46 миллион сайловчи олдидан овоз бериб бўлган
Америка тарихида рекорд даражада, яъни 46 миллион сайловчи аввалдан овоз беришда қатнашди.
Яъни АҚШдаги сайловчиларнинг 40 фоизи олдиндан овоз бериб бўлган.
Сайлов натижалари 9 ноябрь куни Тошкент вақти билан эрталаб эълон қилинади.
Сайловда ғолиб чиққан номзод АҚШнинг 45инчи президенти сифатида Американинг илк қора танли президенти Барак Обама ўрнини эгаллайди.
Янги президент 20 январь куни қасамёдга келтирилади ва расман лавозимига киришади.
АҚШнинг Ню Ҳэмпшир штатидаги тунда овоз бериш мумкин бўлган шаҳарчаларида Ҳиллари Клинтон кўп овоз қозонган.
Трампга қарши намойиш ўтказган ярим яланғоч аёл ушланди
Нью-Йорк шаҳрининг Дональд Трамп овоз берган сайлов участкасида намойиш ўтказган икки ярим яланғоч аёл полиция томонидан ҳибсга олинди.
Манҳэттендаги сайлов участкаси ичкарисига кирган икки ярим яланғоч аёлнинг Украинадаги "Фемин" феминистлар ташкилотидан бўлгани хабар қилинади.
Белидан юқориси яланғоч бўлган аёллар "Трамп сайловдан даф бўл" дея бақирганлар.
Трамп ушбу сайлов участкасида икки соат кейинроқ овоз берди.
АҚШдаги сайлов қонунларига кўра, сайлов участкалари ёки яқинида бир номзод фойдасига ёки унга қарши намойиш ўтказиш жиноят ҳисобланади.
Полиция икковлонга нисбатан жиноий иш очганини айтди.
Politico: Америкаликлар президент кампаниясидан дарғазаб
Америкаликлар энг аввало Оқ Уйда кучли лидерни кўришни истайди.
Politico журналининг аввалроқ овоз берган сайловчилар орасида ўтказган сўрови ана шундай натижани кўрсатди.
Бу америкаликларнинг 36 фоизи учун кимга овоз беришда энг асосий мезон бўлган.
Аввалги президент сайловида Оқ Уйда кучли раҳбарни кўриш истаги сайловчиларнинг бор-йўғи 18 фоизида бўлганди.
Сўровда иштирок этганларнинг 29 фоизи эса келажак ҳақида аниқ тасаввурга эга бўлган номзоднинг раҳбар бўлишини истаган.
16 фоиз респондент учун улар қадриятига шерик бўлган ва сайловчилар ҳақида қайғурган номзоднинг ғалаба қилиши муҳим экани аниқланди.
Аммо, респондентларнинг 85 фоизи бу йилги сайловларнинг тезроқ битишини исташларини айтган.
Сўров иштирокчиларининг ярмидан кўпроғи сайлов кампаниясидан дарғазаблиги ва 39 фоизининг кайфияти тушганини билдирган.
Улардан фақат 25 фоизигина сайлов кампаниясидан фахрланиши ва бахтиёр эканини айтган.