Линклар

Шошилинч хабар
22 август 2019, Тошкент вақти: 23:19

Халқаро янгиликлар

Путин Молдованинг Россияга хайрихоҳ президентини қўллашда давом этади

Игорь Додон Владимир Путин билан.

Россия президенти Владимир Путин Мир телеканалига берган интевьюси давомида Молдованинг Россияга хайрихоҳ президенти Игор Додонни қўллашда давом этишини билдирди. Молдовада икки рақиб ҳукумат легитимлик иддао қилиб, ҳокимият талашмоқда.

8 июнь куни Додоннинг Социалистик партияси кутилмаганда Европа билан яқиндан алоқа ўрнатиш тарафдори бўлган ACUM блоги билан куч бириктирди. Парламентдаги 101 ўриннинг 61 тасини эгаллаган альянс ACUM етакчиси Майя Сандуни ҳокимият етакчиси этиб тайинлади.

9 июнь куни Молдованинг Конституциявий суди Санду ҳукуматини ноқонуний деб қарор чиқарди ҳамда Социалистик партиянинг собиқ етакчиси Додонни хизматидан четлаштирди.

Натижада ҳукмрон Демократик партия номзоди ва бош вазир Павел Филип муваққат президент вазифасини бажаришга киришди ва парламентни тарқатиб юборди.

Демократик партияга мунозаралари тадбиркор Владимир Плахотнюк етакчилик қилмоқда. Социалистлар ҳамда ACUM Конституциявий судни Плахотнюк буйруқларини бажаришда айблаб келади.

Британия ички ишлар вазири WikiLeaks асосчисини экстрадиция қилиш тўғрисидаги буйруқни имзолади

Жулиан Ассанж

Британия ички ишлар вазири Сажид Жавид (Sajid Javid) BBC билан суҳбатда WikiLeaks сайти асосчиси Жулиан Ассанжни АҚШга экстрадиция қилиш тўғрисидаги буйруқни имзолаганини маълум қилди. Жавид Ассанжни экстрадиция қилиш бўйича якуний қарорни 14 июнь куни Британия суди чиқаришини айтди.

АҚШ терговчилари Ассанжга 18 айблов қўйган бўлиб, улар орасида махфий ҳужжатларни тўплаш ва нашр қилиш ҳамда АҚШ ҳарбий хизматчиси Челси Мэннинг билан биргаликда АҚШ Мудофаа вазирлиги компьютери паролини бузиш айбловлари бор.

47 ёшга тўлган Ассанж 11 апрель куни Лондондаги Эквадор элчихонасидан чиқариб юборилди. Фаол 2012 йилда Эквадор унга сиёсий бошпана берганидан бери ўша ерда яшаб келаётган эди.

Уни Британия полицияси дарҳол қўлга олди ва ҳозир у суднинг гаров эвазига очиқда юриш шартини бузгани учун 50 ҳафталик қамоқ жазосини ўтамоқда.

Швецияда жинсий зўравонликда айбланган Ассанж 2010 йилда Лондонда ҳибсга олинган ва гаров эвазига қўйиб юборилганди.

Нур-Султон ва Олмаотадаги митинглар иштирокчиларидан мингга яқини жазоланди

Полиция Олмаота шаҳри марказида митингда қатнашган йигитни ушлаб олиб кетмоқда. 2019, 12 июнь

Олмаота ва Нур-Султондаги ноқонуний митингларда иштирок этгани учун суд 957 кишига маъмурий жазо тайинлади, шундан 670 нафари 6 кундан 15 кунгача қамалди, 115 киши жаримага тортилди.

Бу хақда пайшанба куни Қозоғистон республикаси Бош прокуратураси мулозими Сапарбек Нурпеисов маълум қилди.

Қозоғистонда рухсат берилмаган митинглар ва уларнинг иширокчиларини ушлашлар 9 июнда ўтказилган президент сайлови куни ва 10 июнь ҳамда 11 июнга ўтар кечаси— овоз бериш натижаларининг расман эълон қилинишга қарши ва аввал қўлга олинганларнинг озод қилиниши талаби билан ўтказилди. 12 июн куни Олмаотада аввал митинг бўлиб ўтган Остона майдони атрофида бугун эрталабдан кучайтирилган полиция ходимларининг иштироки кузатилди.

10 июнь куни сайлов ғолиби дея эълон қилинган ва 12 июнь куни президент сифатида қасамёд қабул қилган Тоқаев ҳибсга олишларни “зарурат” дея атаган эди. Қозоғистон ички ишлар вазирлиги норозилик намойишлари иштирокчиларини “иғвогарлар” ва “радикал кайфиятдаги элементлар” дея атади. Бош прокуратура “бу каби қонун бузилишларга қарши туришга” ваъда берди.

Бундан аввалроқ Ички ишлар вазирлиги 9 ва 10 июнь кунлари камида 700 киши ушланганини маълум қилди. Қозоғистон хуқуқ химоячилари бу рақамлапр камайтириб кўрсатилганини айтишмоқда, ҳамда полициянинг ҳатти ҳаракатлари юзасидан мустақил тергов ўтказилишини талаб қилмоқда, уларнинг баёнотига қараганда хуқуқ тартибот идораларининг ходимлари “юзага келган вазиятга нисбатан шафқатсизларча ҳаракат қилишган”.

АҚШ ҳарбий-денгиз флоти Уммон кўрфазида ҳужумга учраган икки кемага ёрдам кўрсатди

Уммон кўрфазида икки нефть танкери ҳужумга учрагани ҳақидаги хабар ортидан АҚШ Ҳарбий-денгиз кучлари кемаларга ёрдам кўрсатди.

АҚШ Ҳарбий-денгиз кучларининг Баҳрайнда жойлашган Бешинчи флоти ушбу ҳодиса юзасидан эълон қилган баёнотда “Уммон кўрфазида танкерларга қилинган ҳужум ҳақидаги хабарлар бизга маълум. Минтақадаги АҚШ ҳарбий-денгиз кучлари эрталабки соат 6:12 да ва иккинчи марта соат 7:00 да иккита ёрдам чақириғига жавоб берди. Ҳарбий денгиз кучлари ҳозир ўша ерда ёрдам кўрсатмоқда” дейилади.

Кемаларнинг бирини бошқараётган Front Altair ширкати кема бортида содир бўлган портлаш ортидан ёнғин бошланганини маълум қилди. Ҳужумга учраган иккинчи танкер Kokuka Courageous кемаси эканлиги айтилди.

Ҳар икки кема экипажи эсон-омон эвакуация қилинган.

Бундан бир ой олдин Бирлашган Араб Амирликлари соҳиллари яқинида тўрт нефть танкерига ҳужум уюштирилган, АҚШ ва унинг ҳамкорлари ҳужумларда Эронни айблаган эди. Эрон эса бу айбловларни кескин рад этиб келади.

АҚШ Польшага минг нафар аскарини киритишга рози бўлди

АҚШ аскарлари.

Қўшма Штатлар Польшанинг эҳтимолий Россия агрессияси юзасидан ҳавотирларига жавобан бу мамлакатда минг нафарга яқин ҳарбийсини жойлаштиришга рози бўлди.

12 июнь куни АҚШ ва Польша ўртасида имзоланган мазкур шартномани президент Дональд Трамп тасдиқлади. Бироқ шартномада АҚШ ҳарбийларининг Польшага жойлаштирилиши «доимий ёки вақтинчалик» экани қайд этилмаган.

Бу эса Россиянинг Шарқий Европада АҚШ ҳозирлиги кучайиб бораётгани тўғрисидаги ташвишларига сабаб бўлмоқда.

Трампнинг айтишича, Германиядаги 52 минг АҚШ ҳарбийсининг минг нафари Польшага кўчирилади.

«Биз уларни Германиядан олиб чиқиб Польшага жойлаштирамиз. Европага қўшимча ҳарбийлар киритилмайди», деди Трамп.

Россия Қримни босиб олган ва Украина шарқидаги россияпараст исёнчиларни қўллай бошлаган 2014 йилдан бери АҚШ ротация асосида Польшага 4500 ҳарбийсини жойлаштирган эди.

Журналист Иван Голунов тарафдорлари ўтказган митингда камида 400 одам қўлга олинди

Москвада 12 июнда қўлга олинганлардан бири.

Журналист Иван Голунов тарафдорлари 12 июнь куни Москвада ўтказган намойишни куч билан тарқатиш пайтида полиция камида 400 одамни ҳибсга олди.

ОВД-Инфо ташкилотининг билдиришича, қўлга олинганлар орасида мухолифатчи сиёсатчи Алексей Навальний ҳам бўлган. Кейинроқ Навальний Твиттер саҳифасида ўзининг қўйиб юборилганини айтди ва қолганлар ҳам озод этилишига умид билдирди.

Москва полицияси 12 июндаги намойишда 1200 одам иштирок этганини ҳамда улардан 200 нафари қўлга олинганини айтмоқда.

Латвияда жойлашган "Медуза" нашрининг суриштирув журналисти бўлган Иван Голунов 6 июнь куни Москвада наркотиклар савдосида гумонланиб ҳибсга олинган ва 11 июнда жамоатчиликнинг жуда қаттиқ босими остида озод этилган эди.

Россия ички ишлар вазири Голуновнинг жиноятга алоқаси борлиги исботланмаганини тан олишга мажбур бўлган. Аммо шунга қарамай, норозилар митинг ўтказиш фикридан воз кечган эмас.

-Ҳар куни кўчаларда одамларни ҳеч қандай айбловсиз ноқонуний равишда қўлга олишмоқда. Бу бизнинг фуқаролик ҳуқуқларимиз ва эркинлигимизнинг бузилишидир, деб ҳисоблайман. Мен бундай воқеаларга барҳам беришимиз шарт, деб ўйлайман,-деди митингга чиққанлардан бири.

Ҳонконгда полиция ёш норозиларга нисбатан куч қўллади

Полиция тарқатган намойишчилар.

Ҳонконг полицияси 9 июндан бери норозилик намойиши ўтказаётган минглаб одамларни куч қўллаб тарқатишга ҳаракат қилди.

Хабарда айтилишича, 12 минг нафарга яқин ёш намойишчи ҳукумат биноси олдида тўпланиб, полициячиларга ҳужум қила бошлаган.

-Жиддий муаммога дуч келганимиз сабабли, бизда полицияга ҳужум қилаётган норозиларга нисбатан куч қўллашдан бошқа имконият қолмади,-деди Ҳонконг полицияси бошлиғи Стивен Ло Вай-чунг.

Ҳонконгда ҳонконгликларни Хитойга экстрадиция қилишга рухсат берувчи қонун лойиҳасига қарши ўтказилаётган намойишлар 9 июнда бошланган ва якшанба куни унда бир миллионга яқин одам иштирок этган эди.

Норозиликларга қарамай, Ҳонконг маъмурияти қонунни қабул қилиш режасидан воз кечмаслигини билдирмоқда. Шаҳар раҳбарларига кўра, мазкур қонун Ҳонконг жиноятчилар учун бошпана берувчи маконга айланиб қолмаслигини кафолатлайди.

Бироқ ҳуқуқ фаоллари мазкур қонун амалиётда Хитой сиёсатига қарши бўлган мухолифатчилар ва диссидентларга нисбатан қўлланилади, деб ҳисобламоқдалар.

1842 йилдан бери Британия бошқарувида бўлган Ҳонконг 1997 йилда Хитой тасарруфига ўтказилган. Ўшанда Хитой Ҳонконг суд ва ҳуқуқ тизимига камида 50 йил мустақил бошқарув берилишини кафолатлаган. Бироқ сўнгги йилларда Хитой бу ваъдасини эсидан чиқармоқда ва мухторият ишларига аралашмоқда.

Ҳонконгда сўнгги марта бу каби йирик намойиш 2014 йилда бўлиб ўтганди. Ўшанда шаҳар аҳолиси Бейжиннинг Ҳонконг маҳаллий ҳокимиятига ўтказилган сайловни ўз назоратига олиш уринишига қарши норозилик билдирган. 2014 йилнинг 28 сентябрида бошланган бу намойиш 79 кун давом этганди.

Швеция суди 7 йилга кесилган ўзбекистонликка нисбатан чиқарилган ҳукмни бекор қилди

Девид Идриссон (Фарҳод Тошмуҳаммедов) суд залида.

Швециядаги аппеляция суди чоршанба куни “Исломий давлати” террор ташкилоти номидан Швецияда портлашлар уюштиришга тайёргарлик кўрганликда айбдор, деб топилиб 7 йилга озодликдан маҳрум қилинган ўзбекистонлик 46 яшар Фарҳод Тошмуҳаммедовга (Швецияга келиб олган исми Девид Идриссон) белгиланган жазони бекор қилди. Бу ҳақда Швеция матбуоти хабар қилди.

Ройтерс агентлигининг хабар қилишича,суд Идриссонга қўйилган террор ҳужумини тайёрлаш айбловини бекор қилган, лекин тероризмни молиялаш айблови ўз кучида қолган. Судья Раднар Палм Квистгнинг баёнотига кўра, апелляция суди уни террор ҳужумига тайёргарлик кўрганликда айблаш учун етарли далиллар йўқ, деб ҳисоблайди.

Швеция пойтахти яқинидаги Солна округ суди жорий йилнинг мартида Девид Идриссонни терактга тайёргарлик кўрганликда айбдор, деб топиб етти йилга озодликдан маҳрум этган эди. Девид Идриссон, аввалги исми эса Фарҳод Тошмуҳаммедов бўлган ўзбекистонлик қамоқ муддатини ўтаб бўлганидан сўнг Швециядан бадарға қилинадиган, мамлакатга қайтиб киритилмайдиган бўлган.

Россия июль ойида Туркияга С-400 тизимларини етказиб беради

Россиянинг С-400 мудофаа тизимлари

11 июнь куни Россия Туркияга С-400 мудофаа тизимларини июль ойида етказиб беришини маълум қилди. Бундан бир неча кун олдин эса Вашингтон Анқарага рус тизимларини харид қилиш режасидан қайтиш учун 31 июлгача муҳлат берган эди. Вашингтон Анқара бу талабни бажармаса, F-35 қирувчи учоғи дастуридан чиқарилиши ҳақида огоҳлантирди.

НАТО аъзолари АҚШ ва Туркия бир неча ойдан бери Анқаранинг Россиядан альянс тизимлари билан ишлай олмайдиган С-400 тизимларини харид қилиш режаси юзасидан келиша олмай келади.

Кремлнинг ташқи сиёсат бўйича маслаҳатчиси Юрий Ушаков 11 июнь куни Россия ва Туркия ўртасидаги келишувлар ўз вақтида амалга оширилаётганини, икки давлат ўртасида ҳеч қандай келишмовчилик йўқлигини айтди. Ушаков, шунингдек, тизимлар июль ойида Туркияга етказилишини қўшимча қилди.

Туркия тизимларни чиндан қабул қилиб олса, Вашингтон Анқарага қарши санкция жорий қилиши ҳамда мамлакатдаги иқтисодий таназзул янада кескинлашиши мумкин.

10 июнь куни АҚШ Намоёндалар палатаси Туркияни С-400 тизимларини сотиб олишдан воз кечишга ва Анқара бунга амал қилмаса, мамлакатга қарши санкция жорий қилишга чорловчи резолюцияни қабул қилди.

Япония бош вазири Теҳронга хизмат сафарини бошлади

Япония бош вазир Синдзо Абэ Эрон президенти Ҳасан Руҳоний билан Давосдаги учрашувда, 2014, 22 январь.

Япония бош вазири Синдзо Абэ 12 июнь куни Эронга хизмат сафари билан боради. Вазир ташрифи давомида Эрон ва АҚШ ўртасидаги танглик даражасини пасайтиришга умид қилмоқда.

Синдзо ўз ташрифи давомида Эрон президенти Ҳасан Руҳоний ҳамда олий раҳбар Оятуллоҳ Али Хоманаий билан учрашади.

АҚШ ва Эрон ўртасидаги муносабатлар Дональд Трамп ўтган йили Вашингтон Теҳрон билан 2015 йилда имзоланган ядровий шартномадан бир томонлама чиқишини эълон қилганидан сўнг мураккаблаша бошлаган. Кейинги икки йил ичида Вашингтон Теҳронга қарши янги санкция жорий қилди ва минтақага ҳарбий ва ҳарбий техника юборди. Бу ҳолат Вашингтон ва Теҳрон ўртасида ҳарбий тўқнашув юзага келиши мумкинлиги ҳақидаги хавотирларни кучайтирди.

Ташрифи арафасида Абэ Япония “Яқин Шарқда тинчлик ва барқарорлик ўрнатиш йўлида қўлидан келганини қилишни исташини” таъкидлади.

АҚШнинг Осиёдаги энг яқин ҳамкорларидан бири бўлган Япония Эрон билан ҳам яхши муносабатда. Аммо кузатувчилар бош вазир ташрифи давомида бирор муайян натижага эришиши мушкул эканлигини айтмоқда. Қолаверса, Абэнинг ташрифи июль ойига белгиланган сайловлар арафасида унинг имижини яхшилашга қаратилган бўлиши мумкин.

Тоқаев Қозоғистон президенти сифатида қасамёдга келтирилди

Қасим-Жомарт Тоқаев

Қозоғистонда Қасим-Жомарт Тоқаев президент сифатида қасамёдга келтирилди. Халқаро ҳамжамият ва қозоқ мухолифати президент сайловлари фундаментал инсон ҳуқуқлари қўпол бузилган тарзда ўтказилганини айтмоқда. Бундан ташқари, сайлов ва сайловдан кейинги кунларда Қозоғистон бўйлаб митингга чиққан юзлаб намойишчи қўлга олинди.

Собиқ президент Нурсултон Назарбоев кўрсатган номзод Қасим-Жомарт Тоқаев 12 июнь куни Нурсултон шаҳрида Мустақиллик саройида қасамёдга келтирилди.

Расмий маълумотларга кўра, ёши 66 га чиққан Тоқаев 9 июнь куни ўтган сайловда 71 фоиз овоз олган.

19 мартда мамлакатни қарийб 30 йил бошқарган президент Назарбоев истеъфо бергани ортидан 20 март куни Тоқаев Қозоғистон муваққат президенти сифатида қасамёдга келтирилган эди. Тоқаевни Назарбоев шахсан ўзи танлагани учун унинг сайловда ғолиб чиқиши ҳеч ким учун кутилмаган воқеа бўлмади.

Аммо сайлов кампанияси давомида ва сайловдан кейин ҳам мамлакат бўйлаб ҳокимият сценарийси асосида ўтказилган сайловларга қарши намойишлар бўлиб ўтди.

Францияда яшаëтган собиқ банкир ва мухолифатчи Мухтор Аблязов интернет орқали қозоғистонликларни Нурсултон ва Олмаота шаҳарларида яна норозилик намойишига чиқишга чақирди.

Туркия Истанбулда ноқонуний ишлаётган 50 минг хорижликни депортация қилмоқчи

Туркия байроғи.

Туркия ноқонуний яшаётган хориж давлат фуқароларини аниқлаш ҳамда депортация қилиш ишларини кучайтиради. Бу ҳақда Истанбулда 10 июнь куни ўтган халқ билан мулоқот пайтида ички ишлар вазири Сулаймон Сўйлу маълум қилди.

Унга кўра, ўтган йили Истанбулда ноқонуний яшаётган 4500 хорижлик аниқланиб, депортация қилинган эди. Жорий йилнинг шу кунигача уларнинг сони 13 минг нафарга етди.

Сўйлу йил охиригача биргина Истанбулнинг ўзидан 50 минг нафар хорижлик депортация қилиниши режалаштирилаётганини айтди.

Маълумотларга қараганда, 2018 йилда Туркияда хориждан келган 787 минг мигрант расман ишлаш учун рўйхатдан ўтган. Уларнинг 383 минги қисқа муддатли туристик виза билан мамлакатга келган ва ноқонуний ишламоқда.

Аввалроқ The Diplomat нашри Туркияда 30 минг нафар ўзбекистонлик меҳнат муҳожири борлиги, лекин уларнинг икки мингга яқинигина қонуний ишлаётгани ҳақида хабар берганди.

“Қуръон ҳақида ҳазил” видеоси муаллифдан судланганлик олиб ташланди

Москва шаҳар Тушино туман суди Илья Мэддисон таҳаллуси билан танилган видеоблогер Илья Давидовнинг судланганликни олиб ташлаш тўғрисидаги аризасини қаноатлантирди.

Блогер 2018 йилнинг июлида Қуръон тўғрисидаги видеоси учун шартли равишда 1,5 йилга озодликдан маҳрум қилинган эди.

Илья Давидовга нисбатан жиноят иши 2017 йилнинг февралида очилган. У 2015 йилда “Қуръон ҳақида ҳазил” деб номланган видеони Youtube порталига жойлаштириш орқали нафрат ва низо қўзғашга уринганликда айбланган.

Бу видеода Давидов Қуръонни кўтариб ҳожатхонага киргани, кейин эса ҳожатхона қоғози тугаб қолганини пайқагани тўғрисида гапирган. Шундан сўнг у хожатхонага олиб кирилган Қуръонга ҳеч нарса бўлмаганини кўрсатиб, унинг саҳифалари орасига кир пайпоғини жойлаган. Видео охирида эса у ҳазиллашганини, аслида унинг қўлида Қуръон эмас, Инжил бўлганини билдирган.

2017 йилнинг апрелида Россия Адлия вазирлиги бу видеони экстремистик материаллар реестрига киритган.

Давидов мазкур видеодан сўнг ўзига нисбатан таҳдид қилинган билдирувларни ола бошлаган, шундан сўнг у ижтимоий тармоқлардаги барча аккаунтларини ўчириб ташлаган. Таҳдидлар ортидан Давидов Россияни вақтинча тарк этишга мажбур бўлган эди.

Ҳонконгда Хитойга экстрадиция қилиш тўғрисидаги қонунга қарши намойишлар давом этмоқда

Ҳонконгда 10 июнь куни намойишчилар полиция билан тўқнашган эди.

Ҳонконгда ҳонконгликларни Хитойга экстрадиция қилишга рухсат берувчи қонун лойиҳасига қарши ўтказилаётган намойишлар чоршанба куни ҳам давом этмоқда. Хабарларга қараганда, 50 мингдан кўпроқ намойишчи Ҳонконг қонунчилик палатасини қамал қилмоқда.

Мазкур намойиш 9 июнда бошланган ва якшанба куни унда бир миллионга яқин одам иштирок этган эди.

Норозиликларга қарамай, Ҳонконг маъмурияти қонунни қабул қилиш режасидан воз кечмаслигини билдирмоқда. Шаҳар раҳбарларига кўра, мазкур қонун Ҳонконг жиноятчилар учун бошпана берувчи маконга айланиб қолмаслигини кафолатлайди.

Бироқ ҳуқуқ фаоллари мазкур қонун амалиётда Хитой сиёсатига қарши бўлган мухолифатчилар ва диссидентларга нисбатан қўлланилади, деб ҳисобламоқдалар.

1842 йилдан бери Британия бошқарувида бўлган Ҳонконг 1997 йилда Хитой тасарруфига ўтказилган. Ўшанда Хитой Ҳонконг суд ва ҳуқуқ тизимига камида 50 йил мустақил бошқарув берилишини кафолатлаган. Бироқ сўнгги йилларда Хитой бу ваъдасини эсидан чиқармоқда ва мухторият ишларига аралашмоқда.

Ҳонконгда сўнгги марта бу каби йирик намойиш 2014 йилда бўлиб ўтганди. Ўшанда шаҳар аҳолиси Бейжиннинг Ҳонконг маҳаллий ҳокимиятига ўтказилган сайловни ўз назоратига олиш уринишига қарши норозилик билдирган. 2014 йилнинг 28 сентябрида бошланган бу намойиш 79 кун давом этганди.

АҚШ Грузияга мудофаа салоҳиятини кучайтириш учун кўмаклашишда давом этади

АҚШ Давлат котиби Майк Помпео.

АҚШ Давлат котиби Майк Помпео Грузиянинг НАТОга аъзо бўлиш интилишини олқишлади ҳамда Россиянинг Грузияга нисбатан давом этаётган агрессиясини қоралади.

-2008 йилда Россия бостириб кирганидан бери ўтган ўн йил давомида Грузия нақадар саботли эканни намойиш этди. Бугун Грузия АҚШнинг муҳим стратегик ҳамкори ва глобал хавфсизликка ҳисса қўшиб келаётган давлатдир, - деди Помпео 11 июнь куни Вашингтонда Грузия Бош вазири Мамука Бахтадзе билан учрашувда.

Помпеога кўра, АҚШ Грузияга мудофаа салоҳиятини кучайтириш учун ёрдам беришда давом этаверади.

Москва 2008 йилда Грузия билан қисқа муддатли уруш ўтказиб, Жанубий Осетия, кейинроқ Абхазияга харбий кучларини киритган эди. Москва Грузиянинг бу икки айирмачи минтақасини мустақил давлатлар сифатида тан олган.

Грузия президенти Саломе Зурабишвили 10 июнь куни Тбилиси мазкур икки минтақа устидан назоратни яқин келажакда ўз қўлига киритишини билдирди ҳамда: “Ўйлайманки, босиб олинган ҳудудлардаги аҳоли аста-секинлик билан бўлса ҳам Россия билан биргаликда келажак мавжуд эмаслигини англаб етмоқда”, деб айтди.

Журналист Иван Голунов озод этилганига қарамай, унинг ҳимоясига митинг ўтказилади

Иван Голунов.

Журналист Иван Голунов озод этилгани ва жиноят иши тўхтатилганига қарамай унинг тарафдорлари 12 июнда Москвада режалаштирилган митингни ўтказадилар.

Бу ҳақда намойиш ташкилотчилари маълум қилди. Уларга кўра, ҳукумат Иван Голуновни озод этиш талабини бажарди, бироқ журналистни ноқонуний қўлга олганларга нисбтан жазо чораларини қўлламади.

Журналистнинг ўзи 11 июнь куни уй қамоғидан озод этилганидан сўнг:

-Менга маънавий зарар учун тўланган товон -бу каби воқеа бошқалар билан қайталанмаслигидир, - деб айтди.

Латвияда жойлашган "Медуза" нашрининг суриштирув журналисти бўлган Иван Голунов 6 июнь куни Москвада наркотиклар савдосида гумонланиб ҳибсга олинган ва уй қамоғида сақланаëтган эди.

Мустақил журналистнинг "уйдирма айб билан" қўлга олиниши маҳаллий ва халқаро журналистлар ва кенг жамоатчиликнинг жиддий норозилигига учради.

Жамоатчилик босими остида 11 июнь куни Россия ички ишлар вазири Владимир Колокольцев "Биологик¸ криминалистик ¸ дактилоскопик ва генетик экспертиза хулосаси асосида гражданин Иван Голуновнинг жиноятни содир этишга алоқаси йўқлиги тасдиқланди ва шу асосда унга очилган жиноят иши тўхтатилди. Унга нисбатан айблар олиб ташланди ва у бугуноқ уй қамоғидан озод этилади"¸ деб билдирди.

Журналист Иван Голунов озод этилди¸ унга нисбатан очилган жиноят иши тўхтатилди

Иван Голунов

Россия Ички ишлар вазири Владимир Колокольцев 11 июнь куни журналист Иван Голуновга нисбатан очилган жиноят иши унинг жиноятда қатнашганига оид далиллар йўқлиги боис тўхтатилганини билдирди.


"Биологик¸ криминалистик ¸ дактилоскопик ва генетик экспертиза хулосаси асосида гражданин Иван Голуновнинг жиноятни содир этишга алоқаси йўқлиги тасдиқланди ва шу асосда унга очилган жиноят иши тўхтатилди. Унга нисбатан айблар олиб ташланди ва у бугуноқ уй қамоғидан озод этилади"¸ деди Россия полицияси раҳбари.

Латвияда жойлашган "Медуза" нашрнинг суриштирув журналисти бўлган Иван Голунов 6 июнь куни Москвада наркотиклар савдосида гумонланиб ҳибсга олинган ва уй қамоғида сақланаëтган эди.

Мустақил журналистнинг "уйдирма айб билан" қўлга олиниши маҳаллий ва халқаро журналистлар ва кенг жамоатчиликнинг жиддий норозилигига учради. Голунов ҳибсга олинган куниëқ Россиядаги таниқли журналистлар уни озод этиш талаби билан ИИВ биноси олдида пикет ўтказди.

10 июнь куни Россиянинг уч нуфузли етакчи газетаси – “Ведомости”, “Коммерсантъ” ва РБКнинг Бош саҳифалари журналист Иван Голуновни озод этиш талаби билан чиқди.

Россиялик 6 мингдан ортиқ журналист Голуновни қамоқдан озод қилиш талаби билан Ички ишлар вазирлиги, Бош прокуратура ва тергов қўмитасига мурожаат қилди. Мазкур мурожаат Журналистлар касаба уюшмаси сайтида эълон қилинди.

Якшанба куни change.org сайтида журналистни озод қилиш тўғрисидаги петицияни 110 мингдан кўпроқ одам имзолади.

Қозоқ полицияси 9-10 июнь кунлари сайловга норозилик билдирган 700 намойишчини ушлади

Қозоғистоннинг энг йирик шаҳри Олмаотада юзлаб намойишчи қўлга олинди.

Қозоғистон полицияси 9-10 июнь кунлари президент сайловларига норозилик билдиришга чиққанлардан 700 га яқинини қўлга олди.

Қозоғистон Ички ишлар вазири расмийси Нурилда Оразнинг 11 июнь куни мухбирларга айтишича¸ икки кун давомида 550 дан ошиқ одам маъмурий жавобгарликка тортилган.

Расмийларнинг айтишича¸ ушланган намойишчилардан 200 га яқини Нур-Султан шаҳрида тўполон чиқармаслик мақсадида бошқа ҳудудларга чиқариб юборилган.

9 июнь куни муддатидан аввал ўтказилган Қозоғистон президентлик сайловида¸ дастлабки расмий натижага кўра¸ Қасим-Жомарт Тоқаев 71 фоиз овоз билан ғалаба қозонган.

Сайлов куни мамлакатнинг аксар шаҳарларида¸ ҳокимият сценарийси асосида ўтказилган сайловларни бойкот қилишга чақирган норозилик намойишлари ўтказилди.

«Тоқаев – менинг президентим эмас!» деган шиор остида ўтаëтган норозилик тадбири қатнашчилари сайловларнинг ҳалол ва эркин ўтмаганини таъкидламоқда.

ШҲТ саммити арафасида Бишкекда хавфсизлик чоралари кучайтирилди

Қирғизистон Ички ишлар вазири ўринбосари Алмаз Ўразалиевнинг 11 июнь куни журналистларга билдиришича¸ ШҲТга аъзо давлат раҳбарларининг Бишкек саммити давомидаги хавфсизликни таъминлашга 5000 нафардан кўпроқ милиция ходими жалб этилади.

Вазирлик мутасаддисининг айтишича¸ саммит мажлислари¸ меҳмонлар турадиган жойлар ва улар юрадиган йўлларни қўриқлашда пойтахт милициясидан ташқари вилоятлардан келадиган ходимлар¸ шунингдек¸ ИИВ марказий аппарати қўшинлари ҳам қатнашади.

Хавфсизлик чораларининг кучайтирилиши¸ хусусан¸ йўллар ва айрим объектларнинг бишкекликлар учун ëпилишини олдиндан маълум қилган ИИВ¸ пойтахтликларни «вазиятга тушуниш билан ëндашиш»га чақирди.

Шанхай ҳамкорлик ташкилотининг навбатдаги Бишкек саммити 13-14 июнь кунлари бўлиб ўтади.

Саммит билан айни кунда Хитой¸ Ҳиндистон ва Монголия президентларининг Қирғизистонга расмий сафари ҳам режаланган.

ШҲТда кузатувчи мақомига эга Эрон президентининг ҳам Бишкек саммитида қатнашиши хабар қилинди.

Ташкилотга Хитой¸ Россия¸ Ҳиндистон¸ Қозоғистон¸ Қирғизистон¸ Покистон¸ Тожикистон ва Ўзбекистон аъзо.

Россия Евроосиë иқтисодий иттифоқидан келган меҳнат муҳожирларига пенсия тўлайди

Россия Евроосиë иқтисодий иттифоқидан келган меҳнат муҳожирларига¸ улар ўз ватанига қайтган тақдирда ҳам пенсия тўлайди.

РБК агентлигининг хабар қилишича¸ иттифоқ аъзоларининг пенсия таъминоти ҳақида имзоланиши кутилаëтган келишувига шундай банд киритилган.

Пенсия тўлаш жараëни¸ айтилишича¸ 2020 йилдан бошланади ва пенсиялар миқдори йилдан-йилга ошиб боради.

Россия жорий қонунчилигига кўра¸ иш берувчилар мамлакатда ишлаëтган меҳнат муҳожирлари учун Пенсия жамғармасига тўлов қилади¸ аммо муҳожирлар қариганда бу жамғармадан пенсия олишга ҳақли эмас.

Меҳнат муҳожирларидан ушлаб қолинаëтган пенсия тўловларининг ҳозирга қадар қаерга кетаëтгани ҳақида расмий маълумот берилмаган.

Кремль етовидаги Евроосиë иқтисодий иттифоқига ҳозирда Арманистон¸ Беларус¸ Қозоғистон ва Қирғизистон аъзо.

Украина президенти Зеленский Конституциявий суд чақириғига мувофиқ маҳкама мажлисига келди

Президент Зеленский Украина Конституциявий судининг 11 июнь кунги мажлисида бевосита иштирок этди.

11 июнь куни Украина Конституциявий суди Олий рада депутатлари аризасини кўриб чиқишни бошлади.

Раданинг 62 нафар депутати президент Зеленскийнинг парламентни тарқатиш ва муддатидан олдин сайлов эълон қилиш қарорининг қанчалик қонунийлигини ўрганиб чиқишни сўраб Конституциявий судга мурожаат қилган.

Суд мажлисига 62 депутатнинг ҳаммаси¸ шунингдек президент Владимир Зеленскийнинг ўзи ҳам чақиртирилди.

Ҳакамларга чақириқ учун миннатдорчилик билдирган Зеленский¸ президентнинг судга чақирилиши Украина тарихида биринчи марта бўлаëтганни айтиб¸ «ҳозирга қадар судъяларни президент чақиртириб келгани»ни таъкидлади.

Ўз чиқишида Украина янги президент мажлисга келиш орқали Конституциявий судга¸ «қонун руҳи ва ҳарфи»га ўз ҳурматини намоëн қилишни истаганини билдирди.

«Суд¸ ҳеч биримизни уялтирмайдиган адолатли ҳукм чиқарди»¸ дея умид билдирди Зеленский ўз чиқишида.

Шундан сўнг президент «ўз иштироки билан суд қарорига таъсир ўтказди¸ ҳукм президент босими остида чиқарилди»¸ деган айбловларга ўрин қолдирмаслик учун суд залини тарк этди.

Украина янги президенти сифатида қасамëд қилганининг эртаси – 21 май куни Зеленский парламентни тарқатиш ҳақидаги фармонга қўл қўйди. Олий радага муддатидан аввал сайловлар 21 июлга белгиланган.



Қирғизистонда журналистга қўпол муомала қилган вилоят раҳбари ишдан бўшатилди (ВИДЕО)

Чуй вилоятининг раҳбари Туйгунали Абдраимов .

Қирғизистонда Чуй вилоятининг раҳбари Туйгунали Абдраимов журналистга қўпол муомалада бўлгани оқибатида лавозимидан бўшатилди. Бу борадаги буйруқни 10 июнь куни Бош вазир Муҳаммедкалий Абилгазиев имзолади.

Туйгунали Абдраимов 5 июнь куни Сўқулуқ туманидаги Ўрўқ қишлоғида содир этилган оммавий муштлашув ортидан воқеа жойига борган аёл журналистлардан бирига қўпол муомалада бўлиб: “Сизнинг юзингиз менга ёқмаяпти”, деб айтган эди.

Бу воқеа интернетда тезда ёйилиб кетди ва журналистлар орасида ижтимоий тармоқларда “Мен журналистман. Менинг юзим ўзимга ёқади. Менга ҳукуматимизнинг юзи ёқмайди” деб номланган тадбир бошланиб кетган эди. Юзлаб одамлар Чуй вилояти раҳбарини ишдан бўшатилишини талаб қилиб чиқди.

6 июнь куни вилоят ҳокимиятига норозилик билдириб борган ўнлаб журналистларга Туйгунали Абдраимов ўз ҳаракатидан уялмаслигини ва журналист аёлдан кечирим сўрамаслигини айтганди.

Қозоғистоннинг янги президенти полиция норозиларни қўлга олганини олқишлади

Қозоғистоннинг сайланган президенти Қасим-Жомарт Тоқаев.

Қозоғистоннинг сайланган президенти Қасим-Жомарт Тоқаев 9 июнь куни ўтган сайлов пайтида 500га яқин норозини қўлга олган полиция ҳаракатини “жуда тўғри бўлган”, деб олқишлади.

10 июнь куни журналистларга интервью берган янги президент 9 июнда Нурсултон, Олмаота, Шимкент ва бошқа шаҳарларда юзлаб одамлар иштирокида сайловни бойкот қилиш чақириғи билан ўтказилган митингларни “ноқонуний” деб атади.

Қасим-Жомарт Тоқаевга кўра, бу митингларни “хориж давлатларидан нотўғри маълумот олиб, йўлдан адашган одамлар” уюштирган. "Полиция бундан кейин ҳам мана шундай руҳда фаолият юритаверади", деб айтган президент.

Тоқаев Марказий сайлов комиссияси расмий натижаларни эълон қилиб улгурса, инаугурация маросими 12 июнда ўтказилишини айтди.

Айни пайтда халқаро ҳамжамият ва қозоқ мухолифати сайловлар фундаментал инсон ҳуқуқлари қўпол бузилган тарзда ўтказилганини билдирмоқдалар. Жумладан, Қозоғистон собиқ бош вазири, мухолифат лидери Акежан Кажагелдин Current Time дастурига:

-Жаноб Тоқаев халққа ҳалол сайлов ўтказишга сўз берган эди. У ўз ваъдасини бажармади. Шу тарзда у президент сифатидаги ўз карьерасини жуда оғир сиёсий юк билан бошлади, - деб айтди.

Чеченистон суди фаол Оюб Титиевни муддатидан олдин қамоқдан бўшатди

Ҳуқуқ фаоли Оюб Титиев.

Чеченистоннинг Шали туман суди 10 июнь куни ҳуқуқ фаоли Оюб Титиевни муддатидан олдин шартли равишда қамоқдан озод қилиш тўғрисида ҳукм чиқарди. Мазкур қарор ўн кундан сўнг кучга киради.

“Мемориал” ҳуқуқни ҳимоя қилиш ташкилотининг Чеченистон бўлимини бошқарган 61 ёшли Оюб Титиев 2018 йилда “автомашинасидан наркотик модда топилди”, деган айблов билан тўрт йилга қамалган эди.

Титиевнинг ўзи ва ҳамкасблари ҳуқуқ-тартибот тузилмалари унинг машинасига атайлабдан наркотик модда ташлаб қўйганини билдирган. Халқаро ташкилотлар Титиев ҳуқуқбонлик фаолияти учун ҳукумат томонидан таъқиб қилинди, деб ҳисоблайдилар.

Ўндан ортиқ ҳалқаро ҳуқуқ ташкилотлари, Ғарб давлатларининг қатор раҳбарлари президент Владимир Путинни Титиевни қамоқдан озод қилишга чақириб келаётган эди.

Россия қонунчилигига асосан Оюб Титиев 21 майда белгиланган жазо муддатини учдан бирини ўтаб бўлгани боис, ўзини муддатидан олдин қамоқдан бўшатиш илтимоси билан судга мурожаат қилган эди.

Покистоннинг собиқ президенти коррупцияда айланиб қўлга олинди

Покистоннинг собиқ президенти Осиф Али Зардорий.

Покистоннинг собиқ президенти Осиф Али Зардорий 10 июнь куни коррупцияда айбланиб қамоққа олинди.

Зардорий билан биргаликда унинг синглиси Фарьял Талпур ҳам коррупцияда гумонланмоқда.

Терговнинг билдиришича, Зардорий ва Талпур бир миллион долларга яқин пулни шахсий банк ҳисобларига ўтказиб, ўзлаштириб олган. Зардорий ва Талпур айбловни инкор этмоқда.

Амалдаги Бош вазир Имрон Хон ҳокимиятга келганидан бери Покистонда бир қатор сиёсатчилар коррупцияда айбланиб қўлга олинди.

Олий Суд собиқ Бош вазир Навоз Шарифни ҳам коррупцияда айблаб лавозимидан бўшатган. Ўтган йилнинг 24 декабрида суд Навоз Шарифни 7 йил қамоқ жазосига ҳукм қилган эди.

Зардорий 2008 йилдан 2013 йилгача Покистон президенти бўлган.

Давомини ўқинг

XS
SM
MD
LG