Линклар

Шошилинч хабар
17 сентябр 2019, Тошкент вақти: 15:35

Халқаро янгиликлар

"Норманд тўртлиги": Украина шарқида ўт очишни мутлақо тўхтатиш лозим

Украина президенти Порошенко Россиянинг Минск келишувларига риоя қилмаслигига йўл қўйиб бўлмаслигини таъкидлаб ўтди.

“Норманд тўртлиги” лидерлари чоршанба кунги телефон орқали суҳбат давомида Украинанинг Донецк ва Луганск областларида ўт очишни мутлақо тўхтатиш зарурлиги тўғрисида келишиб олдилар, деб хабар қилди Украина президенти Петр Порошенконинг матбуот хизмати.

Украина раҳбари сўнгги ҳафталарда Донбассда вазият мураккаблашгани тўғрисида маълумот бераркан, Россия ва россияпараст сепаратчилар томонидан Минск келишувларига риоя қилинмаслигига йўл қўйиб бўлмаслигини таъкидлаб ўтди.

Украина, Россия, Германия ва Франция – Норманд тўртлиги – лидерлари чоршанба куни телефон орқали боғланиб Киев ва Украина шарқидаги сепаратчилар ўртасида эришилган тинчлик келишуви ижроси ҳақида мулоқот қилажаклари тўғрисида аввалроқ хабар қилинган эди. Порошенко маъмурияти сепаратчиларни тинчлик келишувини тез-тез бузаётганликда айблади.

Москва турк ширкатларига Россияда қурилишда ишлашни тақиқлади

Россия ҳукумати қабул қилган қарорга биноан 2016 йилнинг 1 январидан бошлаб турк ширкатлари Россияда қурилиш, меъморий ва муҳандислик лойиҳалаш, туризм, давлат эҳтиёжларини таъминлаш ҳамда ёғочни қайта ишлаш соҳаларида ишлаши мумкин эмас.

Бу ҳақда ҳукумат сайтида хабар қилинди. Унда айтилишича, жорий этилган тақиқ шартномаларини 30 декбаргача имзолаган турк ширкатларига тааллуқли эмас.

Бу Туркияга қарши Россия эълон қилган санкцияларнинг биринчиси эмас.

Бош вазир Дмитрий Медведев 1 декабрда Туркияга нисбатан жорий қилинган санкциялар рўйхатини тасдиқлаган эди.

Ҳукумат расмий сайтида эълон қилинган рўйхатда Туркиядан қишлоқ хўжалик маҳсулотларини сотиб олиш 1 январдан тақиқланиши назарда тутилган.

Москва ва Анқара ўртасидаги муносабатлар турк ҳарбийлари томонидан 24 ноябрда рус ҳарбий самолёти уриб туширилганидан сўнг ёмонлашиб бормоқда. Анқара Сурияда ҳарбий амалиётни ўтказаётган рус самолёти Туркия чегарасини бузиб ўтгани учун уриб туширилганини билдирмоқда. Россия эса бу билдирувни инкор қилиб, самолёт Сурия ҳудудида турк ҳарбийлари томонидан уриб туширлганини иддао қилаётир.

Озодлик радиоси Бишкек бюроси экс-директори Омбудсмен лавозимига сайланди

Озод Европа/Озодлик радиоси қирғиз хизмати – Азаттиқ радиосининг Бишкекдаги бюроси собиқ директори Кубат Оторбаевни Қирғизистон парламенти – Жўғўрқу Кенеш Қирғизистон Ҳақиқатчиси (Омбудсменнинг бу мамлакатда қабул қилинган расмий номи) лавозимига сайланди.

Оторбаев 8 номзод орасида 105 ўринли парламент депутатларининг 66 нафари овозини олиб Қирғизистоннинг бош инсон ҳуқуқлари ҳимоячиси бўлди.

Кубат Оторбаев Азаттиқ радиосининг Бишкекдаги бюроси директорлигидан мамлакат миллий телерадиокомпанияси етакчиси лавозимига ўтган эди.

Азаттиқнинг яна бир журналисти Жанар Акаев яқинда бўлиб ўтган сайловда Қирғизистон парламенти депутатлигига сайланган. Парламентга келгунича Жанар президент Атамбаевнинг матбуот котиби бўлиб ишлаган.

Азаттиқ радиосининг Бишкекдаги бюроси ҳозирги директори Султан Каназаров Қирғизистон экс-президенти Роза Ўтунбаеванинг матбуот котиби бўлиб ишлаган. Каназаров президент маъмуриятига Азаттиқдаги журналистлик фаолиятини тўхтатиб ўтган.

Ислом уйғониш партияси лидерини қабул қилгани учун Душанбе Теҳронга норозилик билдирди

Муҳиддин Кабирий Эрон лидери Оятуллоҳ Хоменаий билан, 2015 йил, 30 декабрь.

Эроннинг Тожикистондаги элчиси Хўжатилло Фағоний сешанба куни Тожикистон ташқи ишлар вазирлигига чақиртирилиб, Тожикистонда экстремистик ва террористик деб эълон қилинган Ислом уйғониш партиясининг халқаро қидирувга берилган лидери Муҳиддин Кабирийнинг Эронда ўтказилаётган конференцияга таклиф қилинишидан норозилик нотаси топширилди.

Тожикистон ташқи ишлар вазирлигининг бу ҳақдаги баёнотида айтилишича, Кабирий “давлат тўнтаришини амалга оширишга ва ҳокимиятни куч билан босиб олишга уринганликда” айбламоқда ва устидан жиноят иши қўзғатилиб, халқаро қидирувга берилган.

Шу кунларда Теҳронда “Ислом дунёси олдида турган синовлар” шиори остида 29-инчи “Ислом бирлиги” анжумани бўлиб ўтмоқда.

Доллар 73 рубллик довондан ошди

Бугун доллар ва евро рублга нисбатан кўрсаткичларини янгилаб, навбатдаги поғонага кўтарилди. АҚШ доллари нархи 73 рублдан, 1 евро 80 рублдан ошди.

Экспертлар фикрича, рубль қадрининг пасайиши нефтнинг арзонлаётгани ҳамда солиқ тўлаш даври якунига етаётгани билан изоҳланади.

Душанба куни Brent нефтининг бир бочкаси нархи 2008 йилдан буён илк марта 37 доллардан пастга тушди.

Покистондаги худкуш ҳужумда ҳалок бўлганлар сони 21 кишига етди

Мардан шаҳрида портлаш содир этилган ҳудуд.

Покистоннинг Мардан шаҳрида 29 декабрь куни содир этилган портлашда ҳалок бўлганлар сони камида 21 кишига, яраланганлар сони 50 кишига етди. Хабарларга қараганда, яраланганлардан 12 нафарининг аҳволи ўта оғир.

Дастлабки маълумотларда камида 18 киши ҳалок бўлгани ва 28 киши яралангани айтилган эди.

Полиция портлаш Давлат рўйхатга олиш хизматининг ҳудудий бўлими олдида содир этилганини маълум қилди. Гувоҳларнинг айтишларича, худкуш террорчи бинога киришга ҳаракат қилган, лекин уни бинони қўриқлаётган хавфсизлик хизмати ходимлари текшира бошлагач, у ўзини портлатиб юборган.

Террор ҳаракати учун масъулиятни Толибоннинг Покистондаги бўлинмаси таркибига кирган Жамоатул Аҳрор гуруҳи ўз зиммасига олди.

АҚШ афғон тадбиркорини молиявий жиноятларда айбламоқда

АҚШ суди афғонистонлик тадбиркор Ҳикматулло Шодмонни Қўшма Штатлар билан миллион долларлик шартномаларга эришиш учун америкалик ҳарбийларни сотиб олишда айбламоқда.

Хикматулло Шодмонга нисбатан жиноят иши 23 декабрдан Шимолий Каролина штати федерал судида кўриб чиқила бошланган.

Юк ташиш хизмати кўрсатувчи транспорт ширкати раҳбари Ҳикматулло Шодмон АҚШнинг икки ҳарбийсига 2009 йилда пора берганликда айбланмоқда. Бунинг эвазига ҳарбийлар Шодмоннинг ширкати билан бир неча миллион долларлик шартномаларни имзолаши шарт бўлган.

2013 йилда АҚШ Адлия вазирлиги мазкур иш юзасидан гумонланаётган Ҳикматулло Шодмоннинг банк ҳисобларидаги 63 миллион доллар маблағини музлатиб қўйган эди.

Прокурорларга кўра, Шодмон 2009 ва 2012 йиллари пора бериш орқали АҚШ билан 77 миллион долларлик шартномаларни имзолашга муваффақ бўлган. Айни пайтда Шодмон кимларга пора бергани ўрганилмоқда.

Тўқтўғул ГЭСининг икки генератори фавқулодда ўчирилди

Тўқтўғул ГЭСи.

Қирғизистонни электр қуввати билан таъминловчи Тўқтўғул ГЭСида кечадан бошлаб икки генератор фавқулодда равишда ўчирилди. Бунга ГЭС кабелларидаги носозликлар сабаб бўлган.

Хабарларга қараганда, ГЭСнинг кабеллари 40 йилдан бери янгиланмагани ортидан мана шундай фавқулодда ҳолат юз берган.Бунинг ортидан Энергетика вазирлиги Қирғизистонда электр қуввати таъминотига чеклов киритилиши ҳақида маълум қилди.

Энергетика вазирлигининг расмий билдирувида Қирғизистоннинг барча вилоятларида электр энергияси ҳар куни 1-2 соатга ўчирилиши хабар қилинган. Чеклов ГЭС кабелларидаги носозликлар бартараф этилгунга қадар кучда қолади.

Энергетика вазирлигига кўра, ҳозир ГЭСдаги носозликларин россиялик мутахасислар бартараф этмоқда. Таъмирлаш ишлари бир ойгача давом этиши мумкин.

Россия Тергов қўмитаси Борис Немцовни ўлдиришни ким буюрганини маълум қилди

Россия Тергов қўмитасига кўра,таниқли сиёсатчи Борис Немцовни ўлдиришга буюрган ва бу жиноятни уюштирган шахс Чеченистон ички ишлар вазирлигининг “Север” батальони жангчиси Руслан Мухудиновдир. Бу ҳақда бугун қўмита расмий вакили Владимир Маркин баёнот берди.

18 январь куни Москва шаҳар Басманний суди Мухудиновни сиртдан ҳибсга олган эди. У федерал ва халқаро қидирувга берилган.

Терговчиларга кўра, Немцовни ўлдиришда гумон қилинаётган шахс, “Север” батальони собиқ жангчиси Заур Дадаев Руслана Мухудинов Борис Немцовни ўлдириш учун унга 25 миллион рубль ваъда қилганини айтган.

Мухудинов “Север” батальони командирининг собиқ ўринбосари Руслан Геремеевнинг ҳайдовчиси бўлган. Немцовнинг яқинлари фикрича, қотиллик ортида айнан Геремеев бўлган.

Немцовлар оиласининг адвокати Вадим Прохоров Би-Би-Сига берган интервьюсида “Чеченистон раҳбари Рамзан Қодировнинг атрофидаги хослардан бўлган Геремеевга айблов эълон қилишга терговчиларнинг кучи етмаяпти”, деган.

Рамзан Қодировни сўроққ чақириши талабини ҳам терговчилар рад этган.

Борис Немцов 2015 йил 27 февраль кечқурун Москва марказида ўлдирилган эди.

2015 йили 69 журналист хизмат вазифаларини бажараётган пайтда ўлдирилди

2015 йили камида 67 журналист касбий фаолиятини амалга ошираётган пайтда ҳалок бўлди. Бу ҳақда оммавий ахборот воситалари эркинлиги учун курашиб келаётган “Чегара билмас мухбирлар” ташкилоти хабар қилди.

Бош қароргоҳи Парижда жойлашган ташкилотга кўра, ҳалок бўлганларнинг аксарияти қуролли зиддиятлар юз бермаётган мамлакатларда ўлдирилган. Айтилишича, яна 43 журналистнинг ўлими тафсилотлари ҳозирча маълум эмас.

“Чегара билмас мухбирлар” ҳисоботида айтилишича, Сурия ва Ироқ журналистлар учун энг хавфли мамлакатлардир. Бу йил Сурияда 10 Ироқда эса, 11 журналист ҳалок бўлди.

Қароргоҳи Нью-Йоркда жойлашган Журналистларни ҳимоя қилиш қўмитасига кўра 2015 йили оммавий ахборот воситаларининг 69 ходими касбий фаолиятини амалга ошираётган пайтда ҳалок бўлган. Шу жумладан 29 нафари радикал исломчи гуруҳлар жанггарилари қурбони бўлган.

Бельгияда террор ҳужуми режалаштирганликда гумон қилинган 2 шахс ҳибсга олинди

Бельгияда Янги йил маросимлари пайтида Брюсселда ҳужумлар уюштиришни режалаштирганликда гумон қилиниб, 2 киши ҳибсга олинди. Бу ҳақда бугун Бельгия федерал прокуратураси маълумот тарқатди.

Гумон қилинаётган икки шахс якшанба ва душанба кунлари Брюссель ва Льеже шаҳарлари атрофларида ҳамда Фламанд Брабанти минтақасида ўтказилган рейдлар давомида қўлга олинган. Уларнинг исм-фамилиялари, ёши ва жинси тўғрисида маълумот берилмади.

Тинтув давомида ҳарбий кийим, информация ташувчи электрон асбоблар ҳамда “Ислом давлати” экстремистик гуруҳининг тарғибот материаллари топилгани, бироқ қурол ва ўқ-дори топилмагани хабар қилинди.

Айтилишича, дастлаб 6 киши қўлга олинган, лекин улардан 4 нафари кейин қўйиб юборилган.

Бельгия федерал прокуратурасига кўра, ўтказилган рейдларнинг ўтган ойда Парижда амалга оширилган ҳужумларга алоқаси йўқ.

13 ноябрь куни Парижда содир этилган террор ҳужумларидан 130 киши ҳалок бўлган эди.

Евро 80 рубллик довондан ошиб ўтди

Бугун доллар ва евро рублга нисбатан кўрсаткичларини янгилаб, навбатдаги поғонага кўтарилди. 1 евро 80 рублга тенглашди ва бу жорий йил августидан буён энг юқори кўрсаткичдир. АҚШ доллари нархи эса, 72 ярим рублга тенглашди.

Экспертлар фикрича, рубль қадрининг пасайиши нефтнинг арзонлаётгани ҳамда солиқ тўлаш даври якунига етаётгани билан изоҳланади.

Душанба куни Brent нефтининг бир бочкаси нархи 2008 йилдан буён илк марта 37 доллардан пастга тушди.

Британ нашри Россия президенти Толибон раҳбари билан кўришгани ҳақида ёзмоқда

Толибон лидери мулла Ахтар Мансур.

Россия президенти Владимир Путин Толибон ҳаракати раҳбари мулла Ахтар Мансур билан кўришиб, дастак ваъда қилган. Бу ҳақда Британиянинг The Sunday Times газетаси Толибоннинг мазкур учрашувда иштирок этган дала қўмондонларидан бири сўзларига таянган ҳолда хабар тарқатди.

Нашрнинг ёзишича, Путин сентябрь ойида Тожикистондаги ҳарбий базада Толибон лидери билан учрашув ўтказган. Россия президенти минтақада кучайиб бораётган “Исломий давлат” террор гуруҳига қарши куч сифатида Толибонга кўмаклашишга ваъда берган.

Газетанинг исми ошкор қилинмаётган манбасига кўра, Ахтар Мансур Россия томонидан қандай ёрдам бўлиши мумкинлигини муҳокама қилмоқчи бўлган, Путин эса толибларга Москва мақсадига мувофиқ бўлган ҳамкорлик эвазига Россияда ишлаб чиқарилган замонавий қурол-аслаҳа ва молиявий ёрдам ваъда қилган.

The Sunday Times газетаси ушбу учрашув борасида Россия расмийларига ҳам мурожаат қилган, бироқ исми кўрсатилмаган Кремль вакили Путиннинг Ахтар Мансур билан учрашганига оид гаплар асоссизлигини айтган.

Путин сентябрь ойи ўрталарида террорчиликка қарши курашга бағишланиб Душанбеда ўтказилган Коллектив хавфсизлик шартнома ташкилоти саммитида иштирок этганди.

Вашингтон Ироқ қўшинлари томонидан Рамадийнинг озод этилишини олқишлади

Рамадийдаги ҳукумат аскарлари, 2015 йил 28 декабри.

Қўшма Штатлар Ироқда ҳукумат кучлари томонидан Рамадий шаҳрининг “Исломий давлат” гуруҳидан тўла озод қилинишини олқишлади.

АҚШ мудофаа вазири Эштон Картер Ироқ кучлари томонидан “Исломий давлат” жангариларининг Рамадийдан қувиб чиқарилиши бу “ваҳший гуруҳ” устидан ғалаба қозониш кампаниясида катта қадам бўлиб ҳисобланишини билдирди.

У Ироқ ҳукуматини Рамадийда тинчликни сақлаб қолиш учун бу имкониятдан фойдаланиш, “Исломий давлат” гуруҳи қайтишининг олдини олиш ҳамда рамадийликларнинг ўз шаҳрига қайтишларига кўмаклашишга чақирди.

Кеча Ироқ телевидениеси ҳукумат қўшинларининг Рамадийдаги асосий ҳукумат биноси устига миллий байроқ тикаётганлари ва уларнинг шаҳар кўчалари бўйлаб саф тортиб кетаётганлари тасвирланган лавҳани намойиш қилди. Унда Ироқ ҳарбий мулозими, генерал Яҳё Расул Рамадий шаҳри озод қилинганига доир баёнот берди.

Айни пайтда Анбар вилоятидаги ҳарбий амалиётлар раҳбари бўлган Исмоил Маҳлавий бу каби баёнотларни беришга ҳали эрталигини билдирди.

“Биз ҳали Рамадий тўла озод қилинди, деёлмаймиз. Ҳали жангарилар назорати остида бўлган мавзелар бор”, деди Исмоил Маҳлавий.

Бағдоддан 100 километр ғарброқда жойлашган ва асосан суннийлар истиқомат қиладиган Рамадий шаҳри шу йил май ойида “Исломий давлат” томонидан ишғол этилган эди.

Давлатга хиёнатда айбланган озарбайжонлик журналист олти йилга қамалди

Озарбайжонлик журналист Рауф Мирқодиров (ўртада).

Душанба куни оғир жиноятлар бўйича Боку суди давлатга хиёнатда айбланаётган озарбайжонлик журналист Рауф Мирқодировни олти йиллик қамоқ жазосига ҳукм қилди.

Озодлик радиоси озарбайжон хизматининг хабар қилишича, у Арманистон фойдасига жосуслик қилганликда айбланган.

Аввалроқ прокурор суддан журналистни етти йилга озодликдан маҳрум қилишни сўраганди.

Мирқодиров шу йилнинг 19 апрель куни Туркияда қўлга олиниб, Озарбайжонга депортация қилинганди. Ўзига қарши айбловларни рад этаётган журналист бу таъқибни касбий фаолияти билан боғламоқда.

Amnesty International ҳамда бошқа қатор маҳаллий ва халқаро ташкилотлар Рауф Мирқодировни сиёсий маҳбус, дея тан олганлар.

АҚШ: Эрон 11 тонна кам тўйинтирилган уранни Россияга жўнатди

Вашингтон расмийларига кўра, бортида 11 минг килограмм кам тўйинтирилган уран бўлган кема Эрондан чиқиб, Россияга йўл олган. Бу дунёнинг етакчи давлатлари билан келишув шартларини бажариш бўйича Теҳрон томонидан қўйилган энг катта қадам экани айтилмоқда.

Бу ҳақда сўзлаган АҚШ Давлат котиби Жон Керри мазкур юк 20 фоизгача тўйинтирилган, бироқ тадқиқот реактори учун ёнилғига айлантирилмаган ядровий материаллардан иборатлигини айтди.

Шу йил 14 июлида тузилган шартномага кўра, Эрон мамлакатда реакторлар учун керак бўлган 300 килограммча уранни сақлаб қолиш ҳуқуқига эга. Бу Теҳрон томонидан олинган асосий мажбуриятдир. Шунингдек, Эрон центрифугалар сонини сезиларли даражада қисқартириши ва ишлаб чиқарилаётган плутоний ҳажмини камайтириш учун реакторни модификация қилиши лозим.

Бундан ташқари, Теҳрон ўзидаги 20 фоизгача тўйинтирилган уран заҳираларини экспорт қилиш мажбуриятини зиммасига олган. Бу мажбуриятлар бажарилиши эвазига жаҳон ҳамжамияти Эронга нисбатан жорий этилган иқтисодий санкцияларнинг қарийб барчаси бекор қилишга ваъда берган. Эрон ўз ядровий дастури ҳеч қачон ядро қуроли ишлаб чиқаришга қаратилмаганини иддао қилиб келади.

Москвада ИДга молиявий кўмак берганликда айбланаётган толиба судланмоқда

Москва округ ҳарбий судида кеча “Исломий давлат” террор гуруҳига кўмак берганликда айбланаётган 24 ёшли толиба Саида Холиқова иши бўйича маҳкама жараёни бошланди.

Тергов иддаосига кўра, Астрахан тиббиёт академияси толибаси ИДга 43 минг рубль ўтказган. Холиқованинг адвокатлари қиз совун сотиб, ишлаб топган пули қаерга кетаётганини билмаган ва у пулни Дарья Ицанкова деган танишидан олган ҳисоб рақамига юборган, холос. Адвокат Собир Агаевга кўра, терговчи қисқа муддатли қамоқ жазоси бериш эвазига ўз айбини бўйнига олишга кўндирган.

Саида Холиқованинг онаси Россия президенти Владимир Путинга қизига нисбатан адолат қилинишини сўраб, хат орқали мурожаат қилган. Хатда у қизини қилмаган иши ҳақидаги эътирофномани имзолашга мажбур қилишганини ёзган.

Украинада россияпараст айирмачилар билан жангда ҳукуматнинг бир аскари ҳалок бўлди

Украина ҳарбийларининг 27 декабрь куни маълум қилишича, россияпараст айирмачилар билан отишма оқибатида бир аскар ва бир ёши катта аёл ҳалок бўлган. Байрам кунларига икки томон ўртасида сулҳ эълон қилинганига қарамасдан, ўзаро отишмалар тўхтагани йўқ.

Айни пайтда, Европада Хавфсизлик ва Ҳамкорлик ташкилоти ўз кузатувчилари Мариуполь шаҳрида ўққа тутилганини айтмоқда.

Украина Мудофаа вазирлиги матубот вакили Олександр Мотузяник тарқатган баёнотга кўра, айирмачилар якшанба куни Донецкдан 55 километр шимолроқдаги Зайцево қишлоғи яқинида ҳукумат кучларига ҳужум қилган.

“Сўнгги 24 соат ичида бир украин аскари ҳалок бўлиб, яна уч нафари яраланди”, дея билдирди Мотузяник.

Икки томон бир-бирини Янги йил ва Рождество байрамлари кунлари ўзаро ўт очишни тўхтатиш бўйича 23 декабрь куни имзоланган сулҳни бузганликда айбламоқда.

Руҳоний мусулмонларни Ислом дини обрўйини тўғрилашга чақирди

Эрон Президенти Ҳасан Руҳоний

Эрон Президенти Ҳасан Руҳоний мусулмонлар “Исломий давлат” каби гуруҳларнинг ҳаракатлари оқибатида Ислом дини обрўйига етказилган зиённи баратараф этишлари лозим, дея баён қилди.

27 декабрь куни Теҳронда исломий конференцияда гапирган Руҳоний “Исломнинг жаҳон жамоатчилиги олдидаги обрўйини тўғрилаш энг буюк вазифамиздир”, дея таъкдлади.

“Душманларнинг ўрнига Ислом дунёсининг ичидан кичик гуруҳ чиқиб, Ислом тилида уни қотиллик, зўравонлик, тамагирлик ва адолатсизлик дини этиб тақдим этишини тасаввур қилганмизми?” дея таъкидлади Руҳоний.

Давлат телевидениесида кўрсатилган нутқи давомида Руҳоний Сурия, Ироқ ва Ямандаги “ўлимлар ва хунрезлик борасида сукут сақлаётган” мусулмон давлатларини танқид қилди.

Рамадида "Исломий давлат" мағлубиятга учради

Рамади шаҳри марказида ўтказилган жанглар.

Ироқ расмийлари ҳукумат кучлари Рамади шаҳридаги ҳукумат бинолари комплекси устидан назоратни қўлга киритганини маълум қилди.

Ироқ ҳукумат кучлари расмийси Сабоҳ ал Нўмонийнинг билдиришича, “Ҳукумат бинолари комплексининг қўлга киритилиши "Исломий давлат" гуруҳининг Рамадидаги мағлубиятини англатади”.

Хабарда айтилишича, Рамади маркази тўла ҳукумат кучлари томонидан назорат қилинмоқда ва бу ерда жанггарилар йўқ қилинган.

Ироқ қуролли кучлари 22 декабрь куни Рамади мараказидаги ИШИД назоратида қолаётган сўнгги ҳудудига ҳужум бошлаганди. Бағдоддан 100 километр ғарброқда жойлашган асосан суннийлар истиқомат қиладиган Рамади шу йилнинг май ойида “Исломий давлат” томонидан ишғол этилган эди.

Рамади Ироқда Тикритдан сўнг “Исломий давлат”дан тортиб олинган иккинчи йирик шаҳар бўлди.

АҚШда торнадодан ҳалок бўлганлар сони 22 кишига етди

АҚШдаги торнадо.

АҚШнинг Техас ва бошқа штатларидаги торнадо оқибатида ҳалок бўлганлар сони 22 кишига етди.

Мамлакатнинг жанубий қисмида 26 декабрда юз берган торнадо ва довуллардан сўнг Даллас атрофида ўнлаб уйлар вайрон бўлган.

Аввалроқ Миссисипи, Теннесси, Арканзас ва Алабама штатида 18 киши ҳалок бўлгани хабар қилинганди. Торнадо пайтида 60дан ортиқ одам қаттиқ жароҳатланган.

Эй-би-си телекомпанияси мазкур беш штатда мингдан ортиқ уй жиддий зарар кўрганини билдирди. Алабама штатида эса сув тошқини оқибатида икки юздан ортиқ йўл ёпиб қўйилган.

Россия тинч аҳолини бомбардимон қилганини рад этди

Суриядаги Россия ҳарбий самолётлари.

Россия Сурияда тинч аҳолини бомбардимон қилаётгани тўғрисдаги хабарларни рад этди.

Якшанба куни Россия ҳарбий коинот қўшинлари бош қўмондони Виктор Бондарев рус ҳарбийлари Суриядаги амалиётлар чоғида бирон марта ҳам янглишмагани, зарба бериш тақиқланган объектлар, яъни мактаб, касалхона ва масжидларга бомба ташламагани тўғрисида баёнот берди.

Аввалроқ Amnesty International халқаро ташкилоти сентябрь-ноябрь ойларида Россия ҳарбийларининг Суриядаги амалиёти оқибатида тинч аҳоли вакилларидан камида 200 киши ҳалок бўлгани, ўлдирилган жангарилар сони эса бир неча ўн кишини ташкил қилишини билдирган эди. Human Rights Watch халқаро ташкилоти ҳам Россияни мактаб, касалхона ва масжидларни бомбардимон қилаётганликда айблаган.

Россия Мудофаа вазирлиги халқаро ташкилотларнинг бу каби ҳисоботларини “ёлғон маълумот” сифатида баҳоламоқда. Россия президенти матбуот котиби Дмитрий Песков ҳам Суриядаги амалиёт халқаро ҳуқуқ меъёрларига қатъий амал қилган ҳолда ўтказилаётгани ҳақида баёнот берди.

Россия сентябрь ойидан Сурияда жанггариларга қарши ҳаво зарбаларини бера бошлаган эди.

Жо Биден Тинч океанни 209 кунда сузиб ўтди

Тинч океанда сузаётган кема.

Британиялик Жон Биден Тинч океанни қайиқда эшкак эшиб ёлғиз сузиб ўтган биринчи одам бўлди.

27 декабрь куни у Австралия қирғоқларига келди. 53 ёшли Биден кунига дам олишсиз 15 соатдан эшкак эшиб, 209 кун мобайнида 7400 денгиз мили масофасини сузиб ўтди.

2011 йилда саёҳатчи Атлантика океанини сузиб ўтган эди. Ўшанда Биден 2600 денгиз милини 53 кун мобайнида сузиб ўтган. Унга кўра, Тинч океанда сузиш Атилантика океанига қараганда анча машаққатли бўлган.

Толибон ИДга қарши курашишда Россия билан алоқа ўрнатмаганини билдирди

Афғонистондаги Толибон ҳаракати "Исломий давлат" гуруҳига қарши курашиш масаласида Россия билан музокаралар олиб бормаётганини билдирди.

Ҳаракат веб саҳифасига қўйилган баёнотда толибларда "Исломий давлат"га қарши курашишда кимдандир ёрдам олишга эҳтиёжи йўқлиги ва улар бу масалада ҳеч ким билан музокара олиб бормаётгани таъкидланган.

Аввалроқ Россия Ташқи ишлар вазирлиги Афғонистондаги "Исломий давлат" гуруҳига қарши курашда Толибон манфаатлари Россия манфаатлари билан уйғун келаётганини маълум қилганди.

Бу ҳақда Россиянинг Афғонистондаги махсус вакили Замир Кабулов Интерфакс агентлиги билан суҳбатда айтганди.

У ахборот алмашиш юзасидан Толибон билан алоқа ўрнатилганини билдирган эди.

Хитойда терроризмга қарши зиддиятли қонун қабул қилинди

Хитой парламенти технология ширкатларидан муҳим маълумотларни ҳукуматга беришни талаб қиладиган ва мамлакат армиясига хорижий мамлакатларда террорга қарши амалиётлар ўтказишга изн берадиган терроризмга қарши янги қонунни қабул қилди.

27 декабрда тасдиқланган янги қонун шунингдек матбуотнинг террор ҳужумлари тафсилотини ёритиш ҳуқуқини чеклайди.

1 январдан кучга кирадиган қонун ғарб давлатлари томонидан танқид қилинмоқда.

Ғарб расмийларига кўра, янги қонун инсон ҳуқуқлари ва сўз эркинлигини чеклайди ҳамда ҳукумат танқидчилари овозини бўғишни осонлаштиради.

Аммо Хитой расмийларига кўра, жангарилар ва айирмачилар хавфи кучайиб бораётган бир пайтда бундай қонуннинг қабул қилиниши айни муддаодир.

Давомини ўқинг

XS
SM
MD
LG