Ўнлаб мижозларнинг кўнглини олган Тўра Суннатовга Тожикистондаги энг омадли адвокатлардан бири сифатида қаралаётган эди. У икки йилга етар-етмас вақт мобайнида 10 нафар маҳкумни қамоқдан чиқаришга, яна 16 кишининг қамоқ муддатларини камайтиришга улгурди.
Бироқ прокурорларнинг айтишича, бу ишларнинг чатоғи бор экан – ўша чатоқдан мижозларнинг ҳам хабари бўлмаган.
Суннатов ўзи иддао қилаётганидай, ҳеч бир қонуний иш қилмаган, бунинг ўрнига ҳужжату хату имзолар, шунингдек, судьялар ва судлар, ҳатто Тожикистон Олий Суди муҳрларини қалбакилаштириш билан шуғулланиб келган.
Натижада, 38 яшар душанбелик собиқ маҳкум "хизмати" учун юзлаб доллар ҳақ олган.
Ўртача ойлик даромад 100-150 доллардан ошмайдиган мамлакатда бу анча-мунча пул эканини билиб олиш қийин эмас, аммо кўплаб оилалар қариндошларини қамоқдан олиб қолгани учун шунча пулни тўлашга ҳам жон-жон деб рози бўлган.
Ҳеч нарсадан гумони йўқ мижозлар қалбаки ҳужжатларни қамоқхоналарга олиб бориб бераверган, у ердаги "боқибеғам" нозирлар эса уларни ҳақиқий суд ҳукми, деб олиб қолаверган, дейилади Бош прокуратура баёнотида.
Унда айтилишича, ясама муҳри ва имзолари бўлган қалбаки ҳужжатлар баҳона 2015-2016 йилларда 10 нафар маҳкум озод этилган. Яна ўнлаб кишилар "ахлоқ тузатиш муассасалари"дан шароити бирмунча қулай оддий қамоқхоналарга ўтказилган.
Ҳокимият идоралари энди, Суннатовнинг ўзини ҳам жалб қилган ҳолда, муддатидан олдин чиқариб юборилган маҳкумларни қамоққа қайтаришга уринмоқда.
Маълум бўлишича, ўнлаб маҳкумлар ахлоқ тузатиш лагерларига қайтарилди, яна ўшанча маҳкумларга қамоқ муддати камайтирилмагани хабар қилинди.
Бош прокуратуранинг катта терговчиси Баҳриддин Исозоданинг айтишича, Суннатовга ҳужжатларни қалбакилаштириш ва товламачилик айби қўйилмоқда, ушбу айбловларнинг ҳар бири учун беш йилдан қамоқ жазоси берилиши кўзда тутилган.
Суннатов 2008 йили ҳужжатларни қалбакилаштириш айби билан уч йилга кесилган эди, аммо ўша илк суд тафсилотлари маълум эмас.
Суннатовнинг жиноятига "ёрдам бериб", шерик бўлгани учун душанбеклик икки нафар оқловчи ва бир нафар қамоқхона нозири ҳибсга олинди, дейди Исозода.
Суннатовнинг тергов ҳужжатларидан маълум бўлишича, айбланувчининг ҳужжатларни "ақл бовар қилмас тарзда қалбакилаштириши" ва "қоннуни қўлловчи идоралар ходимларининг боқибеғамлиги" кўз кўриб, қулоқ эшитмаган жиноят иши содир этилишига замин ҳозирлаган.
Ҳужжатга кўра, гумон қилинувчиларга жиноят содир этиши учун, бор-йўғи, компьютер, сканнер ва оддий қоғоз керак бўлган, холос, бунинг учун ҳатто уйдан чиқиш ҳам шарт бўлмаган.
Бир ҳолатда Суннатовдан 2500 АҚШ доллари эвазига саккиз йилга кесилган аёл маҳкумни қамоқдан чиқариб бериш илтимос қилинган.
Бошқа бир ҳолатда эса саккиз йилга кесилган эркак маҳкумнинг қамоқ муддатини ярмига камайтириб бериш сўралган.
Иккала ҳолатда ҳам Суннатовнинг Олий Суд судьяларининг имзо ва муҳрларини қалбакилаштиргани гумон қилинмоқда.
Терговчиларга яқин манбанинг Озодлик мухбирига хабар қилишича, имзолари қалбакилаштирилган айрим судьяларнинг Суннатов иши кўриладиган суд мажлисида қатнашиши кутилмоқда.
Ҳокимият идоралари мажлис қачон бўлишини ошкор қилмади.
Исми очиқланишини истамаган ва ОАВ вакиллари билан гаплашиш ваколатига эга бўлмаган бир киши айрим амалдорлар гумон қилинувчи ўзларининг имзосини қалбакилаштирганини эшитиб, ҳайратдан ёқа ушлаганини айтмоқда.
Суннатов ўтган йил декабрида бир иши битмай қолган мижоз ҳокимият идораларига арз қилгандан сўнг қамоққа олинган эди.