Линклар

Шошилинч хабар
28 ноябр 2021, Тошкент вақти: 08:02

Халқаро хабарлар

Швейцария Лукашенко, унинг ўғли ва 13 нафар амалдорга қарши санкция жорий қилди

Швейцария Беларуснинг авторитар раҳбари Александр Лукашенконинг молиявий активларини музлатиб қўйган мамлакатлар сафига қўшилди.

12 декабрь куни Швейцария ҳукумати Лукашенко, унинг ўғли Виктар ва Лукашенко тузумига алоқадор 13 белоруснинг Швейцарияга кириши ёки мамлакатдан транзит орқали ўтиши тақиқланганини эълон қилди.

Санкцияга йўлиққан амалдорларнинг барчаси баҳсли президент сайловидан кейин бошланиб кетган норозилик намойишлари бостирилишда иштирок этгани тахмин қилинмоқда.

Беларус ҳукумати 9 август куни бўлиб ўтган сайловда Лукашенко ғолиб чиққанни эълон қилган, аммо сайлов натижалари сохталаштирилгани айтилмоқда.

Сайлов натижалари эълон қилинганидан бери Беларус мухолифати мунтазам равишда норозилик акцияларини ўтказиб келади.

Бугунга қадар кўплаб намойишчи ҳибсга олинди ва қийноққа тутилди. БМТ маълумотларига кўра, намойишлар бошланганидан бери хавфсизлик кучлари 27 000 дан ортиқ шахсни ҳибсга олган.

Кун янгиликлари

Тожикистоннинг Тоғли Бадаҳшонида уч кундирки намойишлар давом этмокда

Тил ва этник жиҳатдан ажралиб турадиган ҳудуд бўлган Тоғли Бадахшон Тожикистондаги можаролар пайтида ҳукумат кучларига қарши чиққан исёнчиларнинг ватани бўлган. 

Тожикистоннинг олис Тоғли Бадаҳшон вилоятида норозилик намойишлари уч кундан буён давом этяпти.

27 ноябрь куни оломон маҳаллий ҳукумат биносига бостириб кириши оқибатида бир намойишчи ҳалок бўлган ва ҳуқуқ-тартибот идораларининг беш нафар ходими яраланган.

Вилоят маркази Хоруғда 27 ноябрь куни бир неча минг киши намойишга чиқди.

Тасдиқланмаган маълумотларга кўра, полиция намойишчиларга қарата ўт очган, улардан бир нечаси яралангани хабар қилинган.

Хоруғдаги норозилик намойишлари 25 ноябр куни хавфсизлик кучлари одам ўғирлашда айбланиб қидирувда бўлган маҳаллий фуқарони яралагани, кейин ўлганидан кейин бошланган.

Озодлик радиосининг тожик хизмати хабарига кўра, намойишчилар воқеа юзасидан тергов ўтказилишини талаб қилиб, 25 ноябр куни Гулбидин Зиёбеков исмли эркакнинг жасадини шаҳар майдонига олиб келишган.

Президент Эмомали Раҳмон қарийб ўттиз йилдан бери ҳукмронлик қилаётган 9, 5 миллионлик қаттиқ назорат остидаги мамлакатда норозилик намойишлари кам учрайди.

1991 йилда Совет Иттифоқи парчаланганидан кўп ўтмай, беш йиллик фуқаролар уруши бошланганидан бери ҳукумат ва Тоғли Бадахшон вилояти аҳолиси ўртасидаги таранглик давом этмоқда.

Тил ва этник жиҳатдан ажралиб турадиган ҳудуд бўлган Тоғли Бадахшон можаролар пайтида ҳукумат кучларига қарши чиққан исёнчиларнинг ватани бўлган.

Зеленский Россия Украинада давлат тўнтариши режалаётгани хақида аудиоёзув борлигини айтди

Украина раҳбарининг сўзларига кўра, унда разведка маълумотлари, жумладан, "Россия вакиллари билан украиналик ишбилармон Ринат Ахметовнинг Украинадаги миллиард доллар жалб этадиган давлат тўнтаришида иштирок этишни муҳокама қилаётгани" туширилган аудиоёзувлар мавжуд.

Украина президенти Владимир Зеленский мамлакатда 1—2 декабрь кунлари давлат тўнтариши режалаштирилаётгани ҳақида қўлида инкор этиб бўлмас далиллар борлигини маълум қилди.

Киевда ўтказилган матбуот анжуманида Зеленский: "Менда биринчи декабрь куни давлатимизда давлат тўнтариши бўлиши ҳақида маълумот бор. Менимча, бу қизиқ ахборот".

Украина раҳбарининг сўзларига кўра, унда разведка маълумотлари, жумладан, "Россия вакиллари билан украиналик ишбилармон Ринат Ахметовнинг Украинадаги миллиард доллар жалб этадиган давлат тўнтаришида иштирок этишни муҳокама қилаётгани" туширилган аудиоёзувлар мавжуд.

"Бизда нафақат разведка маълумотлари, балки Украина ва Россия вакилларининг давлат тўнтаришида Ринат Ахметовнинг иштирокини муҳокама қилаётгани ҳақидаги ёзувлар ҳам бор. Бу подстава. Тадбиркор Украинага қарши урушга тортилмоқда. Сиз ўз халқингизга, халқ сайлаган президентга қарши уришиб бўлмайди. Мен Ахметовни Банкова кўчасига (президент девонига) таклиф қиламан, бу ҳақда бўлишиш мумкин бўлган маълумотларни тинглаши мумкин”, деди Зеленский журналистларга.

Ринат Ахметов Forbs маълумотларига кўра, энг бой украиналик (унинг бойлиги 7, 6 миллиард долларга баҳоланган). У Мордовияда туғилган, лекин кейинчалик ота-онаси билан Донецкга кўчиб ўтган.

Илгари у "Минтақалар партияси" ва Виктор Янукович билан чамбарчас боғланган, аммо 2014 йил воқеаларида у Донбассдаги россияпараст намойишларни қўллаб-қувватламаган.

Яқинда Ахметов ва Зеленский атрофидагилар ўртасидаги можаро ҳақида хабар берилган эди.

Хусусан, Ахметовнинг медиа ресурслари мухолиф сиёсатчиларни қўллаб-қувватлаши ва президентнинг хатти-ҳаракатларини танқид қилиши таъкидланади.

Айни пайтда Ахметовнинг таниши, Россия президенти Владимир Путин билан яқин шахсий алоқага эга украиналик сиёсатчи Виктор Медведчук давлатга хиёнат қилиш ва террорчилик ташкилотлари фаолиятига ёрдам беришда гумон қилинмоқда.

Тергов маълумотларига кўра, у 2014 йил охиридан 2015 йил бошигача “ДХР” ва “ЛХР” деб аталувчи айирмачи ташкилотлардан “кўмир маҳсулотларини етказиб бериш бўйича жиноий схема”ни амалга оширишда иштирок этган.

Депутат бу ҳақда Россия расмийларига хабар берган. Тергов унинг ҳаракатлари Украинанинг энергетик мустақиллигига путур етказганини тахмин қилмоқда.

Шу йилнинг май ойидан бери Медведчук бошқа иш юзасидан уй қамоғида сақланмоқда.

11 май куни у ва "ОПЭЖ" фраксияси депутати Тарас Козак аннексия қилинган Қримда давлатга хиёнат ва миллий бойликларни талон-тарож қилишга уринишда гумон қилинган.

Қирғизистонда 15 киши "ҳокимиятни куч билан эгаллашга уриниш"да гумонланиб ҳибсга олинди

Қирғизистон давлат хавфсизлик қўмитаси мамлакатда "ҳокимиятни куч билан эгаллашга уриниш"нинг олди олингани ҳақда маълум қилди.

“Алоҳида бузғунчи кайфиятдагилар орасида парламент депутатлари ва собиқ юқори мансабдаги амалдорлар раҳбарлигидаги шахслар бор. Бу гуруҳнинг жиноий фаолиятига оид рад этиб бўлмас далиллар олинди. Маълум бўлишича, ушбу гуруҳ бўлажак парламент сайловлари натижалари эълон қилинганидан сўнг алоҳида сиёсий кучлар, жумладан, сайловда мағлуб бўлганларнинг қўллаб-қувватлаши остида вазиятни кескинлаштириш, ҳуқуқ-тартибот кучлари билан тўқнашувлар уюштириш ва келгусида ҳокимиятни куч билан эгаллаш мақсадида Бишкекда оммавий норозилик намойишлари ўтказишни режалаштирган”, — дейилади қўмита матбуот хизмати хабарида.

Қўмитанинг қайд этишича, оммавий норозилик намойишларини ташкил этиш учун мингга яқин тажовузкор кайфиятдаги ёшлар саралаб олинган, улар билан мафкуравий ишлар олиб борилган, оммавий тартибсизликлар уюштириш режаси муҳокама қилинган.

Тинтувлар жараёнида ўқотар қуроллари, ўқ-дорилар ва гиёҳвандлик моддалари топилган.

Ушбу гуруҳнинг 15 дан ортиқ фаол аъзоларини ҳибсга олиш ва жавобгарликка тортиш бўйича қарор қабул қилинган.

Қўмита қўлга олинган ва давлат тўнтариши уринишида гумонланаётган шахсларнинг исмларини очиқламаган.

Аввалроқ Қирғизистон президенти Садир Жапаров айрим сиёсатчилар мамлакатда қуролли тўнтаришни амалга оширишни режалаштираётганини айтганди.

“Уларнинг барчасини биламиз. Далиллар тўпланди. Сайловлардан сўнг (28 ноябрда парламент сайловлари бўлиб ўтади) уларга нисбатан кескин чоралар кўрилади”, — деганди Жапаров.

Африкада аниқланган коронавируснинг янги штамми "Омикрон" дунёга хавф солмоқда

Жанубий Африка Республикасида йўловчилар текширувдан ўтказилмоқда.

Жаҳон соғлиқни сақлаш ташкилоти Жанубий Африка Республикасида аниқланган коронавируснинг янги штаммини Омикрон дея номлади.

Ташкилотга кўра, мутациялар сериясига учраган Б.1.1.529 вируси организмдаги протеин таркибига таъсир кўрсатиш қобилиятига эга.

Амалдаги вакциналар бу каби ўзгаришларга етарлича самарадор бўлмаслиги мумкин.

Жанубий Афарика намунаси вируснинг ушбу варианти ўзидан олдингиларга қараганда тезроқ тарқалаётгани ва кўпроқ одамларга, жумладан, вируснинг бошқа штаммлари билан касалланганлар ҳам юқишини кўрсатган.

Вируснинг мазкур варианти Жанубий Африкада 11 ноябрь куни аниқланган.

Сўнгги ҳафта давомида вируснинг янги штамми Ботсвана, Бельгия, Исроил ва Гонконгда аниқланган.

Ҳозирда кўплаб давлатлар Омикрон тарқалган давлатларга ҳаво қатновини бекор қилган.

Россия: Кузбассдаги шахтада қурбон бўлган кишилар сони 52 нафарга етди

Россия ФВВ вакиллари Белово шаҳрилани "Листвяжная" шахтаси ҳудудида

Кемерово вилоятидаги “Листвяжная” кўмир шахтасида юз берган авария оқибатида 52 киши, жумладан 6 нафар қутқарувчи нобуд бўлди. Бу ҳақда вилоят губернатори Сергей Цивилёв маълум қилган. Шунингдек, 38 нафар кончи ва 11 қутқарувчи касалхонага ётқизилган.

“Шахтада ҳеч ким тирик қолмади. 52 киши ўлди, қутқарувчилар ҳам”, деган шахта жойлашган ҳудуддаги Беловский шаҳар округи маъмурияти вакили. Мулозимга кўра, кончилар ис газидан бўғилиб ўлганлар.

ТАСС манбасига кўра, 25 ноябрь куни “Листвяжная” шахтаси вентиляция йўлида кўмир чанги оловланиши натижасида тутун чиқиб, бутун шахтага тарқалган. Ўша куни бош прокурор ўринбосари Д.Демешин ҳалокат метан гази портлаши оқибатида юз берган бўлиши мумкинлигини билдирган.

Тергов қўмитаси таҳликали ишлаб чиқариш объектларида саноат хавфсизлиги талабларининг бузилишига доир модда бўйича жиноят иши қўзғатиб, шахта директори, унинг биринчи ўринбосари ва участка бошлиғини ҳибсга олган.

2021 йилда “Ростехнадзор” минтақавий бошқармаси “Листвяжная” шахтасида, хусусан, вентиляция ва ёнғинга қарши тизимларда қарийб 140 та қоидабузарлик мавжудлигини аниқлаган, дея хабар берди ТАСС.

“Сибирь.Реалии”нинг ёзишича, 2020 йилда айни шахтада саноат хавфсизлигига оид 18 та жиддий камчилик аниқланган, аммо назорат органи улар бартараф этилган-этилмаганини текширмаган.

Толибон Афғонистонда каннабисни қайта ишлаш корхонасини очмоқчи

Афғонистон дунёда энг кўп гиёҳванд модда етиштириладиган мамлакатлардан бири бўлиб ҳисобланади

Толибон ҳукумати Афғонистонда тиббий мақсадларда фойдаланиш учун каннабисни қайта ишлаш корхонаси қуриш бўйича Австралиянинг CРharm ширкати билан битим имзолаганини очиқлади.

Муваққат ҳукуматнинг ИИВ тизимида гиёҳванд моддалар савдосига қарши кураш масалалари бўйича масъул мулозим Қори Саид Хустий австралияликлар лойиҳага 450 миллион АҚШ доллари миқдорида сармоя ётқизишини билдирган. Унга кўра, корхонада Афғонистондаги минглаб деҳқонлардан сотиб олинажак наша ўсимлиги – каннабисдан тиббий препаратлар ва кремлар тайёрланади.

Бироқ Reuters ахборот агентлиги CРharm ширкати толиблар ва гиёҳванд моддалар билан ҳеч қандай алоқаси йўқлигини, бунақа маълумотни Толибонда қаёқдан олганидан бехабарлигини билдириб, пресс-релиз чиқаргани ҳақида хабар қилган.

Каннабис аввалги ҳукумат ва Толибон ҳаракатининг асосий даромад манбаларидан бири эди.

Сўнгги ўн йилдан бери Афғонистон дунёда энг йирик гиёҳванд моддалар етиштирувчиси бўлиб турибди. 2002 йилдан буён мамлакатда гиёҳванд моддалар ишлаб чиқариш фақат ўсиб бормоқда. БМТ ихтисослашган қўмитасининг янги ҳисоботига кўра, 2021 йилда Афғонистонда афюн ишлаб чиқариш 8 фоизга ортиб, 6800 тоннани ташкил этган.

Шу билан бирга, Афғонистон каннабис етиштиришда ҳам пешқадам мамлакатлардан бири бўлиб, нашадан олинадиган ушбу гиёҳванд моддани ҳар йили халқаро қора бозорга 1,5 дан 3,5 минг тоннагача миқдорда етказиб беради.

Чехияда COVID-19 туфайли фавқулодда ҳолат жорий этилди. Президент Земан ковид юқтирган

Милон Земан

Чехия ҳукумати коронавирус билан боғлиқ вазият кескин ёмонлашгани муносабати билан мамлакатда фавқулодда ҳолат эълон қилди.

Фавқулодда ҳолат 26 ноябрга ўтар кечаси бошланган ва 30 кун давом этади. Бу расмийларга одамларнинг ҳаракатланиши ёки тўпланишига нисбатан чекловлар киритиш имконини беради – қонунга мувофиқ, фавқулодда ҳолатдан бошқа пайтларда бунақа чораларни қўллаш мумкин эмас.

26 ноябрь оқшомидан умумий овқатланиш ва кўнгилочар муассасалари 22:00 гача ишлайдиган бўлади. Рождество бозорлари ва кўчаларда алкоголли ичимликлар ичиш тақиқланади. Шунингдек, маданий ва спорт тадбирларига мингдан ортиқ киши кириши ман этилади.

Бундан ташқари, 25 ноябрда сурункали хасталикдан бир ярим ой даволаниб, бир кун олдин касалхонадан чиққан президент Милош Земан COVID-19 юқтиргани маълум бўлган. Натижада 77 ёшли сиёсатчи яна касалхонага ётқизилган.

24 ноябрь куни Чехияда коронавирус юқтириб олиш билан боғлиқ 25 мингдан зиёд янги ҳолат қайд этилган бўлиб, бу пандемия бошланганидан бери энг юқори кўрсаткичдир. Мамлакат шифохоналарида COVID-19 га чалинган қарийб 6 минг бемор мавжуд, улардан 850 нафари интенвив терапия бўлимларида муолажа олмоқда.

Айни пайтда мамлакат аҳолисининг 58,5 фоизи тўлиқ эмланган бўлиб, бу Европа Иттифоқи бўйича ўртача кўрсаткичдан (65,8 фоиз) бирмунча паст.

Reuters қайдича, Чехия ҳозирда коронавирус билан касалланиш даражаси бўйича умуммиллий локдаун эълон қилган Словакия ва Австриядан кейин учинчи ўринда туради.

Европарламент “Вагнер гуруҳи”га қарши санкциялар жорий этишни маъқуллади

Европарламент 25 ноябрь куни бўлиб ўтган йиғилишида хусусий ҳарбий ширкатлар (ХҲШ) жангчилари томонидан инсон ҳуқуқлари бузилишини қораловчи резолюцияни маъқуллади.

Ҳужжатда “Вагнер ХҲШ” номи илан машҳур тузилма ва “унинг Россия давлати билан алоқалари”га алоҳида эътибор қаратилган, деб ёзди “Немис тўлқини”.

Резолюция қабул қилинишини депутатлардан 585 нафари ёқлаган, 40 нафар депутат қарши овоз берган, яна 43 киши бетараф қолган.

Резолюция матнида айтилишича, Европарламент вакиллари “Россиянинг “Вагнер гуруҳи” ҳарбийлашган ташкилоти ва унинг хусусий ҳарбий тузилмалари томонидан турли можаро ҳудудларида амалга оширилган даҳшатли жиноятларни ўта кескинлик билан қоралайди”.

“Европарламент ушбу ҳарбийлашган гуруҳларнинг молияланиши, ҳарбийча таълим олиши, уларга раҳбарлик ва оператив қўмондонлик қилишга Россия давлати жавобгарлигини тасдиқловчи салмоқли далиллар инобатга олади”, дея урғуланган ҳужжатда.

Евродепутатлар фикрича, “Вагнер ХҲШ” ва бошқа хос ҳарбийлашган пудратчиларга “Россия давлати ишонч билдирган ва унинг манфаатларига хизмат қилувчи ташкилотлар” деб қараш лозим. Шу муносабат билан улар Кремлни мамлакат фуқароларига ёлланма жангчи сифатида қуролли можароларда қатнашишни ман этувчи РФ Жиноят кодекси 359-моддаси талабларини бажаришга чақиришган.

“Вагнер ХҲШ” Россия президентига яқин тадбиркорлардан бири, “Путиннинг ошпази” сифатида машҳур Евгений Пригожин номи билан боғланади.

Ширкатнинг ёлланма жангчилари 2014 йилдан бери Украина, Сурия, Судан, Мозамбик, Ливия, Марказий Африка ва Венесуэладаги ҳарбий ҳаракатларда иштирок этган.

Россия ҳукумати ХҲШлар фаолиятига алоқадорлигини инкор этиб келади.

Тожикистоннинг Москвадаги элчихонаси олдига юзлаб одам тўпланди

Тожикистоннинг Москвадаги элчихонаси олдида йиғилган тожикистонликлар, 2021 йил 25 ноябри

Москванинг Гранатная кўчасида жойлашган Тожикистон элчихонаси биноси олдига 25 ноябрь куни юзлаб тожикистонлик тўпланди. Хабар қилинишича, полиция дипломатик ваколатхонага кириш жойини тўсишга ва ёндош кўчаларда хавфсизлик чораларини кучайтиришга мажбур бўлган. Қўлга олинганлар ҳақида маълумот берилганича йўқ.

Одамлар элчихонага Тожикистоннинг Тавдем қишлоғида туғилган 27 ёшли Гулбиддин Зиёбековнинг ўлдирилиши муносабати билан келишган. У қидирувда бўлган ва, ҳуқуқ-тартибот идоралари талқинига кўра, қўлга олиш чоғида тўппончадан ўт очган, натижада жавоб ўқидан яраланган. Аммо гувоҳлар Зиёбеков қўлга олинганидан сўнг ўлдирилганини иддао қилишмоқда.

Тожикистон расмийлари Зиёбековни уюшган гуруҳ бўлиб гаровга олиш ва миллий, ирқий ёки диний адоват қўзғатишда гумон қилиб, унга нисбатан қидирув эълон қилишган. Маҳаллий прокуратура иддаосича, ўтган йил февралида Зиёбеков ва унинг бир таниши “Роштқалъа тумани прокурори ёрдамчисини гаровга олиб, саккиз соат давомида қийноққа солишган ва калтаклашган”.

Ўз навбатида Роштқалъа туманидан бўлган тожикистонликлардан бири Зиёбеков прокуратура ходимини фақат урганини сўзлаб берган. Бунга прокурор ёрдамчисининг ўша ерлик бир аёлга у билан жинсий яқинлик қилишни таклиф қилгани сабаб бўлгани айтилмоқда.

Путин Жазони ўташ хизмати бошлиғини ишдан олди. Унинг ўрнига ички ишлар вазири ўринбосари тайинланди

Александр Калашников.

Россия президенти Владимир Путин Жазони ўташ федерал хизмати раҳбари Александр Калашниковни лавозимидан озод қилди. Бу борадаги фармон Кремль сайтида эълон қилинди. Аммо унда Калашниковнинг ишдан бўшатилиш сабаблари айтилган эмас.

Калашников ўрнига ички ишлар вазирининг собиқ ўринбосари Аркадий Гостев тайинланди.

"Интерфакс" агентлигининг ёзишича, Калашниковнинг ишдан олинишига “Саратов вилояти ва бошқа минтақалардаги жазони ўташ жойларида қийноқлар қўлланилгани кенг жамоатчиликка ошкор қилингани” сабаб бўлган. Расман бу таҳмин тасдиқланган эмас.

Сўнгги ҳафталарда "Гулагу.нет" лойиҳаси доирасида ҳуқуқ фаоллари тергов изоляторлари ва жазони ўташ жойларида маҳбуслар ва маҳкумларга нисбатан қийноқлар қўлланилгани, жинсий зўравонликлар бўлгани тўғрисидаги ўнлаб видеоларни жамоатчиликка эълон қилган эди.

Олмаотадаги Хитой консуллиги олдида муддатсиз норозилик акцияси ўтказаётганларни полиция қўлга олди

Қозоқ полицияси акция ўтказаётганлардан бири Ҳолида Оқитхонни қўлга олган пайт.

Олмаотадаги Хитой консуллиги олдида Шинжон-Уйғур мухториятида Хитой қамоқларида сақланаётган қариндошлари озод этилишини талаб қилиб муддатсиз норозилик акциясини давом эттиришга келган бир неча кишини полиция қўлга олди. Бу ҳақда Озодлик радиоси қозоқ хизматига фаол Байболат Кунболатули хабар берди.

“Хитой консуллиги олдига келган Гавҳар Қурманалиева, Ҳолида Оқитхон ва Нурзат Ермекбай дарҳол полиция томонидан қўлга олинди. Уларни Медеу туман полициясига олиб кетишди. Мен билан бирга машинамда консулхонага келган Ақиқат Қалиўллуни ҳам машинамдан тушиши биланоқ ушлашди. Жами ушланганлар сони 4 киши”,-деди фаол.

Унга кўра, февраль ойидан бери Хитой консуллиги олдида намойиш ўтказаётган мазкур шахслар полиция уларга яна жарима соладиган бўлса, очлик эълон қилишларини билдирганлар.

Бундан аввал ҳам ўз қариндошлари озод этилишини талаб қилиб акция ўтказаётганлар бир неча марта полиция томонидан ушланган ва жаримага тортилган эди. Байболат Кунболатулининг айтишича, солинган жарималар миқдори 4 миллион танга (тақрибан 9 минг доллар)гача етиб бормоқда.

25 ноябрь куни норозилик акцияси бошланганига 291 кун бўлди. Норозилар Шинжондаги “қайта тарбиялаш лагерлари”да сақланаётган яқинлари озод этилишини ва Қозоғистонга чиқарилишини талаб этмоқда.

2018 йилда Бирлашган Миллатлар Ташкилотининг инсон ҳақлари тузилмаси Шинжондаги лагерларда бир миллионга яқин мусулмон сақланаётганини маълум қилган эди.

АҚШ Конгресси ва Буюк Британия, Канада ва Чехия парламентлари Хитойнинг Шинжондаги сиёсатини геноцид ўлароқ баҳолайди. Пекин эса Шинжондаги вазият “Хитойнинг ички сиёсати” эканини иддао қилиб келади.

Эронда 17 ёшида “жасади шу кунгача топилмаган қизни ўлдирган” йигит қатл қилинди

Абдолали (ўнгда)нинг севган қизи (чапда) 2014 йилда бедарак кетган эди.

Эронда 17 ёшида қотиллик қилганликда айбланиб ўлим жазосига тортилган йигитга нисбатан ҳукм ижро этилди. Бу воқеа Европа Иттифоқи, БМТ ва ҳуқуқни ҳимоя қилиш ташкилотларининг кескин танқидига учради.

25 ёшли Арман Абдолали 24 ноябрь куни қатл этилди. У 17 ёшида ўз севган қизини ўлдирганликда гумонланиб қўлга олинган ва судланган эди. Халқаро ташкилотлар Арман Абдолалининг айбдорлиги судда тўла ўз тасдиғини топмагани ортидан Эрон ҳукуматини унга нисбатан чиқарилган ҳукмни ўзгартиришга чақириб келаётган эди.

Арман Абдолали дорга осилганидан бир неча соат ўтиб Озод Европа-Озодлик радиосига интервью берган отаси Камёр: “Ўғлим қизни ўлдирмаган. У энг охирги дақиқагача “Мен қотил эмасман”, “Мен уни ўлдирмаганман”, деб айтиб турди”,-деди.

Европа Иттифоқи бу воқеа Эрон томонидан олинган халқаро мажбуриятнинг бузилиши эканини, БМТнинг Инсон ҳуқуқлари бошқармаси эса “ўта ташвишли ва инсониятни шокка солувчи”ҳодиса бўлганини қайд этди.

Iran Human Rights ҳуқуқни ҳимоя қилиш ташкилоти эса “бу воқеа халқаро миқёсдаги жиноят бўлди”, деб баёнот берди.

Абдолалининг севган қизи 2014 йилда бедарак кетган эди. Қизнинг жасади шу кунгача топилган эмас. Абдолали қўлга олиниш чоғида жиноятни содир этганини тан олган, аммо тергов жараёнида у ўз айбини тан олмаган.

Amnesty International Абдолалига нисбатан суд жараёни “ўта нохолис ва адолатсиз” бўлгани, “суд фақат қийноқлар остида олинган маълумотларга” таянгани ҳақида билдирган.

Amnesty International ташкилоти ўтган йили Эронда турли жиноятларда айбланган камида 246 киши қатл қилинганини маълум қилган.

Iran Human Rights ҳуқуқни ҳимоя қилиш ташкилоти баёнотида қайд этилишича, сўнгги 10 йил ичида Эронда камида 64 киши болалигида содир этган жиноятлари учун қатл қилинган.

Туркман президенти нефть-газ саноати назоратини ўғлига топширди

Сердар Бердимуҳамедов жорий йил февралидан бери Бош вазир ўринбосари лавозимида ишлаб келмоқда.

Туркманистон президенти Гурбангули Бердимуҳамедов нефть-газ саноати назоратини Бош вазир ўринбосари лавозимида ишлаётган ўғли Сердар Бердимуҳамедовга топширди. Бу ҳақда ҳукуматга қарашли “Нейтрал Туркманистон” газетаси хабар берди.

Туркманистон жаҳондаги энг йирик табиий газ захирасига эга ва жаҳонда газ экспорти бўйича 4-ўринда туради.

Углеводородлар савдоси давлат бюджетининг асосий даромад манбаидир. Crude Accountability халқаро ҳуқуқ ташкилоти ҳисоботида таъкидланишича, газ экспортидан тушаётган даромаднинг 80 фоизи хусусий шахслар, жумладан, президент Бердимуҳамедов ва унинг оиласи чўнтагига тушмоқда.

Давлат бюджетидаги камомад ортидан Туркманистонда бир неча йилдан бери иқтисодий инқироз давом этмоқда, аммо ҳукумат буни тан олмаяпти.

Сердар Бердимуҳамедов жори йил февралидан бери Бош вазир ўринбосари лавозимида ишлаб келмоқда. Мазкур ҳолат Гурбангули Бердимуҳамедов ўғлини ўзининг ҳокимиятдаги вориси ўлароқ кўраётганини англатади.

Кузбассдаги шахтада юз берган портлашда 11 киши ҳалок бўлди, ўнлаб кончи ер остида қолмоқда

"Листвяжная" кўмир конида қутқарувчилар ер остидан 230 кончини олиб чиқди.

Россиянинг Кемерово вилояти Белов шаҳридаги "Листвяжная" кўмир конида юз берган портлаш оқибатида, сўнгги хабарларга қараганда, 11 киши ҳалок бўлди, камида 40 кончи жароҳатланди. Бундан ташқари яна ўнглаб кончи ер остида қолмоқда. Бу ҳақда Кемерово вилоят губернатори Сергей Цивилёв маълум қилди.

Расман билдирилишича, портлаш юз берган конда 285 шахтер ишлаётган эди. Айни пайтда улардан 230 нафари ер устига олиб чиқилди. Шахтада яна 48 ёки 49 киши қолмоқда. Улар билан алоқа узилган.

Портлаш 250 метр ер остида юз берди. Дастлабки таҳминларга кўра, портлашга кондаги техниканинг носозлиги сабаб бўлган.

HRW: Миграция инқирози учун Варшава ҳам, Минск ҳам бирдай жавобгар

Беларусь-Польша чегарасидаги миграция инқирози учун Варшава ва Минск бир хилда жавобгар. Human Rights Watch инсон ҳуқуқлари ташкилоти ана шундай хулосага келган.

Ташкилот ҳисоботида ҳуқуқбонлар Польша чегарачилари – баъзан шафқатсизларча – мигрантларни, улар бошпана сўраётганига қарамай, Беларусь томонга сиқиб чиқараётганини урғулашган. Бундан ташқари, Human Rights Watch маълумотига кўра, польшалик аскарлар депортация чоғида болаларни ота-оналаридан ажратишган. Польша расмийлари барча айбловларни рад этмоқда.

Ҳужжатда Беларусь чегарачиларининг мигрантларга зўравонлик қилгани ва улар билан ғайриинсоний муносабатда бўлганига оид фактлар ҳам келтирилган. Минск ҳам бу айбловларни инкор этмоқда.

Human Rights Watch ҳужжатида қайд этилишича, Европа Иттифоқи чегарадаги мигрантлар ҳаёти муҳофазасини устувор вазифа ўлароқ қабул қилишга Польшани ишонтирмоғи лозим. Ташкилот Польша хатти-ҳаракатларига Еврокомиссия томонидан баҳо берилмаганини алоҳида урғулаб, Беларусь расмийларини мигрантлар ҳаётидан ўз сиёсий манфаатлари йўлида фойдаланганликда айблаган.

Ҳуқуқбонлар октябрь ойида чегаранинг икки тарафидаги қочқинлар ҳузурида бўлишган. Уларнинг ҳисоботи якка ўзи ёки бола-чақаси билан йўлга чиққан 19 кишининг интервьюсига асосланган.

Европа Иттифоқи Беларуснинг авторитар етакчиси Александр Лукашенкони ЕИга ўтишни истаган минглаб мигрантни Польша чегарасига қасддан тўплаганликда айблаб келади. Расмий Брюссель фикрича, Лукашенко жорий этилган санкциялар учун Ғарбдан шу тариқа ўч олмоқда.

Давомини ўқинг

XS
SM
MD
LG