Линклар

Шошилинч хабар
20 август 2019, Тошкент вақти: 08:06

Халқаро янгиликлар

Брюссел аэропортидан 50 миллион долларлик олмос ўғирланди

Қуролланган 8 киши Брюссел аэропортидан 50 миллион долларга баҳоланаётган олмосни ўғирлади.

Аэропорт матбуот вакилининг айтишича, душанба оқшом ўғрилар аэропорт биносининг хавфсизлик деворидан туйнук очиб, иккита автомобилда ичкарига кирган ҳамда олмослар солинган контейнерлар ортилаётган самолётга ҳужум қилган.

Сўнгги хабарларга кўра, полиция кийимида бўлган 8 жиноятчи бир неча дақиқа ичида тарихдаги энг йирик ўғирликни содир этган ва ғойиб бўлган.

Брюссел прокурори матбуот котиби Аня Бийненсга кўра, полиция кейинроқ аэропорт тўсиқлари ёнида ёндириб юборилган автомобилни топган.

Antwerp World Diamond Center матбуот вакилининг AFP агентлигига айтишича, бу инсоният тарихидаги энг катта олмос ўғирлигидир.

Муҳими, жиноят содир этилаётган чоғда бирорта ўқ узилмаган ва ҳеч ким жароҳатланмаган.

Америкаликлар асраб олган яна бир рус боласи ўлди

Макс Шатто (Максим Кузмин).
АҚШ прокурорлари америкалик оила томонидан Россиядан асраб олинган 3 ёшли Макс Шатто-Максим Кузминнинг ўлими юзасидан тергов олиб бормоқда.

Прокурорлар бу боланинг 21 январ куни боқиб олган техаслик онаси томонидан ўлдирилганини гумон қилмоқда.

Бу воқеа ортидан жиддий баёнот берган Россиянинг Болалар ҳуқуқлари бўйича омбудсмени Павел Астахов АҚШ прокурорларига таяниб, Макс-Максимнинг ўгай онаси томонидан муттасил калтаклангани ва психотроп моддалар билан боқилганини даъво қилмоқда.

Аммо, Техас Болалар ҳуқуқини ҳимоя қилиш хизмати матбуот вакили россиялик боалакайни асраб олган онага қўйилган айблар ҳали тасдиғини топмаганини айтди.

Болани асраб олган ота эса ҳодисага изоҳ беришдан бош тортган.

Айни пайтда Россия Давлат думаси депутатлари америкалик оилада вафот этган Макс Шатто-Максим Кузминнинг ўлимини кескин қораламоқдалар.

Ўтган йилнинг декабр ойида Россияда мамлакат болаларнинг АҚШ фуқаролари томонидан асраб олинишини тақиқловчи қонун қабул қилинган.

Женевада инсон ҳуқуқлари фаолларининг саммити бошланди

Женевада Қозоғистон, Россия, Шимолий Корея, Покистон, Судан, Сурия ва Тибетдан борган инсон ҳуқуқлари ҳимоячиларнинг Инсон ҳуқуқлари ва демократик жамият масалаларига бағишланган саммити бошланди.

Саммит кейинги ҳафтада БМТнинг Инсон Ҳуқуқлари бўйича кенгашида ўтадиган йиллик анжуман олдидан ўтказилмоқда.

Анжуман олдидан Женевада йиғилган фаоллар дунё жамоатчилиги эътиборини қаратиш зарур бўлган муҳим масалалар бўйича маслаҳатлашиб олиш ниятида.

Хусусан, жиноятчи гуруҳлар зўрловига учраган покистонлик аёл ҳуқуқлари ҳимоячиси Мухтор Май, Эроннинг Эвин қамоқхонасида сақланган ва қийноқларга тутилган ёзувчи Марина Неъмат, Россияда қамоққа ташланган Pussy Riot гуруҳи аъзоси Надежда Толоконникованинг турмуш ўртоғи, инсон ҳуқуқлари фаоли Пётр Верзилов ҳамда қозоғистонлик журналист Лукпан Ахмедяровларнинг масаласи алоҳида муҳокама қилиниши кутилмоқда.

Ушбу учрашув дунё давлатларидаги 20 та инсон ҳуқуқларини ҳимоя қилувчи нодавлат ташкилотининг ҳомийлигида ўтказилмоқда.

Арманистондаги президентлик сайлови танқид қилинмоқда

Халқаро кузатувчилар Арманистонда бу галги президентлик сайлови аввалгисига нисбатан муваффақиятли кечган бўлсада, унда ҳалол рақобат муҳити етишмаганини айтмоқдалар.

Европада Хавфсизлик ва Ҳамкорлик Ташкилоти кузатувчиларнинг хулосасига кўра, президент Серж Саркисян 58 фоиз овоз олиб, ғалаба қозонган сайлов умумиятла тинч ва яхши ўтган.

Аммо, сайловга аҳолини жалб қилиш ва уларнинг талабларини тўлиқ инобатга олиш бобида камчиликларга йўл қўйилгани, демократик тамойиллар тўла ўрнатилиши учун мамлакат раҳбарлари янада кўпроқ ҳаракат қилиши кераклиги таъкидланди.

Президент Саркисяннинг аксар мухолифлари натижалар унинг фойдасига ҳал қилинишини гумон қилиб, сайловда иштирок этмаганини айтмоқдалар.

Марказий Сайлов комиссияси берган маълумотга кўра, сайлов натижаларини тан олмаган мухолифатдаги “Мерос” партияси лидери, собиқ ташқи ишлар вазири Раффи Ованнисян 36,7 фоиз овоз олган.

Ованисян Сарксяннинг ғалабасини тан олмади ва уни яна бир муддат ҳокимиятда қолиш учун сохтакорликка йўл қўйганликда айблади.

Шунингдек Арманистондаги манбаларнинг хабар қилишича, душанба куни прокуратура ва судларга сайлов қонунчилигининг бузилиши бўйича ўнлаб шикоят аризалари келиб тушган.

Остонада фоҳишалик қилган ўзбекистонлик аёллар Қозоғистондан бадарға қилинади

Остона шаҳрида фоҳишалик билан шуғулланган ўзбекистонлик бир неча аёл Қозоғистондан бадарға қилинади.

Бу ҳақда маълум қилган Остона Ички ишлар департаментига кўра, Остона уюшган жиноятчиликка қарши кураш бошқармаси ходимлари шу кунларда ўтказилган тезкор-профилактик тадбир чоғида шаҳарда 53 нафар фоҳишани аниқлаган. Ёнида шахсини тасдиқловчи ҳеч қанақа ҳужжати бўлмаган 9 аёл қабул-тақсимот пунктида сақланмоқда.

Остона полициясининг маълум қилишича, Қозоғистон ҳудудида фоҳишалик билан шуғулланган 21 нафар ўзбекистонлик ва қирғизистонлик аёлга нисбатан мамлакат Жиноят-процессуал кодексининг 394-моддаси (чет эллик фуқаро томонидан Қозоғистонда юриш қонун-қоидаларини бузганлик) бўйича маъмурий баённома тузилиб, уларни ўз юртларига чиқариб юбориш қарори олинган.

Жалолободдаги маҳбуслар қийноқлардан шикоят қилмоқда

Қирғизистоннинг Жалолобод шаҳридаги вақтинча сақлаш ҳибсхоналарида “Справедливость” ҳуқуқни ҳимоя қилиш ташкилоти томонидан ўтказилган сўров чоғида маҳбуслардан бири калтаклашларга қарши қўли ва томоғига тиғ тортишга мажбур бўлганидан шикоят қилган.

Бошқа бир маҳбус ўтган йилнинг 6 ноябр куни қийноққа тутилганини сўзлаб берган. Маҳбуслардан яна бири эса ўтган йили Ноокен туман милиция ходимлари томонидан дўппосланганини айтган.

Бунгача ҳуқуқни ҳимоя қилиш ташкилотига қийноқлардан шикоят акс этмиш 6 ариза келиб тушган. “Справедливость” ташкилоти бу борада ўз текширувини ўтказиб, куч ишлатар тузилмаларга чора кўриш учун мурожаат қилган.

Бироқ Жалолобод Ички ишлар бошқармаси матбуот котиби Таалайбек Сусунбаев мазкур уч кишининг айтганлари асоссиз эканини билдирган. Унга кўра, маҳбуслар қийноққа солинмаган, балки 6 феврал куни Ўзганга этап қилинаётган пайтда автозакда тан жароҳати олишган.

Арманистондаги сайловда амалдаги президент олдинда бормоқда

Арманистонда душанба куни ўтган президентлик сайловларида номзодлар учун берилмиш овозлар саналмоқда.

Экзит-поллнинг дастлабки натижаларига кўра, сайловчиларнинг қарийб 60 фоизи амалдаги президент Серж Саргсян учун овоз берган. Иккинчи ўринда мухолифатдаги “Мерос” партияси лидери Раффи Ованнисян бормоқда, у 32 фоиз овоз йиғолган.

Арманистондаги манбаларнинг хабар қилишларича, кеча прокуратура ва судларга сайлов қонунчилигининг бузилиши бўйича ўнлаб шикоят аризалари келиб тушган.

Маълумотларга кўра, кечаги президентлик сайловларида сайлаш ҳуқуқига эга бўлган арманистонликларнинг ярми иштирок этган. Арманистонда жами 2,5 миллион сайловчи бор.

Башар Ассад ўз армияси ғалабасига ишонади

Сурия президенти Башар Ассад.
Сурия президенти Башар Ассад ўз армияси қарийб икки йилдан буён давом этаётган ички низода ғалаба қозонишига ишонч билдирди.

Ассаднинг бу баёноти душанба куни Ливаннинг Ассад режимига хайрихоҳ бўлган “Ас-Сафир” газетасида ёйинланди.

Сурия президентига кўра, ғалабага ишонч мамлакатдаги барча муаммолар ҳал қилинганини англатмайди. Унинг фикрича, экстремизм ва террорчиликка қарши курашда ҳам сиёсий, ҳам ҳарбий муваффақиятларга эришиш керак бўлади.

ВВС журналистлари 24 соатга иш ташлади

Британиянинг Лондон, Бирминҳем ва бошқа бир қанча шаҳарларида ВВС ходимлари 24 соатга иш ташладилар.

Улар ВВС Scotland, Five Live, Asian Network, Big Screens, Newsbeat ва Жаҳон хизматида кутилаётган ишдан бўшатишларга қарши норозилик билдирмоқдалар. Иш ташлаш туфайли радио ва теледастурлар формати ва тартиби бузилган.

Мазкур тадбир Журналистлар миллий уюшмаси томонидан ташкил этилган.

Хабарларга кўра, ВВС бош директори вазифасини бажарувчи Тим Дэйви раҳбарият ишдан бўшатилиши керак бўлган 30 нафар журналистни бошқа ишга ўтказишдан манфаатдор экани, бироқ бундай вариантни ишдан бўшатилажак ҳар бир ходимга таклиф қилолмаслигини билдирган.

Кейинги 5 йил мобайнида ВВСда 5 минг киши ишдан бўшатилажаги ҳақида аввалроқ хабар қилинганди. Шунингдек, 2017 йилгача ВВС бюджети 20 фоизгача қисқартирилиши кутилмоқда.

Чавес кутилмаганда Венесуэлага қайтди

Саратон касалига чаилнган Уго Чавес икки ой аввал Кубада жарроҳлик операциясини бошдан кечирди.
Венесуэла Президенти Уго Чавес кутилмаганда Кубадан ватанига қайтди. Саратон касалига чаилнган Чавес икки ой аввал Кубада жарроҳлик операциясини бошдан кечирганидан бери жамоатчиликка кўриниш бермай келаётган эди.

У душанба куни Twitter саҳифасида “Ватанимиз Венесулага қайтиб келдик. Худога шукр. Халқим сенга раҳмат. Даволанишни шу ерда давом эттирамиз”, деган ёзувни қолдирди.

58 ёшли президентга 2011 йилда саратон ташҳиси қўйилган эди. Учта жарроҳлик амалиёти ва бошқа муолажалардан кейин у саратондан тўла фориғ бўлганини эълон қилиб, ўтган октябрда яна бир муддатга президентликка сайланган эди.

Бироқ касаллик аломатлари пайдо бўлгач, Чавес тўртинчи марта операция қилинди. Сўнгги операциядан кейин Чавес танасига инфекция тушиши оқибатида соғлиғи ёмонлашди.

Чавеснинг 10 январга белгиланган инаугурацияси соғлиғи ёмонлашгани боис қолдирилди. Чавес Венесуэлани 14 йилдан бери бошқаради.

Жон Керри билан Сергей Лавров телефонда гаплашди

АҚШ Давлат котиби Жон Керри ва Россия Ташқи ишлар вазири Сергей Лавров Сурия ва Шимолий Корея билан боғлиқ вазиятни муҳокама қилди.

АҚШ Давлат департаментининг маълум қилишича, икки дипломат якшанба куни ярим соат давомида телефон орқали суҳбалашган.

Сурия бўҳрони бўйчиа Вашингтон ва Москва ўртасида кекскин қрама-қаршилик мавжуд. Россия Сурия Президенти Башар ал-Ассад режимини қўллаб-қувватлайди. Вашингтон эса, Ассад режимининг дарҳол иқтидордан кетишини талаб қилиб келади.

Душанаба куни БМТ комиссиясининг Суриядаги инсон ҳуқуқлари вазияти бўйича навбатдаги ҳисоботни эълон қилиши кутилмоқда.

Бундан бир неча кун аввал Керри Сурияда қурбонлар сони 90 мингга етиши мумкинлигини баён қилган эди.

Давлат департаментига кўра, Шимолий Корея масаласида икки дипломат Пхеньян яқинда амалга оширган ядровий синовга “кескин жавоб” беришда яқиндан ҳамкорлик қилишга келишиб олган.

Россия мулозимини ўлдирганликда гумонланганлар қўлга олинди

Липецк шаҳар кенгаши раиси ўринбосари Михаил Пахомов бир неча кун аввал ғойиб бўлган эди.
Россия Тергов қўмитаси ҳукумат расмийсини ўғирлаб кетиб, ўлдирганликда гумонланган саккиз киши ҳибсга олинганини маълум қилди.

Гумонланувчилар душанба куни ҳибсга олингани айтилмоқда. Улар ўлдиргани гумон қилинаётган Липецк шаҳар кенгаши раиси ўринбосари Михаил Пахомовнинг жасади якшанба куни, Москва вилоятида цемент солинган бочка ичида топилган эди.

Пахомов Москвадан 440 километр жануби-шарқда жойлашган Липецк шаҳрида бир неча кун аввал ғойиб бўлган эди.

Ҳибсга олинганлар орасида Москва вилояти ҳукуматининг собиқ мулозими ҳам бор.

Карла дел Понте Суриядаги уруш жиноятлари масаласини Ҳаага судига оширишга чақирди

Карла дел Понте душанба куни Женевада мабуот анжумани ўтказди.
БМТ терговчиси Карла дел Понте Халқаро жиноятлар суди Суриядаги уруш жиноятлари юзасидан суриштирув бошлаши “фурсати келди”, дея баён қилди.

БМТ собиқ прокурори ва Сурия можароси бўйича БМТ мандатига эга тергов комиссияси аъзоси дел Понте, душанба куни Женевда қилган чиқишида, комиссия халқаро ҳамжамиятни Суриядаги зўравонликлар масаласини Ҳаага судига оширишга чақиришини маълум қилди.

Дел Понтенинг баёноти тергов комиссияси Сурияда икки йилдан бери давом этаётган можаро хусусидаги ҳисоботни эълон қилиши ортидан янгради.

131 саҳифалик ҳисоботга кўра, Сурияда ҳам ҳукумат қўшинлари, ҳам исёнчи кучлар уруш жинояитлари, жумладан қотиллик ва қийноқларга қўл урган.

Келаси ойда комиссия БМТ Инсон ҳуқуқлари идорасига уруш жиноятларида гумонланганлар махфий рўйхатини топширишни режалаштирмоқда. БМТ ҳисоб-китобларига кўра, икки йилдан бери давом этаётган жангу-жадалда 70 мингга яқин одам ҳалок бўлган.

Пешовардаги ҳужумда камида 5 киши ҳалок бўлди

Ҳужум Ҳайбар вилоят ҳокими Муттаҳирзеб Хон идорасига кираверишда рўй берди.
Покистонинг Пешовар шаҳрида полиция кийимидаги жанггарилар ҳукумат биносига ҳужум уюштирди. Ҳодисада камида беш киши ҳалок бўлгани айтилмоқда.

Расмийларнинг маълум қилишича, Ҳайбар вилоят ҳокими Муттаҳирзеб Хон идорасига камида тўрт жанггари ҳамла қилган.

Ҳужум қилганлардан бири бинога кираверишда ўзини портлатиб юборгани айтилмоқда.

Ҳужум бошланган пайтда ҳукумат расмийлари билан қабилалар оқсоқоллари учрашаётган бўлган.

Лекин баъзи гувоҳларнинг айтишича, ҳужум ҳукумат биносида жойлашган ҳибсхонага маҳбусларни олиб кетаётган микроавтобус яқинлашган пайтда рўй берган.

Маҳаллий шифохона вакиллари Озодликка ҳужумда ҳалок бўлган беш кишидан тўрт нафари ҳарбийлар бўлганини маълум қилди. Ҳодисада яна камида етти киши жароҳатланган.

Туркманистонда икки сиёсий маҳбус озодликка чиқарилди

Ҳюман райтс уотч ташкилотининг маълум қилишича, сиёсий мотивлар билан қамоққа ташланган туркманистонлик икки фаол, жазо муддатини ўтиб, озодликка чиқарилган. 2006 йилда қамоққа ташланган Сапардурди Хожиев ва Аннақурбон Омонқиличев якшанба куни озодликка чиқарилгани айтилмоқда.

ҲРУга кўра, улар қамоқдалиги пайтида соғлиқлари жиддий тарзда ёмонлашган. Омонқиличев, Хожиев ва унинг опаси Ўғилсапар Муродова муҳожиратдаги Туркманистон Ҳелсинки жамғармаси билан ҳамкорлик қилган.

Фаоллар 2006 йилнинг июн ойида француз журналистларига Туркманистондаги инсон ҳуқуқлари вазияти ҳақида ҳужжатли филм тайёрлашда кўмаклашгани учун қамоққа олинган эди.

2006 йилнинг августида ўтказилган ёпиқ судда уччала фаол ноқонуний қурол сақлаганликда айбдор, деб топилган эди. Муродова 2006 йилнинг сентябрида шубҳали вазиятда вафот этган, Омонқиличев ва Хожиев етти йилданга озодликда маҳрум қилинган эди.

Покистоннинг Пешоварида ҳукумат биноси ҳужумга учради

Покистоннинг Пешовар шаҳрида ҳукумат биноси олдида портлаш ва отишма овози эшитилди. Хавфсизлик кучлари Хайбар минтақаси ҳокими Муттаҳирзеб Хоннинг идорасини ўраб олди.

Ҳодиса гувоҳларининг Озодликка айтишича, ҳужум қабилалалр оқсоқоллари билан ҳукумат мулозимлари ўртасида учрашув кетаётган пайтда бошланган.

Ҳукумат биноси ичида ҳибсхона ҳам жойлашган ва баъзи гувоҳларга кўра, ҳужум бино олдига маҳбусларни олиб кетаётган микроавтобус яқинлашган пайтда бошланган.

Маҳаллий шифохона вакили тиббий муассасага жиддий жароҳатланган етти киши ҳамда уч аскар билан бир фуқаро жасади олиб келинганини маълум қилди.

Арманлар президент сайламоқда

Арманистон президентлигига 8 киши даъвогарлик қилмоқда.
Арманистонда душанба куни президент сайлови ўтказилмоқда. Арманистонликлар мустақилликка эришганларидан бери бешинчи марта президент сайламоқда.

Олти рақиб билан беллашаётганига қарамасдан, иқтидордаги президент Серж Саркисяннинг иккинчи муддатга сайланиши кутилмоқда. Сайловолди сўровлари Саркисянга 70 фоиз сайловчи овоз тўплашини башорат қилган.

Бу сафарги сайловолди кампанияси номзодлардан бирига суиқасд уюштирилгани ва яна бирининг очлик эълон қилгани билан ёдда қоладиган бўлди.

2008 йилдаги сайловда Саркисян ғолиб, деб эълон қилиниши ортидан ўтказилган намойишда норозилар билан полиция ўртасидаги тўқнашувда 10 киши ҳалок бўлган эди.

Қозоғистон автобозорида ўзбек автомобиллари улуши камайди

Nexia қозоғистонликлар орасида ҳали ҳам энг харидоргир автомобиллардан бири бўлиб қолмоқда.
2012 йилда Қозоғистон автомобил бозорида GM Uzbekistan ширкати автомобиллари улуши камайди. Бу ҳақда Қозоғистон автобизнес ассоциацияси ҳисоботида айтилади.

Ҳисоботга кўра, ўтган йили GM Uzbekistan автомобиллари Қозоғистонда сотилган автомашиналар умумий миқдорининг 8,96 фоизини ташкил қилган. 2011 йилда бу улуш 9,98 фоизни ташкил этганди.

Аслида сон нисбатида Ўзбекистонда ишлаб чиқарилган автомобиллар ўтган йили қўшни давлатда 2 баробар кўп сотилган. Дейлик, 2011 йилда GM Uzbekistan Қозоғистонда 3829 та машина сотган бўлса, 2012 йилда 7793 та автомобил сотишга муваффақ бўлган. Бироқ ўтган йили бошқа машиналар кўпроқ сотилгани учун қўшни мамлакат автобозорида ўзбек автомашиналари улуши қисқарган.

Ҳисоботга мувофиқ, 2012 йилда Қозоғистонда энг кўп LADA автомобиллари сотилган ва рус автомобилларининг улуши 40 фоиздан ортиқроқни ташкил қилган. Иккинчи ўринни эса 9,32 фоизлик улуш билан Toyota автомобиллари эгаллаган.

Ҳисоботда ўтган йили Қозоғистонда ўзбек автомобиллари орасида Nexia автомашиналари энг харидоргир бўлгани қайд этилади.

Барак анклавига гуманитар юк етказиб берилди

Қирғизистоннинг Ўзбекистон ичкарисида жойлашган Барак анклавига якшанба куни гуманитар ёрдам етказиб берилди.

Қирғизистон чегара хизмати раҳбари Тўқўн Мамитовнинг маълум қилишича, 4 тонналик ёрдам юки Ўзбекистон томони билан келишилган ҳолда ҳозиргача ёпиқ турган Оқтош назорат-ўтказиш пункти орқали олиб ўтилган.

Гуманитар юкни Қирғизистон ҳукуматининг Ўш вилоятидаги вакили Сўўрўнбай Жээнбеков бошчилигидаги мулозимлар олиб борган. Соғлиғидан шикоят қилган 17 нафар бараклик Қирғизистоннинг бошқа ерларида даволаниш учун Оқтош пункти орқали мулозимлар билан бирга қайтган.

Ироқдаги портлашларда 28 киши нобуд бўлди

Янги йил бошидан буён Ироқда суннийларнинг шиаларга ҳужуми сезиларли даражада кўпайган.
Бағдоднинг шиалар яшовчи мавзеларида содир этилган қатор портлашлар оқибатида якшанба куни, сўнгги маълумотларига кўра, камида 28 киши ҳалок бўлган, 100 киши тан жароҳати олган.

Портлаш мосламалари Бағдоднинг Садр-Сити, Ҳабибия ва Қоҳира мавзеларида портлаган.

Янги йил бошидан буён Ироқда суннийларнинг шиаларга ҳужуми сезиларли даражада кўпайган.

Айни пайтда мамлакатда суннийларнинг шиалар бошчилигидаги марказий ҳокимиятга қарши намойишлари ҳам тўхтамаяпти.

Кипрда президентлик сайловларининг иккинчи босқичи бўлиб ўтади

Кипрда якшанба куни ўтказилган президентлик сайловларида мухолифатдаги «Демократик йиғин» консерватив партияси раҳбари Никос Анастасиадис олдинга чиқиб олди.

Дастлабки маълумотларга кўра, унга сайловчиларнинг 45,44 фоизи овоз берган.

Президентлик сайловининг иккинчи босқичи 24 феврал куни бўлиб ўтади.

Унда Анастасиадисдан ташқари 27 фоиз овоз жамғаролган иқтидордаги Коммунистлар партияси вакили Ставрос Малас ҳам иштирок этади.

Аввалроқ, экзит-полл натижаларига таянган ҳолда, Анастасиадис сайловнинг биринчи босқичидаёқ ғалаба қозонгани хабар қилинганди.

Кипрдаги сайловолди баҳсларида асосан мамлакатни иқтисодий бўҳрондан қандай олиб чиқиш масаласи муҳокама қилинган. Никос Анастасиадис ўз сайловчиларига Европа Иттифоқи ва Халқаро валюта жамғармаси билан Кипрга молиявий ёрдам тақдим этиш бўйича шартнома тузишни кечиктирмасликка ваъда берган.

БМТ-Араб Лигаси вакили Сурия мухолифати таклифини қўллади

БМТ-Араб Лигасининг Сурия бўйича махсус вакили Лаҳдар Брахимий.
БМТ-Араб Лигасининг Сурия бўйича махсус вакили Лаҳдар Брахимий Сурия мухолифати раҳбарларининг бўҳронга чек қўйиш учун мулоқот ўтказиш ҳақидаги чақириғини қўллаб-қувватлашини айтди.

Брахимий мухолифат коалицияси президенти Муаз Ал-Ҳатиб томонидан илгари сурилган таклиф мулоқотга йўл очади ва Сурия ҳукуматининг можарони тинч йўл орқали ҳал этиш ҳақидаги ваъдасини бажаришга ундашини баён қилди.

Лаҳдар Брахимий буни якшанба куни Миср пойтахти Қоҳирада Араб Лигаси Бош котиби Набил Ал-Арабий билан учрашувдан кейин айтди.

Сурия миллий коалицияси жума куни эълон қилган баёнотда президент Башар Ал-Ассад ёки унинг хавфсизлик хизмати аъзолари музокараларда қатнашишига изн берилмаслиги билдирилган.

Дамашқ эса Суриядаги бўҳронга чек қўйиш учун президент Ал-Ассад истеъфога чиқиши кераклиги ҳақидаги мухолифат талабини инкор қилган.

Арманистонда душанба куни президент сайлови ўтказилади

Арманистонда 18 феврал куни президентлик сайлови ўтказилади.

Якшанба куни сайловолди тарғибот-ташвиқот кампанияси олиб бориш таъқиқланган.

Сайлов бюлетенига етти номзоднинг исм-шарфи киритилган.

Бироқ иқтидордаги президент Серж Саркисян президентликка асосий даъвогар экани айтилмоқда.

Хабарларга кўра, мустақил Арманистоннинг биринчи Ташқи ишлар вазири, мухолифатдаги “Меърос” партияси етакчиси Раффи Овонесян сайловда Саркисянга асосий рақиб бўлиши мумкин.

Президентликка яна бир номзод, “Радио хай” хусусий радиостанцияси директори, сиёсатшунос Андреас Гукасян давлат раҳбарини сайловдан четлатиш талаби билан 21 январдан бери очлик акциясини давом эттириб келмоқда.

Косово мустақиллигининг беш йиллиги нишонланмоқда

Косово президенти Атифет Яхйага.
Косово Сербиядан ўз мустақиллигини эълон қилганининг 5 йиллиги нишонламоқда.

Сана муносабати билан телевидение орқали халққа мурожаатида Косово президенти Атифет Яхйага мустақилликни ортга қайтариш “имконсиз экани”ни таъкидлади.

2008 йил 17 февралида Косово мустақиллиги эълон қилинганидан бери БМТга аъзо 193 давлатнинг 98 таси Косовони мустақил давлат сифатида тан олган.

Белград ҳозиргача Косовога ўзининг исёнкор ўлкаси сифатида қарайди.

2011 йилда Европа Иттифоқи етакчилигида бошланган музокаралар натижасида Сербия ва Косово муносабатлари илиқлаша бошлади.

6 феврал куни Брюсселда Косово Президенти Атифет Яҳйага ва Сербия Президенти Томислав Николич илк бор учрашди.

Айни пайтда, Косово Европанинг энг камбағал давлати бўлиб қолмоқда.
Косоводаги 1,8 миллион аҳолининг учдан бир қисми кунига бир доллардан кам пулга яшамоқда.

Покистондаги ҳужумда ўлганлар сони 81 кишига етди

Покистон жануби-шарқида жойлашган Балучистон вилоятининг Кветта шаҳрида содир этилган портлашда, камида 81 киши ҳалок бўлди, 160 дан ортиқ одам яраланди.

Покистон полицияси қурбонларнинг аксари ҳазора шиалар эканини билдирди.

Шанба кунги ҳужум учун массъулиятни сунний мазҳабидаги Лашкари Жангви гуруҳи ўз зиммасига олди.

Жорий йил бошида айни шаҳарда шиаларга қарши амалга оширилган ҳужумда камида 86 одам нобуд бўлган эди.

Ҳужум маҳаллий ҳукуматнинг тарқатиб юборилишига сабаб бўлди.

Давомини ўқинг

XS
SM
MD
LG