Линклар

Шошилинч хабар
19 октябр 2019, Тошкент вақти: 15:34

Халқаро янгиликлар

Ню Йоркда поезд ҳалокатга учради, тўрт одам нобуд бўлди

АҚШнинг Ню Йорк шаҳрида поезд изидан чиқиб кетиб, ҳалокатга учради. Ҳалокат оқабтида тўрт киши ҳалок бўлди.

Metro North ширкатига қарашли поезд бугун эрталаб Пукупсидан Ню Йоркнинг Марказий вокзалига кетаётган пайтда Бронкснинг “Спайтен Дайвел" бекати яқинида издан чиқиб кетган.

Metro North ширкати вакилларига кўра, поезднинг беш вагони ағдарилган, яраланганлар анча.

Ҳодиса жойида қутқарувчилар ва ўт ўчирувчилар иш олиб бормоқда. Ҳалокат сабаблари ўрганилмоқда.

Намойишчилар Киевдаги шаҳар ҳокимияти биносига бостириб киришди

Киевда намойишчилар шаҳар ҳокимияти биносига кириб олишди. Украинанинг мухолифатдаги “Озодлик” партияси фаолларидан бири Юрий Левченко, намойишчилар исниш ва ҳожатхонадан фойдаланиш эҳтиёжидан ҳокимият биносига кирганликларини айтди.

- Ҳокимият биноси дахлизидан нарига ўтиш ниятимиз йўқ. Исиниш ва ҳожатхонадан фойдананиш учун бу ерга кирдик. Биз босқинчи эмасмиз, европаликлармиз", - деди Левченко.

Тягнибок мустақиллик майдонида йиғилган минглаб оламонга қарата қилган нутқида бутун украиналикларни умумиллий норозиликка чақирди.

Бугун куннинг иккинчи ярмида минглаб одам пойтахт Киевдаги Мустақиллик майдонига кириб борди.

Украинадаги "Баткивщина" мухолифат партияси фаолига кўра, Киевнинг Мустақиллик майдонида бўлаётган намойишларда 500 мингдан ортиқ киши иштирок этмоқда.

Украина президенти Виктор Янукович Европа Иттифоқи билан ассоциацияга кириш тўғрисидаги битимни имзолашдан бош тортгани норозиликларга сабаб бўлди.

Шанба куни Мустақиллик майдонида полиция намойишчиларга қарши куч қўллаши эса украиналиклар ғазабини кучайтириб юборди.

Киевда намойишчилар Мустақиллик майдонига ёриб киришди

Киевда намойишчилар тақиққа қарамай Мустақиллик майдонига ёриб киришди.

Тарас Шевченко боғидан юриш қилган минглаб намойишчи қўйилган темир тўсинларни четга суриб, Мустақиллик майдонига киришди.

Аввалроқ Киев суди 1 декабрдан келаси йилнинг 7 январигача мазкур майдонда оммавий намойишларни ўтказмаслик ҳақида қарор чиқарган эди.

Маҳкама янги йил тадбирларига халақит қилмаслик учун шундай тақиқ жорий қилинганини маълум қилганди.

Киев суди Мустақиллик майдонида намойиш ўтказишни тақиқлади

Киев суди шаҳарнинг Мустақллик майдонида оммавий намойишлар ўтказишни жорий йилнинг 1 декабридан келаси йилнинг 7 январигача тақиқлади.

Суд қарорида айтилишича, майдондаги ҳар қандай оммавий тадбир у ерда олиб борилаётган янги йил байрамига тайёргарлик ишларига халақит қилиши мумкин.

Шаҳар маъмурияти бугун майдонга арча ўрнатмоқда.

Киев судининг қарори Мустақиллик майдонида йирик намойиш ўтказишга тараддуд кўраётган мухолифатчилар режасига қандай таъсир қилиши маълум эмас.

Намойишчилар Киевдаги Тарас Шевченко боғида тўпланиб, Мустақиллик майдони томон юриш қилишини режалаётган эди.

Мухолифатдаги Удар ҳаракати лидери Виталий Кличконинг айтишича, Львовдан ўн минг киши Киевга қараб йўл олган.

Дунёда ОИТСга қарши кураш куни нишонланмоқда

Дунё мамлакатларида Орттирилган иммун танқислиги синдроми - ОИТСга қарши кураш кунида Жаҳон соғлиқни сақлаш ташкилоти дунё аҳлини ушбу касаллик хавфидан огоҳ бўлишга чақирмоқда.

Ташкилот “ОИТВга чалинган беморлар, ОИТВни юқтирганларнинг дискриминация қилиниши ҳамда ушбу касалликдан нобуд бўлиш холатларини нолга туширайлик”, шиори остида кампания бошлади.

Дунё бўйича 30 миллиондан ортиқ киши ОИТС касаллигига йўлиққан. Ҳар йили ушбу касаллик бир ярим миллиондан кўпроқ одамнинг ёстиғини қуритади.

Ўзбекистонда ОИТВни юқтирган уч мингдан зиёд бемор қайд этилган. Четга чиқиб ишлаб қайтаётган меҳнат муҳожирлари орасида ушбу касаллик кўпайгани кузатилади.

Хорватияда бир жинсли никоҳни тақиқлаш бўйича референдум ўтказилмоқда

Хорватияда бир жинс вакилларининг никоҳдан ўтишини тақиқлаш масаласи умумхалқ мухокамасига қўйилди.

Агар буни халқ бугунги референдумда маъқулласа Хорватияда бир жинсли никоҳ ноқонуний деб эълон қилинади.

Аввалроқ, Хорватия католик черкови ушбу ташаббусни олқишлаган эди.

Айни пайтда, пойтахт Загребда минглаб намойишчи ва гей ҳуқуқлари ҳимоячилари аҳолини референдумда овоз бермасликка чақирмоқда.

Украина мухолифати Киевда йирик норозилик намойишига тараддуд кўрмоқда

Киевнинг Мустақиллик майдонида полиция намойишчиларга қарши куч қўллаганидан ғазабланган украиналиклар бугун йирик норозилик акциясига тараддуд кўрмоқда.

Намойиш Киевдаги Тарас Шевченко боғида бошланиб, Мустақиллик майдонига юриш билан давом этиши кутиляпти.

Ҳозирда Украинанинг бошқа шаҳарларидан ҳам намойишчилар Киевга ёприлмоқда.

Мухолифатдаги "Удар" ҳаракати лидери Виталий Кличконинг айтишича, Львовдан ўн минг киши Киевга қараб йўл олган.

"Батькавшини" партияси етакчиси Арсений Яценюк норозилар Тарас Шевченко боғидан Мустақиллик майдонига юриш қилишларини айтди.

Киевда намойишчиларга куч қўлланиши ортидан украин мухолифати ҳукуматни истеъфо беришга ва зудликда парламент ҳамда президентлик сайлови ўтказишга чақирди.

Шанба куни Мустақиллик майдонида полиция намойишчиларни калтаклаган, ўнлаб одам буни оқибатида жароҳат олган эди.

Америкалик актёр Пол Уокер автоҳалокатдан ҳалок бўлди

Америкалик актёр Пол Уокер Калифорнияда автомобил ҳалокати оқибатида ҳалок бўлди.

Шанба куни Уокер дўстининг машинасида кетаётган бўлган. АҚШ матбуотига кўра, Porsche спорт автомобили дарахтга бориб урилган.

У билан бирга бўлган дўсти ҳам ҳалок бўлган. 40 ёшли Уокер “Форсаж” филмида махфий агент ролини ижро этиб шуҳрат қозонган эди.

Украина мухолифати ҳукуматни истеъфо беришга чақирди

Киевда намойишчиларга куч қўлланиши ортидан Украина мухолифати ҳукуматни истеъфо беришга ва зудликда парламент ҳамда президентлик сайлови ўтказишга чақирди.

Хабарларга кўра, бугун Мустақиллик майдонида полиция намойишчиларни калтаклаган, ўнлаб одам буни оқибатида жароҳат олган.

Айни пайтда Киевнинг Михайловск черкови қаршисида тўрт минг одам норозилик акциясини давом эттирмоқда.

Бир кун аввал Украина президенти Виктор Янукович Европа Иттифоқи билан ассосциацияга кириши тўғрисидаги битимни имзолашдан бош тортган эди.

Сўнгги бир ҳафта давомида евроинтеграция тарафдорларининг норозилик чиқишларига саҳна бўлган Киевнинг Мустақиллик майдонини ҳозир Украинанинг махсус кучлари бўлинмаси назорат қилмоқда.

Тожикистон президентининг ўғли Божхона хизматига раҳбар бўлди

Тожикистон президенти Имомали Раҳмон мамлакат Бохона хизматига ўзининг 26 ёшли ўғли Рустам Имомалини раҳбар этиб тайнилади.

Шу пайтгача Рустам ушбу хизмат раҳбари муовини лавозимини эгаллаб келаётган эди.

Имомали Раҳмон Тожикистонни 1992 йилдан буён бошқариб келади.6 ноябр кунги сайлов Раҳмонни навбатдаги етти йиллик муддатга президентликда қолдирди.

Евро ҳудадда ишсизлик қарийб 12 фоизга камайди

17 мамлакат аъзо Евро ҳудадда ишсизлик 2011 йилдан буёнги энг паст кўрсаткичга тушди.

Европа Иттифоқи статистика маркази Eurostat маълумотларига кўра, Евро ҳудадда октябр ойида ишсизлик 12,1 фоизга камайган.

Ҳозирда минтақада ишсизлар армияси 18 миллионни ташкил этмоқда.

Энг кўп ишсизлар Испания ва Греция ҳиссасига тўғри келади. Бу мамлакатларда меҳнат қобилиятига эга ҳар тўрт одамнинг бири ишсиздир.

Eurostat келаси йил Евро ҳудудда иқтисодий ўсиш 1,5 фоизни ташкил этишини башорат қилмоқда.

Россиялик актёр Юрий Яковлев вафот этди

Таниқли россиялик актёр Юрий Яковлев 30 ноябр куни 85 ёшида оламдан ўтди.

Яковлев ҳаётининг сўнгги йилларида Москвадаги Евгений Вахтангов номли театрда ижод қилиб келган.

Яковлев театр ва кинода 140дан ошиқ рол ижро этган. У ўзбек томошабинига “Иван Васильевич касбини ўзгартиради” филмидаги бош рол ҳамда “Тақдир хазили ёки қушдай енгил бўлинг” филмидаги Ипполит роли орқали яхши танишдир.

Киевда намойишчилар тарқатиб юборилди

Украина полицияси Киевнинг Мустақилллик майдонига йиғилган юзлаб намойишчини тарқатиб юборди.

Ҳуқуқ фаоллари айрим намойишчилар калтакланганини айтишмоқда. Шунингдек, полиция намойишчиларга қарши кўзни ёшлантирувчи газ қўллаган.

Бир кун аввал Украина президенти Виктор Янукович Европа Иттифоқи билан ассоциацияга киришиш тўғрисидаги битимни имзолашдан бош тортган эди.

Сўнгги бир ҳафта давомида евроинтеграция тарафдорларининг норозилик чиқишларига саҳна бўлган Киевнинг Мустақиллик майдонини ҳозир Украинанинг махсус кучлари бўлинмаси қўриқламоқда.

Украина ЕИ ассоциациясига қўшилмади

"Жонли ҳалқа" акцияси иштирокчилари.
29 ноябрь куни Вильнюсда якунланган “Шарқий ҳамкорлик” саммитида Украина Европа Иттифоқи билан ассоциацияга кириш тўғрисидаги шартномани имзоламади. Лекин Украина президенти Виктор Янукович яқин келажакда ушбу шартномани имзолашга ваъда берди.

Айни пайтда Украина бўйлаб Европа Иттиқофи тарафдорларининг норозилик акциялари давом этаяпти.

Бугун “Евромайдон” намойишчилари Киев марказидан Польша чегарасигача “жонли ҳалқа” қилиш акциясини давом эттираяпти.

Бунинг учун бир пайтнинг ўзида 500 минг одам бир-бирига қўл ушлаб туриши лозим бўлади.

Киев марказидаги “Незалежности” майдонидан бошланган “жонли ҳалқа” Львов орқали ўтаяпти.

"Жонли ҳалқа"нинг асосий қисми Киев-Чоп трассасидан ўтаяпти. Ҳозирда Ровно ва Житомир шаҳри аҳолиси акцияга жалб қилинмоқда.

Киевда ҳукумат тарафдорларининг ҳам намойиши бўлиб ўтмоқда. Ташкилотчилар маълумотига кўра, Европа майдонида тахминан 50 минг одам йиғилган.

Ироқда ўғирланган 18 кишининг жасади топилди

Бугун Ироқ полицияси бир неча соат аввал уйларидан ўғирлаб кетилган 18 кишининг жасадини топди.

Хавфсизлик хизмати ва шифокорларнинг маълумотига кўра, жасадлар Бағдод шаҳридан 30 километр шимолдаги суннийлар яшайдиган Мишаҳ шаҳри яқинида топилган.

Жасадларнинг барчаси бошига отилган ўқдан ўлгани айтилаяпти.

Маълум бўлишича, ушбу 18 кишини ҳарбий кийимдаги кишилар ҳарбий машинада ўғирлаб кетган.

Марҳумларнинг оила аъзоларига кўра, ҳарбий кийимдагилар яқинларини қандайдир жиноий иш бўйича гумонланувчи сифатида сўроқ қилиш учун олиб кетилаётганини айтган.

Кейинги пайтда Ироқда зўравонлик ҳолатлари сони ошаётгани кузатилмоқда.

Кеча Ироқнинг бир қатор ҳудудларида автомобилларга ўрнатилган бомбалар портлаши оқибатида камида 30 одам ҳалок бўлди.

Энг кўп портлашлар Бағдоддан 100 километр узоқликда жойлашган Хилла шаҳрида содир этилди. Бу ерда бирин-кетин учта автомобил портлатилиши оқибатида 9 одам ўлди.

Нажаф шаҳрида портлашларда 7 киши ҳалок бўлди. Портлашлар, шунингдек, Бағдод, Самария ва Теймия шаҳарларида ҳам содир этилган.

Pussy Riot фаолининг колония раҳбарияти устидан аризаси рад қилинди

Pussy Riot гуруҳи аъзоси Надежда Толоконникова.
Россия Тергов қўмитаси Pussy Riot гуруҳи аъзоси Надежда Толоконникованинг колония раҳбарияти томонидан унга ўлдириш билан таҳдид қилгани борасидаги аризасини кўриб чиқишни рад қилди.

Сентябрь ойида маҳкума колония бошлиқ ўринбосари Юрий Куприянов унинг ҳаётига таҳдид қилиб, қўрқитганини айтиб, очлик эълон қилган эди.

Ушбу хабардан сўнг Россия президенти қошидаги инсон ҳуқуқлари бўйича кенгаш Толоконникова сақланаётган қамоқхонадаги шароитни ўрганишини маълум қилди.

2012 йилнинг 17 август куни Хамовнический туман суди Pussy Riot аъзолари бўлган Надежда Толоконникова, Мария Алехина ва Екатерина Самуцевични безориликда айблаб, уларни икки йилданга озодликдан маҳрум қилганди. Кейинроқ Самуцевичга берилган жазо шартли жазога алмаштирилган ва у озодликка чиққан.

Pussy Riot аъзолари 2012 йилнинг феврал ойида Москвадаги Исо Масиҳ черковида президент Владимир Путинга қарши перформенс уюштириши ортидан ҳибсга олинган ва қамалган эдилар.

Украинада 500 минг кишилик намойишга тайёргарлик кетаяпти

Киев марказида минглаб киши Украинанинг Европа Иттифоқига интеграция бўлиши жараёни тўхтатиб қўйилгани туфайли норозилик акцияларини давом эттирмоқда.

Бугун “Евромайдон” намойишчилари Киевдаги Европа майдонидан Польша чегарасигача “жонли ҳалқа” қилишни режалаштирган.

Бунинг учун бир пайтнинг ўзида 500 минг одам бир-бирига қўл ушлаб туриши лозим бўлади.

Дам олиш кунлари ҳам Киевда кўп минг кишилик намойишлар давом этиши кутилаяпти.

Муҳолифатчилар иш ташлашга ва ҳукумат истеъфосини талаб қилишга чақирмоқда.

Кеча Брюссел расмийлари Киевнинг Европа Иттифоқи билан Ассоциацияга киришиш келишувини имзоламаслик қароридан таассуф билдирди.

Сешанба куни телевидение орқали чиқиш қилган Украина президенти Виктор Янукович Европа Иттифоқи тарафидан таклиф этилган молиявий шартлар Украинани камситишини айтди.

Президентга кўра, ЕИ Украинага 610 миллион евролик ёрдам таклиф этган ва буни Халқаро валюта фонди билан бўлган келушувга боғлаб қўйган.

Януковичнинг айтишича, Украина ЕИ стандартларига етиши учун йилига 20 миллиард доллар талаб этилади.

Польша сиёсатчиси Сочи Олимпиадасини байкот қилишга чақирди

Польша пойтахти Варшавада ўтган халқаро анжуманда польшалик сиёсатчилар ҳамда Россия мухолифати вакиллари халқаро ҳамжамиятни Сочи Олимпиадасини байкот қилишга чақирди.

Европа парламентига Польшадан сайланган депутат Марек Мигалский Сочи Олимпиадасини зўравон режимни легитимлаштиришга имконият берувчи классик тадбир сифатида баҳолади. “Европа Иттифоқи бу тадбирни байкот қилиши ва бундай ҳолат билан келишмаслиги лозим”, деди депутат.

Россия муҳолифати вакили Борис Немцов эса ғарб сиёсатчиларини Владимир Путинга ультиматум эълон қилишга чақирди.”Ғарб Путиндан сиёсий маҳбусларни озод қилишни талаб этиши зарур. Мана шундагина Сочи Олимпиадасидан қандайдир наф бўлади” деди Немцов.

Ироқда пайшанба куни 30 одам ҳалок бўлди

Пайшанба куни Ироқнинг бир қатор ҳудудларида автомобилларга ўрнатилган бомбалар портлаши оқибатида камида 30 одам ҳалок бўлди.

Энг кўп портлашлар Бағдоддан 100 километр узоқликда жойлашган Хилла шаҳрида содир этилди. Бу ерда бирин-кетин учта автомобил портлатилиши оқибатида 9 одам ўлди.

Нажаф шаҳрида портлашларда 7 киши ҳалок бўлди. Портлашлар, шунингдек, Бағдод, Самария ва Теймия шаҳарларида ҳам содир этилган.

Сурия ҳукумати ва мухолифати тинчлик музокараларида қатнашишга рози бўлди

Сурия ҳукумати ва Ғарб томонидан қўллаб-қувватланаётган асосий мухолифат коалицияси БМТ ҳомийлигида ўтказиладиган тинчлик музокараларида қатнашишга ролзилик берди.

Бироқ, иккила томон 22 январ куни Женевада бошланиши кутилаётган сўзлашувларнинг мақсади борасида турли позицияда қолмоқда.

Сурия Бош вазири Ваел ал-Ҳалқий ҳукумат вакиллари Женевага ҳокимиятдан воз кечиш эмас, бўҳронга сиёсий ечим топиш мақсадида боришини баён қилди.

Мухолифатдаги Сурия Миллий коалицияси етакчиси Аҳмад Жабра Женевада ўтадиган йиғинда президент Башар Ассадни ўз ичига олмаган ўтиш даври ҳукумати тузилиши борасида келишиб олинишига умид қилаётганини билдирди. Жабра шунингдек Эрон ҳам сўзлашувларда қатнашиши мумкинлиги, лекин бунинг учун Теҳрон ҳукумат тарафида курашаётган кучларни қўллаб-қувватлашни тўхтатиши лозим дея билдирди.

Эрон АЭХА инспекторларини Аракдаги реакторни келиб кўиршга таклиф қилди

Атом энергияси халқаро агентлигига кўра, Эрон ҳукумати БМТ инспекторларини 8 декабрь куни мамлакатдаги оғир сув реакторини келиб кўришга таклиф қилган.

АЭХА Бош директори Юйика Амано бу ҳақда пайшанба куни Венада БМТ қошидаги агентлик мажлисида эълон қилди.

Ўтган якшанба куни дунёнинг олти қудратли давлати билан эришилган битимга кўра, Эрон ўз ядровий дастурини олти ой муддатга қисқартириш ва Арак реакторини ишга туширмаслик ёки реактор жойлашган иншоотга ёқилғи ва оғир сувни олиб бормасликка рози бўлган.

Бунинг эвазига Исломий Республикага нисбатан жорий қилинган халқаро санкцияларнинг бир қисми бекор қилиниши ваъда қилинган.

Аракда қурилаётган реактор халқаро ҳамжамият ташвишларига сабаб бўлиб келади, чунки унда чиқадиган ядровий ёқилғи турларидан бири қуролда ишлтилиши мумкин бўлган плутонийдир.

ЕИ расмийси Украинанинг Ассоцияцияга киришиш келишувини имзоламаслик қароридан таассуф билдирди

Брюссел расмийлари Киевнинг Вильнюсда ўтадиган Шарқий Ҳамкорлик саммитида Европа Иттифоқи билан Ассоциацияга киришиш келишувини имзоламаслик қароридан таассуф билдирди.

ЕИ Кенгайиш масалалари бўйича комиссари Штефан Фюле пайшанба куни Вильнюсда фуқаролик жамияти масалалари бўйича конференцияда қилган чиқишида Киев ҳукумати “Украина иқтисодида тўғридан-тўғри хорижий инвестициялар камайиб кетиши тенденциясини баратараф қилишнинг нодир имкониятини қўлдан бой бермоқда”, дея таъкидлади.

ЕИ расмийси Украинада модернизация ва сармояларга доир кўплаб имкониятлар ҳам ортга сурилмоқда, дея қўшимча қилди.

Фюле бу фикрларни пайшанба куни Вильнюсда очилаётган саммит олдидан баён қилди. Саммит очилиши муносабати билан уюштириладиган кечки зиёфатда ЕИ билан собиқ иттифоқнинг олти давлати – Арманистон, Беларус, Грузия, Молдова, Озарбайжон ва Украина етакчилари иштирок этади.

Япония ва Жанубий Корея Хитой денгизи узра мудофаа зонаси жорий қилинишига қарши чиқмоқда

Мудофаа зонаси Япония, Хитой ва Тайван даъво қиладиган оролларни ҳам ўз ичига олган.
Япония ва Жанубий Корея Пекиннинг Шарқий Хитой денгинзи осмонида мудофаа зонасини жорий қилиш қарорига амал қилмасликларини билдирди.

Япония дегиз соҳилини қўриқловчи қўшинлар Хитой ўз мудофаа зонаси деб эълон қилган ҳудудда парвоз амалга оширганини айтмоқда. Жанубий Корея ҳаво кучлари ҳам бу ҳудудда ўз самолётини учирганини билдирди.

Ўтган шанба куни Хитой мазкур ҳудудда мудофаа зонасини эълон қилиб, у ердан учиб ўтадиган ҳар қандай ҳаво аппарати парвоз режаси, қайси давлатга қарашли экани ҳақида хабардор қилиши ва доимий тарзда алоқада қолиши лозимлиги, акс ҳолда “фавқулодда мудофаа чоралари” кўрилишидан огоҳлантирди.

Мудофаа зонаси Япония, Хитой ва Тайван даъво қиладиган оролларни ҳам ўз ичига олган. Бу зонага Корея ўзига қарашли эканини даъво қиладиган сув ости қояси ҳам киритлган.

Хитой қарорини “минтақадаги жорий вазиятини беқарорлаштиришга уриниш”, дея баҳолаган Қўшма Штатлар ўтган сешанба куни мазкур ҳудуд узра, аввалдан эълон қилмаган ҳолда, B-52 русумидаги иккита бомбардимончи самолётни учирди.

Бразилияда ЖЧ ўтадиган стадионда фожеа юз берди

Сан Паулода Жаҳон чемпионати муносабати билан қурилаётган бинолардан бири.
Бразилиянинг футбол бўйича Жаҳон чемпионати ўтказиладиган Сан Паулу шаҳрида қурилаётган стадионда қурилиш крани қулаши оқибатида икки ишчи ҳалок бўлди.

Фожеа стадион томи ёпилаётган пайтда юз берган. Кран қулаши оқибатида стадион биносининг бир қисми вайрон бўлган. Стадион қурилиши декабрь ойда ниҳоясига етказилиши керак эди. Бироқ фожеа туфайли қурилиш ишлари ортга сурилиши айтилмоқда.

“Арена- де Итакуэра” деб номланган мазкур стадионда 2014 йилги футбол бўйича Жаҳон чемпионатининг очилиш маросими ўтказилиши режалаштирилган эди.

Сурия ҳукумати "Женева-2"да иштирок этишга рози бўлди

Башар Ассад
Сурия ҳукумати мамлакатдаги зиддиятни бартараф этиш юзасидан Женевада ўтадиган халқаро анжуманда иштирок этишга тайёр эканини билдирди.

Айни пайтда Сурия ҳукумати бир қатор давлатларнинг президент Башар Ассад ҳокимиятни топшириши кераклиги тўғрисидаги талабларини бажармаслигини билдирди.

"Женева-2" деб номланган мазкур анжуман 2014 йилнинг 22 январида ўтказилади.

Давомини ўқинг

XS
SM
MD
LG