Линклар

Шошилинч хабар
20 август 2019, Тошкент вақти: 08:04

Халқаро янгиликлар

Эронга нисбатан босим кучаймоқда

Эрон мукаммалроқ центрифугаларни ишга тушираётганига оид ҳисоботлар ортида Теҳрон ҳукуматига нисбатан халқаро босимлар кучаймоқда. БМТ қошидаги Атом энергияси халқаро агентлиги пайшанба куни эълон қилган ҳисоботга кўра, центрифугалар Натанздаги ядровий заводга ўрнатилмоқда.

Қўшма Штатлар Эроннинг бу ҳаракати “провокацион қадам” бўлишини баён қилди. Британия эса, бу вазият “жиддий ташвиш” келтириб чиқаришини таъкидлади.

Эроннинг ашаддий рақиби Исроил Исломий Республика атом бомбасида ишлатилиши мумкин бўлган бойитилган уранни қўлга киритишга бевосита яқинлашди, дея баёнот берди.

АЭХАга кўра, Натанзда ўрнатилиши айтилаётган центрифугаларнинг ишга туширилиши Эронга уранни бойитиш жараёнини жиддий тарзда тезлатиш имконини беради, дея маълум қилди.

Ғарб давлатлари Эронни яширин тарзда ядровий қурол ишлаб чиқаришга уринаётганликда айблаб келади. Теҳрон бу айбловларни рад этади.

Келаси ҳафта Қозоғистонда Эрон билан олти қудратли давлат ўртасидаги музокараларнинг навбатдаги босқичи бўлиб ўтади.

Қирғизистон парламенти ГЭС қуришга оид келишувни ратификация қилди

Қирғиз парламенти Норин дарёси устида гидроэлектростанция қуришга оид Қирғизистон ва Россия ўртасида имзоланган келишувни ратификация қилди.

Парламент маъқуллаган ҳужжат кучга кириши учун уни Қирғизистон Президенти Алмазбек Атамбаев имзолаши керак.

Мазкур келишув ўтган йилнинг сентябрда Россия Президенти Владимир Путиннинг Бишкекка ташрифи давомида имзоланган эди. Унга кўра, Россия гидроиншоотни қуриш лойиҳасига 1,7 миллиард АҚШ доллари миқдорида сармоя қилиши керак.

Шунингдек келишувда Россия сармоя қилган маблағ қатйрилгунига қадар Қирғизистондаги тўққизта гидроиншоотда 75 фоиз улушга эгалик қилиши кўзда тутилган. Россия сармояси қайтарилгач эса, иккала томон 50 фоиздан улушларни назорат қилади.

Қирғизистон парламентида келишув ратификациясига оид масала декабр ойидан бери қизғин муҳокама қилинди.

Ўзбекистон бу каби келишувлар имзоланишида минтақадаги барча мамлакат манфаатлари инобатга олиниши лозимлигини айтиб, қўшни республиканинг ГЭС қуриш лойиҳасини танқид қилиб келади.

Қотилликда айбланаётган машҳур паралимпиячи Писториусни гаровга қўйиб озод қилиш масаласи кўрилмоқда

Оскар Писториус ўз қаллиғини қасддан ўлдирганликда айбланмоқда.
Жанубий Африка суди югуриш бўйича паралимпия чемпиони, ўз қаллиғини қасддан ўлдирганликда айбланаётган Оскар Писториусни гаров эвазига қўйиб юбориш масаласини тўрт кундан бери кўриб чиқмоқда.

Жума куни судда чиқиш қилган прокурор Жерри Нел ногирон спортчи Писториус қилмиши учун “қамоққа тушиши муқаррар” эканини яхши тушуниши ва шу боис унинг қочиб кетиши эҳтимоли юқорилигини таъкидлаб, гаров эвазига қўйиб юборилмаслиги лозим, деди.

Ўз навбатида адвокатлар Пситориус жуда машҳур одам бўлгани важидан қочиши мумкинлигини эҳтимолдан соқит қилмоқдалар.

Қораловчилар Писториус 14 феврал кунги ҳодисада ўз қаллиғи 29 ёшли модел Рива Стинкампни, у ваннахонада қамалиб олган пайтда отиб ўлдирганликда айбламоқдалар.

26 ёшли Писториуснинг ўзи Стинкампни тасодифан, уйни тунагани кирган босқинчи, деб ўйлаб отиб қўйганини иддао қилмоқда.

Иккала оёғи йўқ спортчи углерод тўқимали махсус металлдан тайёрланган протезлар ёрдамида халқаро мусобақалардан иштирок этади ва Жанубий Африкада қаҳрамон ҳисобланади. 2012 йилги Лондон Олимпиадасида Писториус нафақат паралимпия ўйинлари, балки ёзги олимпиаданинг асосий қисмида етти мучали соғ спортчилар билан беллашди.

НАТО вазирлари Афғонистон ва Украина билан ҳамкорликни муҳокама қилмоқда

НАТО Бош котиби Андерс Фог Расмуссен.
НАТО мудофаа вазирлари Брюсселда икки кундан бери 2014 йилда қўшинлар Афғонистондан олиб чиқилганидан кейин Кобул ҳукуматига молиявий ёрдамни давом эттириш масаласини муҳокама қилмоқда. НАТО мудофаа вазирлари йиғинида Украина билан ҳамкорликни кучайтириш йўллари ҳам муҳокама этилмоқда.

Жума кунги мажлис бошланиши олдидан чиқиш қилган НАТО Бош котиби Андерс Фог Расмуссен, вазирлар Украина қуролли кучларини ислоҳ қилиш ва модернизациялаш дастурини қўллаб-қувватлаш мақсадида “ҳамкорликни қандай йўлга қўйиш мумкинлиги”га оид масалаларни муҳокама қилади, дея таъкидлади.

Расмуссен мажлис давомида “Украина халқи манфаатида демократияни кучайтириш ва қонун устуворлигини таъминлаш” йўлларига оид масаланинг ҳам кўтарилишини маълум қилди.

НАТО мудофаа вазирларининг Афғонистонда 2018 йилгача 350 минглик ҳарбий контингентни қолидириш масаласини кўриб чиқиши ҳам айтилмоқда. Ўтган йилги йиғин пайтида вазирлар Афғонистонда 230 минг қўшиндан иборат кичикроқ контингентни молиялашга келишиб олган эди.

АҚШ элчиси Россия расмийларини фожеани "сенсация яратиш" учун ишлатмасликка чақирди

Россия расмийлари ва парламент вакиллари Техас штатида вафот этган 3 яшар Макс Шатто, уни боқиб олган она тарафидан ўлдирилганини иддао қилиб келмоқда.
АҚШнинг Россиядаги элчиси америкалик оила боқиб олган рус болакайининг ўлимини “сенсация яратиш” мақсадида ишлатишни тўхтатишга чақирмоқда.

Кейинги бир ҳафта давомида Россия расмийлари ва парламент вакиллари Техас штатида вафот этган 3 яшар Макс Шатто (асл рус исми Максим Кузмин), уни боқиб олган она тарафидан ўлдирилганини иддао қилиб келмоқда.

АҚШ элчиси Майкл МакФол Интернетда эълон қилган блогида, Россия матбуоти америкаликларни ёмон отлиқ қилаётганидан “ташвишда” эканини билдирди. АҚШ расмийлари, дея ёзди МакФол, болакайнинг ўлими сабабларини аниқлаганича йўқ ва бу хусусда “синчковлик билан терговни” давом эттирмоқда.

Келаси ҳафта Россия Ташқи ишлар вазири Сергей Лавров ва АҚШ Давлат котиби Жон Керри учрашуви давомида мазкур ҳодисанинг ҳам муҳокама қилиниши кутилмоқда.

Айни пайтда, америкалик оила боқиб олган Максим Кузмин ва укаси Киррилнинг биологик онаси Юлия Кузмина маст ҳолатда поезддан тушириб қолинди. Пайшанба куни Юлия Кузмина Россия телеканалида чиқиш қилиб, аввалги айш-ишратли ҳаёт тарзидан воз кечгани ва америкалик оилада тарбияланаётган ўғлини қайтариб берилиши талаб қилган эди. Маълум бўлишича, Россия федерал телеканлларидаги интервьюлардан кейин Кузмина Москвадан Псковга қайтаётиб, ўйнаши билан маст ҳолатда тўполон қилганидан кейин поезд маъмурияти уларни тушириб юборишга мажбур бўлган.

Суд Писториуснинг гаров эвазига озод этилиш сўровини кўриб чиқади

Бугун, 22 феврал куни Жанубий Африканинг Претория шаҳри суди ўз қаллиғини ўлдирганликда айбланаётган таниқли паралимпиячи Оскар Писториусни гаров пули эвазига озодликка чиқиш сўровини кўриб чиқади.

Прокурорлар олти карра паралимпиада чемпиони Писториусни 14 феврал куни ўз уйида 29 ёшли Рива Стинкампни қасддан отиб ўлдирганликда айбламоқда.

Ампутант спортчи Оскар Писториуснинг айтишича, у Стинкампни хатолик туфайли – уни уйга кирган ўғри деб ўйлаб отиб қўйган.

Спортчи адвокатлари уни ҳеч қаерга қочмаслигини айтиб, суддан уни гаров эвазига озод этишни сўрашган.

Миср президенти парламент сайловлари муддатини белгилади

Миср президенти Муҳаммад Мурсий парламент сайловларини 27 апрелда бошланиб, июн ойида тугаши ҳақида қарор чиқарди.

Қарорга кўра, сайловлар тўрт босқичда бўлиб ўтади ва Миср парламенти қуйи палатаси – Халқ ассамблеяси 6 июн куни ўз йиғинини ўтказади.

Пайшанба куни парламент юқори палатаси – Шўро кенгаши Конституциявий суд тарафидан ўзгартиришлар киритилган сайловларга оид қонунни қабул қилди.

Сайловолди кампаниясида партиялар икки гуруҳга – президент Муҳаммад Мурсийни қўлловчи исломчи партиялар ва 2011 йилги инқилобдан сўнг кутилган демократик ўзгаришлар юз бермаётганини иддао қилаётган дунёвий қарашларга эга партияларга бўлиниши кутилмоқда.

Миср парламенти қуйи палатаси ўтган йили сайловларни ноқонуний деб топган Конституциявий суд қарори билан тарқатилган эди.

Дамашқдаги йирик портлашда 60 дан ошиқ киши ҳалок бўлди

Сурия пойтахти Дамашқ шаҳри марказида бомба ўрнтатилган автомобил портлашида 60 дан ошиқ киши ҳалок бўлди.

Бомба портлаши пайшанба куни иқтидордаги Баас партияси қароргоҳи ва Россия элчихонаси яқинида юз берган.

Сурия расмий телевиденияси портлашда ҳалок бўлганлар сони 53 нафар бўлгани ҳақида хабар берди. Мухолифат фаоллари эса камида 59 киши ўлганини иддао қилмоқда.

Пайшанба кунги портлаш кучлилиги ва қурбонлар сони бўйича оммавий исёнлар бошланган 2011 йилдан бери Дамашқда юз берган энг катта портлаш экани айтилмоқда.

Россия элчихонаси портлаш натижасида бинонинг бир неча деразаларидаги ойналар сингани, аммо бошқа зарар етмаганини маълум қилди.

Сурия расмий хабарларида "террорчилик амалиёти", деб баҳоланаётган бу портлашга қайси тараф масъул экани ҳозирча аниқ эмас.

Арманистонда президент сайловидан норозилар чиқиши давом этмоқда

Арманистон мухолифатининг президентлик сайлови натижаларидан норози бўлган юзлаб тарафдори Ереван шаҳри марказидаги намойишларини икки кундирки давом эттирмоқда.

Душанба куни ўтган президентлик сайловида Арманистоннинг амалдаги президенти Серж Саркисян ғолиб, деб эълон қилинган эди.

Унинг асосий рақиби, собиқ ташқи ишлар вазири Раффи Ованнисян ўз мағлубиятини тан олмаган.

Марказий сайлов комиссияси эълон қилган натижаларга кўра, Саркисянга сайловчиларнинг 58,64 фоизи, Ованнисянга эса 36,75 фоизи овоз берган.

Раффи Ованнисян ва унинг тарафдорлар сайлов натижаларининг бекор қилинишини талаб қилмоқда.

АҚШнинг учувчисиз учқичлари ҳужумида 4700 одам ўлдирилган

Сенатор Линдсей Греҳэм.
АҚШ Сенатори Линдсей Греҳэм Америка ҳарбийларининг учувчисиз учқичлар ёрдамида шу кунгача уюштирган ҳужумларида жами 4 минг 700 одам, шу жумладан тинч аҳоли вакиллари ҳам ўлдирилгани ҳақидаги маълумотни эълон қилди.

Бу АҚШ қонунчиси ёки ҳукумат мулозими томонидан Покистон, Яман ва бошқа ҳудудларда террорга қарши кураш доирасида уюштирилаётган шундай ҳужумлардаги қурбонлар сонига оид илк баёнотдир.

Террорчиларга қарши курашда учувчисиз учқичлардан фойдаланишни қувватлаб келаётган сенатор сўзларидан иқтибос Жанубий Каролинадаги Easley Patch сайтида берилди.

Асли шу штатдан бўлган сенаторнинг идорасидан бу хабарга ҳозирча бирор муносабат билдирилгани йўқ.

Дамашқ марказида йирик портлаш содир бўлди

Сурия расмий телевидениеси берган хабарга кўра, пойтахтнинг марказида бомба ўрнатилган автомобил портлаган.

Иқтидордаги Баас партияси қароргоҳи ва Россия элчихонаси яқинида бўлган портлаш, расмий хабарга кўра, жуда кучли бўлган ва қурбонлар сони ҳам каттадир.

Аммо, расмий хабарда "террорчилик амалиёти", деб баҳоланаётган бу портлашда қанча одам қурбон бўлгани ҳақида ҳозирча аниқ маълумот берилгани йўқ.

Расмий телевидение кўрсатган видеолавҳада эса портлаш вақтида ён-атрофда бўлган ўнга яқин автобилга зарар етгани ва бир неча кишининг ерда ётган жасади акс этган.

Россия элчихонаси портлаш натижасида бинонинг бир неча деразаларидаги ойнаклар сингани, аммо бошқа зарар етмаганини маълум қилди.

Россия прокуратураси Максим Кузмин иши бўйича маълумот талаб қилмоқда

Россия Бош прокуратураси АҚШ Адлия вазирлигидан америкалик оила асраб олган 3 яшар Максим Кузмин-Макс Шатто ўлимига оид тафсилотларни сўрамоқда.

Бош прокурор матбуот котиби 21 феврал кунги баёнотида ўз идораси Техаснинг Эктор округида бир ой олдин вафот этган рус болакайининг ўлимига оид сабаблар ва сўнгги тафсилотлар, хусусан суд-тиббий экспертиза натижаларини кутаётганини айтди.

Айни пайтда Озод Европа/Озодлик радиосига сўзлаган Эктор округи шерифи Марк Доналдсон Россия расмийларининг терговда иштирок этишига изн берилмаслигини айтди.

Пайшанба куни Россия Ташқи ишлар вазирлиги мулозими Максим Кузмин-Макс Шаттонинг "шафқатсиз ҳамда ноинсоний муносабат" туфайли вафот этганига ишониш учун асослар борлиги ҳақида гапирди.

Бироқ, америкалик терговчилар болакайнинг танасида жароҳат излари борлиги аниқ бўлсада, бу унинг қийноқдан вафот этганини таъкидлаш учун етарли асос эмаслигини айтмоқда.

Бразилия ЖЧ-2014 хавфсизлигини таъминлашда Россия қуролидан фойдаланади

Бразилия 2014 йилда ўтадиган футбол бўйича Жаҳон чемпионати ва 2016 йилда ўтадиган ёзги Олимпиада ўйинларида ҳаво хавфсизлигини таъминлаш учун Россиянинг зенит-ракета мажмуаларини сотиб олишни режалаштирмоқда.

Бу ҳақда чоршанба куни Бразилияга ташриф буюрган Россия Бош вазири Дмитрий Медведев билан ўтказилган музокараларда ҳам муҳокама қилингани айтилмоқда.

Бразилия мудофаа вазирига кўра, Бразилия Россиянинг ўрта масофага мўлжалланган Панцырь С1 ер-осмон ракетаси, артилерия батареялари ва Игла-С елкадан отиладиган ракеталарига қизиқиш билдирмоқда.

Қурол сотиб олиш бўйича музокаралар март ойида бошланади.

Расмийларга кўра, Бразилия ҳукумати Россиядан қурол ишлаб чиқиш технологиясини сотиб олишни ҳам режалаштирган. Агар технология сотиб олинса, Бразилиядаги маҳаллий корхоналар Россия қуролларини ишлаб чиқариш имкониятига эга бўлади.

Дамашқдаги ҳаво ҳужумида камида 20 киши ҳалок бўлди

Суриялик фаолларнинг маълум қилишича, мамлакат пойтахти Дамашқ яқинида уюштирилган ҳаво ҳужумида камида 20 киши ҳалок бўлди.

Британияда жойлашган Сурия инсон ҳуқуқлари обсерваторияси чоршанба куни Ҳамурияҳ мавзесида уюштирилган ҳужум оқибатида яна кўплаб кишилар вайроналар остида кўмилиб қолганини таҳмин қилмоқда.

Бошқа бир фаоллар гуруҳи – Маҳаллий Мувофиқлаштириш Қўмиталари эса ҳалок бўлганлар сони 35 га етганини маълум қилди.

Ҳукуматга қарашли оммавий ахборот воситалари чоршанба куни Дамашқдаги стадионга уюштирилган миномёт ҳужумида бир футболчи ҳалок бўлгани ҳақида хабар берди.

БМТ таҳминига кўра, 2011 йил март ойида президент Башар Ассад режимига қарши оммавий исёнлар бошланганидан бери Сурияда 70 мингдан ортиқ одам нобуд бўлган.

Қирғизистон Ички ишлар вазирлиги расмий сайти ҳак қилинди

Қирғизистон Ички ишлар вазирлиги расмий сайти ҳакерлар ҳужумига учради.

Дастлаб сайтнинг бош саҳифасида "CLONE-SECURITY томонидан ҳужум қилинди, "Биз ирқчиликка қаршимиз", деган ёзув пайдо бўлди. Кейин сайт техник сабабларга кўра, вақтинча ёпиб қўйилгани эълон қилинди.

Сайтга ҳужум учун масъулиятни зиммасига олган CLONE-SECURITY ҳакерлар гуруҳи қирғиз ҳукуматининг ирқчилик сиёсатига қарши норозилик тариқасида бу амалга қўл урганини маълум қилди.

Ўзларини CLONE-SECURITY, деб атайдиган ҳакерлар гуруҳи аввал Ўзбекистон Соғлиқни сақлаш вазирлиги, Ўзбекистон Давлат телерадиокомпанияси сайтларини ҳам ҳак қилганини иддао қилган.

CLONE-SECURITY гуруҳи сайтларга қилинаётган ушбу ҳужумларни Ўзбекистон ичкарисида туриб амалга ошираётганини таъкидлаб келмоқда.

Қирғизистон Ички ишлар вазирлиги расмийлари ҳакерлик ҳужумлари юзасидан ҳозирча изоҳ бермади.

Қозоғистонда "Аллоҳ" калимаси билан ароқ чиқарилган заводни портлатмоқчи бўлганлар жазоланди

Қозоғистоннинг Ақтўба шаҳридаги маҳкама Аллоҳ номи ёзилган шишада ароқ чиқарган заводни портлатмоқчи бўлган уч шахсни уч йилдан беш йилгача муддатларга озодликдан маҳрум қилди.

Озодлик мухбирига кўра, 17, 18 ва 19 ёшда бўлган учавлон судда айбларини бўйнига олмаганлар.

Ўтган йил Ақтўбадаги спиртли ичимликлар ишлаб чиқарувчи завод ароқ шишасида Аллоҳ калимаси ёзилиб қолгани учун мусулмонлардан узр сўраган ва дўконлардан ушбу ароқларни қайтариб олганини билдирганди.

Завод маъмурияти дизайнердан ёрлиқ шарқона бўлишини сўраган ва ундаги сўзларга эътибор бермаган.

Аллоҳ ҳаром қилиб тақиқлаган маҳсулотга "Қуръон"дан калималар ёзилишини мусулмонлар ҳақорат сифатида қабул қилган ва бу уларнинг ғазабини келтирган.

Оскар Писториус ўз қаллиғини ўлдирмаганини айтмоқда

Ўз қаллиғини ўлдирганликда гумонланаётган олти карра паралимпиада чемпиони Оскар Писториус бугун Претория шаҳри маҳкамасида ҳозир бўлди.

У 29 ёшли модел Рива Стинкамп ўлимида айбланмоқда. Стинкамп 14 феврал кечаси жанубий африкалик спортчининг уйида отиб ўлдирилган эди.

Писториус ўз қаллиғига қарата ўқ отмаганини айтмоқда. Оскар Писториус ҳимоячилари ўз мижозини гаров эвазига озодликка чиқариш талабини илгари суришмоқда.

Болгарияда Бойко Борисов бошлиқ ҳукумат истеъфо берди

Болгариядаги давомли норозилик намойишлари ортидан бош вазир Бойко Борисов бошлиқ ҳукумат истеъфо берди.

Бугун парламентда чиқиш қилган Борисов ҳокимиятни бошқара олмаслигини айтди.

Бир неча кун аввал Болгарияда электр нархлари ошиши норозиликларни келтириб чиқарди.

Пойтахт Софияда полиция ва норозилар ўртасида келиб чиққан тўқнашувда бир қанча одам жабр кўрди.

Ҳозирги норозиликлар Болгариядаги сўнгги 15 йил ичидаги энг йириги экани айтилмоқда.

Тунис ҳукумати раҳбари Ҳамад Жаболий истеъфо берди

Тунис бош вазири Ҳамад Жаболий иқтидордаги “Ан Наҳда” исломий партияси ўтиш даври ҳукуматини тузиш бўйича унинг таклифларини рад этиши ортидан лавозимидан истеъфо берди.

6 феврал куни Тунис мухолифати етакчиси, дунёвий сиёсатчи Шокри Белаиданинг ўлдирилиши ортидан мамлакатда вазият кескинлашди.

Бутун Тунис бўйлаб норозилик тўлқини ва зўравонлик кучайди. Жаболий 2011 йил декабр ойида ҳукумат тепасига келган эди.

Россияда 2012 йилда икки мингдан зиёд бола зўравонлик қурбони бўлган

Россияда ўтган йил 2139 нафар бола зўравонлик қурбони бўлган. Россия президентининг болалар ҳуқуқларини ҳимоя қилиш бўйича вакили Павел Астахов бу ҳақда баёнот берди.

Жаноб Астаховга кўра, ўтган йили зўравонликдан ўлган болалар сони ундан аввалги йилдагига қараганда 21.5 фоизга ошган.

Шунингдек, Россияда жинсий зўрланганлар сони ҳам ортган. Павел Астахов Россияда жинсий зўрланган ҳар беш жабрдийданинг бири балоғат ёшига етмаганлар эканини қайд этди.

Алепподаги портлашда камида 30 киши ҳалок бўлди

Сурия мухолифати фаоллари Алеппо шаҳрининг шимолий қисмида ракета портлаши оқибатида камида 30 киши ҳалок бўлганини билдирди.

Британияда жойлашган Сурия инсон ҳуқуқлари обсерваторияси ҳалок бўлганлар орасида 14 нафар ёш бола ва 5 нафар аёл борлигини айтмоқда.

Обсерваторияга кўра, Алеппода портлаган бомба "ер-ер", яъни ердаги нишонга ердан отилувчи ракета бўлган.

Интернетда пайдо бўлган видео ва суратларда Алеппонинг ракета ҳужумига учраган Жабал Бадро мавзесидаги вайроналар кўрсатилган.

Сурия ҳукуматига қарашли SANA ахоборт агентлиги эса мамлакат президенти Башар Асад саройи олдида иккита миномёт снаряди портлагани ҳақида хабар берди.

Ҳужумга Озод Сурия Армияси масъул экани айтилмоқда.

Косово ва Сербия бош вазирлари яна бир бор учрашди

Косово ва Сербия бош вазирлари сешанба куни Брюсселда Европа Иттифоқи воситачилигида учрашди.

Бош вазирлар Ҳошим Тачи ва Иван Дачич иштирокидаги учрашув чоршанба куни ҳам давом этиши кутилмоқда.

Расмийлар бундан олдин ҳам бир неча бор ЕИ воситачилигида икки давлат ўртасидаги алоқаларни яхшилаш бўйича учрашувлар ўтказишган.

Косово 2008 йилнинг февралида Сербиядан мустақиллигини эълон қилган. Косово мустақиллигини юзга яқин давлат тан олган.

Сербия эса ҳамон Косово мустақиллигини тан олмай келади. Шунга қарамай расмий Белград ЕИ воситачилигида Косово билан диалог ўрнатишга рози бўлган.

Сербиянинг бундай қарори мамлакатнинг Европа Иттифоқига қўшилиш имкониятларини ошириш учун қилингани айтилмоқда.

6 феврал куни Сербия ва Косово президентлари Томислав Николич ва Атифете Яҳяга Косово Сербиядан мустақиллигини эълон қилганидан бери илк бор учрашганди.

Apple ҳакерлар ҳужумига учради

Apple ширкати ҳакерлар ҳужумига учраганини эълон қилди.

Ширкатга кўра, номаълум ҳакерлар ширкат ходимлари тарафидан ишлатилган Макинтош компютерларига вирус дастурларини ўрнатишга муваффақ бўлишган.

Бош қароргоҳи АҚШда жойлашган Apple компаниясига бўлган ҳужум ўтган ҳафта Facebook ижтимоий тармоғига қилинган ҳужумга ўхшаб кетиши айтилмоқда.

Apple ширкати вируслар фақат бир нечта компютерларни заҳарлагани ва мижозлар ҳақида ҳеч қандаы маълумот шикаст емагани ёки ўғирланмаганини билдирди.

Айни дамда ҳакерлик ҳужуми ортида кимлар тургани номаълум.

Бироқ АҚШ оммавий ахборот воситалари сўнгги вақтда АҚШ компанияларига уюштираётган кибер-жосуслик ҳужумларида Хитой ҳарбийларини айблаб келмоқда.

АҚШ ҳукумати бу масалани Хитой ҳукумати ва ҳарбий кучлари расмийлари билан ўтган учрашувларда бир неча бор кўтарган эди.

АҚШ: Генерал Жон Аллен истеъфога чиқди

АҚШ президенти Барак Обама сешанба куни генерал Жон Алленнинг истеъфога чиқаётгани ва шу сабаб НАТО кучлари олий қўмондони лавозимини эгалламаслигини эълон қилди.

Президентнинг ёзма равишга тарқатилган баёнотида генерал Аллен 19 ой давом этган Афғонистон сафаридан сўнг ўз оиласи ёнида бўлишни исташи айтилган.

Сўнгги вақтда генерал Жон Аллен НАТОнинг Европадаги бирлашган кучлари қўмондонлиги лавозимини эгаллаш таклифини рад этиши ҳақидаги баҳслар кучайган эди. Бу лавозимга унинг номзодини президент Барак Обама тавсия қилган.

Афғонистондаги АҚШ ва халқаро коалиция кучларига қўмондонлик қилган генерал Аллен президент Обама таклифи устида ўйлаб кўриш учун вақт сўраган эди.

Аллен ўтган йили Жилл Келли исмли аёл билан "номақбул алоқа"да бўлгани ҳақидаги айбловлар бўйича текширилган эди. Жорий йилнинг январ ойида Пентагон айбловлар асоссиз эканини эълон қилган.

НАТО баёнотида шимолий алянс генерал Жон Аллен қарорини “тўлиқ” ҳурмат қилиши айтилган.

Брюссел аэропортидан 50 миллион долларлик олмос ўғирланди

Қуролланган 8 киши Брюссел аэропортидан 50 миллион долларга баҳоланаётган олмосни ўғирлади.

Аэропорт матбуот вакилининг айтишича, душанба оқшом ўғрилар аэропорт биносининг хавфсизлик деворидан туйнук очиб, иккита автомобилда ичкарига кирган ҳамда олмослар солинган контейнерлар ортилаётган самолётга ҳужум қилган.

Сўнгги хабарларга кўра, полиция кийимида бўлган 8 жиноятчи бир неча дақиқа ичида тарихдаги энг йирик ўғирликни содир этган ва ғойиб бўлган.

Брюссел прокурори матбуот котиби Аня Бийненсга кўра, полиция кейинроқ аэропорт тўсиқлари ёнида ёндириб юборилган автомобилни топган.

Antwerp World Diamond Center матбуот вакилининг AFP агентлигига айтишича, бу инсоният тарихидаги энг катта олмос ўғирлигидир.

Муҳими, жиноят содир этилаётган чоғда бирорта ўқ узилмаган ва ҳеч ким жароҳатланмаган.

Давомини ўқинг

XS
SM
MD
LG