Линклар

Шошилинч хабар
15 октябр 2019, Тошкент вақти: 06:22

Халқаро янгиликлар

Туркия Сурия шимоли-шарқида курд жангариларига қарши ҳарбий амалиётни бошлади

Ҳарбий амалиёт ўтказилаётган ҳудудни тарк этаётган сурияликлар.

Туркия Сурия Озодлик армияси билан ҳамкорликда Сурия шимоли-шарқида курд жангариларига қарши ҳарбий амалиётни бошлади. Бу ҳақда 9 октябрь куни Туркия президенти Ражаб Тоййиб Эрдўғон телевидение орқали маълум қилди.

-Ишонаманки, Сурия Озодлик армияси билан ҳамкорликда Туркия қуролли кучлари Сурия шимолида РПК, ЙПГ ва «Ислом давлати»га қарши катта муваффақиятларга эришади. Бизнинг мақсадимиз аниқ. Биз террорчилар йўлагини йўқ қилмоқчимиз. Биз бу ерда тинчлик йўлагини ташкил эта олишимизга умид қиламан. Хавфсизлик ҳудудини яратиш асосий мақсадимиздир, - деди Эрдўғон.

Сўнгги хабарларга қараганда, турк ҳарбий самолётлари курд жангарилари манзилларини бомбардимон қилган. Бомбардимон оқибатида камида 15 киши ҳалок бўлди. АҚШ президенти Дональд Трамп курд жангарилари манзилларининг бомбардимон қилинишини «ёмон ғоя»деб атади.

Бир неча кун олдин АҚШ президенти Дональд Трамп Вашингтон Туркиянинг Сурия шимолида, Фирот дарёси шарқида “хавфсизлик зонаси” ташкил қилиш режасига тўсқинлик қилмаслигини айтган эди. Туркия ушбу зонага 2 миллионга яқин суриялик қочқинни жойлаштирмоқчи.

Трамп Туркия президенти Ражаб Тоййиб Эрдўғонни Туркия амалиёти давомида АҚШ ҳарбийларига зиён етса, оқибати ёмон бўлиши ҳақида огоҳлантирди.

Анқара курд отрядларини террорчи гуруҳлар сифатида билади. Аммо АҚШ “Ислом давлати” гуруҳига қарши курашда курд жангарилари билан ҳамкорлик қилган ва уларни қўллаб-қувватлаган.

Навальнийнинг “Коррупцияга қарши кураш фонди” "хориж агентлари” рўйхатига киритилди

Мухолифатчи Алексей Навальний.

Россия Адлия вазирлиги мухолифатчи Алексей Навальнийнинг “Коррупцияга қарши кураш фонди”ни “хориж агентлари” рўйхатига киритди. Бу маълумот Адлия вазирлиги расмий сайтида эълон қилинди.

Россия қонунларига асосан хориж давлатларидан олинган маблағлар ҳисобига фаолият юритаётган нодавлат нотижорат ташкилотлари “хориж агентлари” ҳисобланади.

Навальний Адлия вазирлигининг бу билдирувига раддия берди. “Россия ҳукумати фонд коррупция билан боғлиқ далил-исботларни жамоатчиликка эълон қилаётганидан чўчиб, мана шундай қарорларга келмоқда. Адлия вазирлиги мазкур фонд чет элдан бир тийин пул олгани тўғрисида бирорта фактни келтира олмайди”, деб ёзди Навальний Твиттер саҳифасида.

Август ойида Тергов қўмитаси “Коррупцияга қарши кураш фонди”ни ноқонуний йўл билан топилган пулларни машрулаштиришда айблаб, жиноят иши қўзғатган эди.

“Хориж агентлари тўғрисида”ги қонун Россияда 2012 йилда қабул қилинган. Ўтган йилнинг ноябридан хориж давлатларидан пул олган оммавий ахборот воситаларини ҳам “хориж агентлари” рўйхатига киритишга имкон берувчи қонун кучга кирган.

Бугунги кунгача “хориж агентлари” рўйхатига 150дан ортиқ нодавлат нотижорат ташкилотлари киритилган. Уларнинг орасида Озодлик радиоси рус хизмати ва “Настояшее время” телеканали ҳам бор.

Эрон Туркия билан чегарадош ҳудудда ҳарбий машқларни бошлади

Эроннинг Ғарбий Озарбайжон вилоятида ўтказилаётган машқларга генерал-майор Абдулраҳим Мусавий етакчилик қилаётгани айтилмоқда.

Эрон армияси мамлакатнинг Туркия билан чегарадош ҳудудида аввал эълон қилинмаган ҳарбий машқларни бошлади. Бу ҳақда Эрон матбуоти хабар тарқатди.

9 октябрь куни ISNA агентлиги машқларда тезкор чора кўриш бўлимлари, ҳужум бригадалари ҳамда вертолётлар қатнашаётганини хабар қилди.
Эроннинг Ғарбий Озарбайжон вилоятида ўтказилаётган машқларга генерал-майор Абдулраҳим Мусавий етакчилик қилаётгани айтилмоқда.
Эрон нашрлари машқларда иштирок этаётган ҳарбийлар сонини очиқламади.

Эроннинг ушбу машқларидан олдин Туркия шимолий Сурияда ҳарбий амалиёт ўтказишини эълон қилган эди. Сурия президенти Башар ал-Ассадни қўллаб келаётган Теҳрон Туркиянинг амалиётига қаршидир.
Эрон президенти Ҳасан Руҳоний 9 октябрь куни Анқарани Сурияда ҳарбий чора кўришдан ўзини тийишга чорлади.

- Туркия ҳақли равишда жанубий чегарасидаги вазиятдан хавотирда. Бу хавотирларни бартараф этиш учун тўғри йўл танланиши керак, деб ишонамиз, - деди президент.

Руҳоний, шунингдек, АҚШ ҳарбийларини ҳудудни тарк этиши кераклигини, курд жангчилари эса Сурия армиясини қўллаши кераклигини таъкидлади.

Россия Адлия вазирлиги мухолифатчи Навальнийнинг Коррупцияга қарши жамғармасини “хориж агенти” деб топди

Алексей Навальний

Россия Адлия вазирлиги мухолифатчи Алексей Навальнийнинг коррупцияга қарши жамғармасини (русча қисқартмаси ФБК) “хориж агенти” деб топди. Россияда 2012 йилда қабул қилинган “Хориж агенти” тўғрисидаги қонунни Ғарб давлатлари кескин қоралаб келади.

Алексей Навальний ўз фонди Россияда чуқур илдиз отган коррупцияни фош қилиб келаётгани учун расмийлар ундан қўрқишини айтиб, вазирликнинг қарорини рад этди.

Мухолифатчи Twitterда “Адлия вазирлиги ўз қарорини изоҳлаб, ФБК (Коррупцияга қарши жамғарма) хорижий манбалардан бирор тийин олганини кўрсатувчи далил келтиришини талаб қиламиз”, деб ёзди.

“Адлия вазирлигининг ҳаракатлари мутлақ ноқонуний ва, кўриниб турибдики, [президент Владимир] Путиннинг тўғридан-тўғри берган буйруқлари асосида амалга оширилди. ... Путин ФБКдан жуда қўрқади. Ахир, у ўғрилар, порахўрлар ҳамда коррупциячи расмийлар кучига таянади. Биз эса коррупцияни фош қиламиз. Нима бўлишидан қатъи назар, ишимизни тўхтатмаймиз”, дея сўзини давом эттирди Навальний.

Россияда “Хориж агенти” деб топилган ташкилотлар хориж давлатларидан молиялаштирилувчи ташкилотларга қўйилган талабларни бажариши керак бўлади. Улар орасида ташкилот қаердан маблағ олгани, уни қандай сарфлагани, ташкилот етакчилари ва мақсадлари ҳақида мунтазам равишда ҳисобот бериб туриш каби мажбуриятлар бор.

Курдлар Туркия ҳужуми арафасида ялпи сафарбарлик бошлади

Туркия ҳарбийлари Сурия чегарасига яқин йўлда кетиб бормоқда. 2019, 8 октябрь оқшоми.

Курд етакчилари Анқара Сурия шимолида амалиёт бошлашини эълон қилиши ортидан “ялпи сафарбарлик” эълон қилди. Аввалроқ Оқ уй Туркия амалиётига тўсқинлик қилмаслигини айтиб, ҳудудда ўз қўшинларини олиб чиқиб кетган эди.

Шимолий Суриянинг курдлар бошқарувидаги фуқаровий маъмурияти тўқнашувлар бошланса, гуманитар ҳалокат содир бўлишини айтди.

Россия ташқи ишлар вазири Сергей Лавров эса АҚШнинг ҳудуддаги ҳаракатлари бутун минтақага “ўт қўйиши” мумкинлиги ҳақида огоҳлантирди.

“Шимолий ва Шарқий Суриянинг мухтор маъмурияти” номи билан маълум бўлган гуруҳ “Халқимизни, барча миллат вакилларини Туркия билан чегарага яқин ҳудудга келиб, ушбу тарихий пайтда қаршилик чораларини кўришга чорлаймиз”, деган чақириқ ташлади.

8 октябрь куни кеч Туркия Сурия билан чегарадош ҳудудларга қўшимча ҳарбий техника ва қўшинларни юбора бошлагани хабар қилинди.

Аввалроқ АҚШ президенти Дональд Трамп Вашингтон Туркиянинг Сурия шимолида, Фирот дарёси шарқида “хавфсизлик зонаси” ташкил қилиш режасига тўсқинлик қилмаслигини айтган эди. Туркия ушбу зонага 2 миллионга яқин суриялик қочқинни жойлаштирмоқчи.

Роскомнадзор “Фергана” сайтига қўйилган тўсиқни бекор қилди

"Фергана" бош муҳаррири Мария Дубнова.

Роскомнадзор “Фергана” сайтига 1 октябрда қўйилган тўсиқни 8 октябрда олиб ташлади.

Сайт директори Даниил Кислов Роскомсвобода ҳаракати ва юристлар кўмагида Роскомнадзор “Фергана” сайтига нега тўсиқ қўйганини аниқлашга муваффақ бўлинганини айтди.

Билдирилишича, “Фергана”да қирғизистонлик пенсионер ўз жонига қасд қилгани тўғрисидаги мақола Россияда эълон қилиниши ман этилган контент сифатида топилган ва бунинг ортидан сайт блок қилинган.

Нашр бош муҳаррири Мария Дубнова тахририят мазкур мақолани сайтдан олиб ташлаганини ва бу ҳақда Роскомнадзорни огоҳлантирганини билдирди. Унга кўра, Роскомнадзор нашрни огоҳлантириш ўрнига, ҳеч қандай тушунтиришларсиз блоклаб қўйган.

Россияда рўйхатга олинган “Фергана” агентлиги Марказий Осиё давлатлари тўғрисидаги хабарларни тарқатади. Мазкур сайт ўз вақтида Ўзбекистонда ва Қирғизистонда ҳам тақиқланган эди. Кейинроқ бу тақиқ бекор қилинган.

2019 йилнинг апрелида эса "Фергана" мухбири Андрей Кудряшов Тошкентда аккредитациядан ўтказилганди.

"Фергана" бугунги кунда Туркманистонда ҳам блок қилинган.

Туркия яқин соатларда Сурияда ҳарбий амалиёт бошлашини эълон қилди

Сурия Озодлик армияси жангарилари Туркия ҳарбийлари билан ҳамкорликда чегарани кесиб ўтиши айтилди.

Туркия ҳарбийлари Сурия Озодлик армияси билан ҳамкорликда Сурия чегарасини яқин соатлар ичида кесиб ўтади. Бу ҳақда 9 октябрь тонгида Туркия президенти Ражаб Тоййиб Эрдўғоннинг матбуот котиби маълум қилди.

Reuters агентлигининг Анқара расмийларига таяниб билдиришича, Туркиянинг Сурия шимоли-шарқидаги ҳарбий амалиёти курд жангариларига огоҳлантириш бериш билан бошланади.

Туркия курд жангариларига қуролларни ташлашни ва жангариликни тўхтатишни таклиф қилмоқда.

Икки кун олдин АҚШ президенти Дональд Трамп Вашингтон Туркиянинг Сурия шимолида, Фирот дарёси шарқида “хавфсизлик зонаси” ташкил қилиш режасига тўсқинлик қилмаслигини айтган эди. Туркия ушбу зонага 2 миллионга яқин суриялик қочқинни жойлаштирмоқчи.

Трамп Туркия президенти Ражаб Тоййиб Эрдўғонни Туркия амалиёти давомида АҚШ ҳарбийларига зиён етса, оқибати ёмон бўлиши ҳақида огоҳлантирди.

Анқара курд отрядларини террорчи гуруҳлар сифатида билади. Аммо АҚШ “Ислом давлати” гуруҳига қарши курашда курд жангарилари билан ҳамкорлик қилган ва уларни қўллаб-қувватлаган.

Физика бўйича Нобель мукофоти канадалик ва швейцариялик уч нафар олимга берилди

Физика бўйича 2019 йилгни Нобель мукофоти лауреатлари.

Физика бўйича 2019 йилгни Нобель мукофоти Канада ва Швейцария олимларига берилди.

-Бугун Швеция Қироллик фанлар академияси 2019 йил учун физика бўйича Нобель мукофотининг бир қисмини физик космология бўйича назарий кашфиети учун Жеймс Пиблс ва иккинчи ярмини қуёш типидаги юлдуз экзосайёраси орбитасини кашф этгани учун Мишел Майор ва Дидье Келосуга топширишга қарор қилди,- деб эълон қилди Швеция Қироллик фанлар академияси бош котиби Горан Ханссон.

7 октябрь куни Физиология ва тиббиёт бўйича Нобель мукофоти икки америкалик ва бир британиялик олим - Уильям Келин, Питер Рэтклиф ва Грегг Семенцларга “тирик ҳаётнинг энг муҳим мослашув жараёнлари механизмини кашф этгани” учун топширилган эди.

Адабиёт бўйича мукофот 10 октябрда, Нобель-Тинчлик мукофоти эса 11 октябрь куни эълон қилинади.

Иқтисод бўйича Нобель мукофоти совриндори исми эса 14 октябрда эълон қилинади.

Адабиёт бўйича Нобель мукофотини Швеция академияси, физика, кимё ва иқтисод бўйича мукофотларни Швеция Қирол фанлар академияси, Нобель-Тинчлик мукофотини эса Норвегия пойтахти Ослода жойлашган Норвегия Нобель қўмитаси топширади.

Ироқ президенти норозиларга нисбатан қурол ишлатилганини қоралади

Ироқ президенти Бархам Салих.

Ироқ президенти Бархам Салих Бағдод телевидениеси орқали қилган чиқшида ҳуқуқ-тартибот тузилмалари норозилик намойиши иштирокчиларига нисбатан ҳаддан ортиқ куч ишлатганини қоралади.

-Тинч намойишчиларига хавфсизлик кучларининг ўқотар қурол билан ҳужум қилгани, шунингдек, оммваий ахборот воситалари ва журналистларга ҳужум қилингани Ироқда йўл қўйиб бўлмайдиган ҳолатдир. Биз Ироқни инсон ҳуқуқларига риоя қилинадиган демократик давлатга айлантирмоқчимиз, - деди президент

Ироқда 1 октябрдан бери аксилҳукумат намойишига чиққанларнинг полиция билан тўқнашувларида камида 104 одам ҳалок бўлди, 6100дан ортиқ одам яраланди.

Бағдодда ишсизлар сони ортиб бораётгани ва яшаш шароити ёмонлашаётганидан ғазабланган кишилар 1 октябрдан бошлаб норозилик намойишларига чиқа бошлади. Шундан сўнг мамлакатнинг шиалар кўп яшайдиган жанубий ҳудудларида ҳам норозилик намойишлари бошланиб кетган эди.

Покистон бош вазири Имрон Хон Хитойга хизмат сафари билан боради

Покистон бош вазири Имрон Хон.

Покистон бош вазири Имрон Хон Хитой президенти Си Цзиньпин ҳамда бош вазири Ли Кэцян билан Пекинда учрашиб, икки давлат ўртасидаги иқтисодий ҳамкорлик ҳамда Кашмирдаги вазиятни муҳокама қилади.

Хон маъмурияти Покистон ва Хитойни “қалин дўстлар, яқин ҳамкорлар ҳамда “алоқалари темирдай мустаҳкам ака-укалар”” дея таърифлади. Маъмурият билдирувида 8 октябрь куни бошланадиган учрашув Покистоннинг Хитой билан иқтисодий, инвестиция ҳамда стратегик алоқаларини мустаҳкамлашда муҳим роль ўйнаши айтилади.

Икки етакчи Хитойнинг “Бир камар, бир йўл” ташаббуси (Belt and Road Inititive) доирасида йўлга қўйилган 60 миллиард долларлик Хитой-Покистон иқтисодий коридорини муҳокама қилади.

Хон, шунингдек, Деҳлининг Кашмирнинг Ҳиндистон бошқарувидаги ҳудудини автономия ҳуқуқидан айирганини ҳам муҳокама қилади. Хитойнинг ҳам Ҳиндистон билан чегара масаласида келишмовчиликлари бўлиб, Пекин Деҳлининг Кашмирдаги ҳаракатларини қоралаб келади.

ЕИ Ташқи ишлар идорасининг янги раҳбари: Европа ўз Шарқига катта эътибор қаратиши керак

Европа Иттифоқи Ташқи ишлар идораси раҳбари этиб тайинланган Жозеп Боррель.

Европа Иттифоқи Ташқи ишлар идораси раҳбари этиб тайинланган Жозеп Боррель Европа шарқи блок ташқи сиёсати кун тартибининг энг муҳим масалаларидан бири бўлиши керак, деб баёнот берди.

7 октябрь куни Брюсселда Европа Парламентининг ташқи ишлар қўмитаси олдида сўзлаган Боррель Европа ва Россия ўртасида кескинлашиб бораётган тангликни тилга олди ҳамда сўнгги ўн йил ичида дунёдаги аҳвол салбий жиҳатга ўзгарди деган фикрни билдирди.

Боррель Хитойнинг ошиб бораётган қудрати, Европа Иттифоқининг АҚШ билан келишмовчиликлари ҳамда тобора агрессивлашиб бораётган Кремль Европанинг халқаро майдондаги ролига босим ўтказаётганини таъкидлади.

Ҳозирда Испания ташқи ишлар вазири лавозимида ишлаётган Боррель 15 дақиқага чўзилган нутқида Европа ўз чегарасидаги муаммоларни ҳал қила олмаси, глобал ўйинчи бўлиш орзусига эриша олмаслигини айтди.
Шу сабабдан Боррель илк расмий ташрифини Косово пойтахти Приштинага қилишини айтди. Косово 2008 йилда Сербиядан мустақиллик эълон қилган бўлиб, буни Испания ва яна тўрт Европа Иттифоқи давлати тан олмай келади.

Боррелдан аввал Европа Иттифоқи Ташқи ишлар идораси раҳбари лавозимида беш йил давомида Федерика Могерини ишлади.

Туркия шимолий Сурияда амалиёт ўтказишга ҳозирланар экан, Трамп Эрдўғонни огоҳлантирди

АҚШ президенти Дональд Трамп

7 октябрь куни Туркия Мудофаа вазирлиги Сурия шимолида ўтказилиши режалаштирилаётган ҳарбий амалиётга тайёргарлик чоралари якунланганини маълум қилди.

Бир кун олдин АҚШ президенти Дональд Трамп Вашингтон Туркиянинг Сурия шимолида, Фрот дарёси шарқида “хавфсизлик зонаси” ўрнатиш режасига тўсқинлик қилмаслигини айтган эди. Туркия ушбу зонага 2 миллионга яқин суриялик қочқинни жойлаштирмоқчи.

7 октябрь куни юқори лавозимли АҚШ расмийси ҳудуддаги 50 ка яқин АҚШ ҳарбийлари бошқа ерга олиб кетилаётганини билдирди. Бир вақтнинг ўзида расмий АҚШ Суриядан бутунлай чиқиб кетаётганини рад этди.

Трамп Туркия президенти Ражаб Тоййиб Эрдўғонни Туркия амалиёти давомида АҚШ ҳарбийларига зиён етса, оқибати ёмон бўлиши ҳақида огоҳлантирди.

Агар Туркия, бирор нима қилсаю уни буюк ва беназир донолигимга қарамай, қуюшқондан чиқди деб ҳисоблайдиган бўлсам, мен Туркиянинг иқтисодиётини батамом вайрон ва барбод қиламан, - деб ёзди Трамп Твиттерида.

Хабарларга кўра, Америка ҳарбийлари аллақачон Сурия ва Туркия чегарасидаги ҳудуддан чиқиб кета бошлаган. Ҳарбийлар кўчишни бошлашидан бир неча соат олдин Оқ уй Туркиянинг шимолий Сурияда курдлар етакчилигидаги жангчиларга қарши амалиётига тўсқинлик қилмаслигини маълум қилган эди.

АҚШ Хитойдаги мусулмонлар ҳуқуқларини бузаётган давлат ташкилотлари ва ширкатларга санкция жорий қилди

Уйғур қизлари.

Қўшма Штатлар 8 октябрь куни Шинжон- Уйғур мухториятидаги уйғурлар ва бошқа мусулмон миллатлар ҳуқуқларини бузишда гумонланаётган Хитойнинг 28та давлат ташкилоти ва хусусий ширкатни санкциялар рўйхатига киритди.

Қора рўйхатга киритилган ташкилотлар орасида Шинжон-Уйғур мухторияти жамоат хавфсизлиги бошқармаси, унга бўйсунувчи 19та бўлинма ва 8та хусусий ширкат, жумладан, Hikvision компанияси ҳам бор.

Hikvision жаҳонда видеокузатув системаларини ишлаб чиқарувчи энг йирик ширкат ҳисобланади.

АҚШ Савдо вазирлиги баёнотида айтилишича: “Санкция рўйхатига киритилган ширкатлар инсон ҳуқуқларини бузишда, репрессияларга, оммавий тарзда ноқонуний қўлга олишларга, уйғурлар, қозоқлар ва озчиликни ташкил қилувчи бошқа мусулмон халқлар вакилларига нисбатан электрон кузатувни жорий қилганликда айбланмоқда”.

Санкциялар рўйхатига киритилган мазкур ташкилот ва ширкатларга АҚШ ҳукуматининг махсус рухсати берилмагунига қадар Америка технологияларини сотиш тақиқланади.

Hikvision ширкати АҚШ Савдо вазирлигининг баёнотига норозилик билдирди. Ширкат бир неча ой олдин халқаро меъёрлар доирасида фаолият юритаётганини баҳолаш учун инсон ҳуқуқлари бўйича америкалик мутахассисни маслаҳатчи сифатида ёллаганини маълум қилди.

БМТ маълумотларига кўра, Хитойда миллион нафардан ортиқ уйғурлар ва бошқа мусулмонлар “қайта тарбиялаш лагерлари”да сақланмоқда.

Россия ташқи ишлар вазири Сергей Лавров Қозоғистонга келади

Россия ташқи ишлар вазири Сергей Лавров.

Россия ташқи ишлар вазири Сергей Лавров Қозоғистонга қиладиган икки кунлик ташрифи доирасида президент Қасим-Жомарт Тоқаев билан учрашади.

Лавровнинг Нур-Султонга ташрифи 8 октябрда бошланади. У дастлаб Қозоғистон ташқи ишлар вазири Мухтар Тлеуберди билан музокарлар ўтказади.

“Ташқи ишлар вазирлари Россия-Қозоғистон ҳамкорлигига оид муҳим масалаларни, халқаро ва минтақавий ташкилотлар доирасидаги алоқаларни муҳокама қилади”, дейилади расмий билдирувда.

Томонлар жорий йил якунида ўтказилиши кутилаётган ўзаро оммавий тадбирларга тайёргарлик масаласини ҳам кўриб чиқади. Улар орасида Омскда 16- Қозоғистон-Россия минтақавий ҳамкорлиги форуми ва Қирғизистон пойтахти Бишкекда ўтадиган КХШТ саммитига тайёргарлик масалалари ҳам бор.

АҚШ аскарлари Туркия ҳарбий амалиёт ўтказилиши кутилаётган ҳудуддан олиб чиқиб кетилди

Суриялик курдлар Расалайн шаҳрида Туркия ҳарбий амалиётига қарши норозилик билдириш учун АҚШ ҳарбийлари олдига келмоқда.

Туркия ҳарбий амалиёт ўтказишни режалаштирган Суриянинг шарқий ҳудудларидан америкалик 50-100 нафар аскарнинг бошқа жойга кўчирилиши АҚШ қўшинлари олиб чиқиб кетила бошланганини англатмайди. Бу ҳақда 7 октябрь куни Оқ Уйнинг исми айтилмаган расмийси журналистлар билан телефон мулоқоти пайтида маълум қилди.

Аввалроқ Туркия президенти Ражаб Тоййиб Эрдўғон:

-Жаноб президент Дональд Трамп баёнот берганидай, Сурия шимоли-шарқидан АҚШ кучларини олиб чиқиб кетиш бошланди,-деб билдирган эди.

Бир неча кун олдин Эрдўғон турк қўшинлари Фирот дарёси шарқидаги Сурия ҳудудларида ҳарбий амалиётни бошлашга шай эканини билдирганди.

Эрдўғон амалиётдан мақсад Суриянинг Туркия билан чегарадош ҳудудларини АҚШ томонидан қўллаб-қувватланаётган курд жангари отрядларидан тозалаш ва “хавфсизлик зоналари”ни ташкил қилиш эканини айтган.

Анқара курд отрядларини террорчи гуруҳлар сифатида билади. Аммо АҚШ “Ислом давлати” гуруҳига қарши курашда курд жангарилари билан ҳамкорлик қилган ва уларни қўллаб-қувватлаган.

6 октябрь куни Эрдўғон Трамп билан телефон мулоқоти ўтказди. Оқ уй расмийсининг билдиришича, телефон суҳбати пайтида Дональд Трамп Эрдўғонни Туркия амалиёт ўтказган ҳудудларда АҚШ аскарларига зарар етадиган бўлса “катта кўнгилсизликлар бўлиши”дан огоҳлантирган.

Тиббиёт соҳасидаги Нобель мукофоти америкалик ва британиялик олимларга берилди

Физиология ва тиббиёт бўйича 2019 йилги Нобель мукофоти ҳужайралар муҳитдаги кислород миқдорини сезиб, тегишли тарзда мослашишини аниқлаган икки америкалик ва бир британиялик олимга берилди.

7 октябрь куни Стокгольмда жойлашган Каролинска институти эълон қилган билдирувда Уильям Келин, Питер Рэтклиф ва Грегг Семенцлар “тирик ҳаётнинг энг муҳим мослашув жараёнлари механизмини кашф этгани” айтилади.

“Улар кислород даражаси қай йўсинда ҳужайра метаболизми ҳамда физиологик функциясига таъсир кўрсатишини тушунишимизга асос яратишди. Уларнинг кашфиётлари, шунингдек, анемия, саратон ва бошқа кўплаб касалликларга қарши янги стратегиялар учун йўл очди”, дейилади институт баёнотида.

Учала олим 9 миллион крон ($918,000 АҚШ доллари) нақд пул мукофоти билан тақдирланади.

Бу йилги мукофот 1901 йилдан бери физиология ва тиббиёт бўйича берилган 110-мукофот бўлди.

8 октябрда физика, унинг эртаси кимё бўйича бу йилги ғолиблар номлари эълон қилинади. Адабиёт бўйича мукофот 10 октябрда, Нобель-Тинчлик мукофоти эса 11 октябрь куни эълон қилинади.
Иқтисод бўйича Нобель мукофоти совриндори исми эса 14 октябрда эълон қилинади.

Адабиёт бўйича Нобель мукофотини Швеция академияси, физика, кимё ва иқтисод бўйича мукофотларни Швеция Қирол фанлар академияси, Нобель-Тинчлик мукофотини эса Норвегия пойтахти Ослода жойлашган Норвегия Нобель қўмитаси топширади.

Минскда Россия билан интеграцияга қаршилар норозилик акциясини ўтказди

Аляксандр Лукашенка

Минск шаҳрининг “Озодлик” майдонида ўнлаб одам Беларуснинг Россия билан потенциал интеграциясига қарши норозилик акциясига чиқди.

Акцияни таниқли мухолифатчи ҳамда президентликка собиқ номзод Макалай Статкевич уюштиргани айтилмоқда.

Статкевич жорий президент Аляксандр Лукашенкани назарда тутиб, “Бу шахс мамлакатимиз, давлатимизни сотиши керакми?” деди.

“Коммерсантъ” ва бошқа рус нашрларида декабрь ойида Россия ва Беларусь келажакда интеграциялашув режасини имзолаши ҳақида хабар бериши ортидан, Беларусда Москва билан яқиндан алоқа ўрнатишга қаршилар орасида хавотир уйғонди.

Матбуот хабарларига кўра, Россия ва Беларус ўртасида иттифоқ келишуви имзоланганига 20 йил тўлган кун – 8 декабрда Лукашенка ва Россия президенти Владимир Путин қатор келишувни имзолайди.

1999 йили имзоланган келишувда ягона валюта, банк ва солиқ тизимини жорий қилиш назарда тутилган эди. Аммо имзоланиши кутилаётган янги келишувларда ягона солиқ кодекси ҳамда солиқ сиёсатининг айрим жиҳатларини бирлаштириш кўзда тутилгани хабар қилинди.

Оқ уй: Туркия шимолий Сурияда амалиёт бошлайди

Дональд Трамп

Оқ уй Туркия Сурия шимолига юриш режасини амалга оширишини маълум қилди. Бундан эса АҚШ қўллаб келган курд жангчилари тақдири мавҳум қолади.

Президент Дональд Трамп маъмурияти бу ҳақда 6 октябрь куни эълон қилди. Ўша куни Туркия президенти Ражаб Тоййиб Эрдўғон Трамп билан телефонда суҳбат қилганини, икки етакчи кейинги ойда Вашингтонда учрашишга келишиб олганини маълум қилган эди.

Оқ уй баёнотида АҚШ Туркиянинг “кўпдан бери режалаштирилиб келаётган амалиётини қўлламайди ёки унда қатнашмайди”, дейилади.

Шунингдек, билдирувда АҚШ қўшинлари амалиёт ўтказиладиган ҳудудда қолмаслиги айтилган.

Бундан нари қўлга олинган “Ислом давлати” жангарилари тақдири Туркия қўлида бўлади. Оқ уй билдирувига кўра, жангариларни асл ватанлари бўлмиш Франция, Германия ва бошқа Европа давлатлари қайтиб олишдан бош тортган.

Туркия АҚШ, Россия ва Эронни Сурия шимолида “хавфсизлик зонасини” ўрнатишга чақириб келади.

Эрдўғоннинг сўзларига кўра, бундай зона Фрот дарёси шарқий соҳилида яратилади. Сурияда 2011 йилдан бери тинчимаётган фуқаролар урушида минглаб одам ҳалок бўлди.

Қирғизистондаги иккита кўмир конида олти шахтёр ҳалок бўлди

Қирғизистондаги ташландиқ кўмир конларидан бирида кўмир қазиётган одамлар.

Қирғизистоннинг Қизилқия ва Сулукта шаҳарларидаги иккита кўмир конида икки кун ичида кетма-кет юз берган фалокатларда олти нафар одам ҳалок бўлди.

Озодлик радиоси қирғиз хизматининг билдиришича, 6 октябрь куни тушдан кейин Қизилқиядаги кўмир конларидан бирида бахтсиз ходиса туфайли уч киши ҳалок бўлган. Расмийлар ҳодиса тафсилотлари ҳақида ҳозирча маълумот бермаяптилар.

Сулукта шаҳридаги ҳодиса эса 5 октябрда юз берган. Кўмир конида газдан заҳарланган беш одам касалхонага келтирилган. Улардан уч нафари хушига келмай вафот этган, қолган икки нафарининг аҳволи яхшилангани билдирилди. Вафот этганларнинг барчаси ака-укалар бўлган.

Расмий маълумотларга қараганда, Қирғизистонда 2017 йилда конларда 26 ҳалокат юз берган ва уларда 24 одам вафот этган. 2018 йилда шахталарда қанча одам ҳалок бўлгани тўғрисида маълумотлар мавжуд эмас.

Тожикистон Суриядаги ватандошларини олиб келмоқчи

Иллюстратив сурат.

Тожикистон ҳукумати Суриядаги қочқинлар лагерларида яшаётган тожикистонлик аёллар ва болаларни ватанларига қайтаришга тайёрлигини билдирди.

Аввалроқ БМТ Суриядаги лагерларда қочқинлар чидаб бўлмас даражадаги оғир шароитларда яшаётганини маълум қилганди.

Тожикистон Ташқи ишлар вазирлиги 5 октябрда тожик дипломатлари бу масалада Сурия ҳукумати вакиллари билан учрашганлари ҳақида хабар берди. Дипломатлар Тожикистонга қайтарилиши кутилаётган одамларнинг шахси ва аниқ сонини ўрганишмоқда.

Тожик томони эга бўлган маълумотларга қараганда, Суриядаги қочқинлар лагерларида 575 аёл ва бола сақланмоқда. Уларнинг асосий қисми “Ислом давлати” сафига қўшилган оилаларнинг вакилларидир.

Тожикистон жорий йил баҳорида Ироқдан 84 тожик боласини ватанига олиб келган эди. Бу болаларнинг оталари жангарилар сафларида ҳалок бўлган, оналари эса узоқ муддатга қамалган.

Тожикистон ҳукуматининг билдиришича, 2014 йилдан бери 1900 нафар тожикистонлик Сурия ва Ироққа кетиб, “Ислом давлати” гуруҳига қўшилган.

Ироқдаги намойишларда ҳалок бўлганлар сони 104 кишига етди

Ироқдаги намойишларда ҳалок бўлганлардан бирининг дафн маросими.

Ироқда 1 октябрдан бери аксилҳукумат намойишига чиққанларнинг полиция билан тўқнашувларида камида 104 одам ҳалок бўлди.

Ички ишлар вазирлиги 6 октябрь куни яраланганлар сони 6107 нафарга етганини, улардан 1200 нафари хавфсизлик ходимлари эканини билдирди. Ҳалок бўлганлардан саккиз нафари полициячидир.

Расмий маълумотларга қараганда, норозилар 51та жамоат биноси ва саккизта сиёсий партия штаб-квартирасига ўт қўйган.

-Биз сиёсий партияларни хоҳламаймиз. Юз одам ўлган бўлсада, кўчага яна бизга ўхшаган миллион одам чиқади,-деди норозилардан бири.

Бағдодда ишсизлар сони ортиб бораётгани ва яшаш шароити ёмонлашаётганидан ғазабланган кишилар 1 октябрдан бошлаб норозилик намойишларига чиқа бошлади. Шундан сўнг мамлакатнинг шиалар кўп яшайдиган жанубий ҳудудларида ҳам норозилик намойишлари бошланиб кетган эди.

Туркия Сурия билан чегарага қўшимча ҳарбий кучларни жалб қилмоқда

Сурия чегарасидаги турк ҳарбий техникаси.

Туркия Акчақала минтақасида Сурия билан чегарадош ҳудудларга қўшимча аскарлар ва ҳарбий техникани жалб қилишни бошлади. Президент Ражаб Тоййиб Эрдўғон турк қўшинлари Фирот дарёси шарқидаги Сурия ҳудудларида ҳарбий амалиётни бошлашга шай эканини билдирди.

Эрдўғон амалиётдан мақсад Суриянинг Туркия билан чегарадош ҳудудларини АҚШ томонидан қўллаб-қувватланаётган курд жангари отрядларидан тозалаш ва “хавфсизлик зоналари”ни ташкил қилиш эканини айтди.

Анқара курд отрядларини террорчи гуруҳлар сифатида билади. Аммо АҚШ “Ислом давлати” гуруҳига қарши курашда курд жангарилари билан ҳамкорлик қилган ва уларни қўллаб-қувватлаган.

Эрдўғон 6 октябрь куни ҳарбий амалиётни бошлаш тўғрисида яқин соатларда қарор қабул қилинишини билдирган.

Туркия 2016 йилда Сурияда президент Башар Ассадга қарши “Фирот қалқони” ҳарбий амалиётини ўткизган эди. 2018 йилда эса Туркия ҳарбийлари Сурияда курд жангариларига қарши қатор амалиётларни амалга оширган.

Косоводаги парламент сайловида мухолифатчи партиялар ғолиб бўлди

Косоволик аёллар овоз бермоқда.

Косоводаги иккита асосий мухолифат партияси - Косово Демократик Лигаси ва Ветевендоше 6 октябрда ўтган навбатдан ташқари парламент сайловида мамлакатни 12 йилдан бери бошқариб келган ҳукмрон партия устидан ғалаба қозонди.

Овозларнинг 80 фоизи санаб бўлинганидан сўнг маълум қилинишича, миллатчиларнинг Ветевендоше партияси 26 фоиз, Косово Демократик Лигаси 25 фоиз овоз олган. Косовога 12 йил ҳукмронлик қилган Косово Демократик партияси эса 22 фоиз овозга эгалик қилмоқда.

Косово Демократик партияси лидери Кадри Весели партия мағлубиятга учраганини ва сайлов натижаларини тан олишини билдирди. Унга кўра, бундан буён собиқ ҳукмрон партия мухолифатда бўлади.

Сайловнинг якуний натижалари 7 октябрь куни эълон қилинади. Расман маълум қилинишича, 1,9 миллион сайловчининг 44 фоизи сайловда овоз берган. Бу ўтган йиллардаги кўрсаткичларга қараганда анча кўпдир.

Косово 2008 йили Сербиядан мустақиллик эълон қилгандан бери тўртинчи марта парламент сайловини ўтказмоқда.

Косово парламенти 120 депутатлик ўрнидан иборат. Парламентдаги 120 та ўриндан 10 таси этник серблар ва яна 10 таси этник турклар ва лўлилар учун ажратилади.

БМТ расмийси Ироқдаги зўравонликни дарҳол тўхтатишга чақирди

БМТ бош котибининг Ироқдаги махсус вакили Жанин Ҳеннис-Пласшерт Ироқдаги норозиликларга қарши зўравонликни қоралади ҳамда беш кунда ҳалок бўлганлар сони 100 кишига яқинлашиб қолгани хабар қилингандан сўнг: “Бу жараён тўхтатилиши шарт!” деб айтди.

Мен барча томонларни тўхтаб, ўйлаб кўришга чақираман. Зўравонлик учун масъул кишилар жавобгарликка тортилиши керак. Бутун Ироқда бирдамлик руҳи устун бўлиши зарур, − деди ва “одамлар ҳалок бўлганидан чуқур қайғуга ботдим”, дея қўшимча қилди у.

Ироқ парламентининг инсон ҳуқуқини ҳимоя қилиш масалалари бўйича комиссияси маълумотига кўра, 1 октябрдан бери 99 киши ўлдирилган, деярли 4000 киши ярадор бўлган.

Ишсизлар сони ортиб бораётгани ва яшаш шароити ёмонлашаётганидан ғазабланган кишилар ҳукуматга қарши, дастлаб пойтахт Бағдодда, сўнгра мамлакатнинг шиалар кўп яшайдиган жанубий ҳудудларида норозилик намойишларига чиқди.

Ушбу қадам амалдорлар ўртасидаги коррупцияга барҳам бериш ва ҳукуматни алмаштиришдай кенг миқёсли норозилик намойишларига айланиб кетди.

Ироқ шиаларининг машҳур руҳонийси Муқтадо ас-Садр 4 октябрда ҳукуматни истеъфога чиқишга ва янги сайлов ўтказишга даъват этди.

Косоволиклар навбатдан ташқари парламент сайловида овоз бермоқда

Косоводаги навбатдан ташқари парламент сайловида овоз бериш бошланди.

1,9 миллион киши сайловда овоз бериш ҳуқуқига эга. Улар 2008 йили Косово Сербиядан мустақиллик эълон қилгандан бери бўлиб ўтаётган тўртинчи сайловида 120 нафар парламент аъзосини сайлаши керак.

Гаагадаги Халқаро ҳарбий трибунал прокурорлари июль ойида бош вазир Рамуш Ҳарадинайни Косово озодлик армияси командири сифатида уруш даврида қилган ишлари бўйича сўроққа чақиргандан сўнг истеъфога чиқиши сабаб янги сайлов эълон қилинган эди.

Сайлов олдидан коррупция, ишсизлар кўплиги ҳамда Косовонинг Сербия билан БМТга аъзолигига йўл очиши мумкин бўлган тинчлик битими имзолаш ҳақидаги масалалар кўтарилган сайловолди кампанияси бўлиб ўтган эди.

Ҳарадинай бошлиқ уч партияли бошқарув коалицияси ҳисоботидан жамоатчилик норози бўлгани ўнг марказчи Косово демократик лигаси (ЛДК) ҳамда миллиятчи ва сўл “Ветевендошйе” партияси биринчи ўринни олиш учун курашмоқда.

ЛДК етакчиси Вйоса Усмонийни ҳисобга олмаганда, барча бош вазир лавозимига асосий даъвогарлар Косово озодлик армияси аъзоларидир.

Этник албанлардан иборат бўлгинчи халқ лашкаридан иборат ушбу армия 1998-99 йиллардаги Косово урушида Сербия ҳокимият идораларига қарши жанг қилган ва уруш НАТОнинг кўпсонли этник албанлар ёнини олган аралашуви билан якун топган эди.

Парламентдаги 120 та ўриндан 10 таси этник серблар ва яна 10 таси этник турклар ва лўлилар учун ажратилади.

Давомини ўқинг

XS
SM
MD
LG