Москвада Путинга қарши намойишлар давом этмоқда

Путин қайтди

Владимир Путин яна олти йиллик муддатга президент сифатида иш бошлаган кун Москва марказий кўчаларини ўн минглаб ОМОН ва полиция ходимлари тўлиқ назоратга олди.

7 май кунги инагурация маросими Владимир Путиннинг мутлақо бўм-бўш Москва кўчаларидан ўтиши билан бошланди: Янги Арбат кўчаларидан нафақат транспорт, балки оддий йўловчилар ҳаракатланиши ҳам тақиқланди, марказий метро бекатларига кириш ва чиқиш бутунлай ëпиб қўйилди.

Шундай бўлса-да¸ пойтахтнинг турли районларида Путинга мухолиф кучларнинг “Оқ шаҳар” акцияси уюштирилди.



Энг катта норозилик намойиши Москванинг Никитские дарвозаси олдида бўлиб ўтди. У ерга йиғилган мингга яқин юриш иштирокчиси “Шармандалик!”, “Россия Путинсиз!”, “Учинчи муддат – қамоққа!”, деб ҳайқирди.



Хавфсизлик кучлари дарҳол аксилпутинчиларни тарқатиш ҳаракатига тушди. Полиция Путин расми ёпиштирилган майка кийган кремлпараст ёшлардан бошқа¸ юришнинг аксар иштирокчиларини ҳибсга олди.



Мухолифат кучлари 6 май куни кечқурун Болотная майдонида бўлиб ўтган “Миллионлар марши” норозилик акциясини бундан сўнг ҳам давом эттириш режасида.

Москва Ички ишлар бошқармаси хабарига кўра, 6 май куни полиция ва митинг иштирокчилари ўртасида бўлиб ўтган тўқнашувлар давомида 30 нафар полициячи ва 47 нафар намойишчи жароҳатланган.

Хабарларга кўра¸ бошланмай туриб тарқатилган аксилпутинчилар норозилик митингида 439 киши ҳибсга олинган ва полиция участкаларига олиб келинган.

Кузатувчиларга кўра, 6 майдаги Болотнаядаги “Миллионлар маршида” камида 650 киши, жумладан мухолифат лидерлари Сергей Удалцов, Алексей Навалний ва Борис Немцовлар ҳам қўлга олинган.