АҚШ расмийси 13 россияликни ҳамда рус ширкатларини АҚШ сайловларига аралашишда айблади. Айбланаётган ширкатлар орасида «Россия тролл фабрикаси» деб танилган ширкат ҳам бор.
Дональд Трамп сайлов штабининг Кремль билан тил бириктирганини тергов қилаётган махсус прокурор Роберт Мюллер офиси 16 февраль куни эълон қилган айбловлар шу кунгача Россия аралашуви бўйича эълон қилинган энг жиддий айбловлар эканлиги айтилмоқда.
Мюллер офиси эълон қилган суд ҳужжатларида рус ширкатлари 2014 йилдан бошлаб АҚШ сайлов жараёнига таъсир кўрсатиш учун кураша бошлагани айтилади.
АҚШ бош прокурори – адлия вазири ўринбосари, генерал Род Розенштайн ушбу масала юзасидан:
- Ушбу махфий режа «Лахта лойиҳаси» деб аталган кенг-кўламли амалиётнинг бир бўлаги бўлган. «Лахта лойиҳаси»нинг бир неча компоненти бўлган. Уларнинг айримлари Россия Федерацияси ичидаги гуруҳларни, бошқалари эса бир неча хорижий давлатдаги гуруҳларни мўлжалга олган, - деди.
Айбланаётганлар орасида Россия Президенти Владимир Путиннинг «бош ошпази» сифатида танилган ресторатор Евгений Пригожин ҳам бор.
