Линклар

Шошилинч хабар
20 август 2019, Тошкент вақти: 08:04

Халқаро янгиликлар

Паралимпиадачи чемпион Писториус қотилликда айбланмоқда

Бугун Претория суди олти марта параолимпиада чемпиони Оскар Писториусга нисбатан ўзининг хуштори Рива Стинкампни ўлдирганлик айбловини эълон қилди.

Судя бу қарорни эълон қилгач, 26 ёшли Писториус суд залида баланд овозда йиғлаб юборган.

Писториусни гаров эвазига озод қилиш маҳкамаси келаси сешанбага қолдирилди. Прокурорлар "қотиллик қасддан содир этилган"лиги учун Писториусни ҳибсда сақлашни таъкидлаяпти.

30 ёшли модел Рива Стинкамп 14 феврал кечаси Писториуснинг ҳашаматли уйида отиб ўлдирилган ҳолда топилган.

Челябинскда метеоритдан жароҳатланган сони 1000га етди

15 феврал куни Россиянинг Челябинск вилояти ҳудудига тушган метеоритдан жароҳатланганлар сони 1000 нафарга етди. Улардан 200 нафари болалардир.

Россия Фавқулодда вазиятлар вазири Владимир Пучковга кўра, жароҳатланганлардан 112 нафари, жумладан, 80 бола шифохонага ётқизилган.

Россия Ички ишлар вазирлиги матбуот марказининг маълумотига кўра, шифохонага ётқизилганлардан тўққиз нафарининг аҳволи оғир ва ўртача оғир даражада.

Расмий маълумотга кўра, метеорит қолдиқлари уйларнинг деразаларини синдирган, синган ойна парчаларидан эса аҳоли жароҳатланган.

Вазир Пучковга кўра, метеорит қулаши оқибатида 300 та уй, 12 мактаб, бир қатор ижтимоий объектлар ва ташкилотлар шикастланган.

Рус матбуотига кўра, Челябинск вилоятининг олтита туманидаги уйлар метеоритдан шикастланган.

Челябинскда мактаб ва болалар боқчаларида машғулотлар тўхтатилган.

Айни пайтда радиация нормаларининг ошиши ва хавфли радиактив-кимёвий моддаларнинг Ерга тушиши кузатилмаган.

Пулков обсерваторияси илмий ходими Сергей Смирнов "Россия-24" телеканалига берган интервьюсида метеорит бир неча тонна оғирликда бўлгани ҳақида гапирган.

Метеорит қулашини Россиянинг бошқа вилоятлари ва қўшни Қозоғистон аҳолиси ҳам кузатган.

Метеорит қолдиқлари Челябинск вилоятининг учта туманидан топилган. 16 феврал куни илмий экспедиция жўнатилади.

Метеорит қулаши ортидан Россиянинг бешта вилоятида - Челябинск, Курган, Свердлов, Самар ва Саратовда махсус шатаблар ташкил қилинди.

Бугун Ерга астероид яқинлашади

Бугун катталиги футбол майдонининг ярмича келадиган астероид Ерга жуда яқин масофадан учиб ўтади.

Америка фазовий тадқиқотлар агентлиги (НАСА) маълумотига кўра, мазкур астероид Ер планетасидан 27 минг 700 километр узоқликда учиб ўтиши кутилаяпти.

Тезлиги секундига 13 километрни ташкил қиладиган мазкур астероид Ҳинд океанининг шарқий қисми, Индонезия ороллари устидан учиб ўтади.

Шу пайтгача бу масофада бирорта ҳам астероид Ерга яқинлашмагани айтилаяпти.

Олимлар фикрича, астероиднинг Ерга бирор бир хавфи бўлмайди.

Астероидни Осиё, Австралия ва Шарқий Европа аҳолиси кузатиш имконига эга.

Москвада “Катта йигирмалик” учрашуви бошланди

Бугун Москва шаҳрида саноати тараққий этган давлатларни ўз ичига олувчи “Катта йигирмалик” (G20) давлатларининг Молия вазирлари ва Марказий банк раислари учрашуви бошланди.

Икки кунлик йиғилишда "валюталар уруши" мавзуси муҳокама қилиниши кутилаяпти. Жумладан, Япониянинг иқтисодий ўсишни барқарорлаштириш борасидаги ҳаракатлари муҳокамага қўйилиши мумкин.

“Катта йигирмалик”ка иқтисодлари энг йирик бўлган дунёдаги йигирмата давлат аъзо.

Челябинскда метеоритдан 150 одам яраланди

Бугун Россиянинг Челябинск вилояти ҳудудига метеорит тушди.

Россия Ички ишлар вазирлиги маълумотига кўра, метеорит қолдиқлари уйларнинг деразаларини синдирган, синган ойна парчаларидан эса тахминан 150 киши жароҳатланган.

Метеорит қулашини Россиянинг бошқа вилоятлари ва қўшни Қозоғистон аҳолиси ҳам кузатган.

Расмий маълумотларга кўра, метеорит қолдиқлари Екатеринбургдан ҳам топилган.

Метеорит қулаши ортидан Россиянинг бешта вилоятида - Челябинск, Курган, Свердлов, Самар ва Саратовда махсус шатаблар ташкил қилинди.

АҚШ миллиардери кетчуп ширкатини сотиб олди

Уоррен Баффет.
Америкалик миллиардер Уоррен Баффет Heinz озиқ –овқат ширкатини 28 миллиард долларга сотиб олганини билдирди. Бу Америка озиқ-овқат саноати тарихидаги энг йирик харид ҳисобланади.

Пайшанба куни имзоланган шартномага биноан ширкатни Баффетга қарашли Berkshire Hathaway холдингги ва 3 G Capital сармоя жамғармаси сотиб олади. Мазкур шартнома имзоланганидан сўнг Heinz акциялари баҳоси 20 фоизга қимматлаган.

Bloomberg агентлигининг хабар беришича, 82 ёшли Баффетнинг бойлиги 50 миллиард доллардан кўпроқдир. Heinz ширкати 1876 йилда ташкил қилинган ва ўзининг кетчуплари билан шуҳрат қозонган.

Тимошенко судга олиб келинади

Украина собиқ Бош вазири Юлия Тимошенко қамоқхонада.
Украинанинг собиқ Бош вазири Юлия Тимошенко 15 феврал куни депутат Евгений Шчербаннинг ўлдирилиши юзасидан ўтаётган маҳкама жараёнига гувоҳ сифатида олиб келинади. Бу ҳақда Украина пенитенциар хизмати маълум қилди.

14 феврал куни Киев суди Тимошенкога 16 йил аввал ўлдирилган украиналик депутат Евгений Шчербан иши қаралмиш маҳкамага боришдан бош тортгани учун 2000 АҚШ долларига тенг жарима солган эди.

Ўтган ой Украина Бош прокурори собиқ бош вазир Тимошенко Шчербан иши бўйича гумонланаётганини билдирганди.

Хизмат вазифасини суиистеъмол этганлик айби билан етти йиллик қамоқ жазосини ўтаётган Юлия Тимошенко бу айбловни тан олишдан бош тортган. У ўзига қарши айбловлар сиёсий сабабга кўра уйдирилмоқда, деб ҳисоблайди.

Жон Керри Сурияда ўлганлар юзасидан янги рақамларни айтди

АҚШ Давлат котиби Жон Керри.
Суриядаги тўқнашувларда ҳалок бўлганлар сони 90 мингга етган бўлиши мумкин. Бу ҳақда пайшанба куни АҚШ Давлат котиби Жон Керри баёнот берди.

Унга кўра, у бундай маълумотни Саудия Арабистони ташқи ишлар вазири Сауд Ал Файсал билан ўтказган учрашуви чоғида олган. Шу ҳафта бошида БМТнинг инсон ҳуқуқлари қўмитаси раҳбари Нэви Пиллэй Сурияда икки йилдан бери давом этаётган ҳукумат кучлари ва мухолифат тўқнашувларида ҳалок бўлганлар сони 70 минг кишига етай деб қолганини билдирган эди.

Жон Керри БМТ раҳбари Бан Ги Мун билан учрашуви чоғида Суриядаги “фавқулодда гуманитар вазият”ни муҳокама қилишини айтди.

ЕИ Эрон ҳукуматини мухолифат лидерларини озод қилишга чақирди

ЕИнинг Ташқи сиёсат ва хавсизлик масалалари бўйича олий вакили Кэтрин Эштон.
Европа Иттифоқининг Ташқи сиёсат ва хавсизлик масалалари бўйича олий вакили Кэтрин Эштон Эрон ҳукуматини мухолифатнинг икки таниқли лидери Мир Ҳусайн Мусавий ва Меҳди Каррубийни уй қамоғидан озод қилишга чақирди.

14 феврал куни эълон қилинган баёнотда Эштон хоним Каррубий ва Мусавий ҳамда Мусавийнинг рафиқаси Заҳро Раҳнавани икки йилдан бери ҳибсда қолаётганидан “жуда хавотирда” эканини билдирган.

ЕИ расмийси Эрон Исломий Республикаси ҳукуматини яна бир карра мухолифат лидерларининг ҳаракат эркинлигини таъминлашга чақирди.

Мусавий ва Каррубий 2009 йилги сайловда президентликка номзод бўлган. Улар 2011 йил бошида ҳибсга олинган.

Афғонистон президенти халқаро кучларга норозилик билдирди

Афғонистон Президенти Ҳамид Карзай.
Афғонистон Президенти Ҳамид Карзай НАТО етакчилигидаги халқаро кучлар қўмондони АҚШ генерали Жозеф Данфордни чақиртириб тинч аҳолидан 10 киши ўлган ҳаво ҳужумига изоҳ беришни талаб қилди.

Чоршанба куни Кунар вилоятида амалга оширилган ҳаво ҳужумида бир неча толиблар жанггариси ҳам ўлгани айтилмоқда.

Афғонистон президенти матбуот хизматига кўра, Ҳамид Карзай “келажакда бундай воқеалар қайтарилмаслиги шарт экани” таъкидлаган.

Генерал Данфорд эълон қилган баёнотда тинч аҳоли вакиллари нобуд бўлганидан афсусланиш билдириб, НАТО кучлари “аҳоли яшайдиган минтақаларда амалиётлар ўтказиш ва бомбардимон қилишдан тийилиш”ни ваъда қилган.

Генерал Жозеф Данфорд НАТО етакчилигидаги халқаро кучлар қўмондонлигини 10 феврал куни қабул қилиб олган.

Данфорд 2014 йил охиригача халқаро жанговор кучлар Афғонистондан олиб чиқилишини назорат қилади.

Поляк депутатлари қамоқдаги қозоқ мухолифатчиси билан учраша олмадилар

Қозоғистондаги рўйхатга олинмаган Олға партияси раҳбари Владимир Козлов.
Қозоғистон ҳукумати икки нафар полшалик сиёсатчининг қамоқдаги қозоғистонлик мухолифат лидери Владимир Козлов билан учрашишига рухсат бермади.

Қозоғистонда рўйхатга олинмаган Олға партияси раҳбари Козлов ҳозирда Петропавловск шаҳридаги меҳнат колониясида жазо муддатини ўтамоқда.

Полша парламенти аъзоси Томаш Маковски ва Малгорзата Маркинчиевиц Озодликка Козлов билан чоршанба куни учрашишга ҳаракат қилганларини айтди.

Козлов Қозоғистон ғарбидаги Жанаўзен шаҳрида нефт заводи ишчиларининг оммавий иш ташлашини уюштирганлик айби билан 2012 йил октябр ойида етти ярим йилга қамоқ жазосига ҳукм қилинган.

2011 йил декабр ойида Жанаўзенда намойишчилар билан милиция ходимлари ўртасида рўй берган тўқнашувда 17 одам нобуд бўлган.

Козлов ўзига нисбатан очилган жиноий ишнинг сиёсий асосга эга эканини айтган.

АЭХА ва Эрон музокаралар бўйича келишувга эриша олмади.

Атом энергияси халқаро агентлиги директори ўринбосари Ҳерман Накаертс.
Атом энергияси халқаро агентлиги (АЭХА) Теҳрон ядровий тадқиқотлар олиб бораётгани тахмин қилинган объектларда текширув ўтказиш борасида Эрон билан келишувга эриша олмади.

Буни 14 феврал куни Вена шаҳрида Атом энергияси халқаро агентлиги директори ўринбосари Ҳерман Накаертс журналистларга маълум қилди.

Накаертс томонлар навбатдаги учрашув қачон бўлиши ҳақида ҳам келишиб олмаганини қўшимча қилди.

Ундан олдин Эроннинг Атом энергияси халқаро агентлигидаги вакили Али Ашғар Султоний агентлик ва Эрон расмийларининг чоршанба куни Теҳронда бўлган учрашувида айрим масалаларда келишувга эришилганини айтган.

Бироқ Султоний қандай масалалар бўйича келишувга эришилганини айтмаган.

Атом энергияси халқаро агентлиги ядровий қуролларнинг бир қисми синовдан ўтказилгани иддао қилинган Эроннинг Парчин ҳарбий объектида инспекция ўтказишга рухсат берилишини хоҳламоқда.

26 феврал куни Қозоғистон пойтахтида дунёнинг олти қудратли давлати расмийлари ва Эрон вакилари ўртасида Эроннинг ядровий дастури бўйича навбатдаги музокара бўлиб ўтиши режаланган.

Покистонда сиёсий ва диний арбоблар тинчлик сўзлашувини муҳокама қилмоқда

Покистонда сиёсий ва диний партиялар вакиллари покистонлик толибларнинг тинчлик музокаралари олиб бориш таклифини муҳокама қилиш учун Исломобод шаҳрига йиғилди.

14 феврал куни очилган анжуманда 26 та сиёсий ва диний партия вакиллари иштирок этмоқда.

Бироқ толиблар тарафдори бўлган Жамоати Ислом ва Таҳрики Инсоф мазкур тадбирда қатнашишдан бош тортган.

Ҳайбар Пахтунхва вилоятининг Ахборот вазири Миан Ифтихор Озодликка анжуманда қабул қилинажак тавсиялар Покистон президенти ва ҳарбий қўмондонларга тақдим этилишини айтди.

Шу ой бошида покистонлик толиблар ҳукумат билан тинчлик музокаралари олиб боришни таклиф қилган эди.

Шундан сўнг Авоми миллий партияси бу масалани муҳокама этиш учун анжуман уюштиришни таклиф қилган.

Доғистонда тўрт полиция ходими ҳужум қурбони бўлди

Россиянинг Доғистон Республикасида амалга оширилган худкуш ҳужумда камида тўрт нафар полиция ходими ҳалок бўлди, олти нафари яраланди.

Полиция расмийларига кўра, пайшанба куни эрталаб Хасавюрт шаҳри ташқарисидаги текширув пунктида полиция ходимлари худкуш кетаётган машинани тўхтатган пайтда у ўзини портлатган.

Ахборот агентликлари хабарига кўра, ҳужумдан сўнг полициянинг бир ходими бедарак йўқолган.

Ҳужум масъулияни ҳозирча ҳеч ким ўз зиммасига олмади.

Доғистон Россиянинг зўравонликлар энг кўп содир этиладиган минтақаси ҳисобланади.

Қирғизистонда “йўлтўсарлик” учун жарима солинади

Қирғизистонда қонунга хилоф равишда йўлларни тўсиб қўйган кишилар бундан буён жаримага тортилади. Мазкур қонун 13 февралдан бошлаб кучга кирди.

19 январ куни мамлакат парламенти томонидан қабул қилинган ва кеча президент Атамбаев томонидан имзоланган қонун фуқароларнинг ҳаракат эркинлиги ҳуқуқини ҳимоя қилишга қаратилгани айтилмоқда.

Қирғизистонда тез-тез бўлиб турадиган митинглар чоғида намойишчилар томонидан магистрал йўлларни ноқонуний равишда тўсиб қўйиш ҳамда йўловчилар ва машиналарни ўтказмай қўйиш ҳолатлари кўп кузатилади.

Россия Малига қурол етказиб бермоқда

"Рособоронэкспорт" раҳбари Анатолий Исайкин.
Россия Малига ўқотар қуроллар етказиб бермоқда. Бу ҳақда чоршанба куни «Рособоронэкспорт» ширкати раҳбари Анатолий Исайкин маълум қилди.

У бошқа турдаги қурол-аслаҳаларни етказиб бериш бўйича ҳам музокаралар олиб борилаётгани, бироқ улар миқдори унча кўп эмаслигини қўшимча қилди.

Исайкинга кўра, Россия Малидаги халқаро кучлар билан ҳамкорлик қилмоқда.

Сўнгги ҳафталарда Франция етакчилигидаги халқаро кучлар Ал-Қоидага алоқадор жанггариларни Мали шимолидаги кўп ҳудудлардан сиқиб чиқаришга муваффақ бўлган.

БМТ масъуллари чоршанба куни Мали бўйича минтақавий стратегия ишлаб чиқилаётганини билдирдилар.

Тимошенкога 2 минг долларлик жарима солинди

Украина собиқ бош вазири Юлия Тимошенко.
Киев суди қамоқда қолаётган собиқ бош вазир Юлия Тимошенкога судга ҳурматсизлик кўрсатгани учун жарима солди.

2000 АҚШ долларига тенг жарима Тимошенкога 16 йил аввал ўлдирилган украиналик депутат Евгений Шчербан иши қаралмиш маҳкамага боришдан бош тортгани учун солинган.

Ўтган ой Украина бош прокурори собиқ бош вазир 1996 йилда ўлдирилган Шчербан иши бўйича гумонланаётганини билдирганди.

Хизмат вазифасини суиистеъмол этганлик айби билан етти йиллик қамоқ жазосини ўтаётган Юлия Тимошенко бу айбловни тан олишдан бош тортган. У ўзига қарши айбловлар сиёсий сабабга кўра уйдирилмоқда, деб ҳисоблайди.

Германияда аксилфашистлар ва неофашистлар тўқнашди

Германиянинг аксилфашистик ташкилотлари кеча Дрезденда шу кунга мўлжалланган неофашистик юришга қарши оммавий намойиш ўтказдилар.

Неофашистлар Дрезден шаҳри иттифоқчилар авиацияси томонидан бўмбабўрон қилинганининг 68 йиллиги муносабати билан чоршанба куни юриш ўтказишлари аввалроқ маълум бўлганди.

Хабарларга кўра, аксилфашистик руҳдаги фаоллар неонацистлар юришига халал бериш учун шаҳарнинг тарихий марказида занжир ҳосил қилиб турганлар.

Гувоҳларнинг айтишларича, бу оммавий чиқишлар чоғида бир неча киши полиция томонидан ушлаб кетилган.

Доғистонда полициячининг болаларини ўлдирганликда гумон қилинган шахс қўлга олинди

Россиянинг Доғистон Республикасида маҳаллий полициячининг икки боласи ўлдириб кетилишига алоқадорликда гумонланаётган шахс қўлга олингани айтилмоқда. Россия Тергов қўмитаси расмийларига кўра, чоршанба куни қўлга олинган 21 ёшли йигит қотилликни содир этганига иқрор бўлган.

Душанба куни Доғистоннинг Бележи қишлоғида маҳаллий полиция зобитининг икки нафар ёш боласи уйида чавақлаб кетилган эди. Воқеа жойдан қимматбаҳо тақинчоқлар солинган қути билан 300 минг рубл (9900 АҚШ доллари) ўмариб кетилгани хабар қилинди.

Россиянинг беқарор Шимолий Кавказ минтақасида ишсизлик, коррупция ва полиция зўравонлиги кенг тарқалган. Зўравонликларга исломий жанггариларнинг ҳокимият вакилларига қарши деярли ҳар куни содир этадиган ҳужумлари ҳам ҳисса қўшади.

Бенедикт XVI тахтдан кетиши "черков манфаатида" эканини баён қилди

Рим Папаси Бенедикт XVI шй ой охирида истеъфога кетади.
Рим Папаси Бенедикт XVI истеъфога кетиш ниятини билдирганидан бери илк бор жамоатчилик олдида кўриниш берди. Бенедикт XVI ўзининг Рим-католик черкови тахтидан кетиши “черков манфаати учун” хизмати қилишини баён қилди.

Ватиканда чоршанба куни чиқиш қилган Папа ўз қарорининг нақадар жиддий эканини англашини, лекин шу билан биргаликда руҳий ва жисмоний аҳволи ёмонлашиб бораётганини ҳам яхши ҳис қилишини таъкидлади.

Куннинг иккинчи ярмида понтифик католик олами рўзаси бошланишини англатадиган Тазарру куни муносабати билан ўтказиладиган ибодатга бошчилик қилади.

85 ёшли Рим Папаси душанба куни шу ойнинг охирида истеъфога кетишини эълон қилиб, 1,2 миллиард нуфусга эга католик оламини саросимага солиб қўйди. Папа ўз қарорини лавозимини бажариши учун “лаёқатсиз” бўлиб қолганини тан олиши билан изоҳлади.

Рим-католик черковининг янги раҳбарининг март ойида сайланиши кутилмоқда.

Рим Папасининг истеъфо бериши кейинги 600 йил ичида илк бор рўй бермоқда.

Ата-Мекен етакчиларининг кафандузликда айблангани норозиликка сабаб бўлди

Қирғизистон мухолифатидаги Ата-Мекен партияси тарафдорлари парламент комиссияси мазкур партия етакчисини икки йил аввалги тартибсизликлар пайтида кафандузлик қилганликда айблаганига қарши норозилик намойиши уюштирди.

Чоршанба куни Қирғизистон парламенти биноси олдида уч мингга яқин одам тўпланиб, комиссия чиқарган резолюцияни бекор қилишни талаб қилди.

Ўтган ҳафта парламент махсус комиссияси 2010 йил апрел ойида президент Қурманбек Бакиевни ҳокимиятдан ағдарган намойишлар пайтида мародёрлик ҳоллари юзасидан ўтказилган текширув бўйича резолюция қабул қилди. Ўша пайтда кафандузлар асосан Бакиев ва унинг оиласига қарашли мол-мулкни талон-тарож қилган ва бир нечта уйга ўт қўйган эди.

Парламент олдида ўтказилган норозилик қатнашчилари Қирғизистон Президенти Алмазбек Атамбаевдан вазиятга аралашишини талаб қилдилар.

Ата-Мекен партияси Ар-Намис ва Социал Демократик партияси билан бирга иқтидордаги коалицияга киради.

Афғонистондаги НАТО ҳужумида тинч фуқаролар ҳалок бўлди

Афғонистоннинг Кунар вилояти расмийлари НАТО ҳаво ҳужумида тинч фуқаролардан 10 киши, жумладан беш нафар бола ҳалок бўлганини айтмоқда. Кунар вилояти ҳокими Фазлулло Воҳидийнинг айтишича, НАТО етакчилигидаги Халқаро хавфсизлик ёрдами кучлари чоршанба куни вилоят расмийларини огоҳлантирмасдан ҳаво ҳужумини уюштирган.

Воҳидийга кўра, Човғам қишлоғида амалга оширилган ҳужумда яна камида тўрт нафар Толибон жанггариси ўлдирилган.

Халқаро кучлар матбуот вакили майор Адам Войак Кунар вилоятидан олинган хабарга таяниб, бундай ҳужум амалга оширилганини тасдиқлади. Бироқ НАТО вакили ўлдирилганлар ёки тинч фуқаролар орасидаги талафотлар ҳақидаги маълумотни тасдиқлай олмаслигини таъкидлади.

Войак “тинч фуқаролар орасидаги талафотларга оид барча иддаоларни жиддий қабул қиламиз ва ҳазирда ҳодисани ўрганмоқдамиз”, дея қўшмча қилди.

НАТО кучлари томонидан қилинадиган ҳужумларда тинч фуқароларнинг ҳалок бўлиши Афғонистонда ўта нозик масала бўлиб, одатда прездент Ҳамид Карзай томонидан қораланади.

Теҳронда АЭХА билан Эрон ўртасида музокара бошланади

Атом энергияси халқаро агентлиги вакиллари Теҳронда Эрон расмийлари билан музокара бошлайди. Бугун бошланиши кутилаётган музокаралар олдидан Эрон Ташқи ишлар вазирлиги Теҳрон ва халқаро агентлик Эроннинг ядровий ҳуқуқларини тан оладиган “ҳар томонлама келишувга” эриша олса, халқаро инспекторлар Парчиндаги ҳарбий иншоотни бориб кўришлари мумкинлигини эълон қилди.

АЭХА Парчиндаги ҳарбий базада ядровий қурол ишлаб чиқришга оид фаолият олиб борилаётгани эҳтимоли борлигини айтиб келади. Эрон атом қуролини ишлаб чиқаришга ҳаракат қилмаётганини айтиб келди.

АЭХА бош инспектори Ҳерман Накаерц агентлик вакиллари Эрон билан “келишмовчиликларни” ҳал қилиш учун “қўлдан келганча” ҳаракат қилишини ваъда қилди. АЭХА вакилларининг Теҳронга сафари 26 феврал куни Қозоғистонда бўлиб ўтиши кутилаётган Эрон билан олти етакчи давлат ўртасидаги музокаралардан олдин амалга ошмоқда.

АҚШ президенти Афғонистондаги уруш келаси йил якунланишини ваъда қилди

АҚШ Президенти Барак Обама.
АҚШ Президенти Барак Обама Америка учун Афғонистондаги уруш 2014 йил охирига қадар якуналанишини эълон қилди.

Сешанба куни америкаликларга қилган йиллик мурожаатида Обама келаси бир йил давомида Афғонистондан 34 минг америкалик аскар уйга қайтарилишини баён қилди. Бу билан Афғонистондаги АҚШ қўшинлари сони икки баробардан кўпроққа камайтирилади. 2014 йилда қўшинлар сони янада қисқартирилиб, “Афғонистондаги урушимиз якунига етади”, деди АҚШ раҳбари.

Обама Ал-Қойда террорчи тармоғидан “сояси қолди холос”, дея қўшимча қилди.

АҚШ президенти шунингдек, Эрон етакчиларини ядровий бўҳронни дипломатик йўллар билан ҳал қилиш йўлларини қидиришга чақирди ва халқаро ҳамжамият Исломий Респубкликанинг ядровий қуролни қўлга киритишга йўл қўймайди, дея таъкидлади.

Обама Шимолий Корея сешанба куни амалга оширган ядровий синовни қоралади ҳамда АҚШ ва Россиянинг атом қуроллари арсеналини янада камайтириш ҳаракатларини давом эттиражагини ваъда қилди.

Нави Пиллай: Суриядаги тўқнашув қурбонлари сони 70 мингга етди

БМТнинг инсон ҳуқуқлари бўйича қўмитаси раҳбари Нави Пиллай Хавфсизлик кенгаши аъзолари олдида чиқиш қилмоқда, 2013 йилнинг 12 феврали.
Сурияда президент Башар Ассад мухолифлари ва ҳукумат қўшинлари ўртасида 2011 йил баҳоридан буён давом этаётган қуролли тўқнашувларда тақрибан 70 минг киши қурбон бўлди. Бу маълумотни сешанба куни БМТ Хавфсизлик кенгаши мажлисида чиқиш қилган БМТнинг инсон ҳуқуқлари бўйича қўмитаси раҳбари Нави Пиллай келтирди.

Бир ой муқаддам Пиллай хоним тўқнашув қурбонлар сони 60 минг кишини ташкил этганини айтганди.

БМТ инсон ҳуқуқлари қўмитаси раҳбарига кўра, Суриядаги воқеаларни баҳолашда Хавфсизлик кенгаши аъзолари ўртасида бўлган тафовут ҳаракатсизликка олиб келган ва бу ҳаракатсизлик сурияликлар учун қимматга тушган.

Нави Пиллай Хавфсизлик кенгашидан яна бир бор Суриядаги зиддият тўғрисидаги ишни Халқаро жиноят судига топширишни сўради.

Давомини ўқинг

XS
SM
MD
LG