Линклар

Шошилинч хабар
08 август 2020, Тошкент вақти: 04:55

Халқаро хабарлар

Виночиликнинг Грузия ҳудудида 8000 йил олдин бошлангани аниқланди

Грузия ҳудудидан топилган кўза қолдиқларини тадқиқ қилган мутахассислар уларда 8000 йил аввал вино сақланганини аниқладилар.

АҚШ Миллий академияси нашрида эълон қилинган янгиликка кўра¸ бундай топилма дунëдаги узумдан қилинган илк виночиликнинг аввал тахмин қилинганидан 1000 йил олдинроқ бугунги Грузия ҳудудида мавжуд бўлганини кўрсатади.

Бунгача вино мавжудлигини кўрсатувчи энг қадимги кимëвий далиллар эрамизгача бўлган 5400-5000 йилларда Эрондаги Загрос тоғларидан топилган эди.

Дунëдаги энг қадимий винонинг¸ бундан 9000 йил аввал Хитойда гуручдан қилингани тахмин этилади.

Олимлар гуруҳи тўрт йил давомида ўрганган топилмада аниқланган узум сорти¸ айтилишича¸ Евроосиëдаги асосий вино экспортчиси бўлиб қолаëтган Грузияда ҳозирга қадар ўстирилади.

Кун янгиликлари

Ҳиндистондаги авиаҳалокатда камида 15 киши нобуд бўлди

Авиаҳалокат содир бўлган Кожикоде аэропортига келган "тез ёрдам" машиналари, Керала штати, 2020 йил 7 августи.

Дубайдан учиб келаётган "Эйр Индиа Экспресс" авиаширкати учоғи 7 август куни Ҳиндистон жанубий-шарқидаги Керала штати аэропортига қўниш чоғида қулаб тушди. Авиаҳалокат чоғида, расмий маълумотларга кўра, камида 15 киши ҳаётдан кўз юмган.

Хабарларга кўра, учоқ бортида 200 чоғли йўловчи ва экипаж аъзолари бўлган. Йўловчиларнинг аксарияти пул топиш учун Дубайга борган ва эндиликда ватанига қайтиб келаётган ҳиндистонликлар бўлгани айтилмоқда.

Ҳодиса жойида олинган видеокадрлар учоқнинг учиш-қўниш йўлагидан чиқиб кетиб, қияликдан қулаганидан дарак бермоқда. Авиаҳалокат натижасида учоқ фюзеляжи иккига бўлиниб кетган.

Ҳозирда авиаҳалокат содир бўлган жойда қутқарув ишлари, қурбон бўлганларнинг шахсини аниқлаш ва жароҳатланганларга кўмак кўрсатиш ишлари давом этмоқда.

Ашхободда “бюджетчилар” ўз ҳисобидан COVID-19 учун тест топширишга мажбурланмоқда

Иллюстратив сурат.

Туркманистон пойтахтида бюджет ташкилоти ходимлари зиммасига коронавирусга тест топшириш мажбурияти юклатилди. Давлат муассасаларига 6 август куни ана шундай буйруқ келиб тушган, дея хабар қилди Озодликнинг туркман хизмати. Бу мамлакатда расман битта ҳам коронавирус ҳолати қайд этилган эмас.

“Кеча эрталаб бюджет ташкилотларига зудлик билан коронавирусга тест топшириш бўйича янги фармойиш келиб тушди. Бунинг учун оилавий поликлиника врачи лабораторияга йўлланма бериши лозим. Маълумотномалар ташкилотларга олиб келиниши керак, акс ҳолда, ходим ишга қўйилмайди”, дея хабар қилган Озодликнинг Ашхободдаги мухбири.

Унга кўра, бюджет ташкилотлари ходимлари, тиббий суғурта полиси бор-йўқлигидан қатъи назар, таҳлил учун пулни ўз ёнларидан тўлашлари лозим. Бундай тест 100 манат ёки 28,5 доллар туради. Айни пайтда врачлар таҳлил натижаларини маълумотномада кўрсатмасликлари шарт, бу ҳақда улар ходим келган бюджет ташкилотининг раҳбарларига хабар беришлари керак.

Озодликнинг туркман хизмати давлат ташкилотлари ходимларига нима сабабдан ёппасига тест топширтирилаётганини аниқлаштиришга муваффақ бўлолмаган. “Бюджетчилар”нинг ўзлари журналистларга янги буйруқ маош берилган кунга тўғри келгани айтганлар ва уларнинг фикрича, бу буйруқ ходимлардан пул ушлаб қолиш учун чиқарилган.

Расмийлар Туркманистонда коронавирус мавжудлигини инкор қилиб келадилар, бу орада таҳририятга манбалардан мунтазам равишда касалхоналар тўлиб кетгани ва қурбонлар сони ошиб бораётгани ҳақида маълумотлар келиб турибди.

ЖССТ миссияси вакиллари шу йил 15 июлида Туркманистон расмийларига “худди мамлакатда коронавирус аниқланганидек” чоралар кўришни тавсия қилган. Шундан сўнг бу ўлкада карантин чораларини жорий этиш бошланди: бозорлар, йирик дўконлар ва масжидлар ёпилган. Дейлик, Ашхободда йирик дўкон ва бозорлар фаолияти тақиқланган, Лебап вилоятида ҳам жамоатчилик жойлари ва масжидлар ёпилган, Марв шаҳрида эса аҳолига тўй-маъракаларни бекор қилиш тавсия этилган. Туркманистоннинг барча минтақаларида расмийлар уйма-уй юриб, одамларни кўчага чиқмаслик ва ниқоб тақиб юришга чақиришган.

Россиялик артистлар Беларусда сайловдан бир кун олдин чиқиш қилишдан бош торта бошлашди

Минскда 8 август куни бўлиб ўтадиган концерт афишаси, 2020 йил 6 августи.

Россиялик артистларнинг кўпчилиги Беларусда президент сайловидан бир кун олдин ўтказиш режаланган бепул концертларда чиқиш қилишдан бош тортишди. Бу ҳақда Tut.by нашри хабар қилди.

Қайд этилишича, Леонид Агутин, Григорий Лепс, "Кар-Мэн", Стас Пьеха, Юлианна Караулова, Rasa ва Джаро & Ханза саҳнада қўшиқ куйлашдан бош тортганлар. Бундан ташқари, беларуслик қўшиқчи Мэвл ҳамда америкалик рэп қўшиқчилари Tyga ва Saint Jhn саҳнага чиқмасликларини билдирганлар.

Аввалроқ Беларус Маданият вазирлиги 8 август куни мамлакатнинг 13 та йирик шаҳрида “Беларус учун” деб номланган бепул концертлар бўлиб ўтиши ҳақида маълум қилганди. Ижтимоий тармоқларда саҳнага чиқиши айтилган артистларга кўплаб мурожаатлар бўлган, бу мурожаатларда улар Александр Лукашенка режимини дастакламасликка чақирилган.

Беларусда президент сайлови 9 августга белгиланган. Сайловолди кампанияси амалдаги президент Александр Лукашенкага қарши оммавий намойишлар қабатида ўтмоқда. Расмийлар кетма-кетига олтинчи марта президентликка номзодини қўйган Лукашенканинг сайловда иштирок этмоқчи бўлган икки рақиби банкир – Виктор Бабарико ҳамда таниқли блогер Сергей Тихановскийни ҳибсга олганлар. Мухолифатнинг яна бир номзоди, тадбиркор Валерий Цепкалони МСК рўйхатга олишдан бош тортган.

Душанбедаги автоҳалокатда эстрада юлдузи Баҳром Ғофурий оламдан ўтди

Баҳром Ғофурий.

Душанбеда рўй берган йўл-транспорт ҳодисаси натижасида тожик эстрадаси юлдузи Баҳром Ғофурий ҳалок бўлди. Озодлик тожик хизматининг мамлакат ИИВ маълумотига таянган ҳолда хабар қилишича, ЙТҲ 7 август тонгида тахминан соат 4 ларда Тожикистон педагогика университети яқинида содир бўлган.

ИИВ маълумотига кўра, ҳодиса чоғида Баҳром Ғофурий жон таслим қилган, ҳайдовчи Ислом Анварзода ва йўловчи Баҳодур Зарипов касалхонага етказилган.

Айтилишича, ичида Баҳром Ғофурий бўлган “Тойота Ланд Крузер” автомашинаси КамАЗ автомашинаси билан тўқнашиб кетган.

Ҳодисага “Тойота Ланд Крузер” ҳайдовчиси Ислом Анварзоданинг Рудакий шоҳкўчасида тезликни ошириб юборгани сабаб бўлгани айтилмоқда.

Шифокорлардан олинган дастлабки маълумотларга кўра, Тойота ичидагиларнинг уччаласи ҳам маст бўлган”, дейилади Тожикистон ИИВ хабарномасида.

Хонанданинг яқинлари унинг жанозаси бугун тушда ўқилишини билдирганлар.

Баҳром Ғофурий 2011 ва 2014 йилларда АҚШда Big Music Awards мукофотига сазовор бўлган эди.

Twitter амалдорлар ва давлат оммавий ахборот воситалари аккаунтларига белги қўя бошлади

Twitter ижтимоий тармоғи логоси.

Twitter корпорацияси 6 август куни давлат идоралари, юқори лавозимли амалдорлар, давлат ОАВ ва давлат билан боғлиқ нашрлар, уларнинг бош муҳаррирлари ва асосий вакилларининг ижтимоий тармоқдаги аккаунтларига белги қўйиб бориши ҳақида эълон қилди.

Корпорация хабарномасида айтилишича, бу иш Twitter фойдаланувчилари ва давлат вакиллари ўртасидаги мулоқотни осонлаштириш ҳамда кўпроқ шаффофлик бўлиши учун қилинган.

Ҳозирда БМТ Хавфсизлик кенгашининг доимий аъзолари бўлган беш мамлакат, шу жумладан Россияга алоқадор аккаунтларгагина белги қўйилмоқда.

Давлат раҳбарларининг шахсий аккаунтларига (шу жумладан АҚШ президенти Дональд Трамп аккаунтига) белги қўйилмаган, бироқ, масалан, Оқ уй ёки Британия бош вазири расмий аккаунтларида бундай белгилар бор.

Давлат ёки давлат билан боғлиқ оммавий ахборот воситалари ўлароқ давлат бевосита редакцион назоратни амалга оширадиган оммавий ахборот воситалари ҳисобланади. Агар ОАВ таҳририятлари, улар ҳатто давлат маблағлари ҳисобидан молиялаштирилаётган бўлсалар ҳам, мустақил равишда фаолият кўрсатаётган бўлсалар, уларга бунақа белги қўйилмайди. Бу каби белгилар, хусусан, Россиянинг RT телеканали, унинг бош муҳаррири Маргарита Симоньян, “РИА Новости” агентлиги, ТАСС агентлиги, Хитойнинг Синьхуа агентлиги ҳамда инглиз тилидаги “Жэньминь жибао” аккаунтларига қўйилган.

Аввалроқ шу каби сиёсатни Facebook корпорацияси жорий қилганди.

АҚШ Украина президентига алоқадор миллиардернинг мулкини мусодара қилмоқчи

Коломойский АҚШда бир қатор ширкатларга эгалик қилади.

Қўшма Штатлар Украина президенти Володимир Зеленскийга алоқадор миллиардер Игор Коломойскийнинг Техас ва Кентуккидаги ширкатларни давлат фойдасига мусодара қилмоқчи.

АҚШ Адлия вазирлиги 6 август куни судга Игор Коломойскийнинг мол-мулкини мусодара қилиш талаби билан ариза киритди. Адлия вазирлиги Коломойский ва унинг ҳамкори Геннадий Боголюбовни “Приватбанк”дан пул ювиш орқали “миллиард долларлаб маблағларни ноқонуний ўзлаштирганлик”да айбламоқда.

Аризада таъкидланишича, бу ишда уларга икки нафар АҚШ бизнесмени ҳам кўмак кўрсатган. Адлия вазирлиги Коломойский, Боголюбов ва уларнинг АҚШдаги икки ҳамкори ноқонуний ўзлаштирилган пулларга Қўшма Штатларда кўчмас мулк ва пўлат ишлаб чиқариш заводини сотиб олганини билдирди.

«Вашингтон пост» газетасининг ёзишича, Коломойскийнинг адвокати Майкл Салливан ўз ҳимоясидаги одам “Адлия вазирлиги айбловларини инкор қилаётганини”ни билдирган.

АҚШ Федерал тергов бюроси - ФТБ 4 август куни Игор Коломойскийнинг Кливленд ва Майамидаги ширкатлари офисларида тинтув ўтказган эди. ФТБ ходимига кўра, тинтувлар пайтида ҳеч ким қўлга олинган эмас.

Франция президенти Байрутдаги портлашни халқаро тергов қилишга чақирди

Франция президенти 6 августда Байрутга борди.

Франция президенти Эммануэль Макрон Ливан пойтахти Байрутда юз берган портлашни халқаро тергов қилишга чақирди.

Макрон 6 август куни Байрутга борган эди. Франция президентининг сафари арафасида Ливан Соғлиқни сақлаш вазирлиги портлаш қурбонлари сони яна кўпайгани ва 137 кишига етганини, ўнлаб одам бедарак кетганини ва камида 5 минг одам яраланганини билдирди.

Ливан ҳукумати портлаш юзасидан ўтказилаётган тергов доирасида 16 кишини қўлга олди.

Байрут бандаргоҳида портлаш 4 август куни содир бўлган. Портлаш зарбаси ҳатто Кипрда сезилган.

Ҳодиса ортидан шаҳардаги биноларнинг қарийб ярмига шикаст етган. Кўплаб иншоотлар қулаган, айримларининг ойна ва эшиклари синган.

Портлаш туфайли етказилган зарар миллиардлаб долларни ташкил этиши айтилмоқда.

Ливан расмийлари ҳодисага бандаргоҳ омборхонасида сақланган қарийб уч минг тонна аммиак селитраси сабаб бўлганини билдирганлар.

Мазкур модда қишлоқ хўжалиги маҳсулотларини етиштириш, портловчи моддалар ҳамда ракета ёқилғисини ишлаб чиқаришда ишлатилади.

Тергов версиясига кўра, селитра омборхонада олти йил мобайнида хавфсиз бўлмаган шароитда сақланган, бу бепарволик охир-оқибат фожиага сабаб бўлган.

АҚШда сўнгги уч ойда биринчи марта коронавирусдан энг кўп ўлим ҳолати қайд этилди

АҚШда бир кунда коронавирусдан 2 минг киши ўлгани ҳолати сўнгги марта 7 майда қайд этилган эди.

АҚШда 6 август куни 2060 киши COVID-19дан вафот этди. Бир кунда 58 минг кишида коронавирус аниқланди.

Экспертларга кўра, 6 августдаги кўрсаткичлар Оқ уйнинг вирус тарқалишини олдини олиш бўйича ҳаракатлари муваффақиятсизликка учраганини намойиш қилмоқда.

АҚШда бир кунда коронавирусдан 2 минг киши ўлгани ҳолати сўнгги марта 7 майда қайд этилган эди.

Американинг бошқа давлатлари- Мексика ва Бразилияда ҳам касалланганлар ҳамда ўлганлар сони ўсмоқда.

Бразилияда бир кунда 53 минг кишида вирус аниқланди ва 1200 бемор ўлди. Бразилияда коронавирусдан ўлганларнинг жами сони 100 мингга яқинлашди.

6 август куни Мексикада коронавирусдан ўлганларнинг умумий сони 50 минг кишига етди. Бир кунда 6500 кишида вирус аниқланди.

Жонс Хопкинс университетининг билдиришича, 6 август ҳолатига кўра, жаҳонда коронавирусга чалинганлар сони 18 миллион 900 минг кишига етди. Ўлганлар сони 712 минг кишини ташкил қилди.

Қирғиз-тожик чегарасида бугунги кун ҳисобидан яна бир инцидент содир бўлди

Қирғиз-тожик чегарасидаги Кўктош қишлоғи (архив сурати).

Қирғизистон билан Тожикистон чегарасида бугунги кун ҳисобидан иккинчи қуролли инцидент содир бўлди.

Боткен вилоят маъмуриятидан Озодликнинг қирғиз хизматига маълум қилишларича, Кўктош қишлоғи яқинида соат 19:30 ларда қирғизистонлик бир киши сони ва энсасидан иккита жароҳат олган, шундан сўнг у касалхонага етказилган. Унинг аҳволи ўртача оғир, деб баҳоланмоқда. Қайд этилишича, ўқ номаълум томондан отилган.

Қирғизистон Чегара хизмати бу маълумотга аниқлик киритаётганини маълум қилган. Чегара хизматига кўра, воқеа жойида вазият назорат остида тутиб турилибди.

6 август куни эрталаб ҳам қирғиз-тожик чегарасида қуролли инцидент содир бўлганди. Қирғизистон Чегара хизмати маълумотига кўра, Боткен вилоятининг Иккитош деб номланган ҳудудида Тожикистон томонидан номаълум шахслар, тахминларга кўра, ов милтиғидан Чегара хизмати ҳарбийсига қарата ўқ узган. У қўлидан яраланган.

Тожикистон Миллий хавфсизлик давлат хизмати Чегара қўшинлари матбуот маркази шу вақтда Қирғизистон томонидан отилган ўқдан чегара чизиғидан 1 километр нарида юрган тожикистонлик Воҳид Ваҳҳобов оёғидан яралангани, пировардида жон таслим қилганини маълум қилган.

Кейинроқ Қирғизистоннинг Боткен ва Тожикистоннинг Сўғд вилоятлари вакиллари учрашув ўтказиб, чегара яқинида 6 август куни эрталаб рўй берган нохуш ҳолатни муҳокама қилганлар. Ҳар бир тараф инцидент бўйича мустақил тергов ўтказишга қарор қилган.

Қирғизистон билан Тожикистон ўртасидаги чегара 970 километрга узанган. Бундан 519 километри бўйича келишувга эришилган, чегаранинг қолган қисми эса баҳсли бўлиб ҳисобланади. Бундай участкалар асосан Қирғизистоннинг Тожикистон билан чегарадош Лайлак ва Боткен туманларида жойлашган. У ерда кўпинча сув, яйлов ва ер талашиш ортидан тўқнашувлар келиб чиқмоқда.

Тожикистонда президент сайлови 11 октябрга белгиланди

Тожикистон парламенти юқори ва қуйи палаталарининг 5-6 август кунлари бўлиб ўтган қўшма мажлисида мамлакат президенти сайловини 11 октябрга белгилаш ҳақида эълон қилинди. Бу ҳақда Озодликнинг тожик хизмати Марказий сайлов комиссияси аппарати раҳбари Наврўз Самадзодадан олинган маълумотларга таянган ҳолда хабар қилди.

Қонунга мувофиқ, Тожикистонда президентликка номзодларни сиёсий партиялар, вилоят, шаҳар ва туман касаба уюшмалари кўрсатиши мумкин. Бундан олдинги президент сайлови 2013 йил 6 ноябрида бўлиб ўтган.

Бу Тожикистон мустақилликка эришганидан бери мамлакатда ўтказилаётган олтинчи президент сайлови бўлади.

1994 йилдан бери бўлиб ўтган президент сайловларининг барчасида Республика Олий кенгашининг собиқ раиси Имомали Раҳмон ғалаба қозониб келган. У бўлажак сайловнинг ҳам фаворити бўлиб ҳисобланади. У мамлакатни бошқарган қарийб 28 йил мобайнида сайлов тўғрисидаги қонун бир неча бор ўзгарган, бу эса президентга ҳокимият тепасида чекловсиз муддат қолиш имконини берган.

Тожикистон президенти етти йилга сайланади. Президентликка номзодлар мамлакатда камида 10 йил яшаган бўлишлари, тожик тилини билишлари, олий маълумотга эга бўлишлари ва ёшлари 30 дан кичик бўлмаслиги лозим.

Тожикистондаги аввалги сайловларни мониторинг қилган халқаро кузатувчилар фикрича, бу мамлакатда ўтказилган сайловлардан бирортаси ҳам демократик, шаффоф ва халқаро стандартларга мувофиқ бўлган эмас.

Киевдаги банкни портлатиш билан таҳдид қилган самарқандлик Каримов икки ойга ҳибс этилди

Суҳроб Каримов "Универсал Банк" бўлимида, Киев, 2020 йил 3 августи.

Киев суди банк бўлимини портлатиш билан таҳдид қилган ўзбекистонлик Суҳроб Каримовни террор хуружига оид иш бўйича ҳибсга олиш ҳақида қарор чиқарди. Бу ҳақда Киев прокуратураси матбуот хизмати маълум қилди.

Маълумотларга кўра, С. Каримовга Украина Жиноят кодексининг 258-моддаси 1-банди (“Террор хуружи содир этганлик ёки содир қилиш билан таҳдид этганлик”) бўйича айблов билдирилган.

Маҳкама мажлисидан сўнг прокурор Александр Жила журналистларга Суҳроб Каримов гаров пули киритиш ҳуқуқисиз икки ойга ҳибсга олинганини маълум қилган.

Айби исботланган тақдирда Каримов 5 йилдан 10 йилгача озодликдан маҳрум этилиши мумкин.

Шу йил 3 август куни ўзбекистонлик 32 ёшли Суҳроб Каримов Украина пойтахтидаги “Универсал Банк” бўлимига кириб, рюкзагидаги бомбани портлатиб юбориш билан таҳдид қилгани ҳақида Озодлик аввал хабар қилган эди.

У интервью учун ўзининг ёнига журналистлар киритилишини ҳамда унга 40 минг гривна (тақрибан 1400 АҚШ доллари – таҳр.) берилишини талаб қилган.

Суҳроб Каримов “Бумеранг” ва “Гром” махсус амалиётлари чоғида қўлга олинган.

Жаҳон банки пандемиядан сўнг Марказий Осиёда чуқур инқироз юзага келишини тахмин қилмоқда

Жаҳон банки логоси.

Коронавирус пандемияси Марказий Осиё мамлакатларидаги таълим соҳаси, инсон капитали сифати ва ижтимоий-иқтисодий тараққиётга узоқ муддатли салбий таъсир кўрсатмоқда. Бу ҳақда Жаҳон банки 5 август куни ёйинланган хабарномасида айтилади.

Қайд этилишича, минтақа мамлакатларида ўқувчилар ва ёшлар бутун аҳолининг қарийб ярмини ташкил этади. Инқироз ўсиб келаётган авлоднинг истиқболдаги даромадларини хавф остига қўймоқда. Ўсмирлар орасида функционал саводсизлик даражаси ошаётгани, яъни жамият ҳаётида самарали иштирок этиш учун ўқиш, ёзиш ва математикага оид кўникмалардан фойдалана олмайдиган ўқувчилар сони ўсиб бораётгани тахмин қилинмоқда.

Пандемиягача ҳам Марказий Осиёда таълим соҳаси қатор муаммоларга, шу жумладан, таълимга оид қашшоқликни бартараф этиш, кам таъминланган оилалардан бўлган ўқувчиларга тенг имкониятлар тақдим этиш ва инклюзивликни олға суриш кабиларга дуч келган.

Жаҳон банки вакиллари фикрича, минтақа мамлакатларидаги ўқувчилар Европадаги ўз тенгдошларидан ўқиш бўйича 1,5 йилга ортда қолмоқдалар. Марказий Осиёдаги кўплаб ўқувчилар, Иқтисодий ҳамкорлик ва ривожланиш ташкилотининг (PISA) ўқувчиларни баҳолаш бўйича халқаро дастури натижаларига мувофиқ, функционал саводхонлик бўйича паст натижалар кўрсатганлар.

Маълумотларга кўра, ҳар хил даромадли оилалардан бўлган ўқувчиларнинг таълим олиши ўртасидаги узилиш ёки тенгсизликнинг ошиб бораётгани алоҳида хавотир уйғотмоқда. PISA қайдича, Қозоғистонда энг камбағал оилалардан бўлган болалар таълимда ўз тенгдошларидан бир йилга, Қирғизистонда эса 2,5 йилга ортда қоляпти.

Коронавирус пандемияси таълим тизимига шундай яксон қилувчи зарба беряптики, бунинг оқибатлари (бунга биргина Марказий Осиёда 44 миллиард АҚШ доллари миқдоридаги иқтисодий йўқотиш ҳам киради) ўн йиллар кейин ҳам ҳис этилади.

Жаҳон банкининг Марказий Осиёдаги таълим соҳаси бўйича етакчи мутахассиси Айша Ваудага кўра, бу энг пессимистик сценарий эмас.

ЖБ вакиллари коронавирус пандемияси оқибатларини бартараф этиш бўйича режа ишлаб чиқишда энг асосий эътиборни таълим масалаларига қаратиш зарурлигини таъкидламоқдалар. Мамлакатлар таълимга ажратилган бюджет маблағларини сақлаб қолишлари, масофавий таълим сифатини оширишлари, фақат билим эмас, балки салоҳият ва малакага урғу берган ҳолда таълим дастурлари бўйича мослашувчанликни таъминлашлари шарт.

Қайд этилишича, асосий эътиборни мактаблар ёпилишидан энг кўп зарар кўрган ўқувчиларга қаратиш керак. Минтақа мамлакатлари ўқувчилар, ёшлар ва ўқитувчилар ўртасида рақамли технологиялар бўйича кўникмаларни ривожлантиришни таъминлашлари ҳамда масофавий таълим бўйича турли платформаларда педагогнинг ўқувчи билан интерфаол ишлаши учун кўпроқ имконият яратиб беришлари лозим.

Facebook ва Twitter президент Трампнинг саҳифаларидаги видеони ўчириб ташлади

Ижтимоий тармоқ биринчи марта қоидани бузгани учун президент постини ўчириб ташлади.

Facebook ва Twitter коронавирус ҳақида нотўғри маълумот тарқатишга қарши кураш доирасида АҚШ президенти Дональд Трампнинг саҳифаларидан “болалар коронавирусга деярли чалинмаслиги” тўғрисидаги видеони ўчириб ташлади.

Fox News телеканалига берилган интервьюнинг кичик бир қисми бўлган видео “COVID тўғрисида ёлғон маълумот, жумладан, болалар вирусга чалинмаслиги тўғрисидаги иддао ортидан ўчириб ташланди”, - деб билдирди Facebook.

Ижтимоий тармоқ биринчи марта қоидани бузгани учун президент постини ўчириб ташлади.

Мутахассислар болалар коронавирусга чалинмаслиги тўғрисидаги иддаоларни инкор қилганлар. Аммо болалар орасида коронавирусдан ўлим ҳолатлари оз кузатилади.

Twitter эса Дональд Трампнинг расмий аккаунтини вақтинча блок қилиб қўйди.

Тармоқ Трампнинг болаларга коронавирус юқмаслиги тўғрисидаги видеоси ўчирилгачгина, саҳифа қайта тикланишини билдирди.

Байрутдаги портлашда нобуд бўлганлар сони камида 135 нафарга етди

Байрутдаги портлашдан шикастланган иншоотлар.

Ливан пойтахти Байрутда бандаргоҳдаги кучли портлашдан кейин қидирув-қутқарув ишлари давом этмоқда.

Reuters агентлиги келтирган сўнгги маълумотларга кўра, ҳодиса чоғида камида 135 киши ҳалок бўлган, 5 минг чоғли одам жароҳатланган. 250 минг киши эса бошпанасиз қолган.

Расмийлар қурбонлар сони ошиши мумкинлигини тахмин қилмоқдалар. Портлашдан сўнг ўнлаб одам бедарак йўқолгани айтилмоқда. Қутқарувчилар уларни йиқилган деворлар остидан қидирмоқда.

Байрут бандаргоҳида портлаш 4 август куни содир бўлган. Портлаш зарбаси ҳатто Кипрда сезилган. Ҳодиса ортидан шаҳардаги биноларнинг қарийб ярмига шикаст етган. Кўплаб иншоотлар қулаган, айримларининг ойна ва эшиклари синган. Портлаш туфайли етказилган зарар миллиардлаб долларни ташкил этиши айтилмоқда.

Ливан расмийлари ҳодисага бандаргоҳ омборхонасида сақланган қарийб уч минг тонна аммиак селитраси сабаб бўлганини билдирганлар. Мазкур модда қишлоқ хўжалиги маҳсулотларини етиштириш, портловчи моддалар ҳамда ракета ёқилғисини ишлаб чиқаришда ишлатилади. Тергов версиясига кўра, селитра омборхонада олти йил мобайнида хавфсиз бўлмаган шароитда сақланган, бу бепарволик охир-оқибат фожеага сабаб бўлган.

Ливан ҳукумати Байрутда икки ҳафтага фавқулодда ҳолат тартиби жорий қилди. Расмийлар суриштирув энг қисқа муддатда ўтказилишига ваъда бермоқда. Селитра сақланиши учун масъул бўлган амалдорлар уй қамоғига олингани қайд этилган.

Оммавий ахборот воситалари хабарларига кўра, аммиак селитраси бир пайтлар Хабаровск шаҳридан бўлган ва ҳозирда Кипрда истиқомат қилаётган россиялик тадбиркор Игор Гречушкинга тегишли кемадан мусодара қилинган. 2013 йили Грузиянинг Батуми шаҳридан Мозамбикка қараб йўлга чиққан Rhosus кемаси (унинг Молдова байроғи остида сузгани айтилади) техник носозликлар туфайли Байрут бандаргоҳига киришга мажбур бўлган. Ливан расмийлари кеманинг денгизга чиқишини тақиқлаб қўйганлар, юкни эса мусодара этганлар.

ССВ: Афғонистонда аҳолининг учдан бир қисми коронавирусга чалинган бўлиши мумкин

Кобул кўчаларини дезинфекция қилаётган ходимлар, 2020 йил 18 июни.

Афғонистонда, мамлакат Соғлиқни сақлаш вазирлиги баҳосига кўра, аҳолининг учдан бири ёки 10 миллионга яқин одам коронавирус юқтириб олган бўлиши мумкин.

Ўзбекистонга қўшни бўлган бу мамлакатда, расмий маълумотларга мувофиқ, коронавирусга чалинишга оид қарийб 37 мингта ҳолат қайд этилган, қурбонлар сони эса 1294 нафарга етган. Бироқ беморлар ва қурбонлар сони, экспертлар тахминича, бундан анча юқори.

Коронавирусга чалинганлар сони 10 миллионга яқин бўлиши мумкинлиги ҳақида Афғонистон соғлиқни сақлаш вазири Аҳмад Жавод Усмоний билдирган. Унга кўра, бу тахмин 9,5 минг чоғли кишини тестдан ўтказиш натижасига асосланган. Тадқиқот Жаҳон соғлиқни сақлаш ташкилоти кўмагида ўтказилган. Тахминларга кўра, Кобулда беш миллионли пойтахт аҳлининг ярми коронавирус юқтириб олган бўлиши мумкин.

Афғонистонда коронавирусга чалиниш бўйича илк ҳолат февраль ойида қайд этилган. Ўшанда минглаб муҳожир ва қочқин минтақада COVID-19 дан энг кўп зарар кўрган мамлакатлардан бири бўлмиш қўшни Эрондан қайта бошлаган эди.

Россия Беларусдаги президент сайловига ўз кузатувчиларини йўлламайди

Беларуснинг амалдаги президенти Александр Лукашенка ИИВ раҳбарлари билан, Минск, 2020 йил 28 июли.

Россия Марказий сайлов комиссияси Беларус сайлов комиссиясидан президент сайловини кузатишда иштирок этиш учун расмий таклифнома олган эмас. Бу ҳақда Россия МСК раиси Элла Памфилова ТАСС агентлигига маълум қилган.

Мулозимага кўра, бу йил Беларус Марказий сайлов комиссиясидан биронта ҳам анъанавий расмий таклифнома келмаган. Россиядан Беларусга кузатувчилар юборилмаслигининг яна бир сабаб сифатида Памфилова коронавирусга чалиниш хавфи борлигини келтирган.

Беларусда президент сайловининг расмий санасидан беш кун аввал, яъни 4 август куни муддатидан олдин овоз бериш жараёни бошланган.

Бу галги сайловолди кампанияси Беларусда аввалгиларига солиштирганда жуда таранг вазиятда ўтмоқда. Беларус мухолифати муддатидан олдин овоз бериш чоғида кенг кўламли сохталаштиришлар бўлиши мумкинлигини иддао қилиб, бу жараённи танқид қилиб келмоқда.

Беларусни 1994 йилдан (26 йилдан) бери бошқариб келаётган Лукашенка олтинчи муддатга президентликка ўз номзодини қўйган.

Бу мамлакатда президент сайлови жорий йилнинг 9 августига белгиланган.

Қирғизистон бош вазири: Коронавирусга чалиниш ҳолатлари сўнгги икки ҳафтада 39 фоизга пасайди

Қирғизистон бош вазири Қубатбек Бўрўнов.

Қирғизистонда коронавирусга чалиниш кўрсаткичлари пасаймоқда, дея маълум қилди Қирғизистон бош вазири Қубатбек Бўрўнов 5 август куни Бишкекда ўтказилган брифингда.

Янги хасталаниш ҳолатлари камайган, соғайганлар кўпайган – булар яхши кўрсаткичлар. ЖССТ методологиясига кўра, сўнгги 14 кун ичида Қирғизистонда хасталанишга оид янги ҳолатлар 39,2 фоизга кам қайд этилган. Аммо ҳеч ким иккинчи тўлқин бўлмаслигига кафолат беролмайди, бу ҳолатга дунёдаги кўп мамлакатлар дуч келди”, дея иқтибос келтирди Бўрўновнинг сўзларидан Озодликнинг қирғиз хизмати.

Бош вазирга кўра, мамлакатда профилактик чоралар кучайтирилади, кузда ўткир респиратор вирус инфекцияси ва тумовга қарши эмлов ўтказиш режаланмоқда, ўтган йиллар билан солиштирганда бу йил мазкур иш назорат остига олинади, аҳолининг заиф қатлами учун эмлов бепул бўлади.

Ҳукумат раҳбари брифингда зарур дори-дармон ва жиҳозлар сотиб олинаётгани, касалхоналар қурилиши давом этаётгани, ниқоб ва бошқа ҳимоя воситалари тайёрланаётгани, Қирғизистон заводларида тиббий жиҳозлар ишлаб чиқариш бўйича иш олиб борилаётгани, 40 тача “тез ёрдам” машинаси сотиб олиш режаланаётганини қўшимча қилган.

5 август ҳолатига кўра, COVID-19 ёйила бошлаганидан бери қирғизистонликлардан 38110 нафари коронавирус юқтириб олган, 1438 нафар бемор вафот этган.

Қозоғистонда тўрт кун ичида 8 мингдан зиёд киши пневмонияга чалинган

Қозоғистоннинг Ақтўбе шаҳридаги касалхонада фаолият юритаётган шифокорлар, 2020 йил июли.

Қозоғистонда ўтган кеча-кундузда коронавирус инфекцияси белгилари бўлган пневмонияга чалиниш бўйича 1799 та ҳолат ҳамда бу касаллик билан боғлиқ 17 та ўлим ҳолати қайд этилган. Бу ҳақда мамлакат Соғлиқни сақлаш вазирлиги 5 август куни маълумот тарқатди.

Вазирликнинг маълум қилишича, пневмониянинг бу турига чалинганлар сони 1 августдан бери 8054 кишига етган, ўтган тўрт кун ичида мазкур хасталик туфайли 86 бемор вафот этган.

Қозоғистонда коронавирус инфекциясини юқтириб олганларнинг умумий сони 94882 кишига етган, улардан 70 фоиздан кўпроғи соғайиб кетган, 1091 бемор оламдан ўтган.

Соғлиқни сақлаш вазирлиги “COVID-19 белгилари бўлган пневмония”га чалинганлар ва бу хасталикдан ўлганларга оид статистикани август ойи бошидан бери ёйинлаб келмоқда. Шу ўринда бу мамлакатда COVID-19 ҳамда коронавирус белгилари бўлган пневмония статистикаси вазирлик томонидан алоҳида-алоҳида юритилаётганини қўшимча қилиш жоиз.

1 августгача пневмониядан ўлганларга оид рақам базада акс этган эмас, вазирлик бу ишни қилишнинг техник сабабларга кўра имкони йўқлигини қайд этган.

Расмий маълумотларга кўра, шу йил 1 январидан 2 августигача мамлакатда пневмониянинг барча турлари бўйича 256541 та ҳолат, бундан 32 минги июнь ойида, қарийб 157 минги эса июль ойида қайд этилган.

АҚШда Украина президентига алоқадор миллиардернинг офислари тинтув қилинди

Коломойский Майамида бир қатор ширкатларга эгалик қилади.

АҚШ Федерал тергов бюроси - ФТБ Украина президенти Володимир Зеленскийга алоқадор миллиардер Игор Коломойскийнинг Кливленд ва Майамидаги ширкатлари офисларида 4 август куни тинтув ўтказди.

Игор Коломойскийнинг медиаширкатлари 2019 йилдаги президентлик сайловида Володимир Зеленскийни норасмий равишда қўллаб, тарғиб қилганди.

ФТБ ходими Озодлик радиосига офисларда тинтув ўтказилганини тасдиқлади, лекин бу борада бошқа маълумотларни бера олмаслигини билдирди. ФТБ ходимига кўра, тинтувлар пайтида ҳеч ким қўлга олинган эмас.

Коломойский ва унинг украиналик ҳамкори Геннадий Боголюбов Майамида бир қатор ширкатларга эгалик қилади.

АҚШ матбуоти 2019 йилнинг апрелида ва 2020 йилнинг майида ФТБ Коломойскини пул ювишда гумонлаётгани ҳақида билдирган эди. Бироқ ФТБ ҳозиргача бу хабарларга муносабат билдирмаган.

Коломойский ва Боголюбов ўз ихтиёрлари билан Украинани тарк этган ва 2019 йилда Зеленскийнинг президентлик сайловидаги ғалабасидан сўнг Киевга қайтган эди.

Байрутдаги портлаш: 73 одам ўлди, 4 минг одам яраланди

4 август куни Байрут бандаргоҳида портлаш юз берган эди.

Ливан пойтахти Байрутда юз берган иккита портлаш оқибатида ўнлаб одам ҳалок бўлди ва минглаб одам жароҳатланди.

4 август куни Байрут бандаргоҳида портлаш юз берган эди. Бироқ ўшанда ҳалок бўлганлар ва жароҳатланганлар ҳақида маълумот берилган эмас.

Кечроқ Ливан соғлиқни сақлаш вазири Ҳамад Ҳасаннининг маълум қилишича, портлаш оқибатида 73 киши ҳалок бўлди ва тўрт мингдан ортиқ одам жароҳатланди.

Шаҳар ҳудудига ёндош бандаргоҳда кўплаб биноларга шикаст етган, кўчаларда иншоот бўлакларини, ағдарилган автомобилларни, ойна синиқларини кўриш мумкин. Шаҳарда йўл ҳаракати фалажланган, телефон алоқаси узилган.

Бош вазир Ҳасан Диаб портдаги омборхоналардан бирида бир неча йил қишлоқ хўжалиги учун сақланган 2750 тонна аммиак селитраси портлаб кетган.

Бандаргоҳдан бир неча километр наригача биноларнинг ойналари синиб тушган. Байрут турғунлари гувоҳлигига кўра, портлаш худди зилзиладай ҳис этилган.

АҚШ, Франция, Исроил ва Араб давлатлари портлаш ортидан Ливанга тиббий ва гуманитар ёрдам таклиф қилдилар.

Жосусликда айбланган америкалик Пол Уилан Мордовиядаги колонияга этап қилинди

Пол Уилан.

Россияда жосуслик айблови бўйича 16 йилга озодликдан маҳрум қилинган АҚШлик Пол Уилан жазони Мордовиядаги колонияда ўтайдиган бўлди.

Уиланни Москванинг “Лефортово” тергов ҳибсхонасидан у ёққа этап қилиб бўлганлар, дея маълум қилган судланувчининг адвокати Ольга Карлова сешанба куни ТАСС агентлигига. Адвокат бу маълумотни Полнинг укаси Дэвиддан олганини айтган. Карлова тергов ҳибсхонасидан бу борада изоҳ олиш уриниши самара бермаганини қўшимча қилган.

Дэвид Уиланнинг ўзи Интерфакс агентлиги билан суҳбатда бу маълумотни Буюк Британия элчихонасидан олганини билдирган. Пол Уилан Ирландия ва Канада билан бир қаторда Буюк Британиянинг ҳам фуқароси бўлиб ҳисобланади.

Жазони ўташ федерал хизмати элчихонага Пол Мордовияга 1 август куни етиб борганини тасдиқлаган. У Мордовиядаги 18-колонияда 20 кунлик карантинни ўтказиб, кейин 17-колонияга ўтказилар экан, деган Дэвид Уилан. Айни пайтда у Россия томони судланувчи қаерга ва қачон этап қилингани ҳақида унинг оиласини хабардор қилмаганини қайд этган.

Жорий йилнинг 15 июнида Москва шаҳар суди Пол Уиланни 16 йиллик қамоқ жазосига ҳукм қилган. Судланувчи айбловни тан олган эмас, бироқ ўзининг алмаштириб олинишига умид қилгани учун ҳукм устидан шикоят қилмаган.

Судланувчининг адвокати бунга оид қарор сентябрь ойида қабул қилиниши мумкинлиги ҳақида тасдиқланмаган маълумотга эга эканини билдирган. Хабардор манба Интерфакс агентлигига Москва ва Вашингтон Уиланни АҚШда судланган Константин Ярошенко ва Виктор Бутга алмаштириш эҳтимолини фаол муҳокама қилаётганини маълум қилган. Қайд этилишича, бу одамлар икки мамлакат президентлари томонидан чиқарилган афв доирасида озод қилинишлари мумкин.

Ниқобсиз юрган москвалик йўловчилар икки ойда 210 миллион рубль жарима тўлашди

Москва метроси йўловчилари, 2020 йил 3 августи.

Ўтган икки ой ичида Москвада тиббий ниқобсиз ва қўлқопсиз юрган транспорт йўловчилари умумий ҳисобда 210 миллион рубль жарима тўлашган. Москва шаҳар бош назорат бошқармаси маълумотларига кўра, май ойи ўрталаридан июль ойи ўрталаригача 42 мингдан зиёд йўловчи жаримага тортилган.

Россия пойтахтида транспорт, дўкон ва жамоатчилик жойларида тиббий ҳимоя воситаларини мажбурий тақиб юриш тартиби 12 майдан киритилган, бироқ коронавирусга чалиниш ҳолатлари камая бошлаганидан кейин расмийлар тартиб-қоидаларга риоя қилиниши устидан назоратни бўшаштирганлар.

Расмийларнинг “коронавирус устидан ғалаба қозонилгани”га оид баёнотларига қарамай, август ойи бошидан полиция Москва метрополитенининг барча станцияларида йўловчиларга яна ёппасига жарима сола бошлаган. Москвада жамоатчилик транспортида ниқобсиз ва қўлқопсиз юрганлик учун тўланадиган жарима миқдори беш минг рублни ташкил этади.

Байрутдаги бандаргоҳда катта портлаш содир бўлди

Байрутдаги бандаргоҳда портлаш содир бўлган пайт.

Ливаннинг NNA давлат ахборот агентлиги ва хавфсизлик идораларидаги икки манба Байрутдаги бандаргоҳда портловчи моддалар сақланган омборхоналар портлагани ҳақида маълум қилишди. Портлаш сабаби ҳозирча аниқ эмас. Бандаргоҳда айнан қандай портловчи моддалар сақлагани тўғрисида ҳам маълумот йўқ.

Шаҳар ҳудудига ёндош бандаргоҳда кўплаб биноларга шикаст етган, кўчаларда иншоот бўлакларини, ағдарилган автомобилларни, ойна синиқларини кўриш мумкин. Шаҳарда йўл ҳаракати фалажланган, телефон алоқаси узилган.

СNNнинг Байрутдаги мухбири, ҳарбий тўқнашувларни ёритиш бўйича кўп йиллик тажрибаси борлигига қарамай, авваллари ҳеч қачон бунақа катта портлашни кўрмагани ва эшитмаганини хабар қилган.

Бандаргоҳдан бир неча километр наригача биноларнинг ойналари синиб тушган. Байрут турғунлари гувоҳлигига кўра, портлаш худди зилзиладай ҳис этилган.

Ливан пойтахти бўлган Байрут шаҳри яриморолда жойлашган бўлиб, у ердан мамлакатнинг Ўртаер денгизига чиқадиган энг йирик ва асосий бандаргоҳи ўрин олган.

Шаҳарда 2 миллионгача одам яшаши тахмин қилинади. Сўнгги 90 йил ичида бу ерда аҳоли рўйхатга олинган эмас.

Қирғизистонда коронавирус юқтириб олган тиббиёт ходимлари сони 2854 нафарга етди

Бишкеклик тиббиётчилар (иллюстратив сурат).

Ўтган кеча-кундузда Қирғизистонда 25 нафар тиббиёт ходимида коронавирус инфекцияси аниқланган. Бу ҳақда 4 август куни Соғлиқни сақлаш вазирлиги масъули Айнура Ақматова маълум қилди.

Айни пайтда ўтган суткада 5 нафар тиббиётчи соғайган, уйда ўзини ўзи изоляция қилганлардан 36 нафарининг ташқарига чиқишига рухсат берилган.

COVID-19 ёйила бошлаганидан бери мамлакатда 2854 нафар тиббий ходим коронавирусга чалинган, улардан 1894 нафари соғайиб кетган.

30 июлдаги маълумотга мувофиқ, Қирғизистон бўйлаб 73 нафар тиббиётчи коронавирус инфекцияси важидан вафот этган, улардан 44 нафарини врачлар ташкил этади.

Туркманистонда ниқоб тақмаганларни жаримага тортиш бошланди

Ашхободда ниқоб тақиб кетаётган туркман қизлари, 2020 йил 13 июли.

Туркманистонда ҳимоя ниқоблари бўлмаган фуқароларга жарима солиш бошланди. Бу ҳақда Озодликнинг туркман хизмати хабар қилди.

Коронавирус мавжудлиги ҳалигача расман рад этилаётган бу мамлакатда аввалроқ вирусдан ҳимояланиш учун ниқоб таққанлар жаримага тортилган.

“Полиция ниқобсиз юрган одамларни қўлга олиб, дарҳол бўлимга олиб бориб, 60 манат ($17) миқдорида жарима ёзиб бермоқда”, дея хабар қилди Озодликнинг туркман хизмати мухбири. Қўлга олинганлар “бундан буён кўчага ниқобсиз чиқмайман” мазмунида тилхат ёзишга ҳам мажбур қилинмоқда.

Қайд этилишича, автомобилни ниқобсиз бошқараётган ҳайдовчилар ҳам полиция бўлимига олиб кетиляпти. Уларга 50 манат ($14) миқдорида қўшимча жарима ёзиб берилмоқда.

Расмий маълумотларга кўра, Туркманистонда ҳали ҳам коронавирус йўқ. Бироқ мамлакат Соғлиқни сақлаш вазирлиги фуқароларга “ҳавода чанг миқдори ошиб кетгани туфайли” ниқоб тақиш ва ижтимоий масофаланишга риоя қилишни тавсия қилган.

Озодликнинг туркман хизмати манбалари айни пайтда Туркманистон касалхоналари ва поликлиникаларида мунтазам равишда ораларида амалдорлар ҳам бўлган беморларнинг коронавирусга топширган тестлари манфий натижа бераётганини маълум қилаётганини қайд этмоқдалар. Бу орада касалхоналар тўлиб кетгани ҳам хабар қилинмоқда.

ЖССТ миссияси вакиллари шу йил 15 июлида Туркманистон расмийларига “худди мамлакатда коронавирус аниқланганидек” чоралар кўришни тавсия қилган. Шундан сўнг бу ўлкада карантин чораларини жорий этиш бошланди: бозорлар, йирик дўконлар ва масжидлар ёпилди. Дейлик, Ашхободда йирик дўкон ва бозорлар фаолияти тақиқланди, Лебап вилоятида ҳам жамоатчилик жойлари ва масжидлар ёпилди, Марв шаҳрида эса аҳолига тўй-маъракаларни бекор қилиш тавсия этилди. Туркманистоннинг барча минтақаларида расмийлар уйма-уй юриб, одамларни кўчага чиқмаслик ва ниқоб тақиб юришга чақиришди.

Давомини ўқинг

Кўрмай қолган бўлсангиз

XS
SM
MD
LG