суардика ҳоким “Балида террор ҳужуми бўлиши мумкинлиги ҳақида ҳеч қачон гапирмагани, бу ҳақда баёнот бермагани ва огоҳлантирмаганини” айтди.

Балида ғарблик туристларга қарши қатор террор ҳужумлари уюштирилган.

Хусусан, 2002 йил октябридаги ҳужумда 202 одам, асосан туристлар нобуд бўлган.

Финляндияда бир шахс тўрт одамни отиб ўлдирди

Финляндия телевидениеси Эспу шаҳридаги савдо марказида бир шахс одамларга қарата ўт очгани оқибатида камида тўрт киши нобуд бўлганини хабар қилди.

Маълумотларга кўра, воқеа жойига “жуда кўп” тез ёрдам машинаси етиб келган.

Отишмадан кейин савдо марказидаги одамлар эвакуация қилинган.

Финляндия полицияси ҳужумчи 1966 йилда туғилган шахс эканини айтди.

Аммо унинг исми ошкор қилинмади.

Жиноятчи қўлга олингани ёки олинмагани маълум қилинмади.

Ҳолландия ва Нигерия аэропортларида одам танасини "кўра" оладиган ускуналар ўрнатилади

Ҳолландия ва Нигерия расмийлари 23 яшар нигериялик АҚШга тегишли учқични портлатишга уринганига оид воқеадан кейин ўз аэропортларида танани тўла текшира оладиган сканерлар ўрнатилишини маълум қилди.

Ҳолландия ички ишлар вазирига кўра, Амстердадаги Схипол аэропортида АҚШга кетаётган йўловчиларни текшириш учун, одам танасини тўлиқ “кўра” оладиган сканерлар уч ҳафта ичида ўрнатилади.

Нигерия расмийлари мамлакатнинг халқаро аэропортларида сканерлар Янги йилдан кейин ўрнатилишини маълум қилди.

МРБ масъулиятсизликка оид танқидларни рад этди

АҚШ Марказий разведка бошқармаси матбуот вакили Пол Гимилиано 25 декабр куни АҚШга тегишли учқични портлатиб юборишга уринган нигериялик ҳақидаги маълумотларга тегишли эътибор берилмаганига оид хабарларни инкор қилди.

МРБ Умар Форуқ Абдулмутллибга оид маълумотларни вақтида тегишли идораларга етказмаганликда танқид қилинмоқда.

Гимилиано МРБ “Абдулмуталлиб ҳақида ноябрда хабар топгани” ва унинг исми ҳукуматнинг террорчилар рўйҳатига киритилиши учун бу маълумотларни Аксилтеррор миллий марказига юборганини таъкидлади.

Британия фуқароси икки ярим йил асирликдан кейин озод қлинди

Британия Ташқи ишлар вазири Дэвид Милибанд 2007 йилда Ироқда гаровга олинган Британия фуқароси Питер Мур озод қилинганини маълум қилди.

Милибанд Мурнинг кечмишларини икки ярим йил давом этган “азоб, қўрқув ва ноаниқлик”, дея атади.

36 яшар компьютер мутахассиси Бағдодда тўрт нафар бритаянилик тан соқчилари билан биргаликда ўғирлаб кетилган эди. Улардан уч нафарининг ўлиги топилган. Тўртинчисининг тақдири номаълум қолмоқда.

Мур АҚШга қарашли "Bearingpoint" ширкатида ишлаган.

Ироқдаги зўравонликларда 27 киши нобуд бўлди

Кеча Ироқда амалга оширилган бир неча портлаш оқибатида камида 27 киши ҳалок бўлди.

Рамади шаҳрида икки худкуш содир этган порлашларда 20 киши ҳалок бўлди, жароҳатланганлар орасида Анбар вилояти ҳокими ҳам бор.

Полициянинг маълум қилишича, биринчи портлашга Анбар вилояти ҳокими Қосим Муҳаммаднинг идораси олдидаги хавфсизлик текширув пунктига бомба ўрнатилган машинанинг келиб урилиши сабаб бўлган.

Ҳоким рўй берган воқеа жойига келганида иккинчи худкуш ўзини портлатиб юборган. Ҳужумчи қўриқчилар унинг йўлини тўсиб қўйган пайтда портловчи мосламани ҳаракатга келтирган.

Бағдод яқинида йўл четига ўрнатилган бомба портлаши оқибатида эса, етти нафар шиа зиёратчилари ҳалок бўлгани хабар қилинмоқда.

Мухолифат етакчилари Теҳрондан қочгани йўқ

Эрон мухолифати етакчиларидан бири Меҳди Каррубийнинг ўғли Хусайн Каррубий отаси ва Мирхусайн Мусавий ҳали ҳам Теҳронда эканини маълум қилди.

Кеча давлатга қарашли ИРНА агентлиги мамлакатда рўй берган “исён” етакчилари Эрон шимолидаги вилоятлардан бирига қочиб кетганини хабар қилган эди.

Шунингдек, мухолифатга қарашли “Роҳисабз” интернет саҳифаси “Келаробод шаҳрида Инқилоб посбонлари ва разведка вазирлиги ходимлари Мусавий ва Каррубийни халқ ғазабидан ҳимоя қилиш мақсадида олиб кетгани”ни хабар қилди.

Лекин кейинроқ “Роҳисабз” вебсайти аввалги хабарига раддия эълон қилди.

Бу маълумотларни мустақил манбалардан текширишнинг иложи бўлгани йўқ.

Режим тарафдорлари Теҳрон кўчаларига чиқди

Кеча Теҳрон кўчларига жорий ҳафта бошида ўтказилган мухолифат норозиликларига қарши ўн минглаб ҳукумат тарафдорлари намойишга чиқди.

Эрондаги нуфузли руҳонийлардан бири Оятуллоҳ Аҳмад Аламолҳода намойишчилар олдида қилган чиқишида, жумладан бундай деди:

- Халқ исёнчилар етакчиларининг жазоланишини истайди. Биз диннинг бундай таҳқирланишига жим қараб тура олмаймиз,- деди Эрон руҳонийси.

Давлатга қарашли Press TV канали хабарига кўра, намойишчилар шиаларнинг Ашуро байрами кунига “путур етказган исёнчиларни” қоралаш учун кўчага чиққан.

Ҳафта бошида рўй берган норозиликлар пайтида мухолифат тарафдорлари билан хавфсизлик кучлари ўртасидаги тўқнашувларда камида саккиз киши ҳалок бўлди.

НАТО билан Кобул хулосалари бир-бирига зид

Афғонистоннинг Кунар вилоятида 10 фуқаронинг ҳалок бўлишига оид воқеани тафтиш қилаётган ҳукумат комиссияси тинч аҳоли вакиллари, жумладан болаларнинг нобуд бўлишига халқаро кучлар ўтказган операция сабаб бўлганини хулоса қилди.

НАТО кучлари ҳалок бўлганлар жангари эканини айтмоқда.

Комиссия раиси ва президент Ҳамид Карзайнинг маслаҳатчиси Асадуллоҳ Вафо Ассошиэйтед Прессга берган интервьюсида Кунар вилоятининг Наранг туманида ҳалок бўлганларнинг саккиз нафари 12 ёшдан 14 ёшгача бўлган болалар эканини маълум қилди.

НАТО эълон қилган баёнотда афғон ҳукумати комиссиясининг хулосалари шубҳа остига олинди.

Афғонистонда ҳориж фуқаролари ва аскарлари ҳалок бўлди

Афғонистондаги НАТО вакилларига кўра, Қандаҳор вилоятида рўй берган портлашда канадалик тўрт аскар ва бир журналист ҳалок бўлган.

Халқаро коалиция кучларининг маълум қилишича, журналист аскарлар патрули билан бирга Қандаҳор шаҳри яқинида кетаётган пайтда улар жанггарилар ҳужумига учраган.

Айни пайтда, чоршанба куни Афғонистоннинг Хост вилоятида рўй берган худкуш ҳужуми оқибатида, саккиз нафар АҚШ фуқароси ҳалок бўлди. Кобулдаги АҚШ элчихонаси воқеа рўй берганини тасдиқлади.

НАТО етакчилигидаги Халқаро хавфсизлик ёрдами кучлари матбуот вакили ҳалок бўлганлар орасида коалиция аскарлари йўқлигини маълум қилди.

Қурбонлар фуқаровий соҳада ишлаётган америкаликлар экани айтилмоқда.

CNN каналининг исми ошкор қилинмаган АҚШ расмийсига таяниб хабар қилишича, қурбонлар МРБ агентлари бўлган.

Кейинги пайтларда Афғонистонда тараққиёт ва ёрдам кўрсатишга оид лойиҳаларга эътиборнинг кучаяётгани боис, у ерда ҳорижлик фуқаролар сони ҳам ошмоқда.

Теҳрон ва Остона уран олди-сотдисига оид хабарлани рад этмоқда

Теҳрон ва Остона расмийлари Қозоғистоннинг Эронга уран сотишига оид яширин келишув ҳақидаги хабарларни инкор қилмоқда.

Чоршанба куни пайдо бўлган хабарда айтилишича, махфий келишувга кўра, Эрон Қозоғистондан 1350 тонна уран рудасини сотиб олишга уринган.

Уран рудаси бойитилса, ядровий қурол ишлаб чиқаришда ишлатилиши мумкин.

Эроннинг БМТдаги вакили чоршанба куни Рейтерс агентлигига жўнатган факсида бу хабарларни “асоссиз”, дея атаб, “гегемон давлатлар”ни матбуот воситалари орқали Эронга нисбатан психологик уруш олиб бораётганликда айблади.

Кеча эрталаб Қозоғистон ташқи ишлар вазирлиги расмий Остона Атом энергияси халқаро агентлигига нисбат берилаётган разведка маълумотларида Эрон қозоқ урани учун 450 миллион АҚШ долларини таклиф этаётганига оид хабарни “мутлақ инкор қилиши” битилган баёнотни эълон қилди.

Агар яширин келишув ҳақиқатан бўлса, у 2006 йилда Эронга нисбатан жорий қилинган БМТ санкцияларига зиддир. Теҳрон Ғарб давлатларининг Эрон ўз ядровий дастуридан ядровий қурол ясаш мақсадида фойдаланаётганига оид гумонларни рад этиб келади.

Ироқда зўравонликлар давом этаётир

Ироқ бўйлаб содир этилган портлашларда камида 27 киши нобуд бўлди.

Мамлакатнинг Рамади шаҳрида содир этилган икки портлаш оқибатида 20га яқин фуқаро нобуд бўлди, камида 35 киши, жумладан, Анбар вилояти ҳокими Қоссим Муҳаммад тан жароҳати олди.

Расмийларнинг билдиришича, вилоят ҳокимияти биноси олдидаги портлашлар икки худкуш шахс томонидан содир этилган.
Рамади шаҳридаги портлашлар учун масъулиятни ҳеч ким ўз зиммасига олгани йўқ.

Шу куннинг ўзида Бағдод шимолида Ашуро байрамидан қайтаётган шиа зиёратчилари нишонга олинди. Йўл четига ўрнатилган бомба портлаши оқибатида етти киши нобуд бўлган, 20дан зиёд киши тан жароҳати олган.

Халқаро консорциум туркман газ конини ўзлаштиради

Халқаро консорциум Туркманистондаги Жанубий Йолотан газ конини ўзлаштиришга оид қиймати қарийб 9.7 миллиард доллар бўлган йирик шартномани қўлга киритди.

Туркманистон матбуотига кўра, халқаро консорциумга Хитой, Жанубий Корея ва Бирлашган Араб Амирлиги ширкатлари кирган.

Мустақил кузатувчиларнинг билдиришича, Жанубий Йолотан конида тақрибан 6 триллион куб мерт газ заҳиралари мавжуд ва бу
жаҳонда тўртинчи ёки бешинчи йирик газ конларидан биридир.

Хабарларга кўра, Жанубий Йолотан газ конини ўзлаштириш борасида ўтказилган тендерда АҚШ, Хитой ва Россия ширкатлари ҳам қатнашган.

Толиблар Карачидаги портлашни ўз зиммасига олди

Покистонда фаолият юратаётган Толибон ҳаракати шиа зиёратчилари ўлимига сабаб бўлган Карачи шаҳридаги портлаш учун масъулиятни ўз зиммасига олди.

Покистон ахборот агентликларига сим қоққан таниқли дала қўмондони Асматуллоҳ Шаҳин бу каби хуружларнинг яқин келажакда яна содир этилиши хусусида огоҳлантирди.

Ашуро байрамини нишонлаётган шиа зиёратчиларининг худкуш шахс томонидан нишонга олиниши оқибатида 43 киши нобуд бўлди, ўнлаб одам тан жароҳати олди.

Давомини ўқинг

XS
SM
MD
LG