Линклар

Шошилинч хабар
20 август 2019, Тошкент вақти: 08:16

Халқаро янгиликлар

Арманистон президенти номзодига суиқасд қилганлар ушланди

63 ёшли Паруйр Ҳайрикян 31 январ куни Еревандаги уйи олдида уюштирилган суиқассда омон қолган.
Арманистон Миллий хавфсизлик хизмати президентликка номзод Паруйр Ҳайрикянга қилинган суиқасдга алоқадорликда гумонланган икки киши ҳибсга олинганини маълум қилди.

Миллий хавфсизлик хизмати баёнотига кўра, ҳибсга олинганлар Арманистон фуқаролари 47 ёшли Качатур Погосян ва 41 ёшли Самвел Ҳарутюнянлардир. Улар ўзларининг суиқсадда иштирок этганларига иқрор бўлгани айтилмоқда.

Расмий хабарномада айтилишича, Погосян ўтмишда наркотиклар савдоси билан шуғулланган. Терговчиларга кўра, суиқасд мотивлари аниқланганича йўқ.

63 ёшли Ҳайрикян 31 январ куни Еревандаги уйи олдида отиб кетилган, лекин тирик қолган. Жарроҳлар унинг елкасидан ўқни олиб ташлаганидан кейин, президентликка номзоднинг аҳволи яхшиланаётгани айтилмоқда.

Сайловолди кампаниясини давом эттиришини билдирган Ҳайрикян 18 февралга белгиланган президент сайловидаги саккиз номзоддан биридир. У Миллий тикланиш партиясига етакчилик қилади.

Озарбайжон сунъий йўлдоши Ер орбитасига учирилди

Azerspace-1 сунъий йўлдоши Франция Гвианасидаги фазо марказидан учирилди.
Озарбайжоннинг илк сунъий йўлдоши фазога учирилди.

Озарбайжон Ахборот ва коммуникация технологиялари вазирлиги жума куни Azerspace-1 номли сунъий йўлдошни учириш штатсиз ҳодисларсиз амалга ошганини маълум қилиди. Озарбайжонга қарашли аппарат Франция Гвианасидаги фазо марказидан учирилди.

Озарбайжон ўз сунъий йўлдошининг бошқарилиши учун Малайзияга қарашли MEASAT Satellite Systems ширкатига пул тўлайди.

Сунъий йўлдош Шарқий Европа, Кавказ, Марказий Осиё ва Шимолий Африка минтақаларига телекоммуникацион хизматларни кўрсатади.

Azerspace-1 сателлити АҚШнинг Orbital Sciences Corporation ширкати томонидан қурилган бўлиб, дигитал алоқа, Интернет алоқаси, маълумотларни ўтказиш ва ҳукумат алоқа тизимлари учун мўлжалланган.

Озарбайжон иккинчи сунъий йўлдошни 2016 йилда учиришни режалаштираётганини айтмоқда.

Тунисда ўлдириб кетилган мухолифат етакчиси жанозасига минглаб одам тўпланди

Чокри Белайднинг ўлдрилиши Тунис пойтахти ва бошқа шаҳарларда норозилик ва зўравонликларни келтириб чиқарди.
Жума куни Тунисда минглаб одам ҳафта бошида ўлдирилган мухолифат етакчиси жанозасига тўпланди. Дунёвий қарашдаги сиёсатчи Чокри Белайд чоршанба куни пойтахт Тунисда отиб кетилган эди.

Жума куни Тунис бўйлаб эълон қилинган иш ташлаш мамлакатни фалаж ҳолатга келтирди. Белайднинг ўлдрилиши Тунис пойтахти ва бошқа шаҳарларда норозилик ва зўравонликларни келтириб чиқарди.

Пайшанба куни норозилар иқтидордаги Эннаҳда исломий партияси қароргоҳига ўт қўйди. Мўътадил исломчи партия ҳисобланган Эннаҳда вакили, бош вазир Ҳамди Жебалий юзага келган бўҳронни ҳал қилиш йўлида ҳукуматни тарқатиб юбориб, технократлардан иборат кабинет тузишни ваъда қилди. Бироқ партиянинг нуфузли аъзолари бунга қарши чиқди.

Европа етакчилари 7 йиллик бюджет лойиҳасини муҳокама қилмоқда

Брюсселда Европа Иттифоқи етакчилари 27 мамлакатни ўз ичига олувчи блокнинг 7 йиллик бюджети лойиҳасини муҳокама қилмоқда. Таклиф қилинаётган бюджет лойиҳасига кўра, 2014-2020 йиллар давомида ЕИ харажатлари 960 миллиард евро (1,29 триллион АҚШ доллари)дант оширмасликни назарда тутади.

Бунга оид якуний келишувнинг жума куни кечгача қабул қилиниши кутилмоқда. Агар бюджет тасдиқланса, ЕИнинг кўп йиллик бюджетида илк бор харажатларнинг қисқартирилиши амалга оширилади.

Британия ва Ҳолландия каби мамлакатлар ЕИ бюджетини миллий бюджетлардаги қисқартиришларга мос равишда қисқартиришни талаб қилмоқда. Айни пайтда, Франция ва Польша каби давлатлар фермерлар учун субсидиялар ва инфратузилмани ривожлантириш мақсадларга кўпроқ сарф-харажат қилинишини исташмоқда.

Ноябр ойидаги саммитда ЕИ етакчилари 972 миллиард евро (1,31 АҚШ доллари)га тенг бюджет бўйича келиша олмаган эди.

Ироқдаги портлашларда 16 киши нобуд бўлди

Ҳужмлар суннийлар кўпчиликни ташкил қиладиган минтақаларда норозилик кучаяётгани ва сиёсий бўҳронга боғлиқ дейилмоқда.
Ироқнинг бир неча шаҳри, жумладан, пойтахт Бағдодда рўй берган портлашларда камида 16 киши ҳалок бўлиб, ўнлаб одам жароҳатланган.

Бағдоднинг асосан шиалар яшайдиган Қадимия мавзесидаги бозорда рўй берган иккита портлашда 11 киши жароҳатланиб, 30га яқин одам жароҳатлангани айтилмоқда.

Бобил вилоятининг Шомали шаҳарчасида машинага ўрнатилган бомба портлаши оқибатида яна беш киши нобуд бўлган ва 20га яқин одам тан жароҳати олган.

Ироқда кейинги пайтларда зўравонлик яна авж олаётгани кузатилмоқда. Сўнгги ҳафталар давомида мамлакатнинг асосан шиалар истиқомат қиладиган минтақаларида машинага ўрнатилган бомба ва худкуш бомбачи ҳужумлари кўпайган.

Ҳужмлар суннийлар кўпчиликни ташкил қиладиган минтақаларда шиаларга доҳил бош вазири Нури ал-Маликийнинг истеъфоси талаби билан ўтказилаётган норозиликлар ва сиёсий бўҳронга боғлиқ экани айтлмоқда.

МРБ директорлигига номзод АҚШ Сенатида сўроқ қилинди

Жон Берннаннинг нутқи залдаги норозилар тарафидан бир неча марта бўлинди.
Президент Барак Обама АҚШ Марказий разведка бошқармаси директори лавозимига номзод қилиб кўрсатган Жон Бреннан Сенат қўмитасида сўроқ қилинди. Оқ уйнинг террорчиликка қарши кураш бўйича маслаҳатчиси Бреннан ўз номзодини тасдиқлаш эшитувларида иқтидордаги маъмуриятнинг “аксил террор сиёсати” ҳақида “баҳслар давом этаётганини” қайд қилиб, Қўшма Штатлар “Ал-Қойда ва унинг ҳамкорлари билан урушни тугатгани йўқ”, дея таъкидлади.

Сенат вакиллари Бреннанга қатор долзарб масалалар, жумладан АҚШнинг террорчиларни топиб, йўқ қилишга қаратилган пилотсиз учқичлар дастури, шу пайтгача сир тутилиб келган Оқ уйнинг Ал-Қойдага алоқадор, деб кўрилган америкаликларни ўлдришни ёқловчи ҳуқуқий меъёри ва номзоднинг ўтмишда гумонланувчиларни босим остида сўроқ қилишни қўллаши ҳақидаги баёнотларига оид саволларни беришди.

Берннаннинг чиқиши залдаги норозилар тарафидан бир неча марта бўлинди. Залда ўтирган аёллардан пилотсиз учқич ҳужумларида ҳалок бўлганлар рўйхати экани айтилган ҳужжатни рўкач қилиб, тўполон қилди.

Сенат қўмитаси раиси Дайан Файнштейн эшитувларни тўхтатиб, зални бўшатиб қўйишни буюрди.

Украинада Тожикистон собиқ бош вазири ҳибсга олинди

Тожикистон собиқ бош вазири Абдумалик Абдулложонов.
Украинадаги Бориспол шаҳар суди Тожикистоннинг собиқ бош вазири Абдумалик Абдулложоновни 40 кун ҳибсда тутиш ҳақида қарор қабул қилди.

Ҳибс муддати тугагунига қадар Душанбе Украина расмийларига уни экстрадиция қилиш ҳақида расмий талабнома жўнатиши лозим.

Бундан 16 йил муқаддам Тожикистон томонидан халқаро қидирувга берилган 64 ёшли Абдумалик Абдулложонов аввалроқ АҚШдан учиб келган пайтда Киевнинг «Бориспол» аэропортида Украина Ички ишлар вазирлиги Уюшган жиноятчиликка қарши кураш бош бошқармаси ходимлари томонидан қўлга олинган.

Тожикистон Абдулложоновни террорчилик, қуролли исён, суиқасд, уюшган жиноий гуруҳ тузганлик каби бир қатор оғир жиноятларда айблаб келади. Шу жумладан, у 1997 йилнинг 30 апрелида Хўжандда президент Имомали Раҳмонга суиқасд уюштирганликда айбланади. Шунингдек, собиқ бош вазирни 1998 йил ноябрида полковник Маҳмуд Худойбердиев томонидан уюштирилган исённи қўллаб-қувватлаганликда айблайдилар.

Абдулложонов Тожикистондаги беш йиллик фуқаролар урушининг бошларида, яъни 1992-1993 йилларда мамлакат бош вазири лавозимини эгаллаган, кейин эса икки йил Тожикистоннинг Россиядаги элчиси бўлиб ишлаган.

1994 йили у президентликка номзодини қўйган, бироқ мағлуб бўлгач, Тожикистонни тарк этган. 1997 йилда қидирувга берилганидан кейин у бир йил ўтгач, АҚШга кўчиб кетган.

Озодлик радиоси тожик хизмати маълумотига кўра, Абдулложонов АҚШнинг грин-картасига эга.

Москвада юздан зиёд фаррош қўлга олинди

Россия пойтахти Москвада ноқонуний фаолият юритаётган 100 дан зиёд фаррош ушланди.

Россия Федерал миграция хизмати вакили Залина Корниловага кўра, асосан марказий осиёликлардан иборат бўлган 107 кишидан 33 нафари миграция қонунларини бузгани учун ватанига депортация қилинади. Қолган 74 кишининг эса Россияда юриш муддати қисқартирилиши айтилмоқда.

Шу йилнинг январ ойида Россия президенти Владимир Путин Давлат думасига Москвада муҳожирларни рўйхатга олиш устидан назоратни кучайтириш тўғрисида қонун лойиҳасини таклиф қилганди.

Суриялик исёнчилар Карназ шаҳрини қўлдан бой берди

Сурия қўшинлари исёнчилар билан бўлган 16 кунлик жангдан сўнг пайшанба куни мамлакатнинг марказий қисмида жойлашган Карназ шаҳрида назоратни ўз қўлларига олдилар.

Англиянинг Ковентри шаҳрида ерлашган суриялик ҳуқуқ фаоллари маълумотига мувофиқ, исёнчилар Карназ шаҳрини ўтган йил декабридан буён назорат қилиб келаётгандилар.

Улар армия ва исёнчиларнинг қуролли тўқнашуви чоғида камида 90 киши ҳалок бўлгани, улардан 37 нафари тинч аҳоли вакили, 31 нафари ҳарбийлар ва 24 нафари исёнчилардан бўлганини маълум қилади.

Айни маълумотни Франс-пресс агентлиги ҳам келтирган. Бироқ бу хабарни бошқа мустақил манбалардан тасдиқлатишнинг имкони бўлмаяпти.

Брюсселда ЕИ бюджети муҳокама қилинмоқда

ЕИ саммити иштирокчилари.
Европа мамлакатлари лидерлари Европа Иттифоқи яқин етти йил ичидаги бюджетини муҳокама қилиш учун икки кунга Брюсселга йиғилди.

Буюк Британия бош вазири Дэвид Кэмерон Брюссел учрашуви ҳақида гапираркан, ўзаро келишувга эришиш бюджет қисқартирилиши маъқулланган тақдирдагина мумкин бўлишини айтди.

Германия канцлери Ангела Меркел турли мамлакатлар турлича позицияда қолишда давом этаётганини билдирди.

Пайшанба куни саммит очилиши ўзаро муроса йўлини қидираётган иштирокчиларнинг икки томонлама музокаралари туфайли бир неча соатга кечикди.

Еврокомиссия томонидан даставвал таклиф қилинган 1 триллион 200 миллиард евролик бюджет ҳозирнинг ўзида 943 миллиард еврога қисқарган.

Доғистонда полициячи отиб кетилди

Пайшанба оқшомида Доғистонда полиция капитани Ёқуб Алимирзуев ўлдириб кетилди. Мазкур воқеа Леваши туманига қарашли Ҳажалмахи қишлоғида содир бўлди.

Қотил участка нозири Алимирзуев ўз уйига кириб кетаётган пайтда унинг орқасидан ўқ узган. Полициячи касалхонага олиб кетилаётган пайтда жон берган.

Интерфакс агентлигининг Доғистон полицияси маълумотларига таянган ҳолда хабар қилишича, ҳодиса юзасидан тергов бошланган, жиноятчи қидирилмоқда.

Тунисда намойишчилар полициячилар билан тўқнашди

Туниснинг Гафса шаҳрида ҳукумат биноси олдида аксил-исломчи намойишчилар полиция билан тўқнашди.

Намойишчилар полицияга қарата Молотов коктейлини ирғитди, бунга жавобан полиция кўз ёшини оқизувчи газ қўллади. Норозилар чоршанба куни пойтахт Тунисда ўлдириб кетилган мухолифат етакчиси Чокри Белайдни хотирлаш тадбирига чиқди.

Дунёвий сиёсатчи бўлган Белайд иқтидордаги Эннаҳда мўътадил исломчи партиясининг ашаддий танқидчиси эди. Унинг ўлдирилиши Тунис, Сиди Боузид ва бошқа шаҳарларда намойишчилар билан полиция ўртасида тўқнашувларга сабаб бўлди.

Сиди Боузид шаҳри 2011 йил бошида президент Зайн ул-Обидин Бен Алини ҳокимиятдан ағдарган Жасмин инқилобининг бешиги ҳисобланади.

Суиқасддан кейин Тунис Бош вазири Ҳамади Жебалий ҳукуматни тарқатиб юбориб, технократлардан иборат кабинет тузишини эълон қилди. Жабалийнинг бу баёноти унинг партияси вакиллари томонидан танқид қилинди.

Аҳмадийнажод Эрон билан Мисрни ўртасида стратегик иттифоқчилик тузишга чақирди

Миср Президенти Муҳаммад Мурсий сешанба куни Эрон Президенти Маҳмуд Аҳмадийнажодни тантана билан кутиб олди.
Президент Маҳмуд Аҳмадийнажод Мисрни Эрон билан стратегик иттифоқчилик тузишга чақирди. Аҳмадийнажод ташқи кучларни икки мамлакатнинг бирлашишига тўсқинлик қилаётгналикда айблади.

Аҳмадийнажод бу ҳақда чоршанба куни Қоҳирида гапирди. У кейинги 30 йилдан ортиқроқ вақт ичида Мисрга сафар қилган Эроннинг илк раҳбари бўлди.

Икки давлат 1979 йилда Эронда Исломий инқилоб рўй берган пайтда ва Миср Исроил билан тинчлик келишувини имзолаши ортидан алоқаларни узган эди.

Шунингдек, Қоҳирга сафар қилаётган Эрон Ташқи ишлар вазири Али Акбар Солиҳий Теҳрон мисрлик савдогар ва сайёҳлар учун визани бекор қилишини эълон қилди.

Мисрнинг давлатга қарашли MENA хабар агентлиги Солиҳийнинг икки мамлакат ўртасидаги алоқалар “кундан кунга” яхшиланмоқда, деган баёнотидан иқтибос келтирмоқда.

Миср Президенти Муҳаммад Мурсий сешанба куни Исломий давлатлар конференцияси саммитига келган Аҳмадийнажодни тантана билан кутиб олди.

Озарбайжон фазога сунъий йўлдош учирмоқчи

Жума куни Озарбайжоннинг илк сунъий йўлдоши Ер орбитасига учирилади.

Озарбайжон Ахборот ва коммуникация технологиялари вазирлигининг пайшанба куни маълум қилишича, Azerspace-1/Africasat-1a номли сунъий йўлдош Франция Гвианасидаги фазо марказидан учирилади.

Озарбайжон учирган сунъйи йўлдош Малайзияга қарашли MEASAT Satellite Systems ширкати бошқарадиган орбитал йўлакка жойлаштирилиши айтилмоқда.

Сунъий йўлдош Шарқий Европа, Кавказ, Марказий Осиё ва Шимолий Африка минтақаларига телекоммуникацион хизматларни кўрсатади.

Azerspace-/Africasat-1a сателлити АҚШнинг Orbital Sciences Corporation ширкати томонидан қурилган бўлиб, дигитал алоқа, Интернет алоқаси, маълумотларни ўтказиш ва ҳукумат алоқа тизимлари учун мўлжалланган.

Озарбайжон иккинчи сунъий йўлдошни 2016 йилда учиришни режалаштираётганини айтмоқда.

Дамашқдаги жангларда 60дан ортиқ одам ҳалок бўлди

Суриялик фаолларнинг маълум қилишича, пойтахтда исёнчилар ва президент Башар ал-Ассад тарафдорлари ўртасида икки кундан бери давом этаётган жангларда ўнлаб одам ҳалок бўлган.

Чоршанба куни исёнчилар Дамашқ ва унинг атрофида ҳукумат кучларининг бир нечта позициясига ҳужум бошлади. Исёнчилар ўзлари қўлга киритган аксил-ҳаво ракеталари, гранатомётлар ва зирҳли машиналар билан қуролланган.

Бунга жавобан Дамашқ марказидаги тепаликка жойлашган ҳукумат кучлари пайшанба куни оғир артиллерия ва ракеталар билан исёнчилар истеҳкоми бўлган Жобар, Замалка ва Ҳожар ал-Асвад мавзеларини ўққа тутди.

Маркази Лондонда жойлашган Сурия инсон ҳуқуқлари обсерваторияси ташкилотига кўра, жанглар оқибатида чоршанба куни 60 дан ошиқ одам, жумладан 21 тинч фуқаро ва 32 исёнчи ҳалок бўлган.

Афғонистонликлар 2012 йилда жами 4 миллиард долларга яқин пора берган

БМТга кўра, ўтган йили афғонистонликларнинг ярми ҳукумат расмийларига пора берган. Пайшанба куни эълон қилинган ҳисоботга кўра, “айрим ўзгаришлар” кузатилганига қарамасдан, Афғонистонда коррупция кўлами 2009 йилдан бери 40 фоизга ошган ва жами 3,9 миллиард АҚШ долларини ташкил қилган.

БМТ наркотиклар ва жиноятларга қарши кураш агентлиги ва Афғонистонинг коррупцияга қарши кураш идораси чиқарган хулосаларга кўра, афғонистонликлар 2012 йилда пора сифатида берган пул “Афғонистон ялпи ички маҳсулотидан икки баробарга кўпроқдир”.

Полиция, адлия тизими ва таълим вазирликлари Афғонистон ҳукуматининг энг коррупциялашган соҳалари, деб этироф этилди.

2001 йилда АҚШ етакчилигидаги истилодан бери Афғонистонга милллиардлаб доллар миқдорида хорижий ёрдам кўрсатилган. Келаси йили Афғонистона ўз қўшинларини олиб чиқишга тайёрланаётган Ғарб давлатлари келажакда ёрдамни давом эттириш учун коррупцияга қарши курашни шарт қилиб қўйган.

Оятуллоҳ Хоманаий АҚШнинг бевосита музокара қилиш таклифини рад қилди

Эрон Олий руҳоний етакчиси Оятуллоҳ Али Хоманаий АҚШ Вице президенти Жо Байденнинг бевосита музокара қилиш таклифини рад қилди.

Пайшанба куни ҳаво қўшинлари қўмондонлари олдида қилган чиқишида бундай музокаралар “ҳеч нарсани ҳал қилмайди”, дея таъкидлади Хоманаий. Америкаликлар, “Эронга милтиқ ўқталиб туриб”, музокара қилмоқчи, дея қўшимча қилди у.

Байден ўтган ҳафта Мюнхенда ўтказилган хавфсизлик масаларига оид анжуманда қилган чиқишида Эрон ядровий дастури атрофидаги тортишувларни ҳал қилиш учун Теҳрон билан бевосита музокаралар ўтказиш таклифини илгари сурди.

Хоманаийнинг баёонтидан бир кун аввал Қўшма Штатлар Эрон нефт экспортидан оладиган даромадни қисқартишга қаратилган навбатдаги санкцияларни жорий қилди.

Ғарб давлатлари Эрон ўз ядровий дастури ёрдамида атом қуролини қўлга киритшга уринмоқда, деган гумонларни айтиб келади. Теҳрон бу айбловларни рад қилиб, ядровий дастури тинч мақсадларага қаратилганини айтади.

Косово ва Сербия прездентлари 2008 йилги мустақиллик декларацисидан бери илк бор учрашди

Косово ва Сербия президентлари Томислав Николич ва Атифете Яҳйага учрашувига ЕИ мулозими Кэтрин Эштон воситачилик қилди.
Косово 2008 йилда Сербиядан мустақиллигини эълон қилганидан бери икки давлат президентлари илк бор учрашди.

Косово Президенти Атифете Яҳйага ва Сербия Президенти Томислав Николич учрашуви чоршанба куни, Брюсселда Европа Иттифоқи воситачилигида ўтди.

Икки президент ЕИ Ташқи сиёсат бўйича олий ваикли Кэтрин Эштон билан алоҳида музокара ҳам ўтказдилар.

Учрашувдан кейин қилган чиқишида Николич Косоводан мустақиллик иддаоларидан воз кечишни талаб қилди.

Бунга жавобан Яҳйага Сербиянинг эскирган позициясига ёпишиб олганидан таассуф билдириб, Белград етакчиларини келажакка боқишга чақирди.

Сербия ва Косово бош вазирлари Ивича Дачич ва Ҳошим Тачи ҳам бир неча марта ЕИ воситачилигида учрашган.

Косово 2008 йилнинг февралида Сербиядан мустақиллигини эълон қилган. Косово мустақиллигини юзга яқин давлат тан олган.

Ўзбекистондаги келишувлар учун масъул кўрилган TeliaSonera мулозими бошқа лавозимга ўтказилди

TeliaSonera Ўзбекистон президентининг қизи Гулнора Каримовага 320 миллион доллар пора берганликда гумон қилинмоқда.
Швециянинг TeliaSonera телеком ширкати Евроосиёдаги операциялар бўлими бошлиғи лавозимига Вейсал Арални тайинлади. Шу пайтгача Қозоғистондаги Kcell ширкати бош директори ва TeliaSoneraнинг Марказий Осиё бўйича минтақавий раҳбари лавозимида ишлаб келган Арал Теро Кивисаари ўрнини эгаллади.

Теро Кивисаари TeliaSonera ширкати Ўзбекистонда бизнес бошлаш учун президент Ислом Каримов оиласига юзлаб миллион АҚШ доллари миқдорида пора бергани билан боғлиқ жанжал Швеция жамоатчилиги диққат марказида қолаётган пайтда бошқа лавозимга ўтказилмоқда.

Кивисаари ўз вақтида TeliaSonera ширкатининг Ўзбекистондаги фаолиятини бошқарган ва бу мамлакатдаги келишувлар учун маъсул бўлган шахслардан бири деб кўрилади.

Ўтган ҳафта Швециядаги Mannheimer Swartling адвокатлик фирмаси TeliaSoneraнинг Ўзбекистондаги фаолияти юзасидан ўтказган тафтиш хулосаларини эълон қилиши ширкат президенти Ларс Нюберг истеъфога кетишига сабаб бўлди.

Катта қисми Швеция ва Финляндия ҳукуматларига тегишли TeliaSonera ширкати Ўзбекистон телекоммуникацион бозорига кириш учун президент Ислом Каримовга яқин шахслар, хусусан унинг тўнғич қизи Гулнора Каримовага 320 миллион доллар пора берганликда гумон қилинмоқда.

Эрон Миср фуқаролари учун виза режимини бекор қилди

Эрон ҳукумати Мисрнинг бир нечта тоифадаги фуқаролари учун виза режимини бекор қилди.

Бу ҳақда Эрон Ташқи ишлар вазири Али Акбар Солиҳий маълум қилди.

Энди Эронга туристик саёҳат ёки иш билан бормоқчи бўлган мисрликлардан виза талаб қилинмайди.

Вазир Солиҳийга кўра, Ислом ремпубликасининг Миср билан алоқалари "кундан кунга яхшиланмоқда".

Теҳроннинг Қоҳира билан дипломатик алоқалари Эронда 1979 йилда инқилоб амалга оширилганидан сўнг деярли тўхтатилган эди.

Ташқи ишлар вазири Али Акбар Солиҳий айни дамда президент Маҳмуд Ахмадинажод бошчилигидаги Эрон делегацияси билан Миср сафаридадир.

Бу Эрон раҳбарининг 30 йилдан ортиқ вақтдан бери Мисрга илк ташрифидир.

Арманистонда президентликка даъвогар ўз номзодини қайтариб олмоқчи

Арманистонда мамлакат президентлигига даъвогарлардан бири 18 февралга белгиланган сайловлардан ўз номзодини қайтариб олишини эълон қилди.

“Миллий ҳамжиҳатлик” партияси лидери Арам Арутунян чоршанба куни журналистлар билан суҳбатда 7 феврал куни Марказий сайлов комиссияси биноси олдида бир кунлик очлик акцияси ўтказишини ва сайловлардан чиқишини маълум қилди.

Арутунян амалдаги президент Серж Саркисян қўли баланд келиши таҳмин қилинаётган Арманистон презинденти сайловларидаги саккиз номзоддан биридир.

“Миллий ҳамжиҳатлик” партияси лидери бошқа номзодларни ҳам сайлов пойгасидан чиқишга чақирди.

Сайловлардаги яна бир номзод Андриас Гукасян эса Марказий сайлов комиссиясидан Серж Саркисян номзодлигини бекор қилишни талаб қилиб, 17 кундан бери очлик акциясини давом эттирмоқда.

Гукасян номзодларни сайлов пойгасидан чиқишга ва Серж Саркисянни рақибларсиз қолдириб, 18 февралга белгиланган президент сайловларини бекор қилишга чақирмоқда.

АҚШ Эрон телерадиокомпаниясига санкциялар жорий этди

Эрон давлат телерадиокомпанияси логоси
АҚШ Эрон давлат телерадиокомпанияси ва унинг раҳбарига нисбатан молиявий санкцияларни жорий этди.

Молиявий санкциялар Эронда интернет тармоқларидаги оммавий ахборот воситаларни назорат қилиб борувчи Киберполицияни ҳам чеклаб ўтмади.

Вашингтон бу ташклилотларни Эронда цензура ўрнатиш, чет эл телеканалларига атайин тўсиқлар яратиш ҳамда интернетдаги ижтимоий тармоқлар орқали сиёсий фаолларни таъқиб этиш билан шуғулланишда айбламоқда.

Санкциялар АҚШнинг Молия вазирлиги тарафидан жорий этилган. Мамлакат қонунига кўра, Молия вазирлиги маълумот эркинлигига тўсқинлик қилаётган ташкилот ёки шахсларга нисбатан санкция қўйиш ҳуқуқига эга.

Вазирлик берган маълумотда айтилишича, 2009 йилги президент сайловларидан сўнг Эрон ҳукумати цензура ва маълумотни филтрлаш ишларини кучайтирган.

Германияда яна бир вазир плагиат учун жазоланди

1980 йилда ёзган диссертациясида плагиат аломатлари аниқланиши ортидан Германия Маориф вазири Аннет Шаван докторлик унвонидан маҳрум этилди.

Аннет Шаван ҳозирча ўз лавзоимида қолмоқда. Унинг иш сафари билан Жанубий Африка Республикасида экани айтилмоқда.

Канцлер Ангела Меркелнинг яқин сафдоши ҳисобланган Шаван 2005 йилда маориф вазири этиб тайинланган эди.

Бу Канцлер Ангела Меркел ҳукуматидаги вазирлар атрофидаги плагиат билан боғлиқ биринчи жанжал эмас.

2011 йилнинг март ойида Германиянинг ўша пайтдаги Мудофаа вазири Карл-Теодор цу Гуттенберг диссертациясини кўчириб ёзгани ҳақидаги иддаолар ортидан истеъфо беришга мажбур бўлганди.

Ҳюман Райтс Уотч Россияда мухожирлар ҳуқуқлари топталаётгани ҳақда бонг урди

Ҳюман Райтс Уотч халқаро инсон ҳуқуқлари ташкилоти Сочидаги олимпиада иншоотлари қурилишида меҳнат мухожирлари қаттиқ эксплуатация қилинаётгани ҳақда бонг урди.

Ташкилотнинг бу юзадан чиқарган махсус ҳисоботида иш берувчилар меҳнат мухожирларини кунига 12 соатлаб ишлатиши, ойликларини вақтида бермаслиги, берганда ҳам ваъда қилинганидан кам бериши, ишчиларни эксплуатация қилиш учун уларнинг паспортлари олиб қўйлиши фактлари тилга олинган.

Ҳюман Райтс Уотч ташкилотининг Россиядаги эксперти Юлия Горбунованинг Озодлик радиосига айтишича, мазкур ҳисобот Марказий Осиё ҳамда Кавказ минтақасидан келган ўнлаб меҳнат мухожирлари билан ўтказилган суҳбатлар асосида тузилган.

Ҳюман Райтс Уотч Россия ҳукумати ва Халқаро Олимпия қўмитаси раҳбариятини мухожирлар ҳуқуқларининг топталишига чек қўйишга чақирди.

Сочидаги олимпиада иншоотлари қурилишига жалб этилган меҳнат мухожирлари орасида ўзбекистонликларнинг ҳам борлиги айтилади.

Тожикистон собиқ бош вазири Киевда қўлга олинди

Тожикистон собиқ бош вазири Абдумалик Абдуллажонов кеча Украина пойтахти Киевнинг Бориспол аэропортида ҳибсга олинди.

Интерполнинг Украинадаги бўлинмаси расмийлари Озодлик радиоси тожик ҳизмати мухбири билан суҳбатда АҚШдан Киевга учиб келган Абдуллажоновнинг қўлга олинганини тасдиқлашди.

1994 йилги президентлик сайловида Тожикистон президенти Имомали Раҳмоннинг асосий рақиби бўлган Абдумалик Абдуллажоновни расмий Душанбе 1996 йилда Раҳмонга уюштирилган суиқасдда айблаб келади.

Тожикистоннинг сўровига кўра Интерпол Абдуллажоновни қидирилаётган шахслар рўйхатига ҳам киритган.

Собиқ бош вазир қайриб ўн беш йилдан буён АҚШда яшаб келаётганди.

Давомини ўқинг

XS
SM
MD
LG