Линклар

Шошилинч хабар
20 август 2019, Тошкент вақти: 09:01

Халқаро янгиликлар

Чеченистон раҳбари чанғи курорти қуришни бошлади

Чеченистон Президенти Рамзан Қодиров мамлакатдаги илк чанғи курорти қурилишини бошлаб берди.

Иншоотнинг қурлишини "йирик иқтисодий ва сиёсий воқеа", деб атаган Чеченистон раҳбари унинг 3 йил ичида барпо этилажагини айтди.

"Вердучи" деб аталадиган курортда 19 та чанғи учиш йўлаги, бир неча халқаро стандартлардаги йирик меҳмонхона ва замонавий типдаги ёғоч уйларни қуриш режалаштирилган.

Курорт учун денгиз сатҳидан 3 ярим минг километр баландликдаги қори эримайдиган тоғли ҳудуддан 46 километр квадрат майдон ажратилган.

Унинг қурлиши учун 500 миллион АҚШ доллари қийматида маблағ сарфланиши режалаштирилган.

Франция президенти Франсуа Олланд Россияга сафар қилмоқда

Франция президенти Франсуа Олланд Россияга илк сафарини амалга оширмоқда.

Кремл матбуот хизматидан олинган хабарга кўра, чоршанба куни Олланд президент Владимир Путин билан учрашади.

Учрашувда икки томонлама алоқалар, савдо, энергетика ва сармояга оид масалалар билан бирга инновацион технологиялар масаласидаги ҳамкорлик ҳам муҳокама этилиши айтилди.

Ушбу учрашувда, шунингдек француз ҳарбийларининг Малида исломий жанггари гуруҳларга қарши олиб бораётган амалиётлари ҳам муҳокама қилиниши кутилмоқда.

Франсуа Олланднинг Москва сафари пайшанба куни ҳам давом этади.

Бенедикт XVI Ватиканда мухлислари билан хайрлашди

27 феврал куни Рим папаси Бенедикт XVI билан сўнгги бор кўришиш учун Ватикан марказидаги Муқаддас Пётр майдонига 50 мингга яқин одам йиғилди.

Рутбасини тарк этаётган Рим папаси оқ либосда майдонга келди ва оломон орасидан popemobile - кичик очиқ автомобилда ўтаркан, мухлисларига яқиндан кўриниш берди. Унинг қўлига берилган ёш болалар, чақалоқларни пешонасидан ўпиб, дуо қилди.

Ватикан шаҳар маъмурияти кун давомида папа билан хайрлашиш учун 200 мингга яқин одам келиши кутилганини айтган.

Пайшанба куни Бенедикт XVI расман папаликдан истеъфо беради ва католик черковининг кейинги 600 йиллик тарихида рутбадан ўз ихтиёри билан воз кечган илк папа бўлади.

85 ёшга кирган папа истеъфо сабабларини соғлиги оғирлашгани билан изоҳлаган.

Аммо, халқаро ахборот воситаларида Ватикан руҳонийлари орасида "бесоқолбозлик"ни қўллаган ички лоббичилар гуруҳи борлигига оид иддаолар Бенедикт XVIнинг кетишига асл сабаб экани ҳақидаги мақолалар чоп этилмоқда.

Теҳрон: Бу галги таклифлар нисбатан амалий бўлди

Эрон ядровий дастурига оид дунёнинг олти йирик давлати ва Теҳрон расмийлари ўртасида бўлган Олмота музокаралари яна мавҳум натижа билан якунланди.

Чоршанба кунги икки соатлик сўзлашувлар бўйича берилган брифингда томонлар ўртага ташланган таклифлар юзасидан музокараларни шу йилнинг апрел ойида давом эттиришга келишгани маълум қилинди.

Навбатдаги музокаралар ҳам Олмота шаҳрида бўлиб ўтади.

Эрон музокарачиси Саид Жалилий ғарб давлатлари - АҚШ, Россия, Хитой, Германия, Буюк Британия, Франция ҳукуматлари томонидан таклиф қилинган имтиёзлар бу гал "нисбатан амалий" бўлганини айтди.

Аммо, имтиёзлар нимадан иборат экани ҳақида матбуотга ҳозирча аниқ маълумот берилмади.

Ғарб давлатлари номидан музокараларга бошчилик қилган Европа Иттифоқининг Ташқи сиёсат масалалари бўйича комиссари Кэтрин Эштон апрел музокараларида Эрон томонидан ижобий жавоб бўлишига умид билдирди.

Эл-Класико: "Реал" Испания кубоги финалида

Мадриднинг “Реал” футбол клуби сешанба куни Испания кубоги ярим финали жавоб учрашувида “Барселона” клуби устидан меҳмонда 1:3 ҳисобида ғалаба қозонди.

Шундай қилиб, “Реал” мусобақа финалига йўлланмани қўлга киритди.

Учрашувдаги ҳисобни 13-дақиқада пеналтидан Криштиану Роналду очиб берди. 57-дақиқада Роналду ўйиндаги иккинчи голни киритди.

“Барселона” дарвозасига киритилган учинчи голни 68-дақиқада “Реал” ҳимоячиси Рафаэл Варан ўз ҳисобига ёзиб қўйди.

“Барселона”нинг "престиж голи"га 89-дақиқада Хорди Алба муаллифлик қилди.

Мадридда ўтган ярим финал дастлабки учрашувида 1:1 ҳисоби қайд этилган эди.

Испания кубоги ярим финалининг иккинчи жуфтлигида беллашаётган “Атлетико” ва “Севиля” жамоалари бугун, 27 феврал куни беллашади.

Чак Ҳейгел АҚШ Мудофаа вазири этиб тайинланди

АҚШ Сенати мамлакат Мудофаа вазири лавозимига кўрсатилган Чак Ҳейгел номзодини маъқуллади.

Сешанба куни ўтказилган овоз бериш тадбирида Ҳейгелни 57 сенатор қўллаган, 41 сенатор унинг номзодига қарши чиққан.

Аввалроқ республикачи сенаторларнинг баъзилари Ҳейгелни Эронга ён босишликда ва Исроил тарафдорларини танқид қилишда айблаб, унинг номзодига қарши чиқишган эди.

66 ёшли Чак Ҳейгел Мудофаа вазири лавозимида сўнгги тўрт йил фаолият кўрсатган Леон Панетта ўрнини эгаллайди.

Ҳейгел Небраска штатидан собиқ республикачи сенатор ва Ветнам уруши фахрийсидир.

Эрон ядровий дастури юзасидан учрашувлар давом этади

Қозоғистоннинг Олмаота шаҳрида Эрон ядровий дастури юзасидан ўтказилаётган учрашувлар чоршанба куни давом этади.

Сешанба кунги музокаларда аниқ натижага эришилмагани айтилмоқда.

Европа Иттифоқининг Ташқи сиёсати бўйича мулозими Кэтрин Эштон матбуот котиби Майкл Манн учрашувларни “фойдали” эканини, бироқ уларда жиддий келишувга эришилишини кутмаётганини айтди.

Эрон билан келишувга эришишга уринаётган 6 йирик давлат — АҚШ, Буюк Британия, Франция, Россия, Хитой ва Германия расмийлари ҳозир Олмаотада музокаралар олиб бормоқда.

Бунга қадар Эрон ядровий тадқиқотларини тўхтатишга эришиш ниятида ўтказилган оҳирги музокаралар 9 ой муқаддам Москвада бўлган ва натижасиз якунланган эди.

Ғарб ҳукуматлари Эроннинг ядровий дастури атом қуроли яратишга йўналтирилгани борасида ҳавотир билдириб, Ислом Республикасига нисбатан қатор санкцияларни жорий этган.

Эрон ўз атомий дастурининг ҳарбий томони йўқлигини ва фақат тинч мақсадларни кўзлашини урғулаб келади.

Адвокат: Шаттолар оиласи асранди бола ўлимида айбдор эмас

АҚШнинг Техас штатида ҳалок бўлган россиялик асранди бола ота-онасининг адвокати унинг мижозлари болакай ўлимида айбдор эмаслигини билдирди.

Маҳаллий “Odessa American” нашрига интервю берган адвокат Майкл Браун Шаттолар оиласи болани ўлдирганига ишора этувчи ҳеч қандай далил йўқлигини айтди.

Адвокатга кўра, унинг мижозларига номаълум шахслар телефон қилишиб, уларни “бола қотили” дея аташмоқда.

21 январ куни АҚШнинг Техас штатидаги Гардендейл шаҳрида Россиядан асраб олинган уч яшар Макс Шатто (туғилганидаги исми Максим Кузмин) номаълум сабабларга кўра оламдан ўтганди.

Россиялик айрим расмийлар болакайнинг америкалик онаси Лора Шаттони “қотиллик”да айблашмоқда.

АҚШ Давлат департаменти расмийлари эса ҳулоса ясашга эрта эканини айтишмоқда.

Ўтган йилнинг декабр ойида Россия ҳукумати россиялик болаларнинг АҚШ фуқаролари томонидан асраб олинишини тақиқловчи қонун қабул қилган эди.

Қозоғистонда "Таблиғи жамоат" ҳаракати тақиқланди

Остона суди Қозоғистон ҳудудида "Таблиғи жамоат" халқаро исломий гуруҳи фаолиятини тақиқлаш ҳақида қарор чиқарди.

Қозоғистон Бош прокуратурасининг сешанба куни маълум қилишича, экстремистик ташкилот, деб топилган бу гуруҳнинг бундан буён мамлакатдаги ҳар қандай ҳаракати ноқонуний ҳисобланади.

Аммо, прокуратура мулозимлари гуруҳнинг айнан қайси ғоялари экстремистик, деб топилгани ҳақида бирор маълумот бермади.

"Таблиғи жамоат" ҳаракати 1926 йилда Ҳиндистонда пайдо бўлган ва унинг асл ғояси "эътиқодни ёйиш"дир.

Бу гуруҳ ҳаракатлари Россия, Тожикистон, Ўзбекистонда тақиқланган. Хусусан, ўтган йили Тожикистонда бу ҳаракатга аъзоликда айбланган бир неча фуқаро 3 йилдан 5 йилга қадар озодликдан маҳрум этилган.

ЕИ: Олмота учрашувидан жиддий натижа кутилаётгани йўқ

Европа Иттифоқининг Ташқи сиёсат масалалари бўйича мулозими Катрин Эштон дунёнинг йирик давлатлари Эрон ядровий дастури бўйича Олмотада бораётган учрашувда жиддий келишувга эришилишини кутмаётганини айтди.

Сешанба куни бошланган учрашувлар оралиғида бўлган илк матбуот анжуманида ЕИ мулозими Майкл Манн шу мазмунда баёнот берди.

Эрон билан келишувга эришишга уринаётган 6 йирик давлат — АҚШ, Буюк Британия, Франция, Россия, Хитой ва Германия расмийлари ҳозир Олмотада музокаралар олиб бормоқда.

Бунга қадар Эрон ядровий тадқиқотларини тўхтатишга эришиш ниятида ўтказилган охирги музокаралар 9 ой муқаддам Москвада бўлган ва натижасиз якунланган эди.

Олмота учрашувлари чоршанба куни ҳам давом этади.

Литвиненко ўлимига оид далилларни сир сақлаш бўйича текширув бўлади

Александр Литвиненко.
Британиялик терговчилар россиялик диссидент Александр Литвиненко ўлими бўйича айрим даллилларни сир сақлашга оид ҳукумат томонидан киритилган сўровни кўриб чиқадилар.

Собиқ рус диссиденти ва жосуси Литвиненко 2006 йилда полониумдан заҳарланиб, Лондонда ўлган эди.

Унинг ўлимига оид айрим деталларни сир сақлаш ҳақидаги ҳукумат сўрови қатор ахборот воситалари, жумладан BBC, The Independent ва The Guardian нашрлари томонидан танқид қилинди.

The Independent тахминига кўра, Буюк Британия ҳукумати сир сақланишини истаётган далиллар орасида Литвиненконинг Британия разведкаси билан ҳамкорлигига оид тафсилотлар ҳам бўлиши мумкин.

Ҳукумат талаби бўйича терговчилар суриштируви шу йилнинг май ойида бошланади ва унда шунингдек, Литвиненко ўлимига алоқадорликда гумон қилинган Россия фуқаролари — Андрей Луговой ва Дмитрий Ковтунларга нисбатан илгари сурилган айбловлар ҳам текширилади.

Россия бу икки шахсни Буюк Британияга экстардиция қилиш талабини рад этган.

Мирсда ҳаво шарида учаётган 19 киши нобуд бўлди

Мисрнинг қадимий Луксор шаҳрида осмонга кўтарилган ҳаво шари ёрилиб кетиб, 19 киши нобуд бўлди.

Миср расмийларига кўра, ҳаво шари бошқарувчиси ва бир йўловчи омон қолган, аммо уларнинг аҳволи қандай экани ҳақида аниқ маълумот йўқ.

Ҳаво шаридаги парвозларни уюштирувчи ширкат ва хавфсизлик хизмати ходимлари йўловчилар 300 метр баландликда парвоз қилаётган вақтда ҳаво шарига ўрнатилган газ балони портлаб кетганини айтмоқда.

Хабарларга кўра, саёҳатчилар орасида Япония, Франция ва Буюк Британиядан борган сайёҳлар бўлган.

Луксорда ҳаво шарида саёҳат қилиш жуда урф бўлган ва саёҳатчилар саҳро бағридаги яшил водийда жойлашган "Қироллар водийси" каби тарихий обидаларни 300 метргача бўлган баландликдан томоша қилишни хуш кўрадилар.

Покистондаги портлашда икки киши ҳалок бўлди

Покистон жанубидаги Синдх вилоятида юз берган портлашда икки киши ҳалок бўлди, камида 10 киши жароҳат олди.

Душнаба куни рўй берган портлаш Шикарпур шаҳридаги зиёратчилар тўпланган Шох Лахи Ғулом сўфий мақбараси ёнида рўй бергани айтилмоқда.

Ҳозирча портлаш масъулиятини ҳеч қайси тараф ўз зиммасига олгани йўқ.

Кузатувчилар ҳудудда сўфийларга нисбатан ҳужумлар кўпайганини айтишмоқда.

Ўтган ҳафта ҳудуддаги таниқли сўфий олимга уюштирилган бомба ҳужумида олимнинг набираси ҳалок бўлган эди.

Эрон ҳукумати "Арго" филмини танқид қилди

Расмий Теҳрон Оскар мукофотига сазовор бўлган “Арго” филмини Эронга қарши уюштирилган пропаганда, дея танқид қилди.

Актёр ва режиссёр Бен Афлек тарафидан суратга олинган “Арго” филми якшанба куни Ҳолливудда ўтган Оскар ҳайкалчаларини топшириш маросимида йилнинг энг яхши филми, деб топилган эди.

Бу филмда 1979 йилда Эрондаги Исломий инқилобдан кейин гаровга олинган АҚШ элчихонасидан қочиб чиққан америкалик олти дипломат Канада элчиси қароргоҳида яшириниб олгани билан боғлиқ воқеалар ҳикоя қилинган.

Эроннинг Маданият ва Исломий йўналиш вазири Муҳаммад Ҳусейний "Арго" филмини Марказий Разведка Агентлигини "реклама” қилиш учун суратга олинганини айтди.

Сурия Миллий Коалицияси "Сурия дўстлари" конференциясида қатнашади

Сурия Миллий Коалицияси раҳбари Аҳмад Муаз ал-Хатиб.
Сурия Миллий Коалицияси раҳбари Аҳмад Муаз ал-Хатиб у етакчилик қилган мухолиф гуруҳ шу ҳафта дунёнинг етакчи давлатлари иштирокида ўтадиган "Сурия дўстлари" конференциясида қатнашишини билдирди.

Аввалроқ мухолиф гуруҳ оддий фуқароларга нисбатан уюштирилаётган ҳужумларга норозилик сифатида пайшанба куни Рим шаҳрида ўтиши режалаштирилган конференцияга бормаслигини эълон қилган эди.

Хатибнинг Facebook саҳифасида ёзилишича, АҚШ Давлат котиби Жон Керри ва Британия Ташқи ишлар вазири Уилям Ҳаг сурияликларга ёрдам кўрсатиш ваъдасини берганидан сўнг Сурия Миллий Коалицияси Римдаги йиғинда қатнашишга рози бўлган.

Лондондан туриб қилган чиқишида Керри "Сурия дўстлари" гуруҳи Римда “қўйиладиган кейинги қадамлар” бўйича йиғилишини айтиб, Сурия мухолифатини конференцияда қатнашмаслик қарорини қайтатдан кўриб чиқишга чақирган эди.

Олмаотада Эрон ядровий дастури бўйича музокаралар ўтади

Бугун, 26 феврал куни Қозоғистоннинг Олмаота шаҳрида Эрон ядровий дастури юзасидан навбатдаги музокаралар бўлиб ўтади.

Теҳроннинг баҳсларга сабаб бўлаётган ядровий дастури юзасидан музокараларда дунёнинг етакчи давлатлари - АҚШ, Россия, Хитой, Британия, Франция ва Германия вакиллари иштирок этиши кутилмоқда.

Кузатувчилар 10 йил аввал бошланган музокараларнинг бу сафаргиси ҳам ижобий натижа беришдан йироқлигини таҳмин қилишмоқда.

Тарафлар сўнгги бор ўтган йилнинг июн ойида Москва шаҳрида аниқ натижасиз якунланган йиғинда учрашишган эди.

Ғарб ҳукуматлари Эроннинг ядровий дастури ядровий қурол яратишга йўналтирилгани борасида ҳавотир билдириб, Ислом Республикасига нисбатан қатор санкцияларни жорий этган.

Эрон ўз атомий дастурининг ҳарбий томони йўқлигини ва фақат тинч мақсадларни кўзлашини урғулаб келади.

Сурия ҳукумати мухолифат билан мулоқотга тайёрлигини билдирди

Сурия Ташқи ишлар вазири Валид ал-Муаллим.
Сурия Ташқи ишлар вазири Валид ал-Муаллим президент Башар ал-Ассад ҳукумати мухолифат, жумладан икки йилдан бери режимни ағдаришга уринаётган қуролли исёнчилар вакиллари билан мулоқотга тайёрлигини баён қилди.

Душанба куни Москвада Россия Ташқи ишлар вазири Сергей Лавров билан учрашуви олдидан гапирган ал-Муаллим Сурия мухолифати тарафида 28 мамлакат, жумладан Россиянинг Шимолий Каваказ минтақасидан келган жанггарилар урушаётганини таъкидлади.

Матбуот брифингида сўз олган Лавров Москва бўҳронни сиёсий йўл билан ҳал этиш тарафдори эканини таъкидлаб, хунрезлик давом этадиган бўлса, Сурия парокандаликка дуч келиши мумкинлигидан огоҳлантирди.

Россия Сурия мухолифат коалицисияси етакчиси Моваз ал-Хотибни ҳам Москвага музокаралар учун таклиф қилган.

БМТ ҳисоб-китобларига кўра, Сурияда икки йилдан бери давом этаётган зўравонликларда 70 мингга яқин одам ҳалок бўлган.

НАТО Карзай ҳукумати илгари сурган иддаоларни тасдиқлай олмаслигини айтмоқда

Афғонистодаги НАТО халқаро қўшинлар маъмурияти АҚШ махсус кучлари Вардак вилоятида низомни бузганига оид Кобул расмийлари иддаоларини тасдиқлай оладиган далиллар ҳозирча топилмаганини эълон қилди.

НАТО қўшинлари матбуот вакили генерал Гунтер Кацнинг бу ҳақдаги баёноти президент Ҳамид Карзай АҚШ махсус кучлари Вардак вилоятидан икки ҳафта ичида чиқарилишини талаб қилиши ортидан эълон қилинди.

Карзайнинг бу талабига АҚШ махсус кучлари сафида хизмат қилаётган афғонларнинг ҳатти-ҳаракатлари сабаб бўлган.

Кобул ҳукумати АҚШ махсус кучлари ташкил қилган афғон гуруҳларини Вардак вилоятида “хавфсизлик ва барқарорликка путур етказаётганлик ва одамларга тазйиқ ўтказатганлик”да айбламоқда.

Карзай маъмурияти иддаосича, АҚШ махсус кучлари Вардак вилоятида амалга оширган операциядан кейин тўққиз киши бедарак йўқолган.

НАТО вакили Кац Халқаро хавфсизлик ёрдам кучлари ҳукумат билдирган хавотирлар юзасидан текширув ўтказишини билдирди. Лекин, дея қўшимча қилди у, мазкур масала Афғонистон ҳукумати ва НАТО ўртасида муҳокама қилинмагунига қадар, бошқа изоҳ берилмайди.

Вардак вилояти стратегик минтақа ҳисобланади ва кейинги пайтларда у ерда аксил-террор операциялари кўлами кенгайтирилган.

Жерар Депардье "дўсти" президент бўлган Чеченистонда филм олмоқчи

Жерар Депардье "дўсти" Рамзан Қодиров билан.
Россия фуқаролигини олган франциялик таниқли актёр Жерар Депардье Чеченистонда филм суратга олиш ниятида эканини билдирди.

Чеченистон пойтахти Грознийда ўтказилган матбуот анжуманида Депардье чечен етакчиси Рамзан Қодировни “дўстим”, дея атаб, “бир одам беш йил ичида Грозний шаҳрини қайта қура олганига” тан берганини таъкидлади.

Инсон ҳуқуқлари ташкилотлари Қодировни қотилликлар, қийноқлар ва одам ўғирлаш ҳолатларига алоқадорликда айблаб келади.

Депардье Чеченистонга якшанба куни Россиянинг Мордовия Республикасида доимий пропискадан ўтказилгач, етиб келди. Депардье дабдабабозлик билан ўтказилган маросимда Саранск шаҳрининг Демократия кўчасида танишига тегишли квартирага прописка қилинди.

Президент Владимир Путин январ ойида Францияда солиқлар оширилишидан шикоят қилган Депрадьега Россия фуқаролигини берди.

Тожикистон амалдорининг ўғли судда мустақил газетани ютди

Тожикистон Темир йўллари давлат ширкати раҳбарининг ўғли “Имрузнюс” газетасига қарши судда ютиб чиқди. Душанбе шаҳар Исмоил Сомоний туман суди 25 феврал куни чиқарган ҳукмга кўра, хусусий газета Рустам Ҳукумов “шаъни ва қадр-қимматини таҳқирлагани” учун унга 50 минг сомоний (8 минг АҚШ доллари) миқдорида товон тўлаши керак.

Суд шунингдек, газетада “Ҳукумов ва Бакиев оталари учун бошоғриқ бўлди” сарлавҳаси остида чоп қилинган мақола учун узр сўрашни талаб қилди.

Бу мақолада Ҳукумов ҳокимиятдан ағдарилган Қирғизистон президенти Қурманбек Бакиевнинг ўғлига қиёсланган. Ота-ўғил Бакиевлар коррупция билан боғлиқ жиноятларда айбланиб, қидирувга берилган.

“Имрузнюс” газетаси адвокати суд ҳукми юзасидан юқори инстанцияга шикоят билан мурожаат қилишини билдирди. Унинг айтишича, суднинг ёпиқ эшиклар ортида ўтказилгани жиноят-процессуал кодексига зид бўлган.

Ҳамид Карзай Вардак вилоятидан АҚШ махсус кучларини чиқаришни талаб қилди

Афғонистон Президенти Ҳамид Карзай.
Афғонистон Президенти Ҳамид Карзай мамлакат мудофаа вазирлигига икки ҳафта ичида Вардак вилоятидан АҚШ махусус кучларини чиқаришни буюрди.

Президент матбуот котиби Аймал Файзийнинг баён қилишича, бу ҳақдаги қарор Афғонистон Миллий хавфсизлик кенгаши тарафидан якшанба куни қабул қилинган. Бу қарорга АҚШ махсус кучлари сафида хизмат қилаётган афғонларнинг ҳатти-ҳаракатлари сабаб бўлган.

Кобулда ўтказилган матбуот анжуманида Файзий АҚШ махсус кучлари ташкил қилган афғон гуруҳларини вилоятда “хавфсизлик ва барқарорликка путур етказаётганлик ва одамларга тазйиқ ўтказатганлик”да айблади.

Файзийнинг иддао қилишича, АҚШ махсус кучлари Вардак вилоятида амалга оширган операциядан кейин тўққиз киши бедарак йўқолган.

АҚШ махсус кучлари сафидаги афғон гуруҳлари вилоятдаги университет талабаси бошини танасидан жуда қилганликда ҳам айбланмоқда.

Вардак вилояти стратегик минтақа ҳисобланади ва кейинги пайтларда у ерда аксил-террор операциялари кўлами кенгайтирилган.

Жон Керри АҚШ давлат котиби сифатида илк хорижий сафарини бошламоқда

АҚШ Давлат котиби Жон Керри.
АҚШ Давлат котиби Жон Керри бу мақомда илк бор уюштираётган хорижий сафари доирасида душанба куни Лондонда музокаралар ўтказади. Керрининг Британия Бош вазири Дэвид Кэмерон ва Ташқи ишлар вазири Уильям Ҳейг билан учрашиши режалаштирилган.

Музокаралар кун тартибида АҚШ-Европа муносабатлари ҳамда Сурия, Эрон ва Шимолий Корея билан боғлиқ муаммоларнинг ўрин олгани айтилмоқда.

Музокаралардан кейин Керри матбуот анжумани ўтказиб, сафарининг кейинги манзили бўлган Берлинга жўнаб кетади.

АҚШ Давлат котиби лавозимини яқинда эгаллаган Керри Европа ва Яқин Шарқ бўйлаб тўққиз мамлакатга қилаётган сафаридан асосий мақсад танишув эканини айтмоқда.

Сафари доирасида давлат котиби чоршанба куни Римда Сурия мухолифати вакиллари билан ҳам учрашади. Лекин Сурия мухолифатининг баъзи вакиллари халқаро ҳамжамият Суриядаги зўравонликларни тўхтатиш учун етарли ҳаракат қилмагани важидан учрашувни бойкот қилишини эълон қилган.

АҚШнинг Марказий Осиё ва Кавказ мамлакатларига ёрдами қисқаради

АҚШ Давлат департаменти Марказий Осиё ва Кавказ минтақаларига кўрсатиладиган ёрдамни қисқартирмоқчи.

АҚШ Конгрессига киритилган таклиф маъқулланса, давлат департаменти орқали Марказий Осиёга кўрсатиладиган ёрдам жорий йилда 13 фоизга камайиб, 118,3 миллион АҚШ долларини ташкил қилади. Ўтган йили Марказий Осиё мамлакатларига жами 133,6 миллион долларлик ёрдам кўрсатилган. Бунда “Тинчлик ва хавфсизлик” дастури учун ажратиладиган ёрдамнинг ўтган йилги 30 миллион доллар кўрсаткичидан ўзгармаслиги кутилмоқда.

Ўзбекистон учун ажратилган ёрдам ҳам ўтган йилгидан деярли ўзгармаслиги кутилмоқда ва бу мамлакатга ажратилаётган 12,6 миллион долларлик ёрдамнинг 3,4 миллиони хавфсизлик дастурларига қаратилиши режалаштирилмоқда. Минтақа давлатлари орасида энг катта ёрдам Қирғизистонга кўрастилади. Бу республикага ўтган йилги 47 миллион долларлик ёрдам бу йил ҳам сақланиб қолади.

Кавказ минтақаси учун ёрдам миқдори 24 фоизга қисқартилиб, 121 миллион долларни ташкил этиши кўзланмоқда. Ёрдамнинг энг катта қисми, 85 миллион доллари Грузияга тегиши айтилмоқда.

Ҳолливудда Оскар мукофотлари топширилди

Энг яхши филм номинацияси бўйича Оскар "Арго" филми муаллифларига топширилди.
Ҳолливудда Америка киноакадемиясининг Оскар мукофоти совриндорлари эълон қилинди.

Йилнинг энг яхши филми номинациясида “Арго” филми ғалаба қилди. Бен Аффлек суратга олган бу филмда 1979 йилда Эрондаги АҚШ элчихонаси гаровга олиниши воқеалари тасвирланган.

Энг яхши актёр номинацияси бўйича Оскар ҳайкалчаси Стивен Спилбергнинг “Линколн” филмида бош қаҳрамон ролини ижро этган Дэниел Дэй-Люисга тегди. “Ийгитим савдойи” филмида бош ролни ижро этган Жениффер Лоуренс Америка киноакадемияси томонидан энг яхши актриса деб топилди.

Австриялик режиссёр Михаэл Ханеке суратга олган “Севги” филми хориж тилидаги энг яхши филм номинациясида ғалаба қилди.

Иккинчи пландаги энг яхши актёр номинацияси бўйича Оскар мукофоти Квентин Танантино суратга олган “Озод Жанго” филмида ёлланган қотил ролини ижро этган Кристоф Валцга тегди.

Виктор Ҳюго асари асосида суратга олинган “Хўрланганлар” мусиқавий филмидаги роли учун Энн Хэтэуэй иккинчи пландаги энг яхши актриса, деб топилди.

Оскар ҳайкалчаларини топшириш 85-чи маросими 24 феврал куни Hollywood & Highland Centre саройида ўтказилди.

Исроил қамоғида фаластинлик маҳбус вафот этди

Фаластин мухторияти ҳукумати Исроил қамоқхонасида фаластинлик маҳбус Арофат Жарафатнинг ўлими юзасидан халқаро текширув ўтказиш зарурлиги ҳақида баёнот тарқатди.

30 ёшли Жарафат шанба куни вафот этган. Қамоқхона раҳбарияти маҳбус юрак хуружи туфайли вафот этганини билдирмоқда. Исроил томони мазкур воқеа юзасидан расмий текширув ўтказишни бошлади.

Исроил қамоқларида сақланаётган уч мингга яқин фаластинлик маҳбуслар Жарафатнинг ўлими муносабати билан бир кунлик очлик эълон қилди. Иордан дарёсининг Ғарбий соҳилидаги Хеврон шаҳрида норозилик намойиши ўтказилди.

Мазкур воқеа ўтган ҳафта Исроил ҳарбийлари ҳамда Исроил қамоқларида очлик эълон қилган тўрт фаластинликни қўллаб –қувватлаётган Фаластин ўсмирлари ўртасида кескин тўқнашувлар содир этилганидан сўнг бўлиб ўтди.

Исроил ҳукумати Фаластин раҳбариятини кескинлашган вазиятни юмшатиш учун ёрдам беришга чақирди.

Давомини ўқинг

XS
SM
MD
LG