Линклар

Шошилинч хабар
16 сентябр 2019, Тошкент вақти: 19:38

Халқаро янгиликлар

Европа кенгаши президенти Марказий Осиёга ташрифини бошлади

Европа кенгаши президенти Дональд Туск Марказий Осиёга тўрт кунлик хизмат сафарини Тожикистондан бошлади.

29 май куни Тускни Тожикистон ташқи ишлар вазири Сирожиддин Муҳриддин Душанбе аэропортида кутиб олди.

Туск 30 майда президент Эмомали Раҳмон билан музокаралар ўтказганидан сўнг, Нурсултонга жўнаб кетади.

31 май куни Қозоғистон муваққат президенти Қосимжўмарт Тўқаев ва Қозоғистон биринчи президенти Нурсултон Назарбоев билан учрашади.

31 май куни Туск Ўзбекистонга келади ва президент Шавкат Мирзиёев қабулида бўлади.

Европа кенгашининг маълум қилишича, учрашувларда Европа Иттифоқининг Марказий Осиёга нисбатан янги стратегиясига доир масалалар, минтақавий ва икки томонлама ҳамкорлик, иқлим ўзгариши, атроф-муҳитни муҳофаза қилиш, чегараларни бошқариш ҳамда хавфсизлик муаммолари муҳокама қилинади.

Тускнинг ташрифидан икки ҳафта олдин Европа Иттифоқи Марказий Осиё бўйича янги стратегиясини эълон қилган эди.

АҚШ ва Россия дипломатлари Сурияни халқаро ҳамжамиятга қайтариш масаласини муҳокама қилди

Юқори лавозимли АҚШ ва Россия дипломатлари Сурияни халқаро ҳамжамиятга қайта қўшиб олтиш масаласини кўриб чиқмоқда. Бунинг учун Сурия мамлакатдаги фуқаролар урушини тугатиш йўлида қатор чораларни кўриши керак бўлади.

29 май куни ёпиқ эшиклар ортидан ўтказилган БМТ Хавфсизлик кенгаши йиғини ортидан АҚШ ҳукуматининг Сурия масалалари бўйича маслаҳатчиси Жим Жеффри Москва ва Вашингтон саккиз йилдан бери тинчимаётган урушни қадам-бақадам тугатишни муҳокама қилганини таъкидлади.

Жеффри аввалроқ Сочи шаҳрида ўтказилган музокараларда АҚШ давлат котиби Майк Помпео Сурия ҳукумати БМТнинг 2254-сонли резолюциясига амал қилса, уни халқаро ҳамжамиятга қайтариш масаласини муҳокама қилганини айтди.

Россия ва Эрон 2011 йилдан бери амалдаги президенти Башар ал-Ассадни қўллаб келади. АҚШ ва Туркия эса бошқа-бошқа исёнчи гуруҳларни дастаклаб келади. БМТ 2012 йилнинг июнида қабул қилган 2254-сонли резолюция Сурия ҳукуматини тинчлик музокараларини олиб боришга, янги конституция ишлаб чиқишга ҳамда БМТ назорати остида сайловлар ўтказишга чорлайди.

Олмаотада Виктор Цой ёдгорлигига ҳукуматдан норозилар постер илиб кетди

Олмаотада номаълум шахслар муддатидан олдин ўтказилаётган сайловлар арафасида совет давридаги рок юлдуз Виктор Цой ёдгорлигига норозилик изҳор қилинган плакатни илиб кетди.

Русча “Ўзгаришлар” ҳамда қозоқ тилида “Қозоқ баҳори” деб ёзилган плакат ҳайкалнинг ўнг қўлига илиб кетилди.

Плакатни ким қолдиргани ҳозирча номаълум.

rukh2k19 мухолифатчи гуруҳи Istagram тармоғида плакат видеосини “30 йилдан бери ўзгаришларни кутиб келамиз. Уларни ўзимиз амалга оширадиган вақт келди”, деган ёзув билан ёйинлади.

Цой ва у етакчилик қилган “Кино” гуруҳи Совет Иттифоқида 1980 йилларда катта шуҳрат қозонган. Уларнинг “Перемен” ашуласи совет ёшлари орасида эркинлик ва сиёсий ўзгаришларга бўлган умид рамзига айланган.

Ҳафта давомида Қозоғистоннинг бошқа шаҳарларида ҳам ҳукуматни танқид қилувчи постерлар илинди. Расмийлар бир неча шахсни постерларни ёйинлашда гумонлаб қўлга олган. Уларга оммавий тадбирлар бўйича қонунларни бузиш айблови қўйилди.

Европа Чемпионлар лигасининг Бакуда ўтган финалида "Челси" "Арсенал"ни ютди

Европа футбол лигасининг Озарбайжон пойтахти Бакуда ўтган финалида “Челси” “Арсенал”ни 4:1 ҳисобида мағлуб этди.

29 май куни финал беллашуви ўтган стадионда бўш ўринлар жуда кўп бўлди. 70 минг киши сиғадиган стадионга фақат 6 мингта билет сотилди.

УЕФА финал учрашувини ўтказиш учун Европадан 4 минг километр олисдаги Бакуни танлагани футбол ишқибозлари ўртасида баҳсларга сабаб бўлмоқда. Масофанинг узоқлиги сабабли “Челси” ва “Арсенал” ишқибозларининг кўпчилиги Бакуга кела олмади.

Бундан ташқари “Арсенал” юлдузи бўлган арманистонлик Генрих Мхитарян Озарбайжон ва Арманистон ўртасида узоқ йиллардан бери Тоғли Қорабоғ масаласида зиддиятлар мавжудлиги муносабати билан Бакуга боришдан бош тортди.

Чемпионлар лигасининг навбатдаги ўйини “Ливерпуль” ва “Тоттенхем” ўртасида 1 июнь куни Мадридда бўлиб ўтади.

Будапештда кема ағдарилиши оқибатида камида 7 одам ҳалок бўлди

Дунай дарёси.

Венгрия пойтахти Будапештда 29 май куни кечқурун Дунай дарёсида сайёҳлик кемаси ағдарилиши оқибатида камида 7 одам ҳалок бўлди, 20 одам бедарак йўқолди.

Расмий хабарларга кўра, кема кучли жала ёғаётган пайтда ағдарилган. Кемада таҳминан 34 йўловчи бўлган.

Қутқарувчилар 7 одамни сувдан олиб чиқишга улгурган. Уларнинг барчаси касалхонага ётқизилгани, айни пайтда уларнинг аҳволи яхши экани айтилмоқда.

Кемада қанча одам бўлгани аниқ эмас. Полиция кемада Жанубий Кореядан келган 33 нафар сайёҳ бўлганини, кема эгаси эса 32 сайёҳ ва экипажнинг икки аъзоси бўлганини айтмоқда.

Эрдўғон Трамп билан гаплашганидан сўнг террорчи сифатида қамалган олим озод этилди

Турк-Америка олими Серкан Гўлже.

Туркия президенти Режаб Тоййип Эрдўғон ва АҚШ президенти Дональд Трамп 29 май куни ўтказган телефон мулоқоти ортидан олим Серкан Гўлже турк қамоқхонасидан озод қилинди.

Турк-Америка олими Серкан Гўлже АҚШ Коинот агентлиги - НАСАнинг “Марс” дастури устида ишлаган. У террорчиликда айбланиб, уч йил қамоқхонада ёлғиз сақланган. 40 ёшли олимнинг озод этилиши юзасидан расмий тушунтириш берилмади.

Вашингтон Анқарани Гўлже ва бошқа қатор маҳбусларни озод этишга чақириб келаётган эди.

Гўлже 2016 йилда Туркияга оиласи билан дам олишга келган. У оиласи билан бирга яшаётган АҚШнинг Техас штатидаги Хьюстон шаҳрига қайтишига бир кун қолганида Фатҳулла Гуланга алоқадорликда айбланиб қўлга олинган эди.

2018 йилда Гўлже 7,5 йилга қамалган. Аппеляция суди бу муддатни 5 йилга туширган эди.

Эрдўғон ҳукумати Гуланни 2016 йили муваффақиятсизликка учраган давлат тўнтариши ташкилотчиси деб билади.

1999 йилдан бери АҚШда муҳожиратда яшаëтган Гулан ўзи ва тарафдорларига қўйилаëтган айбларни инкор қилиб келмоқда.

Бу воқеадан бери Туркияда 77 минг одам устидан жиноий иш очилди¸ 150 минг одам ўз ишидан ҳайдалди.

Назарбоев Евросиё иқтисодий иттифоқининг фахрий президенти бўлди

Назарбоев Путин ва Лукашенка билан.

Қозоғистоннинг Биринчи президенти Нурсултон Назарбоев Евросиё иқтисодий иттифоқининг фахрий раиси бўлди. Бу ҳақда 29 май куни Твиттер саҳифасида Назарбоевнинг матбуот котиби Айдос Укибай маълум қилди.

Қозоғистоннинг муваққат президенти Қосимжўмарт Тўқаевга кўра, Назарбоевни бу лавозимга Россия президенти Владимир Путин таклиф қилган. Бунга қадар ташкилотда фахрий раис лавозими мавжуд эмас эди.

Евросиё иқтисодий иттифоқига аъзо давлат раҳбарлари ташкилот фахрий раиси лавозимини жорий этишни режалаштираётганлари тўғрисида апрель ойида "Коммерсантъ" газетаси хабар берганди.

Нашрнинг билдиришича, бу лавозимни таъсис этиш ғояси Назарбоев 19 март куни президентликдан истеъфо бергани ва Евросиё иқтисодий иттифоқини ташкил этиш ғоясини биринчи бўлиб Назарбоев 1994 йилда таклиф қилгани ортидан пайдо бўлган.

АҚШ, Саудия ва БАА Эронга нисбатан босимни кучайтирмоқчи

Жон Болтон.

АҚШ ва унинг Форс кўрфазидаги асосий иттифоқчилари Саудия Арабистони ҳамда Бирлашган Араб Амирликлари Эронга нисбатан босимни кучайтиришга келишиб олди.

Уч давлат Эрондан ҳар қандай ҳужумларни тўхтатишни ва минтақавий ҳамкорлик баҳонасида террорчи гуруҳларни қўллашни тўхтатишни талаб қилди.

29 май куни Абу-Дабига борган АҚШ президентининг миллий хавфсизлик бўйича маслаҳатчиси Жон Болтон Теҳрон минтақада АҚШ ва унинг иттифоқчилари манфаатларига таҳдид қиладиган бўлса “жуда кучли муносиб жавоб олиши”дан огоҳлантирди.

Айни пайтда Эрон президенти Ҳасан Руҳоний 29 май куни ҳукумат йиғилишида АҚШни босимларни тўхтатишга чақирди:

-АҚШ бизга нисбатан шафқатсиз муносабатини, шафқатсиз санкцияларини тўхтатиб, ўз мажбуриятларини бажаришга киришган дақиқадан бошлаб улар ўзлари тарк этган музокаралар столига қайтиши мумкин. Улар учун йўл берк эмас, йўлимиз очиқ, - деди Руҳоний.

АҚШ президентининг миллий хавфсизлик бўйича маслаҳатчиси Жон Болтон 28 майда “минтақавий хавфсизликнинг кечиктириб бўлмас масалаларини муҳокама қилиш мақсадида” Бирлашган Араб Амирликларига келганини маълум қилган эди.

Болтон Бирлашган Араб Амирликларига АҚШнинг Эрон билан муносабатлари ўта кескинлашган бир пайтда ташриф буюрди. АҚШ минтақада Эроннинг асосий рақиблари бўлган давлатларнинг яқин иттифоқчиси саналади.

Михаил Саакашвили Украинага қайтди

Киевда Саакашвилини кутиб олиш маросими.

Грузиянинг собиқ президенти, Одесса вилоятининг собиқ губернатори Михаил Саакашвили 29 май куни хориждан Украинага қайтди.

-Мен ўзим севган ва меҳр қўйган мамлакатга қайтдим. Мен кимдандир ўч олиш, кимнидир жазолаш ёки йўқ қилиш учун қайтмадим. Мен вайрон этиш учун эмас, балки энг яхши биладиган ишим- бунёд этиш учун қайтдим, - деди Саакашвили журналистларга Киев аэропортида.

Украина президенти Володимир Зеленский 28 май куни Михаил Саакашвилининг Украина ватандошлигини қайта тиклаган эди.

Саакашвилини 2015 йили Одесса губернатори лавозимига тайинлаган аввалги президент Петро Порошенко унга Украина ватандошлигини берган эди.

2017 йил июлида Саакашвили Янги кучлар ҳаракати деб номланган мухолифат гуруҳи тузиши ортидан Порошенко уни Украина ватандошлигидан маҳрум қилган эди. Шундан сўнг кучишлатар тузилмалар Саакашвилини Украинадан бадарға қилганди.

Путинни мазах қилган рус блогери расмийларни ҳақорат қилишда айбланди

Смоленск шаҳрида яшовчи блогер Сергей Командиров Интернетда Путин сурати остида “Ҳар бир фуқаро биринчи ўриндаги ***** ким эканлигини билади”, деб ёзилган мемни бўлишган.

Россия президенти Владимир Путинни мазах қилувчи мемни Интернетда бўлишган рус блогерига мунозарали “расмийларга ҳурматсизлик” бўйича янги қонун асосида расмий айблов қўйилди.

Смоленск шаҳрида яшовчи блогер Сергей Командиров Интернетда Путин сурати остида “Ҳар бир фуқаро биринчи ўриндаги ***** ким эканлигини билади”, деб ёзилган мемни бўлишган.

Командиров янги қонун 29 март куни кучга кирганидан кейин икки кун ўтиб, Новгород шаҳрида Юрий Картижевга айблов қўйилиши ортидан юқорида тилга олинган мемни бўлишган.

Янги қонунда расмийларни ёки давлат рамзларини ҳақорат қилганларни 15 кунгача қамаш ҳамда 100 минг рублгача жаримага тортиш белгиланган. Қонунни такрор бузганларга эса 200 минг рубль жарима солиниши мумкин.

27 май куни мухолифатчи сиёсатчи Алексей Навалнийнинг ёрдамчиларидан бири Леонид Волков Twitterда Картижевга чиқарилган ҳукмни қоралагани учун расмийларга ҳурматсизлик кўрсатишда айбланди.

HRW: Қирғизистонда хотин-қизларга зўравонликка қарши етарлича курашаямаяпти

Ўтган йилнинг 27 майида Марс Бўдўшев Бурулай Турдиали қизини олиб қочган ва пичоқлаб ўлдирган эди.

Human Rights Watch (HRW) ташкилоти Қирғизистон ҳукуматини хотин-қизларга зўравонликка қарши чораларни кучайтиришга чақирди.

Ташкилот 28 май куни эълон қилган баёнотда зўравонларни жазолаш қонунларига амал қилиш тўлиқ таъминланмаётгани учун мамлакат аҳолисининг ярми хавф остида яшаётган айтилади.

Ўтган йилнинг 27 майида Чуй вилоятининг Жайил туманида Марс Бўдўшев Бурулай Турдиали қизини ўзига турмушга чиқишга мажбурлаш мақсадида олиб қочган, сўнгра милиция томонидан қўлга олиниб, Жайил туман Ички ишлар бўлимига олиб борилган ва ўша ерда Бурулайни пичоқлаб ўлдирган эди.

“Қотилликдан бир йил ўтиб, ҳукумат аёллар ва қизлар ҳаётини сақлаб қолиш учун барча чораларни кўрмаётгани ачинарли ҳолатдир. Қонунларни қабул қилиш илк қадам ўлароқ яхши, аммо бу ҳақиқий ҳимояни таъминлаш учун умуман етарли эмас”, - дейилади ташкилот ҳисоботида.

АҚШ вакили Россиянинг Украина шарқидаги фаолиятини “оккупация” деб атади

АҚШнинг Украина бўйича махсус вакили Курт Волкер

АҚШнинг Украина бўйича махсус вакили Курт Волкер Россиянинг Украина шарқидаги фаолиятини “оккупация” деб атади ва Москвани Минск битимлари доирасида ўз бўйнига олган мажбуриятларига амал қилишга чақирди.

- Россия Минск битимларини амалга ошириш учун жуда кўп иш қилиши керак, - деди махсус вакил.

- Украинанинг ҳам ўз мажбуриятлари бор, - дея қўшимча қилди Волкер 28 май куни журналистларга.

Волкер Володимир Зеленский президент этиб сайланиши ортидан АҚШ Россия билан музокараларни қайта кўриб чиқиши кераклигини айтди.

- Йил бошида Россия билан мулоқот қилганимизда руслар президент сайлови давомида самарали музокаралар олиб бориш учун имкон йўқ, деб айтишган эди, - деди Волкер.

АҚШнинг Украина бўйича махсус вакили июль ойига белгиланган парламент сайловларига тўхталиб ўтар экан, Россия билан музокараларда бирор натижага эришиш имкони бор-йўқлиги ҳозирча қоронғи эканлигини таъкидлади.

Қозоғистон автоаварияда яраланган 9 фуқаросини Италиядан олиб келиш учун самолёт жўнатади

Сиена – Флоренция магистралида кетаётган икки қаватли туристик автобус йўлдан четга чиқиб, жарлика тушиб кетган. 2019, 22 май.

Қозоғистон соғлиқни вазирлиги Италияда юз берган ЙТҲда жабрланган икки қозоғистонликни ватанга олиб келиш учун санавиациянинг махсус самолётини тайёрлаб қўйди. Бу ҳақда Соғлиқни сақлаш вазирлиги матбуот хизматига таянган ҳолда маҳаллий нашрлар маълум қилди.

«Соғлиқни сақлаш вазирлиги мижозларни транспортировка қилишга тайёрлигини билдиради. Санавиациянинг махсус самолёти ҳозирлаб қўйилди, авиапарвоз юқори малакали тиббиёт ходимлари кузатувида амалга оширилади», - дейилади хабарда.

Тўққиз нафар қозоғистонлик жароҳат олган ЙТҲ 22 май куни эрталаб Италиянинг Тоскана вилоятида юз берди. Италия ОАВнинг маълум қилишича, Сиена – Флоренция магистралида кетаётган икки қаватли туристик автобус йўлдан четга чиқиб, жарликка тушиб кетган. Ҳодиса оқибатида Россия фуқароси бўлмиш аёл вафот этган.

Назарбоев Россия, Беларусь ва Қирғизистон президентларини Назарбоев ордени билан тақдирлади

Нурсултон Назарбоев қирғиз президенти Сўўрўнбай Жээнбековга орден топширмоқда.

Қозоғистон муваққат президенти Қосимжўмарт Тўқаев 28 май куни Қирғизистон президенти Сўўрўнбай Жээнбеков, Россия президенти Владимир Путин ва Беларусь президенти Александр Лукашенкага Нурсултон Назарбоев орденини топшириш тўғрисидаги фармонни имзолади.

Фармонда айтилишича, президентлар “Евросиё иқтисодий интеграцияси ғоясининг 25 йиллиги, Евросиё иқтисодий иттифоқи ташкил этилганининг 5 йиллиги муносабати билан ҳамда Қозоғистон билан муносабатларни ривожлантиришга қўшган ҳиссалари учун” тақдирланди.

Назарбоев орденини Қозоғистоннинг собиқ президенти Нурсултон Назарбоев шахсан ўзи топширди.

Россия, Беларусь ва Қирғизистон президентлари Нурсултонга 28-29 май кунлари ўтадиган Евросиё иқтисодий иттифоқи Олий кенгаши йиғилишида иштирок этиш учун борган эди.

19 мартда мамлакатни қарийб 30 йил бошқарган президент Нурсултон Назарбоев истеъфо бергани ортидан 20 март куни Қосимжўмарт Тўқаев Қозоғистон муваққат президенти сифатида қасамёдга келтирилган.

79 яшар Назарбоев президентликдан истеъфо берганига қарамай, Қозоғистон Хавфсизлик Кенгаши ва иқтидордаги "Нур-Отан" партияси раиси бўлиб қолмоқда.

Бишкекнинг "Манас" аэропортида фуқаролиги йўқ шахс беш ойдан бери ташқарига чиқарилмаяпти

"Манас" аэропорти.

Қирғизистон пойтахтидаги “Манас” халқаро аэропортининг бетараф ҳудудида Арлен Хадаа исмли шахс беш ойдан бери ташқарига чиқа олмаяпти. Бу ҳақда Қирғизистон Чегара хизмати 28 май куни маълум қилди.

Расмий маълумотда айтилишича, Арлен Хадаанинг хотини ва икки ўғли Норвегияда яшайди. У 2016 йилда Қирғизистонга депортация қилинган.

Хадаа Қирғизистонда вақтинча яшаб, бу ерда керакли ҳужжатларни расмийлаштирганидан сўнг Норвегияга учган. Бироқ Москва аэропортида у Россия Миграция хизмати томонидан қўлга олиниб, жорий йилинг 19 январида қайта Қирғизистонга депортация қилинган.

Чегара хизмати Хадаанинг ҳужжатларида камчиликлар борлиги учун у Қирғизистон ҳудудига киритилмаётганини билдирди.

Расмий маълумотда айтилишича, Хадаанинг отаси Монголия фуқароси. Онаси Ўзбекистон ССР паспортига эга бўлган этник қирғиздир. Хадаа Қирғизистонда туғилиб, ўсганига қарамай туғилганлиги тўғрисида гувохнома ва паспортга эга эмас.

Элчи Хитойда мусулмонлар таъқиб этилаётганини рад этди

Хитойнинг Қозоғистондаги элчиси Чжан Сяо Нурсултон Назарбоев билан учрашув пайтида.

Хитойнинг Қозоғистондаги элчиси Чжан Сяо Шинжон-Уйғур мухториятида мусулмонлар, жумладан, қозоқларга нисбатан босимлар бўлаётгани тўғрисидаги хабарларни ёлғон ва тухмат сифатида баҳолади.

28 май куни Нурсултонда Хитой-Қозоқ муносабатларига бағишланган тадбирда қатнашган элчи журналистларга: “Бу маълумотлар ёлғон. Бу гапларни қаердан олдингиз? Шинжонда вазият барқарор. У ерда қўлланилаётган чоралар террорчилик ва экстремистликка қарши кураш доирасидаги ҳаракатлардир”, деб айтди.

Бундан бир кун олдин Олматида Хитойдан Қозоғистонга кўчиб келган бир неча қозоқ матбуот анжумани ўтказиб, Шинжон-Уйғур мухториятида “қайта тарбиялаш” лагеридан озод этилган қариндошларига Қозоғистонга кўчиб келишга рухсат берилмаётгани ҳақида гапирган эдилар.

Шинжон-Уйғур мухтор районида 13 миллион уйғур ва бошқа миллат вакиллари яшайди. Хитой расмийлари 1 миллионга яқин мусулмонни “қайта тарбиялаш лагерларига” жойлаштиргани учун БМТ, АҚШ, Европа Иттифоқи ҳамда халқаро ташкилотлар томонидан кескин танқид қилиниб келинади.

Бироқ Хитой ҳукумати мусулмонларга қарши таъқиблар бўлмаётганини, балки барча чора-тадбирлар террорчилик ва экстремистликка қарши кураш доирасида олиб борилаётганини иддао қилмоқда.

Кремль лойиҳаси бўлган Sputnik нашрининг бош муҳаррири Литвадан депортация қилинди

Sputnik вебсайти.

Кремлнинг лойиҳаси экани айтиладиган Sputnik нашрининг Литвадаги шўъбаси бош муҳаррири Марат Касем мамлакатга киритилмади.

28 май куни билдирилишича, Литва пойтахти Вильнюсга навбатдаги сафардан қайтган Марат Касем аэропортдан ташқарига чиқарилмаган ва ўша куниёқ Латвияга депортация қилинган.

Бу ҳақда хабар берган Sputnik нашри Марат Касем Латвия фуқароси эканини ҳам билдирди. Хабарда айтилишича, Марат Касемга Литвага кириш 5 йилга тақиқланди.

Литва чегара хизмати расмий сайтида маълум қилинишича, Марат Касем “Литва миллий хавфсизлигига таҳдид” сифатида кўрилади.

Марат Касем Латвия пойтахти Ригага қайтганидан сўнг тарқатган видеосида Вильнюс аэропортида 6 соат ушлаб турилгани ва сўроқ қилинганини айтди. Унга кўра, сўроқ пайтида унга Россия махсус хизматлари билан қандай алоқада экани тўғрисидаги саволлар берилган.

АҚШ президентининг миллий хавфсизлик бўйича маслаҳатчиси БААга борди

АҚШ президентининг миллий хавфсизлик бўйича маслаҳатчиси Жон Болтон.

АҚШ президентининг миллий хавфсизлик бўйича маслаҳатчиси Жон Болтон “минтақавий хавфсизлик масласини муҳокама қилиш мақсадида” Бирлашган Араб Амирликларига келганини маълум қилди.

Жон Болтон 28 май куни Твиттер саҳифасида бу ҳақда ёзар экан: “Эртага минтақавий хавфсизликнинг муҳим ва кечиктириб бўлмас масалаларини муҳокама қилиш учун Амирликлардаги иттифоқчиларимиз билан учрашишни интиқлик билан кутаяпман”, деб билдирди.

Болтон Бирлашган Араб Амирликларига АҚШнинг Эрон билан муносабатлари ўта кескинлашган бир пайтда ташриф буюрди. АҚШ минтақада Эроннинг асосий рақиблари бўлган давлатларнинг яқин иттифоқчиси саналади.

Саудия Арабистони ва Бирлашган Араб Амирликлари май ойининг бошларида Теҳронни Форс кўрфазидаги нефть танкерларига ҳужум қилганликда айблаган эди.

Бундан ташқари Саудия Эронни Ямандаги хутий шиа исёнчиларига учувчисиз бошқариладиган учоқларни етказиб бераётганликда, шиа исёнчиларини эса бу учоқлардан фойдаланган ҳолда Саудия нефть конларига зарба бераётганликда айблаган эди. Бироқ Теҳрон бу айловларни рад этган.

НАТО АҚШ ортидан коинотга оид сиёсатини ишлаб чиқмоқда

НАТО Бош котиби Йенс Столтенберг.

НАТО ташкилотнинг коинотга оид сиёсат стартегиясини ишлаб чиқмоқда. Бу ҳақда НАТО Бош котиби Йенс Столтенберг 28 май куни Брюсселда ўтган матбуот анжуманида маълум қилди.

-Биз ҳозирда НАТОнинг яна бир лойиҳаси –коинот бўйича кенг қамровли сиёсат дастури устида ишламоқдамиз. Кейинги ойда НАТОга аъзо давлатларнинг мудофаа вазирлари бизнинг янги коинотга оид сиёсатимизни қабул қиладилар, деб умид қиламан,-деди Столтенберг.

Жорий йилнинг 17 январида НАТОнинг энг асосий молиячиси ва аъзоси бўлган АҚШ коинот кучларини яратиш йўналишида иш бошлагани хабар қилинган эди

АҚШ президенти Дональд Трамп коинот жанговар ҳаракатларнинг янги сфераси бўлишини ва келажакда коинот кучлари асосий ҳал қилувчи воситага айланишини айтган.

Ўшанда Трамп АҚШ жаҳонда тенги йўқ ракетадан мудофаа тизимини, жумладан, коинотда ҳам барпо қилиш учун янги технологияларни кашф этиш устида ишлайди, деб билдирган.

Саакашвили ўзига украин ватандошлиги қайтарилганини олқишлади

Грузиянинг собиқ президенти Михаил Саакашвили.

Грузиянинг собиқ президенти ва 2015-2016 йилларда Украинанинг Одесса вилоятига ҳоким бўлган Михаил Саакашвили янги президент Владимир Зеленский унга украин фуқаролигини қайтарганини олқишлади.

-Менимча, Зеленский бошқалар ўйлаётганидан кўра муваффақиятлироқ президент бўлади. Мен бунга ишонаман, - деди Саакашвили 28 май куни Озод Европа-Озодлик радиосига Польшадан туриб берган интервьюсида.

Саакашвили 22 май куни Зеленский маъмуриятига Украина ватандошлигини тиклаш илтимоси билан мурожаат қилган эди.

Саакашвилини 2015 йили Одесса губернатори лавозимига тайинлаган аввалги президент Петро Порошенко унга Украина ватандошлигини берган эди.

Порошенко ва унинг ҳукуматини коррупцияда айблаши ортидан Саакашвилининг Киев ҳокимияти билан муносабатлари бузилган ва 2016 йил ноябрида Порошенко уни губернаторликдан бўшатган эди.

2017 йил июлида Саакашвили Янги кучлар ҳаракати деб номланган мухолифат гуруҳи тузиши ортидан Порошенко уни Украина ватандошлигидан маҳрум қилди.

Зеленский Саакашвилининг Украина ватандошлигини қайта тиклади

Президент ролини ўйнаб танилган комик актëр Владимир Зеленский 20 май куни Украина президенти сифатида қасамëд қилди.

Украина президенти Владимир Зеленский Грузия собиқ президенти¸ Украинанинг Одесса минтақаси собиқ губернатори Михаил Саакашвилининг Украина ватандошлигини қайта тиклади.

Бу ҳақда Украина президенти матбуот хизмати маълум қилди.

Саакашвилининг бу сўрови 22 май куни унинг адвокати томонидан Зеленский маъмуриятига топширилган эди.

Саакашвилини 2015 йили Одесса губернатори лавозимига тайинлаган аввалги президент Петро Порошенко унга Украина ватандошлигини берган эди.

Грузия икки фуқароликни тан олмаслиги асосида Тбилиси ҳукумати Саакашвилини 2015 йил декабрида Грузия ватандошлигидан чиқарган эди.

Порошенко ва унинг ҳукуматини коррупцияда айблаши ортидан Саакашвилининг Киев ҳокимияти билан муносабатлари бузилган ва 2016 йил ноябрида Порошенко уни губернаторликдан бўшатган эди.

2017 йил июлида Саакашвили Янги кучлар ҳаракати деб номланган мухолифат гуруҳи тузиши ортидан Порошенко уни Украина ватандошлигидан маҳрум қилди.

Ватандошликни тиклаш сўровида Саакашвили Порошенко қарорининг ноқонуний ва ҳам Украина¸ ҳам халқаро қонунларга зид экани ва ўзини фуқаролиги йўқ шахсга айлантирганини таъкидлаган.

20 май кунги қасамëд нутқида президент Зеленский¸ ким Украина келажаги учун ишлашга тайëр бўлса¸ унга ватандошлик беришга ҳозирлигини билдирган эди.

Human Rights Watch асосчиси Роберт Бернштейн 97 ëшида вафот этди

Роберт Бернштейн

Халқаро майдонда инсон ҳақлари ҳимояси билан шуғулланиб келаëтган нуфузли Human Rights Watch ташкилоти асосчиси Роберт Бернштейн 97 ëшида оламдан ўтди. Бу ҳақда The New York Times Бернштейн ўғлига таяниб хабар берди.

1944 йили Ҳарвард университетини тамомлаган Бернштейн 2-жаҳон урушидан сўнг Simon & Schuster нашриëтида иш бошлаган. 1966 йилда у Random House нашриëтига асос солди ва уни дунëнинг энг йирик матбаа ширкатига айлантири.

Random House ўз замонида рус ва совет ëзувчилари асарларини нашр қилган саноқли Ғарб ширкатларидан бўлган. 1973 йили Бернштейн совет диссидент ëзувчиси Андрей Амальрикнинг «Совет иттифоқи 1984 йилгача сақланиб қоладими?" деган эссесини ҳимоя қилиш билан инсон ҳақлари ҳимояси билан шуғулланишни бошлади.

Америка ноширлари делегациясида СССРга келган
Бернштейн академик Андрей Сахаров ва рафиқаси Елено Боннер билан учрашган эди.

Дастлаб СССРнинг инсон ҳақларига риоя қилиш бўйича Ҳелсинки келишувини қай даражада бажараëтганини кузатиш учун Helsinki Watch ташкилоти тузган Бернштейн¸ кўп ўтмай уни бутун дунëдаги инсон ҳақлари вазиятини мониторинг қилувчи Human Rights Watchга айлантирди.

Сахаровлар оиласи билан яқин дўст бўлган ношир¸ 1975 йили совет олимига Нобель мукофоти топширилиши маросимида қатнашган эди.

Бернштейн Сахаров¸ шунингдек¸ Вацлав Ҳавел каби коммунистик блок диссидентлари китоб ва мақолаларининг Ғарбда чоп қилинишини таъминлаб келган.

Россия Мудофаа вазири Раҳмон билан ҳарбий ҳамкорликни кучайтириш ҳақида гаплашди

Россия Мудофаа вазири Сергей Шойгу тожик президенти Раҳмон билан.

Душанбега келган Россия Мудофаа вазири Сергей Шойгу 28 май куни Тожикистон президенти билан учрашди.

Ëпиқ эшиклар ортида ўтган бир соатлик суҳбатда¸ тожик президенти матбуот хизматига кўра¸ ”стратегик ҳамкорлик масаласи муҳокама қилинган.

Расмий Душанбе¸ Россия билан ҳарбий ҳамкорлик мамлакат ташқи сиëатининг устувор вазифаси эканини таъкидлаб келади.

Тожикистон Мудофаа вазири Шерали Мирзо билан учрашувда Шойгу тожик ҳарбийларининг Россияда ўтадиган Центр машғулотларида қатнашиши¸ шунингдек йил давомида Тожикистонда КХШТ ҳарбий машқлари ўтказилишини билдирди.

28 май куни Шойгу Душанбедаги Россия ҳарбий базасини ҳам бориб кўрди.

Тожикистон ҳудудидаги уч ҳарбий иншоотда Россиянинг 201-мотоўқчи дивизиясининг 7000 га яқин аскари жойлашган.

2012 йили Москва ва Душанбе Тожикистон ҳудудидаги Россия ҳарбий базасининг 2042 йилгача қолишига изн берувчи келишув имзолаган.

Бундан бир ҳафта олдин Душанбега борган Россия Федерал хавфсизлик хизмати раиси Александр Бортников¸ шимолий Афғонистон ҳудудида “Ислом давлати” террор гуруҳи жангариларининг тўпланаëтганини таъкидлаган эди.

Толиблар ва Лавров АҚШ қўшинларининг Афғонистондан чиқиб кетишини талаб қилди

Сергей Лавров Толибон вакиллари билан сўзлашувда.

28 май куни Москвада Афғонистонда тинчлик ўрнатишга қаратилган музокараларнинг навбатдаги босқичи ўтказилди. Сўзлашувларда афғон оқсоқоллари ва Россия томонидан террорчи ташкилот деб эълон қилинган Толибон гуруҳи вакиллари иштирок этди.

Толибларнинг 14 кишилик делегациясига мулла Бародар Охунд раҳбарлик қилди. Музокараларда¸ Толибон қаршилик кўрсатгани боис¸ Кобул ҳукумати расмийлари қатнашмади.

Музокараларда қатнашган Россия Ташқи ишлар вазири Сергей Лавров Афғонистондаги хориж қўшинларининг бутунлай чиқиб кетиши лозимлигини таъкидлади.

Толибон вакиллари ҳам айни талабни ўртага қўйди ва Қатарда АҚШ расмийлари билан ўтказиладиган сўзлашувларда Америка қўшинларини Афғонистондан олиб чиқиш муҳлати ҳақида сўз боришини маълум қилди.

Толибон делегацияси ўтган йил ноябри ва жорий йил февралида ҳам Москвага келган ва Кремль расмийлари билан музокара қилган эди

Косоводаги тартибсизлик пайтида Россия дипломати ушланди

28 май куни Косово полицияси этник сербларни ҳибсга олиши ортидан тартибсизлик ва дипломатик жанжал бошланиб кетди.

Россия томонидан расман тан олинмаган Косово республикаси полицияси БМТ миссиясида ишлаëтган россияликни қўлга олди.

Бу ҳақда баëнот берган Сербия президенти Александр Вучич “тегишли Россия идораларининг воқеадан хабардор қилингани”ни билдирди.

Бундан аввал Косово шимолидаги тартибсизликлар пайтида ўнлаб одамнинг ушлангани хабар қилинган эди.

28 май куни Косово полицияси 2011 йили полиция ходимини ўлдириш ва уюшган жиноий гуруҳга алоқадорликда гумонланаëтган 13 нафар этник сербни ҳибсга олиши ортидан тартибсизликлар бошланиб кетди.

Косово президенти рейд давомида “дипломатик мақомидан фойдаланиб¸ полиция амалиëтига тўсқинлик қилишга уринган россиялик”нинг қўлга олинганини билдирди.

Косово ҳукуматининг бу ҳаракатига тегишли жавоб қайтарилишини билдирган Сербия президенти мамлакат қуролли кучларини жанговор шайлик ҳолатига келтирди.

Бу воқеаларга муносабат билдирган Россия Ташқи ишлар вазирлиги¸ “Москва вазиятга Сербия манфаатлари ва қонунчилигидан келиб чиқиб ечим топилишини қўллаб-қувватлаши”ни билдирди.

Давомини ўқинг

XS
SM
MD
LG