Линклар

Шошилинч хабар
08 декабр 2019, Тошкент вақти: 05:27

Халқаро хабарлар

Байден: АҚШ Эрон билан музокара олиб боришга тайёр

АҚШ вице-президенти Жозеф Байден.
АҚШ вице-президенти Жозеф Байден Эроннинг ядровий дастурини муҳокама қилиш учун Қўшма Штатлар Эрон расмийлари билан икки томонлама учрашув ўтказиш истагида эканини айтди.

Германиянинг Мюнхен шаҳрида ўтаётган хавфсизлик масаласига бағишланган халқаро анжуманда сўзлаган Жозеф Байден АҚШ маъмурияти мақсади Эроннинг ядровий қуролларни қўлга киритишини тўхтатиш эмас, унинг олдини олиш эканини урғулади.

Якшанба куни тугайдиган Мюнзен анжуманида 400дан ортиқ юқори лавозимли дипломатлар ва мудофаа вазирликлари расмийлари қатнашмоқда.

Улар орасида Европа Иттифоқи, АҚШ, Россия ва бошқа давлатлар расмийлари ҳам бор.

Миср президенти саройи яқинига полиция кучлари жойлаштирилди

Миср пойтахтидаги президент саройи яқинига полиция кучлари жойлаштирилди.

Бунга шанбага ўтар кечаси президент саройи олдида полиция ва намойишчилар ўртасида тўқнашувлар рўй бергани сабаб бўлди.

Шанба куни Миср Бош вазири Ҳишам Қандил бир неча минг киши намойиш ўтказаётган Таҳрир майдонига киришга уринган пайтда намойишчилар унинг машинасига тошлар отган.

Мисрда сўнгги ҳафтада ўтказилган намойишларда қарийб 60 киши нобуд бўлгани айтилмоқда.

Намойишчилар президент Муҳаммад Мурсийни миллий бирлик ҳукумати тузишга чақириб, конституцияга ўзгартишлар киритишни талаб қилмоқда.

АҚШ вице-президенти Сурия мухолифатини дастаклашни ваъда қилди

АҚШ вице-президенти Жозеф Байден.
АҚШ вице-президенти Жозеф Байден Германиянинг Мюнхен шаҳрида ўтаётган Хавфсизлик анжуманидан ташқари Сурия мухолифати вакиллари билан шанба куни учрашишини маълум қилди.

Вашингтон Сурия мухолифатини қўллаб-қувватлашни давом эттиришини айтган Байден Қўшма Штатлар ҳозирда 50 миллион доллардан кўпроқ ноҳарбий ёрдам кўрсатаётганини қўшимча қилди.

Байден бу гапларни 400дан ортиқ дипломатлар ва мудофаа вазирликлари расмийлари иштирок этаётган Хавфсизлик масалаларига бағишланган анжуманида айтди.

Мюнхен анжуманида Европа Иттифоқи, АҚШ, Россия ва бошқа давлатлар расмийлари иштирок этмоқда.

АҚШ Махфий хизмати бошлиғи истеъфо берди

АҚШ Махфий хизмати бошлиғи Марк Салливан.
АҚШ Махфий хизмати бошлиғи Марк Салливан 1 феврал куни истеъфо берди.

Сўнгги йилларда у бошқарган ташкилот жанжалларга сабаб бўлди.

Ўтган йил Махфий хизмат бошлиғи Колумбиядаги воқеа бўйича Конгресс аъзоларига ҳисобот беришга мажбур бўлди.

АҚШ президенти Барак Обаманинг Картаҳена шаҳридаги халқаро учрашувга келишини кутаётган Махфий хизматнинг бир неча аъзоси фоҳишалар билан кеча уюштирган.

Воқеа бўйича текширув ўтказилганидан кейин саккиз нафар ходим ишдан бўшатилган.

Ундан олдин, 2009 йилда Оқ Уйдаги расмий зиёфатга икки нафар бегона киши кириб қолган.

Махфий хизматнинг вазифаси АҚШ президенти ва оила аъзоларини, шунингдек, собиқ президентларни қўриқлашдан иборат.

Айни пайтда, Махфий хизмат қалбаки доллар ва қимматбаҳо қоғозларни аниқлаш билан ҳам шуғулланади.

Покистон хавфсизлик кучларининг 15 аъзоси ҳужум қурбони бўлди

Покистоннинг шимоли-ғарбий қисмида жойлашган Ҳайбер Пахтунхва вилоятида жанггарилар шанба куни тонгда ҳарбий базага ҳужум қилгани натижасида хавфсизлик кучларининг камида 15 аъзоси, тинч аҳолидан 11 киши нобуд бўлди.

Хавфсизлик хизмати расмийларига кўра, Лакки Марват туманининг Сарой Навранг минтақасидаги базага ҳужумда жанггарилар автоматлар ва гранатамётлардан фойдаланган.

Маҳаллий полиция бошлиғи Гул Ҳамид Хон Озодликка етти соат давом этган отишмада хавфсизлик кучлари беш нафар жанггарини ўлдирганини айтди.

Ҳужум учун масъулиятни покистонлик толиблар номи билан танилган Терики Толибон Покистон гуруҳи ўз зиммасига олди.

Франция президенти Малига борди

Франция Президенти Француа Олланд.
Франция Президенти Француа Олланд Малига қисқа муддатли ташриф билан борди.

Олланднинг Малига киритилган француз ҳарбийлари билан учрашиши ва хавфсизликни таъминлаш вазифасини Ғарбий Африка қўшинларига топшириш масаласини муҳокама этиши режаланган.

Малига ташрифи чоғида Франция президентига ташқи ишлар, мудофаа ва тараққиёт масалалари бўйича вазирлар ҳамроҳлик қилмоқда.

Франсуа Олланднинг ташрифи Мали шимолида радикал исломчиларни сиқиб чиқариш бўйича Франция қўшинлари етакчилигида олиб борилаётган ҳарбий амалиётлар ниҳоясига етаётган пайтга тўғри келди.

Франция қўшинлари Малидаги жанговор амалиётларни ўтган ой бошлаган эди.

Жон Керри Давлат котиби сифатида қасамёд қилди

Жон Керри АҚШнинг янги Давлат котиби сифатида расман қасамёд қилди.

Керри қасамёд қилишидан олдин Давлат котиби лавозимини тарк этаётган Ҳиллари Клинтон ҳайрлашув нутқини сўзлади.

Тантанали маросим жума куни АҚШ Олий суди биносида тор даврада бўлиб ўтди.

Жон Керрининг жамоатчилик олдида қасамёт қилиш маросими келаси ҳафтага белгиланган.

69 ёшли Жон Керри Ветнам уруши ветеранидир. У 28 йил давомида сенат аъзоси бўлган.

2004 йилги президентлик сайловида Демократик партиядан номзод бўлган Жон Керри 2008 йилдан бери Сенатнинг Ташқи алоқалар қўмитаси раиси лавозимида ишлаб келаётган эди.

Россия учирган ракета океанга қулади

Бортида алоқа мақсадларида қўлланиладиган АҚШга қарашли Intelsat-27 Ер сунъий йўлдоши бўлган Россиянинг ракетаси жума куни фазога учирилганидан 50 сония ўтиб Тинч океанига қулади.

Интерфакс ахборот агентлиги хабарига кўра, “Зенит” ракетасининг океанга қулашига ёнилғи тизимидаги муаммо сабаб бўлгани тахмин қилинмоқда.

Ракета Россия-АҚШ ўртасидаги Sea Launch лойиҳаси доирасида Тинч океанидаги сузувчи платформадан фазога учирилган.

НАТО АҚШнинг Анқарадаги элчихонасига ҳужумни қоралади

АҚШнинг Анқарадаги элчихонаси биноси.
НАТО АҚШнинг Туркиядаги элчихонасига ҳужумни қоралаб чиқди.

Жума куни Анқарада худкуш шахс АҚШ элчихонаси олдида ўзи ва туркиялик қўриқчини ўлдирганди.

Оқ уй мазкур ҳужумни террорчилик хуружи, деб атади. Туркия бош вазири Ражаб Тоййиб Эрдўғон эса террорга қарши курашни фаоллаштириш зарурлиги ҳақида баёнот берди.

Ҳужум учун масъулиятни ҳозирча ҳеч ким ўз зиммасига олгани йўқ. Бироқ Туркия расмийлари теракт АҚШ ва НАТОга қарши бўлган сўл радикал экстремистик гуруҳлар томонидан амалга оширилганини тахмин қилмоқда.

Қоҳирадаги тўқнашувда яна бир киши ҳалок бўлди

Жума куни Қоҳирадаги президент саройи олдида полиция ва намойишчилар тўқнашуви бўлиб ўтди.

Хавфсизлик кучлари ўзларига қарата тош ва ичига ёнувчи модда қуйилган шишаларни улоқтирмиш намойишчиларни тарқатиш учун сувотар воситаларни ишга солган ва осмонга қарата ўқ узган.

Тўқнашув чоғида бир киши ҳалок бўлгани айтилмоқда.
Президент Муҳаммад Мурсийга мухолиф бўлган кишиларнинг норозилик акциялари Мисрнинг Александрия ва Порт Саид шаҳарларида ҳам ўтказилган.

Намойишчилар Мурсийни миллий бирдамлик ҳукуматини тузишга чақириб, конституцияга ўзгартишлар киритишни талаб қилмоқда.

Сўнгги ҳафтада Мисрда ўтказилган намойишлар чоғида 60 чоғли одам ҳалок бўлган.

Мехикодаги портлаш қурбонлари сони 32 кишига етди

Мексика пойтахти Мехикодаги давлатга қарашли Pemex нефт ширкати биносида содир бўлган портлашда ҳалок бўлганлар сони 32 кишига етди. Аввалроқ мазкур портлашдан 25 киши нобуд бўлгани хабар қилинганди.

Портлаш чоғида 120 дан зиёд киши тан жароҳати олган.

Айни пайтда вайроналар остида қолган кишиларни қидириш ишлари давом этмоқда.

Портлаш сабаби ҳозирча аниқ эмас. Портлаш натижасида осмонўпар бинонинг пастки уч қаватига жиддий шикаст етган.

Ироқда ҳукуматга қарши намойишлар бўлиб ўтди

Ироқнинг пойтахт Бағдод ва бошқа бир қанча шаҳарларида жума куни суннийларнинг Ироқ ҳукумати томонидан амалга оширилаётган сиёсатига қарши норозилик намойишлари бўлиб ўтди.

Намойишчилар шиа мазҳабига мансуб Нури ал-Маликий бошчилигидаги ҳукумат суннийларни қатағон қилаётганини иддао қилдилар. Улар сунний мазҳабига мансуб маҳкумлар озод қилинишини ҳам талаб қилдилар.

Пайшанба куни Ироқда фаолият юритаётган ва Ал-Қоидага алоқадор экстремистик гуруҳлардан бири суннийларни қўлга қурол олиб, шиалар бошқарувидаги ҳукуматга қарши курашишга чақирилган аудиоёзувни ёйинлаганди.

Мюнхенда хавфсизлик бўйича йиллик анжуман бошланди

Германия Мудофаа вазири Томас де Майзер Мюнхен анжумани очилиши маросимида нутқ сўзламоқда.
Германиянинг Мюнхен шаҳрида хавфсизлик бўйича уч кунлик йиллик халқаро анжуман бошланди.

Йиғилишда Европа Иттифоқи, АҚШ, Россия ва бошқа давлатлар дипломатлари ва мудофаа вазирликлари расмийлари иштирок этмоқда.

Мюнхен анжуманида Сурия ва Малида давом этаётган можароларнинг халқаро хавфсизликка таҳдиди, шунингдек, Эроннинг ядровий дастурига оид бўҳроннинг муҳокама этилиши режаланган.

Учрашувда қатнашаётган АҚШ Вице-президенти Жо Байден ва Россия Ташқи ишлар вазири Сергей Лавровнинг шанба куни нутқ сўзлашлари кутилмоқда.

Хавфсизлик анжуманида БМТ-Араб Лигасининг Сурия бўйича вакили Лахдар Браҳимий, Сурия мухолифати лидери Муаз Ал-Ҳатиб ҳам иштирок этмоқда.

Анжуман иштирокчилари хавфсизлигини таъминлашга Германия полициясининг 3400 ходими жалб қилинган.

Мисрда норозилик намойишлари давом этмоқда

Миср шаҳарларида минглаб фуқаро президент Муҳаммад Мурсийга қарши норозилик юришлари ўтказди.

Жума куни пойтахт Қоҳиранинг Таҳрир майдони ва президент саройи олдига йиғилган одамлар “Озодлик!”, “Мурсий ноқонуний!” деган шиорларни айтиб қичқирдилар.

1 феврал куни Искандария ва Порт Саид шаҳарларида ҳам норозилик намойишлари ўтказилди.

Миср мухолифати президент Муҳаммад Мурсийдан миллий бирлик ҳукумати тузиш ва исломчилар ишлаб чиққан конституцияга тузатишлар киритишни талаб қилди.

Туркиядаги АҚШ элчихонасига "террор ҳужуми" уюштирилди

Худкуш шахс Анқара шаҳридаги АҚШ элчихонаси олдида ўзи ва туркиялик қўриқчини ўлдирди.

Туркия ва АҚШ буни “террор ҳужуми” деб атади. Худукуш ҳужумда бир неча одам яраланди.

1 феврал куни телевидениеси орқали воқеага муносабат билдирган Туркия Бош вазир Ражаб Тоййиб Эрдўғон “террорчи унсурлар”га қарши глобал миқёсда курашишга чақирди.

АҚШнинг Туркиядаги элчиси Францис Ричардон журналистларга ҳужум оқибатида қўриқчи ҳалок бўлганидан элчихона ходимлари қайғуга ботганини айтди.

АҚШ Давлат Департаменти матбуот котиби Виктория Нуланд жума кунги портлаш элчихона биноси олдида, текширув пунктида рўй берганини айтди.

Арманистон: Президентликка номзоднинг елкасидаги ўқ олиб ташланди

Жарроҳлар Арманистон президенти лавозимига номзод бўлган Паруйр Айрикянга уюштирилган суиқасд пайтида унинг елкасига тиқилиб қолган ўқни олиб ташлади.

63 яшар Айрикян 31 январ куни кечқурун Ереванда ўз уйи олдида отиб кетилди. Ҳозирда полиция ҳужум қилган шахсларни қидирмоқда.

Арманистон Соғлиқни сақлаш вазирлиги матбуот котиби Анаит Аитаян жума куни журналистларга жароҳат Айрикяннинг ҳаётига таҳдид солмаётганини айтди.

18 феврал куни Арманистонда ўтказиладиган президентлик сайловида Айрикян асосий даъвогар бўлмаган.

Саккиз номзод иштирок этадиган президентлик сайловида иқтидордаги президент Серж Саркисяннинг ғолиб чиқиши кутилмоқда.

Паруйр Айрикянни касалхонага бориб кўрган Арманистон Бош вазири Тигран Саркисян сиёсатчига қилинган ҳужумни қоралаб, уни ҳукуматга берилган зарба дея бахолади.

Арманистон конституциясига кўра, агар президентликка номзод сайловда қатнаша олмаса, сайлов икки ҳафтага кечиктирилади.

Покистондаги ҳужумда камида 15 киши қурбон бўлди

Покистоннинг Ҳайдар Пахтунхва вилоятида амалга оширилган ҳужумда камида 15 киши нобуд бўлди, ўнлаб одам яраланди.

Полиция маълумотига кўра, портлаш жума куни Хангу туманидаги масжид яқинида жойлашган бозорнинг тор ва одамлар билан гавжум кўчасида содир этилган.

Қурбон бўлганларнинг аксари жума намозини ўқиш учун масжидга борган одамлар бўлган.

Хангу туманида сунний ва шиалар ўртасида мазҳаблараро зўравонликлар анча вақтдан бери давом этиб келаётгани айтилади.

АҚШ вице-президенти Германия канцлери билан учрашади

АҚШ вице-президенти Жо Байден.
АҚШ Вице-президенти Жо Байден 1 феврал куни Берлинда Германия Канцлери Ангела Меркел билан учрашади.

Учрашув арафасида Германияда чиқадиган Sueddeutsche Zeitung газетасига берган интервюсида Байден Эронни ўзининг ядровий дастури бўйича музокаралар столига қайтишга чақирди.

Бевосита сўзлашувлар ўтказиш ҳақидаги АҚШ таклифини яна бир марта такрорланган Жо Байден Теҳронни дипломатик музокаралар чексиз давом этмаслиги ҳақида огоҳлантирди.

АҚШ вице-президентининг Мюнхен шаҳрида хавфсизлик масалаларига бағишланган йиллик халқаро анжуманда иштирок этиши режаланган.

Йиғилишда асосан Сурия масаласининг муҳокама этилиши кутилмоқда.

Анжуманда Жо Байденнинг Сурия мухолифати лидери Муаз Ал-Ҳатиб, БМТ-Араб Лигасининг Сурия бўйича вакили Лахдар Браҳимий ва Россия Ташқи ишлар вазири Сергей Лавров билван учрашиши кутилмоқда.

Мехикодаги портлашда 14 киши ҳалок бўлди

Мексика пойтахти Мехикодаги Pemex нефт ширкати бош қароргоҳида юз берган портлашда 14 киши ҳалок бўлди, 80 киши жарохат олди.

Бундан ташқари, 31 январ куни рўй берган портлаш натижасида 30 га яқин киши қўшни бино ертўласида қамалиб қолган.

Айни дамда портлаш сабаблари ҳақида аниқ маълумот йўқ.

Портлаш юз берган кўп қаватли бинодан Pemex нефт ширкатининг минглаган ишчилари экавуация қилинган.

Ҳалок бўлганлар ва жароҳат олганларни касалхонага олиб бориш учун полиция тўрт вертолёт жалб қилгани айтилмоқда.

Мексика давлатига қарашли Pemex ширкати нефт қазиб олиш ҳажми бўйича дунёда тўртинчи ўринда туради. Ширкат кунига 2,5 миллион баррел нефт қазийди.

Арманистонда президентликка номзод қуролли ҳужумга учради

Ереванда 31 январ куни кечки пайт Арманистон президентлигига номзод Паруйр Айрикянга нисбатан суиқасд уюштирилди.

Айрикян шаҳар марказий кўчаларидан бирида номаълум шахс тарафидан отилган ва елкасидан яраланган.

Сиёсатчи олган жароҳат унинг ҳаётига жиддий хавф солмаслиги айтилмоқда.

Арманистон полицияси ҳужум бўйича жиноий иш қўзгади.

Касалхонага ётқизилган Айрикян билан мамлакатнинг қатор сиёсий етакчилари, жумладан, Бош вазир Тигран Саркисян учрашди.

63 ёшли Айрикян Совет даврида диссидентлик фаолияти ва махфий сиёсий ташкилотга аъзо бўлгани учун 11 йил қамоқда ва 3 йил сургунда бўлган.

Паруйр Айрикян 18 феврал куни ўтадиган Арманистон презинденти сайловларидаги саккиз номзоддан биридир.

Клинтон: АҚШ сўнгги тўрт йил ичида дунёда кўпроқ ҳурмат қозонди

Давлат котиби сифатида келтирган сўнгги нутқида Ҳиллари Клитон АҚШ оҳирги тўрт йил давомида олдингига қараганда “уйида кучлироқ ва дунёда кўпроқ ҳурматга эга” мамлакатга айланганини билдирди.

Пайшанба куни Вашингтон шаҳрида Ташқи Алоқалар Кенгашида қилган чиқишида Клинтон АҚШ дунёдаги “жуда муҳим куч” сифатида қолиши ва дипломатиянинг “21 аср воситаларидан”, жумладан, янги технологиялардан фойдаланишда давом этиши кераклигини таъкидлади.

Клинтон мамлакат ташқи сиёсатининг келгуси йиллардаги асосий йўналишлари Осиёда АҚШ позитсиясини мустаҳкамлаш, Афғонистондаги ҳарбий амалиётларни якунлаш, Яяқн Шарқ минтақасида ўзгаришларга кўмаклашиш ва кенг иқтисодий ҳамкорликни давом эттириш эканлигини айтди.

Сешанба куни АҚШ Сенати тарафидан янги Давлат котиби этиб тайинланган Жон Керри 4 февралдан лавозимига киришади.

БМТ Исроилни Фаластин ҳудудларидан яҳудий кўчкиндиларни олиб чиқишга чақирди

БМТнинг инсон ҳуқуқлари бўйича мутахассислари Исроилни Фаластиннинг эгаллаб олинган ҳудудларида яҳудий маҳаллаларини қуришни тўхтатиш ва у ердан яҳудий кўчкиндиларни олиб чиқишга чақирди.

Пайшанба куни эълон қилинган ҳисоботда мазкур масала юзасидан текширув ўтказган БМТ мутахассислари Исроилни инсонпарварлик қонунларини “жиддий тарзда бузганлик”да айблади.

Исроил БМТ Инсон ҳуқуқлари кенгаши томонидан ўтган йилнинг март ойида ташкил қилинган текширув гуруҳи билан ҳамкорлик қилишдан бош тортиб келади.

Бу хусусда пайшанба куни муносабат билдирган Исроил расмийлари ҳисоботни “нохолис” дея атаб, тинчлик ўрнатиш уринишларига путур етказади дея таъкидлади.

Ҳисоботда айтилишича, фаластинликлар келгусида қурмоқчи бўлган давлатнинг бир қисми деб кўарадиган ҳудудлар, жумладан Ғарбий Соҳил ва Шарқий Қуддусда ташкил қилинган 250ка яқин маҳаллада 520 мингга яқин яҳудий кўчкиндиси яшайди.

Мазкур ҳужжат эълон қилинишидан икки кун аввал Исрил тарихда биринчи бўлиб БМТ тарафидан ўзидаги инсон ҳуқуқлари вазиятига баҳо беришини бойкот қилишини эълон қилди.

Жалолободда Ата-Журт партиясининг юзлаб тарафдори намойишга чиқди

Қирғизистоннинг Жалолобод шаҳрида ҳибсда қолаётган Ата Журт партияси етакчиларининг 700га яқин тарафдори норозилик намойиши ўтказди.

Пайшанба кунги намойиш иштирокчилари мухолифатчилар устидан суд одил бўлиши, ҳибсдан уй қамоғига ўтказилиши ва парламентнинг дарҳол тарқатиб юборилишини талаб қилишди.

Намойишчиларнинг камида 50 нафари от миниб келди. Норозилар ўз талаблари қондирилмайдиган тақдирда яна кўплаб намойиш уюштириш тўғрисида резолюция қабул қилди.

Қамчибек Ташиев, Садир Жапаров ва Талант Мамитовлар тартибсизликларни келтириб чиқарганлик ва ҳукуматни ағдаришга уринганликда айбланмоқда. Уалрнинг уччаласи октябр ойида зўравонликка айланиб кетган аксил ҳукумат намойишини уюштирганидан кейин ҳибсга олинган эди. Улар устидан ўтаётган суд пайшанба куни давом этди.

Бишкек марказида бир аёл ўзига ўт қўйди

31 январ куни Қирғизистон парламенти биноси олдида Жипарқан Ўмурова исмли аёл ўғлининг ноҳақ қамалганига норозилик билдириб, ўзига-ўзи ўт қўйди.

Бахтли тасадиф туфайли олов милиция ходимлари тарафидан тезда ўчирилди ва аёл тез тиббий ёрдам хизмати машинасида касалхонага олиб кетилди.

Ўзига бензин ёрдамида ўт қўйишидан олдин 51 ёшли Жипарқан Ўмурова Озодлик радиосининг қирғиз хизмати мухбирлари билан суҳбатлашиб, Бишкекка Норин вилоятидан келгани, қамалган ўғлининг иши бўйича адолат излаётганини гапирди.

Ўмурованинг ўғли бировни гуруҳ бўлиб дўппослашда қатнашганликда айбланган. Унинг иддао қилишича, Норин шаҳар суди уни далиллар йўқлиги туфайли оқлаганига қарамасдан, вилоят суди 13 йилга қамаган.

Соғлиқни сақлаш вазирлиги ўзига ўт қўйган аёл 2-3 даражадаги кўйиш билан Бишкек шаҳридаги Травматология ва ортопедия илмий-тадқиқот марказига ётқизилганини маълум қилди.

Тожикистон вояга етмаган меҳнат муҳожирларини Россиядан қайтармоқчи

Тожикистон Миграция хизмати бошлиғи Сайфулло Девонаев Россияда 74 минг нафар 18 ёшдан кичик бўлган тожикистонлик меҳнат қилаётганини билдирди.

Девонаев Душанбеда ўтказилган матбуот анжуманида тожик болаларининг Россияга меҳнат муҳожирлигига кетиб қолиши олдини олиш учун ҳукумат комиссияси тузилганини маълум қилди.

Матбуот анжуманида қатнашган ички ишлар вазирлиги ўсмирлар масалалари бўйича бошқармаси бошлиғи Латиф Зокиров ҳукумат 2012 йилда ўнлаб ўсмирни Россиядан Тожикистонга қайтарганини таъкидлади.

Ҳар йили Россияга Тожикистон, Ўзбекистон ва Қирғизистондан миллионлаб меҳнат муҳожирлари тирикчилик қидириб кетади.

Расмий маълумотларга кўра, биргина Ўзбекситондан 2,4 миллинга яқин одам Россияда меҳнат қилади. Норасмий манбаларда бу рақам 5 миллиондан 8 миллионгачани ташкил қилиши айтилади.

Марказий-осиёлик меҳнат муҳожирларининг кўпчилиги Россияда нолегал тарзда ишлаши айтилади.

Давомини ўқинг

XS
SM
MD
LG