Линклар

Шошилинч хабар
08 декабр 2021, Тошкент вақти: 18:20

Халқаро хабарлар

Беларусда намойишлар 4 ойдан бери тўхтамаяпти

Беларус хавфсизлик кучлари ходимлари.

Беларус хавфсизлик кучлари 6 декабрь куни мамлакат бўйлаб президент Александр Лукашенкога қарши ўтган митингларда камида уч юз кишини қўлга олди.

Минск ва бошқа шаҳарларда норозилар ўз мавзеларида “Қўшнилар марши” деб аталган намойишларни ўтказдилар.

Беларус мухолифати намойишларни марказлаштирилган тарзда ўтказиш ғоясидан воз кечиб, айни кунларда мавзеларда митинглар ўтказиш стратегиясини танлаган.

Беларусда 9 августда ўтган президентлик сайловида амалдаги президент Лукашенко ғолиб бўлгани эълон қилинганидан бери деярли ҳар куни минлаб одамлар намойишга чиқмоқда. Намойишлар 4 ойдан бери давом этмоқда.

Лукашенко мамлакат учун конституциявий ислоҳот зарурлигини айтиб, Беларусь конституциясига ўзгартишлар киритилганидан кейин лавозимдан кетишини айтмоқда.

Бироқ бундай ўзгартишлар айнан қачон киритилиши ва нималарни ўзида акс эттириши маълум эмас, Лукашенко лавозимдан кетиши лозим бўлган сана ҳам белгиланмаган.

Кун янгиликлари

Австралия АҚШнинг Пекинда ўтадиган Қишки Олимпиадани дипломатик байкот қилиш ташаббусига қўшилди

Австралия Бош вазири Скотт Моррисон.

Австралия Бош вазири Скотт Моррисон ўз мамлакати АҚШнинг Пекинда ўтадиган Қишки Олимпиадани дипломатик байкот қилиш ташаббусига қўшилганини билдирди.

Моррисоннинг 8 декабрда журналистларга билдиришича, Хитой Австралия билан муносабатларда юзага келган қатор муаммоларни, жумладан, Шинжон-Уйғур минтақасида инсон ҳуқуқлари бузилишини бартараф этишни истамаяпти. Бу эса Хитойнинг Австралия билан икки томонлама муносабатларида кескинликни пайдо қилмоқда.

“Шунинг учун ҳам Австралия ҳукумати расмийлари Олимпия ўйинларида иштирок этиш учун Хитойга бормайди, аммо австралиялик спортчилар ўйинларда қатнашади”,-деди Бош вазир.

Хитой томони эса Австралияни муносабатларни яхшилаш учун дипломатик қадамларни ташлашга чақирди.

7 декабрь куни Оқ уй матбуот котиби Жен Псаки АҚШ Хитойдаги Олимпия ўйинларига дипломатик бойкот эълон қилгани тўғрисида билдирган эди. Мулозима, бойкотга қарамай, америкалик спортчилар Олимпиадада иштирок этишлари мумкинлигини қўшимча қилди.

“ХХР томонидан Шинжонда геноцид ўтказилаётгани ва бошқа инсон ҳақлари бузилаётганини эътиборга олган ҳолда, Байден маъмурияти 2022 йилдаги Пекин қишки Олимпиадаси ва Паралимпиадасига дипломатик ёки расмий делегацияни жўнатмайди”, - деган Жен Псаки брифингда.

Пекиндаги Қишки Олимпиада 2022 йилнинг 4 февралидан 20 февралигача бўлиб ўтиши режаланган. АҚШ сўнгги бор 1980 йили Москвада ўтказилган Олимпия ўйинларига тўла бойкот эълон қилган эди.

Коронавирус бўйича экспертлар Omicron штамми унча хавфли эмаслигини айтмоқда

Omicron штаммининг кўриниши.

Дастлабки тадқиқотлар коронавируснинг Omicron штамми тез тарқалишини, аммо у коронавируснинг бошқа штаммларига нисбатан хавфсизроқ эканини кўрсатди. Бу ҳақда АҚШ ҳукуматининг юқумли касалликлар бўйича бош мутахассиси Энтони Фаучи 7 декабрь куни маълум қилди.

Оқ Уйда ўтган брифингда Фаучи Omicron штамми оқибатларини тўлиқ ўрганиш учун бир неча ҳафта вақт керак бўлишини айтди. Унга кўра, кейинги ҳафтада коронавирусга қарши амалдаги вакциналарнинг мазкур штаммга таъсири юзасидан ўтказилган тадқиқот натижалари эълон қилинади.

Кейинги бир неча ҳафта ичида Оmicron штаммига чалинганлар сони Delta штаммига чалинганлар сонидан ўтиб кетиши кутилмоқда.

Айни пайтда Ҳарвард университети тадқиқотчиси Стивен Кисслер Оmicron штамми бошқа штаммларга қараганда хавфсиз экани тўғрисида оптимистик баёнотлар қилишга ҳали эрта деб ҳисоблайди.

Олаф Шольц Германия канцлери лавозимини бажаришга киришмоқда

Олаф Шольц раҳбарлигидаги социал-демократлар партияси сайловда кўпчилик овозни олган эди.

Олаф Шольц 8 декабрь куни Ангела Меркель ўрнига Германия канцлери лавозимини бажаришга киришиши кутилмоқда.

63 ёшли Шольц Бундестаг томонидан расман кейинги 4 йилга канцлер лавозимига сайланди ва президент Франк-Вальтер Штайнмайер томонидан қасамёдга келтирилди.

Молия вазири ва Меркель ҳукуматида вице-канцлер бўлган Олаф Шольц раҳбарлигидаги социал -демократлар партияси 26 сентябрда Бундестагга бўлиб ўтган сайловда кўпчилик овозни олган эди. Бу билан Меркелнинг христиан-демократлар партияси сўнгги 16 йилда биринчи марта парламентда озчилик ўринга эга бўлди.

Қаторасига тўрт муддат канцлер бўлган 67 ёшли Ангела Меркель эса сиёсатдан кетишини эълон қилди.

Янги ҳукумат яшил иқтисодиётга ўтишни ва рақамлаштиришни тезлаштиришга, аҳолини арзон-уй жой билан таъминлашга, ойлик иш ҳақининг энг кам миқдорини кўпайтиришга ва марихуанани легаллаштиришга ваъда бермоқда.

Сауле Умарова АҚШ Молия вазирлиги бошқарма бошлиғи лавозимига номзод бўлишдан воз кечди

Сауле Умарова

Президент Жо Байден томонидан АҚШ Молия вазирлиги валюта назорати бошқармаси бошлиғи лавозимига номзод ўлароқ тавсия этилган асли қозоғистонлик Сауле Умарова ўз номзодини қайтариб олди.

Оқ уй хабарномасига кўра, Умарова айрим республикачи сенаторлар унинг номзодига шубҳа билдиргани ва “коммунист аёл” деб атагани, шунингдек демократлар унинг банк ислоҳотига доир позициясидан хавфсирагани ортидан шундай қарорга келган.

Сенатда ўтган ойда бўлиб ўтган муҳокамаларда Республикачилар партияси вакиллари Умаровага унинг болалиги ва ёшлиги, чунончи комсомолга аъзо бўлгани ҳақида саволлар беришган.

Хусусан, сенатор Пэт Туми Умаровадан МДУда ўқиган йиллари ва Карл Маркс ҳақида ёзган илмий мақолалари билан қизиққан. Яна бир республикачи сенатор Жон Кеннеди эса “Билмадим, сизни профессор деб аташ керакми ёки ўртоқ дебми?” дея кесатган.

Сенатдаги демократлар, аксинча, Умаровани ҳимоя қилишга уринганлар ва унга нисбатан ҳужумларни АҚШда Иккинчи жаҳон урушидан сўнг кузатилган “коммунизм ваҳимаси” даврига қиёслаганлар.

Оқ уй номзоди ўз изоҳида коммунист эмаслиги, ушбу мафкурани ёқламаслиги ва “таваллуд жойини танлаш имконига эга бўлмаган”ини таъкидлаган.

Сауле Умарова Қозоғистон ССР ҳудудида туғилган ва 1991 йилда АҚШга кўчиб кетган, кейинроқ бу мамлакат фуқаролигини олган.

Қозоғистонда давлат мустақиллигининг 30 йиллиги муносабати билан амнистия эълон қилинди

Қозоғистон президенти Қосим-Жўмарт Тоқаев 7 декабрь куни “Қозоғистон мустақиллигига 30 йил тўлиши муносабати билан амнистия тўғрисида”ги қонунни имзолади.

Ушбу қонун ижтимоий оғирлиги катта бўлмаган ва ўртача жиноятлар учун қамоқ жазосини ўтаётганларни муддатидан олдин озод этишни, шунингдек айрим оғир ва ўта оғир жиноятлар бўйича қамоқнинг ўталмаган муддатини қисқартиришни назарда тутади.

Маҳаллий нашрлар хабарига кўра, асосий эътибор ижтимоий ҳимояга муҳтож тоифалар – фуқаролар ва давлат хавфсизлигига жиддий таҳдид солмайдиган ветеранлар, вояга етмаганлар, кексалар, биринчи ва иккинчи гуруҳ ногиронларига қаратилади.

Дастлабки ҳисоб-китобларга кўра, амнистияга 14 мингдан ортиқ одам тушади. Қамоқхоналардан мингга яқин киши озод этилади, 3.8 минг одам пробация хизмати ҳисобидан ўчирилади. Шунингдек, тахминан 9 минг маҳкумнинг жазо муддати қисқартирилиши ва судгача иш юритувда бўлган 5 мингга яқин жиноят иши амнистияга кўра тугатилиши кутилмоқда.

Бугунги кунда Қозоғистондаги 64 та колония ва 16 та тергов ҳибсхонасида 34 мингдан ортиқ одам сақланмоқда. ИИВ статистикасига мувофиқ, 93 фоиз маҳкум оғир ва ўта оғир жиноятлар учун қамоқ жазосини ўтамоқда, улардан қарийб 45 фоизи муқаддам жиноий жавобгарликка тортилган. Бундан ташқари, 32 мингдан ортиқ киши пробация хизмати рўйхатида туради.

Путин ва Байденнинг видеоалоқа орқали суҳбати икки соат давом этди

Жо Байден (ч) ва Владимир Путин (ў) видеоалоқа орқали 7 декабрь куни ўтказилган музокаралар чоғида (коллаж)

АҚШ ва Россия президентлари Жо Байден ва Владимир Путин жорий йилнинг 7 декабрь куни видеоалоқа орқали музокара олиб боришди.

Суҳбат Тошкент вақти билан 20.00 ларга яқин бошланиб, маълум қилинишича, 2 соату 5 дақиқа давом этган. Мулоқот матбуот учун ёпиқ режимда бўлиб ўтган.

Музокаралар якуни бўйича қўшма баёнотлар берилмаган. Суҳбат тугаганидан сўнг тахминан бир соат ўтиб, Оқ уй сайтида қисқа хабарнома пайдо бўлган.

Унда Байден ва Путин Россия-Америка муносабатларига доир кўплаб масалаларни муҳокама қилишгани айтилган. Хусусан, Байден Россиянинг Украина чегараларида ҳарбий қудратини ошираётгани АҚШ ва унинг Европадаги иттифоқчиларини чуқур хавотирга солаётганини билдириб, ҳарбий эскалация бўлган тақдирда иқтисодий ва бошқа чоралар билан жавоб берилишини англатган.

АҚШ президенти Украина северенитети ва ҳудудий яхлитлигини дастаклашини урғулаб, дипломатик музокараларга қайтишга чақирган. Хабарномага кўра, президентлар ўз жамоаларига ушбу масалани ўрганишда давом этишга кўрсатма беришган. Томонлар стратегик барқарорлик, киберхавфсизлик ва Эронга оид масалаларни ҳам муҳокама қилганлар.

Россия президенти сайтидаги хабарномада музокараларнинг асосий мавзуси Украина бўлгани тасдиқланган, аммо Россия талқинига кўра, гап “Украина ичидаги инқироз” ва “Минск келишувларини бажаришда олдинга силжиш йўқлиги” ҳақида борган. Маълум қилинишича, Путин Украина расмийларини “Донбассга қарши фитна қўзғаш”да айблаган.

Кремль стенограммасида Жо Байден Россияга, агар у “вазиятни кескинлаштиришда давом этгудек бўлса”, янги санкциялар билан таҳдид қилгани тасдиқланган. Путин эса ўз навбатида Россия “НАТОнинг шарққа томон кенгайиши ва Россияга туташ давлатларда зарба берувчи ҳужум қуролларини жойлаштиришини истисно этувчи” кафолатлардан манфаатдорлигини билдирган.

Телекўприк илк бор ҳимояланган видеоалоқа линияси ёрдамида ташкил қилинган. Мулоқот чоғида Путин – Сочида, Байден эса Оқ уйдаги ситуацион хонада бўлган.

Bloomberg агентлиги хабарига кўра, Байден Россия раҳбари билан музокаралар якунларини Европадаги иттифоқчилари билан муҳокама қилмоқчи.

Москвада ниқоб можароси ортидан отилган ўқдан икки киши нобуд бўлди

Иллюстратив сурат

Москва жанубидаги “Рязанский” кўп тармоқли марказида номаълум шахс ўқотар қуролни ишга солди. Дастлабки маълумотларга кўра, икки киши – марказ маъмури ва қўриқчи ҳалок бўлган. Бу ҳақда "112" телеграм-канали хабар қилди. Маълумотни Москва мэри Сергей Собянин тасдиқлади.

Ўқ отилиши натижасида ёш бола дохил уч киши жабрланган. Ҳозир улар касалхонада муолажа олмоқда. Ҳодиса юзасидан қотиллик ва ноқонуний қурол сақлаш бўйича жиноят иши очилган.

РБКнинг полициядаги манбаси ўқ отган кишининг исми Сергей Глазов эканини маълум қилган. Readovka телеграм-канали унинг собиқ ҳарбий разведкачи эканини ёзган. Иддаоларга кўра, Глазов марказга гўё носоғ ҳолда келиб, ниқоб тақиш талабини рад этиб, жанжал кўтарган.

Унинг ёнида жанговар ўқ отиш қуролига айлантирилган травматик тўппонча ва ичига симлар солинган халта бўлган. "112" канали қўлга олинган шахс жиноятни нима сабабдан амалга оширганини очиқламаётгани, бироқ терговчиларга пандемия ва фитна назарияси ҳақида гапираётгани ҳақида хабар қилган.

Москва мэри Сергей Собянин ва Россия президенти Владимир Путин можаро чоғида метронинг янги станцияларида поезд ҳаракатининг тантанали очилиш маросимида иштирок этаётган бўлганлар. Бироқ фожиа ортидан мазкур тадбир бекор қилинмай, давом эттирилаверган.

Францияда журналист Жамол Ҳашогги ўлимида гумонланаётган шахс ҳибсга олинди

Саудиялик диссидент ва журналист Жамол Ҳашоггининг Лондондаги анжуманда қилган чиқишидан лавҳа, 2018 йил 29 сентябри

Францияда саудиялик журналист Жамол Ҳашогги ўлимига алоқадорликда гумонланган шахс ҳибсга олинди. Холид Айёд ал-Утайбий, Франция нашрлари хабарларига кўра, 7 декабрь куни Париждаги “Шарль-де-Голль” аэропортида қўлга олинган. У журналист ўлимига оид иш бўйича Туркия томонидан қидирувга берилган 26 нафар саудияликнинг бири бўлиб ҳисобланади, дея хабар қилди Би-би-си.

Саудия қироллик гвардияси хизматчиси бўлган 33 ёшли ал-Утайбий Францияга ўз номига берилган ҳужжат билан келган ва қўлга олинганидан кейин ҳибсхонага жойлаштирилган.

Саудия Арабистони ҳукумати танқидчиси Жамол Ҳашогги 2018 йил октябрида ўз мамлакатининг Истанбулдаги консуллиги биносида ўлдирилган эди.

Қироллик расмийлари Washington Post газетаси собиқ шарҳловчиси Ҳашогги уни ватанга қайтишга ишонтириши лозим бўлган агентлар гуруҳи томонидан ўтказилмиш “манфур амалиёт” қурбонига айланганини билдиришган.

Туркия расмий манбалари эса агентлар Ар-Риёддаги энг юқори мақомли шахслар томонидан берилган буйруқ асосида ҳаракатланганларини таъкидлаб келишади.

Қирғизистон: МСК парламент сайловининг якуний натижаларини эълон қилди

Бишкекдаги участка сайлов комиссияларидан бирининг вакиллари, 2021 йил 28 ноябри

Қирғизистон Марказий сайлов комиссияси ахборот-сайлов тизимида (АСТ) 7 декабрь куни овозларни қўлда санаш якуний натижалари эълон қилинди.

Сайлов варақалари 100 фоиз санаб бўлинганидан сўнг 5 фоизлик сайлов тўсиғидан олти партия ўтган, булар “Ата-Журт Қирғизстан” (17,3%), “Ишеним” (13,63%), “Интимақ” (10,99%), “Альянс” (8,34%), “Бутун Қирғизстан” (7,04%) ҳамда “Ийман Нуру” (6,15%) партияларидир.

Ўттиз олтита бир мандатли округдан 34 нафар номзод сайланган. Икки сайлов участкасида “барча номзодларга қарши” овозлар устунлик қилган, эндиликда ушбу участкаларда қайта сайлов ўтказилади.

Қирғизистонда парламент сайлови шу йилнинг 28 ноябрь куни бўлиб ўтган. Унда сайловчилар нафақат партияларга, балки унинг рўйхатидаги муайян номзодга ҳам овоз бериши мумкин бўлган. Жўғўрқу Кенешнинг 90 бўлғуси депутатидан 54 нафари шу тариқа сайланган, қолган 36 депутат мамлакатнинг бир мандатли округларини тамсил этади.

Мухолифат партиялари овоз бериш натижалари сохталаштирилганини таъкидламоқда. Сайлов куни овозларни автомат тартибда санаш тизимида носозлик чиқиши, сайт қайта ишга тушганидан сўнг эса мухолифат партиялар тўплаган овозлар сони кескин камайиб қолиши сайловнинг холислигини шубҳа остида қолдирмоқда.

Нью-Йоркдаги сайловда АҚШ фуқароси бўлмаганлар ҳам овоз бериш ҳуқуқига эга бўлиши мумкин

Нью-Йорк шаҳри манзараси

АҚШ фуқароси бўлмаган Нью-Йорк турғунлари маҳаллий сайловда овоз бериш ҳуқуқига эга бўлиши мумкин. Бунга оид қонун лойиҳасини шаҳар кенгаши ва мэрия дастаклашга чоғланмоқда.

Мазкур ҳужжат қабул қилинган тақдирда, мэр, шаҳар кенгаши аъзолари ва бошқа мансабдор шахсларни сайлашда Америка фуқароси бўлмаган 800 мингга яқин одам иштирок этиш ҳуқуқига эга бўлади. Айни пайтда фуқаро бўлмаган шахслар аввалгидек президент ёки Конгресс аъзолари сайловида, шунингдек, штат губернатори, депутатлари ва судьяларини сайлашда иштирок эта олмаслиги айтилмоқда.

Қонун лойиҳаси шаҳар кенгашида кенг кўламли қўлловга эга бўлган. Нью-Йорк мэри Билл де Блазио унга вето қўймаслигини билдирган.

Сўнгги маълумотларга кўра, Нью-Йоркда агломерациялар аҳолисини ҳисобга олмаганда жами 9 миллионга яқин одам яшайди. Улардан 7 миллиони овоз бериш ҳуқуқига эга.

АҚШ Пекиндаги Олимпия ўйинларига дипломатик бойкот эълон қилди

АҚШ Хитойдаги Олимпия ўйинларига дипломатик бойкот эълон қилади. Бу ҳақда Оқ уй матбуот котиби Жен Псаки билдирди. Мулозима, бойкотга қарамай, америкалик спортчилар Олимпиадада иштирок этишлари мумкинлигини қўшимча қилди.

“ХХР томонидан Шинжонда геноцид ўтказилаётгани ва бошқа инсон ҳақлари бузилаётганини эътиборга олган ҳолда, Байден маъмурияти 2022 йилдаги Пекин қишки Олимпиадаси ва Паралимпиадасига дипломатик ёки расмий делегацияни жўнатмайди”, деган Жен Псаки брифингда.

Аввалроқ Хитойдаги Олимпиадага дипломатик бойкот эълон қилиниши эҳтимоли ҳақида АҚШ президенти Жо Байден гапирган эди. У Шинжонда уйғурларга босим ўтказилаётгани, Тибет ва Ҳонконгда инсон ҳақлари бузилаётганини бунга сабаб ўлароқ келтирган.

АҚШ ташаббусини Австралия дастаклаб чиққан, бироқ бу мамлакат Олимпиадага дипломатик бойкот эълон қилиш қарорини олган эмас.

Пекиндаги Олимпиада 2022 йилнинг 4 февралидан 20 февралигача бўлиб ўтиши режаланган. АҚШ сўнгги бор Олимпия ўйинларига 1980 йили (Москвада ўтказилган) тўла бойкот эълон қилган эди.

Озодликнинг беларус хизмати мухбири 10 суткалик қамоқдан сўнг озод этилмади

Андрей Кузнечик

Озодлик радиоси беларус хизмати жамоатчи мухбири Андрей Кузнечикнинг яқинлари журналистнинг 10 суткалик маъмурий қамоқдан сўнг озод этилмаганини маълум қилишди. Бу ҳақда “Настояшчее время” телеканали хабар қилди.

Кузнечикнинг қамоқ муддати 5 декабрь куни тугаган, аммо у ҳанузгача ҳибсда қолмоқда. Яқинларига кўра, унинг устидан янги маъмурий иш очилган.

Кузнечик билан алоқа 25 ноябрда узилган, тез орада унинг қўлга олингани маълум бўлган. Журналистнинг квартирасида тинтув ўтказилиб, телефони ва компьютери олиб қўйилган. Ҳукуматга оид телеграм-каналлар маълумотига кўра, 26 ноябрь куни Минск суди уни “майда безорилик”да айбдор деб топиб, 10 суткага қамаган. Кузнечик айблонни тан олган эмас.

2020 йил июнида Минскда Озодлик беларус хизматининг штатдан ташқари маслаҳатчиси, блогер Игорь Лосик ҳибсга олинган эди. У ўшандан бери панжара ортида қолмоқда.

Лосик “ҳокимият ва ҳуқуқ-тартибот идоралари вакилларига нисбатан” ижтимоий адоват қўзғатганликда айбланяпти. Блогер 12 йилгача озодликдан маҳрум этилиши мумкин.

2021 йил июнида Минскда кучишлатар ходимлар Озодлик радиоси беларус хизмати офисини алғов-далғов қилишган. Ўшанда бир неча журналист ҳибсга олиниб, шаҳардан чиқиб кетмаслик шарти билан қўйиб юборилган. 3 декабрь куни Беларусь суди Озодлик беларус хизматининг ижтимоий тармоқлардаги саҳифаларини “экстремистик” деб топган.

Бугунги кунда мамлакатда ўттизга яқин журналист ва блогер ҳибсда сақланмоқда, ўнлаб ОАВ ходими хорижга чиқиб кетишга мажбур бўлган.

Германияда уч партия коалиция тузишга эришди, янги канцлер 8 декабрда сайланади

Немис сиёсатчиси Олаф Шольц Германиянинг янги канцлери этиб сайланиши кутилмоқда

Германияда “Иттифоқ-90/Яшиллар” партияси Эркин демократик партия ҳамда социал-демократлар билан коалицион битимни маъқуллади. Аввалроқ эркин демократлар ва социал-демократлар коалицияга розилик беришган эди. Шу тариқа битим тез орада имзоланади.

8 декабрь куни Бундестаг социал-демократ Олаф Шольцни янги канцлер этиб сайлаши кутилмоқда. Катта эҳтимол билан, янги ҳукуматга тўққиз эркак ва саккиз аёл киради. Ташқи ишлар вазири лавозимига “Яшиллар” вакиласи Анналена Бербок тайинланади, дея хабар қилган dpa агентлиги.

Бундестагга сайлов сентябрь ойи охирида бўлиб ўтган. Собиқ канцлер Ангела Меркель мансуб Христиан-демократлар блоки парламентда 48 та ўринни йўқотган. Социал-демократлар сайловгача банд қилиб турганидан 53 та кўп депутатлик ўрнига эга бўлганлар.

Германияда сайлов илк бор Меркелсиз ўтган. Сайловдан олдин у канцлер лавозимига талабгор бўлмаслигини айтган эди. 3 декабрь куни Берлинда Меркелнинг канцлерликдан кетиши муносабати билан тантанали маросим ўтказилган. У расман 8 декабрь куни истеъфога чиқади.

Европа суди Польшага ўтиб олган мигрантларни Беларусга қайтаришни тақиқлади

Беларусь-Польша чегарасида лагерь қуриб олган мигрантлар

Инсон ҳуқуқлари бўйича Европа суди (ИҲЕС) Польшага кириб олган мигрантларни Беларусь ҳудудига қайтариб юборишни тақиқлаб қўйди – бу ҳақдаги қарор суд сайтида эълон қилинган.

2021 йил 20 августидан 3 декабрига қадар ИҲЕС жами 198 нафар арзгўйнинг Евроиттифоқ ҳудудида хавфсиз бўлишини таъминлаш сўралган 47 та илтимосномасини кўриб чиққан.

Энг кўп шикоят Польша ҳукумати устидан берилган (44 та), яна иккита ҳолатда – Латвияга ва битта ҳолатда Литвага қарши даъво қўзғатилган.

“Аксар мурожаатларда ариза берувчилар Польша ҳудудида эканларини билдириб, уларни Беларусга қайтариб юбормасликни илтимос қилишган. Суд 39-қоидани қўллаб, ариза берувчилар, агар улар ростдан ҳам Польша ҳудудида бўлса, ушбу мамлакатдан чиқариб юборилмаслиги кераклиги ҳақида қарор чиқарди”, дейилган суд қарорида.

ИҲЕС, шунингдек, Варшавадан Беларусь-Польша чегарасида турган 32 нафар афғонистонлик ёнига адвокатларни ўтказишни сўраган. Айрим ҳолларда Страсбург мигрантларни овқат, сув, кийим-кечак, тиббий ёрдам ёки вақтинча бошпана билан таъминлашни талаб қилган.

Беларусь-Польша чегарасида юзага келган миграция инқирози декабрь ойига келиб бирмунча юмшаган. Хусусан, мингга яқин ироқлик мигрант юртига қайтарилгани айтилмоқда.

ЕИ мамлакатлари миграция инқирози вужудга келишида Лукашенко режимини айблайди. 2 декабрь куни Евроиттифоқ Беларусга қарши бешинчи санкциялар туркумини жорий этган. Бу каби чеклов чораларини Минскка нисбатан АҚШ Молия вазирлиги ҳам қўллаган.

ЖССТ: “Омикрон” штаммини юқтирганлар орасида ўлим қайд этилганича йўқ

Иллюстратив сурат

Дунёда коронавируснинг янги “Омикрон” штамми юқиши ҳали бирон ҳолатда инсон ўлимига сабаб бўлмаган. Бу ҳақда Жаҳон соғлиқни сақлаш ташкилоти (ЖССТ) маълум қилди.

Аввалроқ ЖССТ эксперти Мария ван Керкҳове CBS телеканалига берган интервьюсида ҳозирча “Омикрон” штаммига чалингарларда касаллик бирмунча енгил кечаётганини айтган. Бироқ тиббиётчи ва олимлар янги штамм тарқалиши энди бошланганини айтиб, жамоатчиликни огоҳликка чақиришмоқда.

ЖССТнинг соғлиқни сақлаш соҳасидаги фавқулодда вазиятлар дастури директори Майкл Райанга кўра, “Омикрон” нақадар юқумлилиги ва қанчалик оғир асоратларга олиб келиши мумкинлигини аниқлаш учун уни яна бир неча ҳафта ўрганиш керак бўлади.

Айни пайтда янги штамм 30 дан ортиқ мамлакатда қайд этилган. Европа касалликлар профилактикаси ва назорати маркази келгуси ойлардан эътиборан қитъада коронавирус юқтирган беморларнинг тахминан ярмини айнан “Омикрон” штаммига чалинганлар ташкил этишини башорат қилмоқда.

Кўплаб мамлакатларда вирус кириб келиши ва тарқалишининг олдини олиш мақсадида турли чекловлар жорий этилган.

“Омикрон” штамми ноябрь ойи бошида Африка жанубида аниқланган. ЖССТ маълумотига кўра, вируснинг ушбу варианти мутациялари сони аввал аниқланган барча штаммларникидан кўп – 32 та. Бу ўзгаришлар “Омикрон”нинг юқумлилигини ва инсон ҳужайраларига кириб олиш имкониятларини оширади.

Давомини ўқинг

XS
SM
MD
LG