Линклар

Шошилинч хабар
09 июн 2023, Тошкент вақти: 02:58

Халқаро хабарлар

Алина Кабаева “Миллий Медиа Гуруҳ”га етакчилик қиладиган бўлди

Бадиий гимнастика бўйича олимпия чемпиони, “Единая Россия” партиясидан Давлат думасига депутат бўлиб сайланган Алина Кабаева “Миллий Медиа Гуруҳ” (Национальная Медиа Группа) холдинги директорлар кенгашига етакчилик қилишга рози бўлди. Бу ҳақда душанба куни холдинг матбуот хизмати хабар тарқатди.

Қайд этилишича, яқин орада директорлари кенгаши мажлиси ўтказилиб, унда зарур қарорлар қабул қилинади.

Кабаева сўнгги олти йил мобайнида “Миллий Медиа Гуруҳ” жамоатчилик кенгашини бошқариб келган.

“Миллий Медиа Гуруҳ” Россиядаги йирик хусусий медиа-холдинг бўлиб, унинг таркибига 5-канал ва Рен-ТВ каби телеканаллар киради. Холдинг Биринчи каналнинг 25 фоиз акцияларига эгалик қилади. Бундан ташқари, холдинг “Известия” газетаси, Life News телеканали, “Жизнь” ва “Твой день” газеталари, “Русская служба новостей” радиостанцияси ва бошқа оммавий ахборот воситаларига эгалик қилувчи News Media ширкатининг ҳам эгаларидан бири бўлиб ҳисобланади.

Душанба куни Россия Давлат думасининг регламент бўйича қўмитаси палатага 15 сентябрдан бошлаб Алина Кабаеванинг депутатлик ваколатларини муддатидан аввал тўхтатиш ҳақидаги илтимосини қондиришни тавсия қилганди.

Тошкентда туғилиб ўсган Алина Кабаева атрофида кўплаб мишмишлар юради. Жумладан, унинг Россия президенти Владимир Путин билан ишқий алоқалари борлиги иддао қилинади. Путиннинг ўзи бу гапларни расман рад этган.

Кун янгиликлари

Британия Украинага бостириб кирган Россияни дастаклаётгани учун Беларусга қарши санкциялар рўйхатини кенгайтирди

Александр Лукашенко

Буюк Британия расмийлари Украина урушида Кремль режимини қўллаб-қувватлагани учун Беларусга қарши санкция рўйхатини кенгайтирди. Бу ҳақда мамлакат ҳукумати сайтида билдирилган.

Ёйинланган ҳужжатлардан келиб чиқилса, янги чекловлар Беларусдан олтин, ёғоч, каучук ва цемент импортига дахлдор бўлади.

Британия Беларусга кўп мақсадда қўллаш мумкин бўлган товарлар, саноат ускуналари ва пул купюраларини етказиб беришга ҳам тақиқ жорий қилмоқда. Шунингдек, британиялик расмийлар ғарб санкцияларини айланиб ўтишда Россияга ёрдам бераётган беларуслик жисмоний шахслар ва ширкатларга нисбатан янги чекловлар киритишяпти.

Бундан ташқари, Британия ҳукумати санкция остидаги Беларуснинг ҳукуматпараст интернет нашрларига киришни чеклаб қўяди.

Лондон расмийлари Беларусдан бўлган жисмоний ва юридик шахсларни санкция рўйхатига киритиш мезонларини ҳам кенгайтирган. Янги мезонларга мувофиқ, Британия санкция остига тушган беларусликларнинг қариндошларига нисбатан ҳам санкция киритиши мумкин бўлади.

Бу янги пакет Россиянинг ҳарбий хатти-ҳаракатига фаол кўмаклашаётган ва Украина ҳудудий яхлитлигини эътиборсиз қолдираётган Лукашенко ва унинг режимига иқтисодий босимни кучайтиради”, дея билдирган Британия ташқи ишлар вазири Жеймс Клеверли.

Британия Беларусга қарши санкцияларни 2022 йил июлида киритган. Ўшанда чекловлар нефтни қайта ишлашдан олинган маҳсулотлар, илғор технологиялар ва зеб-зийнат ашёлари экспортини тақиқни ўз ичига олган эди. Британия расмийлар Беларусдан темир ва пўлат импортини тақиқлашган, Беларуснинг Лондонда қимматбаҳо қоғозлар чиқариши ҳам чекланган.

2022 йил октябрида Александр Лукашенко ҳарбий хавфсизлик масалаларига бағишланган кенгашда Беларусь Россиянинг Украинадаги “махсус ҳарбий амалиёти”да иштирок этаётганини тан олган. Минск расмийлари Россия қўшинлари ўтиши ва вақтинча жойлашиши учун мамлакат ҳудудини тақдим этган, шунингдек, Беларусь ҳудудидан Украина бўйлаб зарбалар берилган. Украинага қарши урушдаги кўмак ва оммавий репрессиялар туфайли АҚШ, ЕИ ва Британия Беларусга қарши санкциялар жорий этган.

Франциядаги қуролли ҳужум чоғида ёш болалар дохил 5 киши оғир яраланди

Иллюстратив сурат

Франциядаги Анси шаҳрида қуролли ҳужум чоғида тўрт нафар ёш бола дохил камида беш киши оғир тан жароҳати олган. Пичоқ билан қуролланган ҳужумчи полиция томонидан қўлга олинган.

Ҳужумчининг шахси аниқланмоқда ва ҳали тасдиқланган эмас. BFMTV телеканали ва AFP агентлиги манбаларига кўра, ҳужумчи Франциядан бошпана сўраётган суриялик шахсдир. Унинг одамларга пичоқ билан ташланишига нима сабаб бўлгани ҳозирча номаълум.

Ҳужум 8 июнь куни эрталаб Ансидаги Европа боғида содир бўлган. У ерда уч ёшгача бўлган болакайлар тарбиячилари билан айланиб юргани айтилмоқда.

Франция бош вазири Элизабет Борн воқеа жойига йўл олган.

Франция президенти Эммануэль Макрон содир бўлган воқеани “бориб турган пасткашлик” деб атаган.

“Болалар ва бир катта ёшли киши ўлим билан ҳаёт орасида турибди. Миллат шокда”, дейилган Макроннинг Твиттердаги постида.

Тожикистон ЕОИИ га қўшилиш масаласи кун тартибида йўқлигини билдирди

Россия ташқи ишлар вазири 6 июнь куни президент Эмомали Раҳмон ва ташқи ишлар вазири Сирожиддин Муҳриддин билан музокаралар ўтказди.

Тожикистон ҳукумати Евросиё иқтисодий иттифоқи( ЕОИИ)га қўшилиш эҳтимолини муҳокама қилмаяпти. Бу ҳақда ТАСС Тожикистон ташқи ишлар вазирлигининг ахборот ва матбуот департаменти бошлиғи Шоҳина Самадийга таянган ҳолда хабар берди.

Россия ташқи ишлар вазири 5 июнда Тожикистонга келган ва 201-Россия ҳарбий базасида ўтган учрашувда Душанбе “ЕОИИга қўшилиш манфаатли эканини тез орада аниқлаб олиши”га умид билдирган эди.

Шоҳина Самадийга кўра, ЕОИИга қўшилиш эҳтимоли 6 июнда Россия расмийларининг президент Эмомали Раҳмон билан учрашувларида ҳам, ташқи ишлар вазири Сирожиддин Муҳриддин билан музокараларда ҳам кўтарилмаган.

Сергей Лавров 5 июнда Тожикистонга келган эди. У сафарини Душанбедаги 201-Россия базасига боришдан бошлади . 6 июнда эса президент Эмомали Раҳмон ва ташқи ишлар вазири Сирожиддин Муҳриддин билан музокаралар ўтказди.

Лавров Тожикистонга Россияда тожик муҳожирлари оммавий равишда қўлга олинаётган бир пайтга тўғри келди. Сўнгги ҳафталарда Россия полициячилари юзлаб тожик мигрантни қўлга олди ва калтаклади, ўнлаб тожик муҳожирлари депортация қилинди.

Россия расмийлари мигрантларга қарши амалиётлар тўхтатилганини билдирган. Аммо мигрантлар йўлларда, ресторанларда, жамоат транспортида ва иш жойларида полиция текшируви кучайгани акс этган фотосуратлар ва видеоларни жўнатишмоқда.

Владивостокда Шимолий Корея дипломатининг хотини ва ўғли бедарак кетди

Россия – Шимолий Корея чегараси.

Россия Тергов қўмитаси Владивостокдаги Шимолий Корея бош консуллиги вакилининг хотини ва ўғли бедарак кетгани ортидан жиноят иши қўзғатди. Бу ҳақда Озодлик радиосининг “Сибирь.Реалии” лойиҳаси хабар берди.

Владивостокдаги Шимолий Корея бош консуллиги вакили Цой Ен Намнинг хотини 43 ёшли Ким Кум Сун ва ўғли 15 ёшли Пак Квон Чжу консуллик биносида яшаб келган. Улар 4 июнь куни консулликни тарк этган. Ўшандан бери уларнинг қаерда экани номаълум.

Хотини ва боласи йўқолгани тўғрисида полицияга дипломатнинг ўзи маълум қилган. Полиция улар Хитойга ёки Жанубий Кореяга қочиб ўтган бўлишини эҳтимолдан соқит қилмаяпти.

Baza телеграм каналининг полиция маълумотларига таянган ҳолда хабар беришича, дипломатнинг хотини ва ўғли консулхонадан чиққач таксига ўтирган ва Хабаровскка кетган. Полиция таксичини топишга муфааффақ бўлган. Кузатув камераларидан олинган видеолар унинг сўзларини тасдиқлаган.
Amur Mash нашрининг ёзишича, дипломатнинг хотини ва ўғли Хабаровскдан самолётда Красноярскка учиб кетган.

Шимолий Корея фуқаролари Жанубий Кореяга қочиб кетиш учун кўпинча Россия чегарасидан фойдаланади. Чунки Россия – Шимолий Корея чегараси Жанубий Корея чегарасидан кўра заифроқ қўриқланади.

Қозоғистонда январь воқеалари пайтида қўлга олинган шахсни ўласа қилиб калтаклаган 7 полициячи қамалди

Январь воқеалари пайтида ағдарилган Нурсултон Назарбоев ҳайкали.

Олмаота шаҳар Алмали туман суди етти полициячини январь воқеалари пайтида қўлга олинган Жасулан Анафияевни қийнаб ўлдирганликда айбдор деб топди. Бу ҳақда Олмаота шаҳар суди матбуот хизмати хабар берди.

Жиноят кодексининг қийноққа солиш моддаси асосида судланган Аян Елубеков ва Махамбет Шинжирбаев 10 йилданга, Закир Ибрагимов 9 йилга, Нурлан Торибаев, Ардак Азимбеков ва Бейбит Жакипбаев 8 йилданга, Арнат Мирадилови 5 йилга озодликдан маҳрум этилди.

Суд уларни барча унвонлардан ва давлат лавозимларида ишлаш ҳуқуқидан маҳрум қилди. Шунингдек, судланувчилар жабрланувчилар фойдасига 20 миллион танга (246 минг доллар) миқдорида товон пули тўлаши шарт.

Қозоғистонда газ нархи қимматлаганига қарши оммавий норозиликлар 2022 йилнинг 4 январида бошланиб кетган эди. Кейинроқ норозилик оммавий тартибсизликларга айланиб кетган ва 7 январь куни куч билан бостирилган эди. Бу воқеалар пайтида Қозоғистон илтимоси билан мамлакатга КХШТ кучлари киритилган эди.

Расман билдирилишича, январь воқеалари пайтида 238 киши ҳалок бўлган. Улардан олти нафари ҳибсхонада вафот этган. Олти фарзанднинг отаси Жасулан Анафияев улардан бири эди. Бундан ташқари минглаб одам қўлга олинган, юзлаб одам қийноққа солинганини билдиришган. Лекин қийноқлар масаласида қўзғатилган жиноят ишларининг асосий қисми тўхтатилган.

Остонада сув йўқлигидан норози аҳоли кўчани тўсиб қўйди

Сув йўқлиги туфайли кўча тўсган остоналиклар (Ulysmedia.kz видеосидан лавҳа)

Қозоғистон пойтахтида бир неча тураржой мажмуаси турғунлари сув йўқлиги туфайли 6 июнь оқшомида автомобиль йўлини тўсиб қўйишган.

Ulysmedia.kz нашри хабарига кўра, норози фуқаролар “Миллиниум парк” кўп қаватли уйи ёнидаги йўлни тўсишган. Саккиз кундан буён сувсиз яшаётганларини айтган одамлар “сув беринг” дея қичқиришган.

Норозиларнинг айтишича, сув улар яшаётган кўп қаватли уйларга тунги соат 2 дан 5 гачагина берилмоқда. Улар 37 даражали иссиқда болали оилалар ҳатто ҳожатхонага киролмаётганидан шикоят қилишган. Шунингдек, улар яқин атрофдаги дўконларда сув тез тугаб қолаётганини ҳам қўшимча қилишган.

Йиғилганлар олдига келган пойтахтнинг Олмаота тумани ҳокими Самат Мақсатули турғунлардан бироз чидаб туришни илтимос қилган ва ўзи ҳам “график асосида ювинаётгани”ни айтган.

Остона ҳокими Женис Қасимбек эса ўз видеомурожаатида бир ой ичида шаҳарда сув танқислиги билан боғлиқ барча муаммолар ҳал этилишини ваъда қилган.

Қозоғистон пойтахти аҳолиси бир неча ҳафтадан бери кўп қаватли уйларда сув йўқлигидан шикоят қилиб келишяпти. Аввалроқ бу муаммо туфайли BI Group ширкати қурган уйда яшовчи йўл тўсишган эди.

Ўшанда пойтахт ҳокимияти вакиллари сувнинг барқарор равишда берилмаётгани “шаҳар аҳолиси сонининг ошгани ва интенсив равишда қурилишлар бўлаётгани” билан боғлиқлигини билдиришган. Улар хусусий секторда яшовчилардан томорқаларини суғориш учун сувдан фақат соат 23.00 дан 06.00 гачагина фойдаланишни сўрашган ва уларга техник сув сотиб олишни тавсия қилишган.

Каховка ГЭСи тўғони ёрилишига халқаро муносабат

Тўғон ёрилиши оқибатида ўнлаб аҳоли пунктларини сув босди.

Украина президенти Владимир Зеленский Каховка ГЭСи тўғонининг ёрилишини “оммавий қирғиннинг экологик бомбаси” деб атади ва Россияни айблади.

Қремль матбуот котиби Дмитрий Песков тўғон ёрилишига Россиянинг алоқаси йўқлигини билдирди ва бу воқеани “Киев режаси асосида амалга оширилган диверсия” деб атади.

БМТ Бош котиби Антониу Гутерриш тўғоннинг ёрилиши “монументал гуманитар, иқтисодий ва экологик ҳалокат” бўлди деб билдирди.

Германия канцлери Олаф Шольц бу воқеада Москвани айблади. Шольц “Бу Украина қарши ҳужумини тўхтатиш мақсадида амалга оширилган агрессия бўлди”, деб баёнот берди.

НАТО Бош котиби Йенс Столтенберг Twitter саҳифасида “Бу аблаҳона ҳаракат Россиянинг Украинадаги уруши нақадар аёвсиз эканини намойиш қилган яна бир акт бўлди”, деб ёзди.

Оқ уй расмий вакили Жон Кирби Вашингтон тўғон ёрилиши сабабларини аниқлаш учун ўрганиш ишларини олиб боришини билдирди. “Дастлабки маълумотлардан жабрланганлар борлигидан, жумладан, кўплаб одам ҳалок бўлгани эҳтимолидан хабардормиз. Лекин ҳозир уларнинг аниқ сонини айта олмаймиз”, -деди Оқ Уй расмий вакили.

Украина ҳукумати тўғон ёрилишини муҳокама қилиш учун БМТ Хавфсизлик кенгашини чақиришни ва Россияга нисбатан янги санкциялар жорий этишни сўрамоқда.

Каховка ГЭСи тўғони ёрилгани тўғрисида 6 июнь куни хабар берилган эди. Президент Зеленскийнинг билдиришича, тўғон ёрилиши оқибатида 80 та аҳоли пункти сув остида қолиши мумкин. Айни пайтда расмийлар ўндан ортиқ аҳоли пунктини сув босгани ва камида 16 минг киши эвакуация қилинганини билдирган.

1956 йилда қурилган тўғоннинг баландлиги 30 метр, узунлиги 3,3 километрни ташкил қилган. У Россия 2014 йилда аннексия қилган Қрим ярим оролини сув билан тўлиқ таъминлар эди.

Оқ Уй Каховка ГЭСи тўғонининг ёрилиш сабабларини аниқламоқчи

Оқ Уй расмий вакили Жон Кирби.

АҚШ президенти маъмурияти Каховка ГЭСи тўғони ёрилишига ким сабабчи бўлганини ҳозирча аниқ ишонч билан айта олмайди. Бу ҳақда Оқ Уй расмий вакили Жон Кирби маълум қилди. Унга кўра, Вашингтон бу воқеа юзасидан барча маълумотларни йиғади ва ўрганиб чиқади.

АҚШ ҳукуматининг икки расмийси ва Ғарбдаги бир нафар расмий манба аввалроқ NBC News телеканалига президент маъмурияти ГЭСга Россия ҳужум қилган бўлиши эҳтимоли тўғрисида разведка маълумотларига эга экани тўғрисида айтган эди.

Жон Кирби журналистнинг ГЭС тўғони ёрилиши Украинанинг қарши ҳужумга ўтишига қандай таъсир кўрсатиши тўғрисидаги саволига бу борада ҳар қандай прогнозларни қилишга ҳали эрта эканини айтди. Унга кўра, тўғон ёрилиши Украина энергетик хавфсизлигини жиддий таҳдид остида қолдириши мумкин.

Кирбига кўра, умрлари, шаҳарлари ва қишлоқлари хавф остида қолган украиналикларга алоҳида эътибор қаратилмоқда ва уларга керакли ёрдам кўрсатилмоқда.

“Дастлабки маълумотлардан жабрланганлар борлигидан, жумладан, кўплаб одам ҳалок бўлгани эҳтимолидан хабардормиз. Лекин ҳозир уларнинг аниқ сонини айта олмаймиз”, -деди Оқ Уй расмий вакили.

Каховка ГЭСи тўғони ёрилгани тўғрисида 6 июнь куни хабар берилган эди. Президент Зеленскийнинг билдиришича, тўғон ёрилиши оқибатида 80 та аҳоли пункти сув остида қолиши мумкин. Айни пайтда расмийлар ўндан ортиқ аҳоли пунктини сув босгани ва камида 16 минг киши эвакуация қилинганини билдирган.

1956 йилда қурилган тўғоннинг баландлиги 30 метр, узунлиги 3,3 километрни ташкил қилган. У Россия 2014 йилда аннексия қилган Қрим ярим оролини сув билан тўлиқ таъминлар эди.

Ҳаага Халқаро судида Украинанинг Россияга даъвоси бўйича биринчи тинглов бўлиб ўтди

Ҳаагадаги БМТ Халқаро суди биноси.

БМТнинг Ҳаагадаги Халқаро суди 6 июнь куни Украинанинг Россияга даъво аризаси моҳияти юзасидан биринчи тингловни ўтказди. Украина ўз аризасида Россияни террорчиликни молиялашга қарши кураш ва ирқий дискриминациянинг ҳар қандай кўринишларини бартараф этиш тўғрисидаги иккита конвенцияни бузганликда айбламоқда.

«Немис тўлқини»нинг хабар беришича, тингловлар 8,12 ва 14 июнь кунлари давом этади. Кейин қарор чиқариш жараёни бошланади. Халқаро суд ўз қарорини бир неча ой ичида эълон қилиши кутилмоқда. БМТ Халқаро суди чиқарган қарорни бажариш ҳар икки тараф учун мажбурийдир.

Украина аризасида қайд этилишича, ҳуқуқбузарликлар 2014-2015 йилларда содир этилган. Ҳаагадаги украин делегацияси таъкидича, Киев Москвани Украина халқини геноцид қилганлик айблови бўйича ҳам жавобгарликка тортиш воситаларига эга.

Россия делегацияси вакили бу борада журналистлар саволларига жавоб беришдан бош тортди.

Санкт-Петербургда тожик ва қирғиз мигрантлар ўртасидаги муштлашув ортидан 380 киши қўлга олинди

“Лахта-Центр” қурилиш майдони ҳудудида мигрантлар ўртасида юзага келган муштлашувдан лавҳалар

Санкт-Петербургдаги “Лахта-Центр” қурилиш майдони ҳудудида тожикистонлик ва қирғизистонлик мигрантлар ўртасида рўй берган оммавий муштлашув ортидан 380 киши полиция бўлимига олиб кетилган. Муштлашув нима сабабдан юзага келгани ҳақида аниқ маълумот йўқ.

ВЧК-ОГПУ сайти ўз Telegram-каналида оммавий муштлашув 3 июнь оқшомида “Лахта-Центр” ҳудудидаги ошхонада бошлангани, кейин эса кўчада давом этгани ҳақида ёзган.

Мигрантлар томонидан Озодликнинг тожик хизматига йўлланган видеода муштлашув чоғида фақат муштумлар эмас, арматура бўлаклари, тош ва қурилиш каскалари ишга солинганини кўриш мумкин.

Пировардида бир қирғизистонлик касалхонага етказилган. Полиция ва Росгвардия участкага 380 чоғли одамни олиб келгани чоғида профилактика тадбирлари ўтказилганидан кейин муштлашувнинг тўрт нафар муҳтамал ташкилотчиси аниқланган”, деб ёзган ВЧК-ОГПУ.

Полиция маълумотига кўра, муштлашув ташкилотчиларининг тўртови ҳам қирғизистонлик бўлиб, улар мазкур қурилиш майдонида ишлашган. Уларнинг ҳаммаси ҳибсга олинган.

Қўлга олинган бошқа мигрантларнинг тақдири ҳақида маълумот берилган эмас.

Буюртмачиси ва инвестори “Газпромнефть Восточно-Европейские проекти” ширкати бўлиб ҳисобланган “Лахта-Центр” қурилиш объектларида Тожикистон, Ўзбекистон ва Қирғизистон фуқаролари дохил минглаб киши ишлайди.

Жорий йилнинг 19 майида полиция махсус бўлинмаси Санкт-Петербургдаги “Лахта-Центр” қурилиш майдонида бир гуруҳ меҳнат муҳожирини қўлга олган, қўлга олиш чоғида уларнинг айримларига нисбатан куч ишлатилган. Ўшанда Озодликнинг тожик хизматига ОМОНчилар бир неча мигрантни автобусга жойлаётгани акс этган видео келиб тушган.

Видеода полициячилар бир ёш йигитни ерга ётқизиб, қўлини орқасига қайирганини кўриш мумкин. Мигрантлар махсус бўлинма ходимлари хатти-ҳаракатлари ноқонунийлиги ва йигитнинг ёнида ҳужжатлари борлигини айтиб, норозилик билдирганларидан кейингина йигит ўрнидан турғазилиб, полиция участкасига олиб кетиш учун автобусга тиқилган.

Ўзбекистонда қўлга олинган қирғизистонлик Даниэль Ажиев икки ойга ҳибс этилди

Қирғизистонлик гумонланувчининг қўлга олиниши (МХДҚ тарқатган фотосурат)

Бишкекнинг Биринчи май туман суди Даниэль Ажиевни икки ойга ҳибсга олиш ҳақида қарор чиқарди. Озодлик қирғиз хизматининг туман судидан олинган маълумотга таянган ҳолда хабар қилишича, мазкур эҳтиёт чораси 5 июнь куни тайинланган.

Аввалроқ Қирғизистон Миллий хавфсизлик давлат хизмати (МХДҚ) вебкам-студия орқали интим хизмат кўрсатишни ташкил этганликда гумонланиб қидирувга берилган қирғизистонлик шахс Ўзбекистонда қўлга олинганини маълум қилган. У Бирлашган Араб Амирликларига учиб кетишга уринган пайтда ушланган.

МХДҚ қўлга олинган шахснинг тўлиқ исми ва фамилиясини очиқлаган эмас. Бироқ ижтимоий тармоқ фойдаланувчилари махсус хизмат томонидан тарқатилган фотосуратлардан унинг Даниэль Ажиев эканини билишган. МХДҚ иддаосига кўра, қўлга олинган шахсга қарашли интим вебкам-студияларда 18 ёшдан 25 ёшгача бўлган тақрибан 300 киши ишлаган.

Даниэль Ажиев 2020 йили Instagram тармоғи орқали жонли ёйинда ирқий, миллий, диний ёки ҳудудлараро низо қўзғатганликда гумонланиб қўлга олинган эди. Ўшанда у мажбурий даволаниш учун психдиспансерга йўлланган, 2022 йилнинг март ойида эса озодликка чиққан.

Даниэль Ажиев томони ҳозирча унинг қўлга олиниши юзасидан изоҳ бергани йўқ.

Қирғизистонда вебкам-студиялар фаолияти расман тақиқланган бўлиб, бу иш билан шуғулланганлар мамлакат Жиноят кодексининг 161-моддаси (“Порнографик мазмундаги материал-ашёларни тарқатиш”) бўйича жавобгарликка тортилади.

Маҳаллий қонунчиликка кўра, бу моддада айбланганлар 20 мингдан 50 минг сўмгача (тақрибан 230 доллардан 570 долларгача) жарима тўлашлари ёки 40 соатдан 100 соатгача жамоат ишларига жалб қилинишлари мумкин.

ЕИ мухолифатчи Кара-Мурзани жиноий таъқиб қилинишига алоқадор 9 нафар россияликка қарши санкция киритди

Владимир Кара-Мурза

Европа Иттифоқи кенгаши мухолифатчи Владимир Кара-Мурзанинг жиноий таъқиб қилиниши ва ҳуқуқлари бузилишига алоқадор тўққиз нафар россияликка қарши санкция жорий этди.

Санкция рўйхатига тушганлар орасида Россия Адлия вазирининг ўринбосари Олег Свириденко, терговчилар Денис Колесников ва Андрей Задачин, “Независимый эксперт” автоном нотижорат ташкилоти директори Данила Михеев кабилар бор.

Шунингдек, мазкур рўйхатга Хамовнический туман суди судьяси Диана Мишченко, Басманний суди судьяси Елена Ленская, Москва шаҳар суди судьялари Илья Козлов ва Сергей Подопригоров ҳамда 5-сонли тергов ҳибсхонаси бошлиғи Дмитрий Комнов киритилган.

Рўйхатга кирган шахсларнинг мол-мулки музлатилиши айтилган, шу билан бирга, уларнинг Европа Иттифоқи мамлакатларига кириши тақиқланган.

Санкцияларга оид бугунги қарор Европа Иттифоқи суд таъқибига, қамоқ жазосига учраган ёки инсон ҳуқуқлари учун курашаётгани ва ҳақиқатни гапираётгани учун қўрқитилаётган кишиларнинг барчаси билан бирдам бўлишдаги қатъиятини яна бир бор намойиш қилади”, дея билдирган ЕИнинг ташқи сиёсат бўйича мутасаддиси Жозеп Боррель.

Жорий йилнинг 17 апрелида Москва шаҳар суди россиялик мухолифатчи Владимир Кара-Мурзани 25 йилга озодликдан маҳрум қилиш ҳақида ҳукм чиқарган. У давлатга хиёнат, Россия армияси ҳақида фейк тарқатганлик ва “исталмаган ташкилот” билан ҳамкорлик қилганликда айбланган. Инсон ҳуқуқлари ташкилотлари ва ғарб мамлакатлари вакиллари Владимир Кара-Мурзанинг жиноий таъқиб қилинишига унинг сиёсий қарашлари ва фаолияти сабаб бўлган, деган фикрдалар.

Владимир Кара-Мурза Борис Немцов жамғармаси кенгашининг раиси, Халқ озодлиги партияси раисининг ўринбосари ва “Солидарность” демократик ҳаракати бюросининг аъзоси эди. У “Очиқ Россия” жамғармасини бошқарган, Россия ва хориждаги кўплаб ОАВ билан ҳамкорлик қилиб келган.

Мухолифатчи АҚШда “Магнитский акти” қабул қилиниши тарафдорларидан бири бўлган. Мазкур ҳужжат инсон ҳуқуқларининг қўпол равишда бузилиши учун масъул бўлган россиялик мулозимларнинг Қўшма Штатларга киришини тақиқлаш ва уларнинг АҚШдаги активларини музлатишни кўзда тутади.

Қирғизистон: МХДҚ давлат тўнтариши уюштиришда гумонланиб қўлга олинганлар тўғрисида маълумот берди

МХДҚ биноси.

Қирғизистон Миллий хавфсизлик давлат қўмитаси (МХДҚ) “давлатни куч билан босиб олишга ҳаракат қилганлик”да гумонланаётган бир неча шахс қўлга олинганини билдирди. Расмий маълумотда таъкидланишича, ўнлаб одам жиддий қаршилик акцияларини уюштиришга тайёргарлик кўрган. Бу ҳақда Озодликнинг қирғиз хизмати маълум қилди.

МХДҚ билдирувида бу қаршиликнинг асосий уюштирувчиси сифатида “Элдик кенеш” (“Халқ кенгаши”) партиясининг раиси тилга олинади.

“Суд санкциясига асосан йиғилган аудио-видео материаллар асосида жиноят иши қўзғатилди. Қўлга олинган жиноий гуруҳ бир неча йилдан бери тарафдорлари ва норози қатлам орасида иш олиб боргани аниқланди. Асосий ташкилотчи ва ғоявий раҳбар активист, “Элдик кенеш” партиясининг раиси Н.Р.С., экани аниқланди. Терговда бу гуруҳга юзга яқин киши аъзо бўлгани, улар ўртасида вазифалар бўлиштирилгани маълум бўлди. МХДҚга 5 июнда 30 дан ортиқ киши олиб келинди. Н.Р.С., ва унинг асосий шериклари Н.Р.С., И.Г.С., М.А.Ж., ва Д.Т.А., айбларини тан олди. Қўлга олинганлар вақтинча сақлаш изоляторида ҳибс қилинди. Айни пайтда ишнинг бошқа тафсилотлари ва ташкилотга алоқадор бошқа шахсларни аниқлаш юзасидан махсус суриштирув ўтказимлқода”, дейилади расмий билдирувда.

Қўлга олинганлар, уларнинг яқинлари ва адвокатлари ҳозирча бу воқеа юзасидан муносабат билдирмади.

Адлия вазирлиги сайтидаги маълумотларда “Элдик кенеш” партияси раиси Роза Нурматова экани қайд этилган. Қўлга олинганлар орасида фаол Гулжигит Исақов борлиги ҳам айтилмоқда.

5 июнь куни кечга яқин Бишкекда ҳокимиятни куч билан босиб олишга ҳозирланганликда гумонланганлар ёппасига қўлга олинаётгани тўғрисда хабарлар пайдо бўлган эди.

Ўша куни Россия президентининг матбуот котиби Дмитрий Песков “россиялик расмийлар давлат тўнтариши уринишига оид Қирғизистондан келаётган янгиликларни диққат билан кузатиб турибди”, дея билдирган.

“Ҳозирча шунақа жуда ташвишли хабарлар келиб турибди. Шунинг учун ҳам биз янгиликларни диққат билан кузатяпмиз”, дея иқтибос келтирган Песков сўзларидан Вести.ru.

Айни пайтда Путиннинг воизи “бу борада Кремлда бирор-бир тафсилотли маълумот йўқ”лигини қўшимча қилган.

Кремль Путин номидан радио орқали қилинган мурожаат фейк эканини билдирди

Мурожаатда Россияда оммавий мобилизация эълон қилингани айтилади.

Россиянинг Ростов, Воронеж ва Белгород вилоятларида 5 июнь куни эрталаб қатор радиолар эфирида Владимир Путин номидан қилинган мурожаатни Кремль фейк деб атади.

Мурожаатда Россияда оммавий мобилизация эълон қилингани айтилади. Бу маълумот ижтимоий тармоқларда ҳам тарқатилди.

Радиоларда овози ва интонацияси Путинга ўхшаган диктор “Украина армияси Вашингтоннинг қўллови ортидан НАТО бўлинмаси билан бирга Россияга бостириб киргани” ни айтган ва аҳолини эвакуацияга чақирган.

Маҳаллий ҳокимиятлар бу мурожаат фейк эканини ва вазият назорат остида эканини билдирди. Бу мурожаат эфирда қандай пайдо бўлгани ҳозирча номаълум.

Кремаль матбуот котиби Дмитрий Песков ҳам Путин мурожаат қилмаганини расман маълум қилди. Бу воқеа учун ҳеч ким масъулиятни зиммасига олмади.

Расман: Ўзбекистонлик тадбиркорлар Қирғизистонга 70 миллион долларлик инвестиция киритмоқчи

Ўзбекистон инвестициялар, саноат ва савдо вазири Лазиз Қудратов (ўнгда) Қирғизистон президенти ҳузуридаги инвестициялар бўйича агентлик директори Умбриэль Темиралиев билан учрашмоқда.

Қирғизистон президенти ҳузуридаги инвестициялар бўйича агентлик директори Умбриэль Темиралиевнинг Тошкентга қилган сафари доирасида ўзбек тадбиркорлари қирғиз иқтисодиётига 70 миллион доллар миқдорида сармоя киритишга тайёр экани маълум қилинди. Бу ҳақда агентлик матбуот хизмати 5 июнда хабар берди.

Расман билдирилишича, Темиралиев Ўзбекистон инвестициялар, саноат ва савдо вазири Лазиз Қудратов билан бу борада музокаралар ўтказган. Учрашувда 2023 йилнинг охиригача икки давлат ўзаро ҳамкорликда амалга ошириши лозим бўлган лойиҳалар ва шартномалар муҳокама қилинган.

Қирғизистон Ўзбекистон билан ҳамкорликда базальт толасини, кальций карбидни ишлаб чиқариш, текстил корхоналарини қуриш, кварцни бойитувчи завод очишни режалаштирмоқда.

Жорий йилнинг 26 январида президент Шавкат Мирзиёев Бишкекка давлат ташрифи билан келган ва икки давлат ўртасида қатор шартномалар имзоланган эди.

Март ойида Қирғизистон Министрлар кабинети раиси Акилбек Жапаров Тошкентга амалий сафар билан борган ва ўзбек расмийлари билан имзоланган шартномаларни амалга ошириш масаласини муҳокама қилган эди.

Ўзбекистон ва Қирғизистон ўртасида Тошкент ва Бишкекда мос равишда "Made in Kyrgyzstan" ва "Made in Uzbekistan" савдо уйлари очиш, Қирғизистонда автомобиль заводи қуриш, Қирғизистондан Ўзбекистонга 10 миллион долларлик кўмир экспорт қилиш каби ўндан ортиқ шартномалар имзоланган.

Давомини ўқинг

XS
SM
MD
LG